Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

¡He Parau ˈāpī riva-riva mai te ˈAtua mo tātou!

 Kau 3

¿He aŋi ˈā a Iehoha te parau ˈāpī era o ruŋa i te Puka o te ˈAtua?

¿He aŋi ˈā a Iehoha te parau ˈāpī era o ruŋa i te Puka o te ˈAtua?

1. ¿ˈA ˈai i papaˈi te Puka o te ˈAtua?

Te parau ˈāpī riva-riva mo ora ki te hopeˈa raˈa i ruŋa i te henua, i ruŋa i te Puka o te ˈAtua e haˈaki era (Salmo 37:29). Te Puka o te ˈAtua ko aŋa ˈā hai 66 puka iti-iti papaˈi e te 40 taŋata vae e te ˈAtua mo aŋa i rā aŋa. A Moisés i papaˈi te puka raˈe era e rima 3.500 matahiti a tuˈa. Te puka hopeˈa a Juan i papaˈi 1.900 matahiti a tuˈa. Te manaˈu taˈatoˈa era o ruŋa i te Puka o te ˈAtua, mai a Iehoha i oho mai ai. A Īa hai toˈona varūa maitai i haka aŋi-aŋi ai toˈona manaˈu ki te nuˈu papaˈi era i taˈana puka (2 Samuel 23:2). Nei ŋā nuˈu taˈatoˈa, ko papaˈi tahi ana i te manaˈu o te ˈAtua, taˈe i te manaˈu o rāua. Ōira e riva nō tātou mo kī ˈaˈana te Puka nei.E taiˈo 2 Timoteo 3:16; 2 Pedro 1:20, 21.

2. ¿He parautīˈa mau ˈā te meˈe papaˈi i ruŋa i te Puka o te ˈAtua?

Ko ˈite ˈā tātou mai a Iehoha te Puka o te ˈAtua i oho mai ai, o te ai, ko kī mai ˈā te taˈatoˈa meˈe ka piri mai ena pe muˈa ka oho ena. Nei meˈe e ko riva e tahi taŋata mo aŋa (Josué 23:14). Mo te ˈAtua Mana Pūai nō e riva mo aŋa peira.E taiˈo Isaías 42:9; 46:10.

Mo ai o te ˈAtua te Puka nei, e topa kē nō ˈā mai te tahi puka. Ōira ko huri ˈā a ruŋa ki te hanere tumu ˈarero e ko tuhaˈa ˈā tautini piēre o nei Puka. No atu toˈona papaˈi mai muˈa ˈā, te meˈe papaˈi o ruŋa i te Puka o te ˈAtua, ko haka tano ˈā ki te meˈe taˈatoˈa aŋi-aŋi e tātou i te hora nei o ruŋa i te nātura. Peira ˈā te meˈe i papaˈi era e te 40 taŋata i ruŋa i te Puka o te ˈAtua, ko tū manaˈu ˈā no atu te taˈe mahani i roto i a rāua. * Takoˈa i ruŋa i nei Puka he tikeˈa tātou i te here o te ˈAtua, e toˈona pūai mo huri te huru o te taŋata ki toˈona huru haka tere titīka. Ōira rahi nō te taŋata e aŋi-aŋi ena te Puka o te ˈAtua mai i a Īa i oho mai ai.E taiˈo 1 Tesalonicenses 2:13.

 3. ¿He aha te meˈe vānaŋa mai e te Puka o te ˈAtua?

Te tumu mau o te Puka o te ˈAtua, he parau ˈāpī riva-riva mo te taŋata taˈatoˈa: he meˈe riva-riva e tahi haŋa e te ˈAtua mo te ˈAo taˈatoˈa. Ko ˈaˈamu mai ˈā o ruŋa i te haˈamata o te taŋata e pe hē i ŋaro ai te raveˈa mo noho i ruŋa i te henua nehe-nehe ki te hopeˈa raˈa, e ko ˈaˈamu takoˈa mai ˈā, pe hē ka aŋa ena mo riro haka ˈou te henua pahe kona nehe-nehe e tahi.E taiˈo Revelación 21:4, 5.

I ruŋa i te Puka o te ˈAtua, e ai rō ˈā te roŋo mo haka tere titīka o tātou. Takoˈa a ruŋa i te huru haka tere o te ˈAtua ki te taŋata o muˈa ˈā, he riva tātou mo aŋi-aŋi toˈona huru. Ōira te Puka o te ˈAtua e haˈūˈū rō mai ˈā mo aŋi-aŋi o ruŋa i a Īa, e pe hē tātou ana riro he ŋaruhoa ˈoˈona.E taiˈo Salmo 19:7, 11; Santiago 2:23; 4:8.

4. ¿Pe hē tātou ana aŋi-aŋi te haˈauraˈa o te Puka o te ˈAtua?

Te puka iti-iti nei he haˈūˈū mai mo aŋi-aŋi riva-riva te Puka o te ˈAtua, pe he aŋa iŋa era o Ietū i muˈa ˈā. A īa e kī era e tahi kupu vānaŋa o ruŋa i te Puka o te ˈAtua e ki ˈoti, e haka ˈite era i te haˈauraˈa ki te taŋata.E taiˈo Lucas 24:27, 45.

Te parau ˈāpī riva-riva oho mai ena mai te ˈAtua, he meˈe hopeˈa o te riva-riva mo piri atu, ˈina he meˈe hahine ki nei roa. E no atu nei meˈe, kē nuˈu e ko tapa, e kē nuˈu he riri mo vānaŋa o ruŋa nei meˈe. ˈIna koe ko horiŋa i te ŋā nuˈu nei. He ˈoti mau ˈā te raveˈa mo rovaˈa te ora ki te hopeˈa raˈa, e hāpī e oho koe o ruŋa i te ˈAtua.E taiˈo Juan 17:3.

 

^ párr. 7 Ka uˈi te puka iti-iti te ˈīŋoa ko Un libro para todo el mundo.