Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

Mo hāpī ki taˈa ŋā poki

 KAU 12

He taŋa ˈāpī e tahi taˈe riˈa-riˈa

He taŋa ˈāpī e tahi taˈe riˈa-riˈa

Mai ki hāpī tātou o ruŋa i te taŋa ˈāpī e tahi. Kai ˈite tātou toˈona ˈīŋoa, te meˈe ˈite nō o ruŋa i a īa, he poki o te taina o Pablo e ˈaˈana i haˈūˈū, mo taˈe tiŋaˈi i toˈona papatīo, no atu toˈona riˈa-riˈa. ¿Haŋa rō koe mo ˈite he aha taˈana meˈe i aŋa?...

A Pablo ko puru ˈā i Jerusalén. ¿O te aha e puru era? O te vānaŋa o ruŋa i a Ietū ki te taŋata. Te ˈati e ai rō ˈā te taŋata riri mo Pablo, e he vānaŋa ananake mo tiŋaˈi i a īa. Oīra i haŋa ai mo kī ki te kape o te mutoˈi: “Ka uŋa koe ki taˈa auarīo mo maˈu i a Pablo ki te hare ture”. Te manaˈu o rāua, he pipīko i te ara, e ki maˈu i a Pablo a rā ara, e he eˈa e rāua he tiŋaˈi.

Te taŋa ˈāpī he ˈaˈamu ki a Pablo e ki te kape era o te mutoˈi o ruŋa i tū aŋa rake-rake era

Te poki o te taina o Pablo, ko ŋaroˈa ˈā nei meˈe, e he eˈa he oho he ˈaˈamu ki toˈona papatīo. I ŋaroˈa era e Pablo he kī: “Ka hōrou ka oho ki te kona noho o te kape o te mutoˈi e ka ˈaˈamu tahi nā meˈe”. Peaha i riˈa-riˈa rō a īa mo vānaŋa ki tū taŋata era, o te ai a īa he puˈoko o te mutoˈi taˈatoˈa. ¿I oho i vānaŋa rō te taŋa ˈāpī ki rā kape mutoˈi era?... E ē, no atu toˈona riˈa-riˈa, i oho i vānaŋa rō.

Te kape o te mutoˈi ko noho ko haka roŋo tahi ˈā te vānaŋa o tū kope era. Oīra mo hapaˈo i a Pablo he toˈo he uŋa ki te kona e tahi te ˈīŋoa ko Cesarea. E takoˈa he uŋa i te roŋo ki te 500 auarīo mo hokorua i a Pablo e he kī: “Ka maˈu rō ai i te pō mau nei ˈā”. ¿I ora rō a Pablo?... E ē, ko ora ˈā. Kai riva te ŋā taŋata rake-rake era mo tiŋaˈi i a Pablo.

¿He aha te meˈe o tātou mo hāpī o ruŋa i te ˈaˈamu nei?... ¿Ko tikeˈa ˈā koe i tū taŋa ˈāpī era ˈina kai riˈa-riˈa? ¡A koe e riva nō mo tuˈu pe īa takoˈa! Oīra, ˈina tātou ko riˈa-riˈa mo vānaŋa o ruŋa o Iehoha ki te taŋata. ¿E riˈa-riˈa rō koe mo vānaŋa o ruŋa o Iehoha?... He meˈe hopeˈa o te nui-nui te vānaŋa te oho o ruŋa i te ˈAtua, o te ai peira te taŋata ka ora ka oho ena e ˈina e ko mate.

MAI KI TAIˈO I RUŊA I TE PUKA O TE ˈATUA:

  • Hechos 23:12-24

  • Mateo 24:14; 28:18-20

  • 1 Timoteo 4:16