Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

Mo hāpī ki taˈa ŋā poki

 KAU 3

Ko haka roŋo ˈā Rahab ki a Iehoha

Ko haka roŋo ˈā Rahab ki a Iehoha

Ki oho tāua ki te hora era o muˈa ˈā ki a Jeriko, kona e tahi o te henua era o Canaán. Te taŋata o rā kona ˈina he haka roŋo ki a Iehoha. E i te kona nei e noho era e tahi viˈe, ko Rahab toˈona ˈīŋoa.

Mai te iti-iti haŋa ˈā, a Rahab i haka roŋo ai pe hē a Motē i avahi ai te vaikava era ko Vaikava mea-mea toˈona ˈīŋoa, mo toˈo i te Israelita mai Egipto. Takoˈa i ŋaroˈa rō pe hē i haˈūˈū ai e Iehoha mo rē ki te tahi kaiŋa taˈe haka roŋo era ki a Īa. E i te hora nei he ŋaroˈa a Rahab i te ˈaˈamu nui-nui e tahi: Te Israelita ko hahine ko oho mai ˈā ki a Jeriko.

Ko haˈūˈū ˈā e Rahab ki tū ŋā kope era e rua o toˈona ˈite o ruŋa i te meˈe aŋa era e Iehoha

I te pō e tahi, e rua kope Israelita, he uru ki Jeriko mo uˈi i rā kona. He tuˈu ki te hare era o Rahab. He kī e Rahab mo uru mo noho. He ˈite e te ariki o rā kona o ruŋa i te ŋā kope nei e rua, e he kī ki taˈana taŋata mo oho mo toˈo mai ˈira, ¿He aha te meˈe i aŋa e Rahab? He kī ki tū ŋā kope era mo pipīko i ruŋa i te hare. E he kī ki tū ŋā taŋata uŋa era e te ariki, pe nei ē: “Ko oho era ˈā a rāua. Mo tute e kōrua i te hora mau nei ˈā he ravaˈa e kōrua”. Peira a Rahab i hapaˈo ai i tū ŋā kope era e rua. ¿O te aha i haˈūˈū ai?... O te ai ko ˈite ˈā ko ai a Iehoha e ko ˈite takoˈa ˈā, ma Iehoha e vaˈai tahi te kaiŋa era o Canaán mo noho o rāua.

Raˈe ki te oho mai te hare era o Rahab, te ŋā kope era e rua, he kī ki a Rahab, ko īa nō e ko toˈona huaˈai ka ora era, i te hora ka haka kore era e Iehoha a Jeriko. E ai rō ˈā e tahi meˈe mo aŋa e Rahab, ¿Ko meˈe hē?... E tau te taūra mea-mea e tahi a haho o toˈona hare ˈe e haka piri tahi toˈona huaˈai i roto i te hare. E peira mau ˈā i aŋa ai e Rahab. ¿Haŋa rō koe mo ˈite pe hē i hopeˈa ai?...

A Iehoha i hapaˈo i a Rahab e i toˈona huaˈai oīra i ora ai

I tano era te mahana he tuˈu te Israelita ki a Jeriko e he haka teka tahi ka vari rō. E ono mahana i haka teka i oho ai, e tahi teka i te mahana, e ˈina e tahi reˈo rere. I te hitu mahana e hitu teka i aŋa ai, e i te teka hopeˈa i kikiu pūai ai taˈatoˈa. I rā hora a Iehoha i haka marere tahi ai te ˈaua e vari e oho era i a Jeriko. ¿He aha te meˈe i piri ki a Rahab? I te meˈe era ko huki ˈā e īa i tū taūra mea-mea era, ˈina toˈona hare kai marere. ¿E tikeˈa rō ˈā koe i te taūra i ruŋa i te hohoˈa?... Peira a Rahab koīa ko toˈona huaˈai i ora ai.

 ¿O te aha a Rahab i ora ai?... A Rahab i ora ai o toˈona haka roŋo ki a Iehoha. ¿O te aha i haka roŋo ai? O te ai ko ˈite ana te ˈaˈamu o ruŋa o Iehoha. Nā koe takoˈa e hāpī mai ena rauhuru meˈe o ruŋa o Iehoha. ¿E haka roŋo rō koe ki a Iehoha pe Rahab?... E hoˈi, e haka roŋo koe.

MAI KI TAIˈO I RUŊA I TE PUKA O TE ˈATUA:

  • Josué 2:1-24; 6:1- 5, 14, 15, 20-25

  • Hebreos 11:31