Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

¡He Parau ˈāpī riva-riva mai te ˈAtua mo tātou!

 Kau 11

¿He aha te hauhaˈa riva mo rovaˈa mo haka tere i a tātou a te roŋo o te Puka o te ˈAtua?

¿He aha te hauhaˈa riva mo rovaˈa mo haka tere i a tātou a te roŋo o te Puka o te ˈAtua?

Te roŋo o te Puka o te ˈAtua e hāpī rō mai ˈā te ora he mahīa nui-nui e tahi o te ˈAtua ¿Pe hē ana hapaˈo?SALMO 36:9.

1. ¿O te aha tātou ana taˈe riva mo haka tere i a tātou ˈā?

O te ai te ˈAtua kai aŋa i te taŋata mo haka tere i a rāua e rāua ˈā (Jeremías 10:23). Te ˈAtua e here ˈe e tapa rō ˈā i te taŋata. Pahe ŋā poki riki-riki e ai te rāua matuˈa mo haka tere, peira ˈā, te taŋata mo te ˈAtua e haka tere o te ai ata maramarama a Īa ki a tātou (Isaías 48:17, 18). Te roŋo papaˈi i ruŋa i te Puka o te ˈAtua, he mahīa nui-nui e tahi ˈaˈana, mo haka tere i a tātou.E taiˈo 2 Timoteo 3:16.

Te roŋo o Iehoha e hāpī rō mai ˈā, hē te huru hopeˈa o te riva-riva mo haka tere i a tātou i aŋanirā, e pe hē ana rovaˈa te hauhaˈa riva ki te hopeˈa raˈa. I te ai ˈaˈana tātou i aŋa, maˈana nō e haˈatere i a tātou, ōira e haŋa tātou mo haˈatere mai e Īa. Peira ˈā e haŋa ˈe e haka roŋo i taˈana roŋo hai mahatu.E taiˈo Salmo 19:7, 11; Revelación 4:11.

2. ¿Pe hē te Puka o te ˈAtua e haka tere ena i a tātou?

A Iehoha ko vaˈai mai ˈā, i ruŋa i taˈana Puka e rua huru o te roŋo: te roŋo raˈe, ko te roŋo ena mo kī mai hē te meˈe mo aŋa e hē te meˈe mo taˈe aŋa (Deuteronomio 22:8). Te rua roŋo, ko te roŋo era mo hāpī mai mo haka topa i te manaˈu pe hē tātou ana haka tere a roto i te rauhuru ˈati e meˈe ka piri mai ena i aŋarinā e pe muˈa ka oho ena. Mo aŋi-aŋi pe hē ana haka tere hai roŋo nei e haka topa i raˈe te manaˈu (Proverbios 2:10-12). I he haˈauraˈa atu, te Puka o te ˈAtua e hāpī rō ˈā o ruŋa i te roŋo e tahi: te ora iŋa he mahīa e tahi o te ˈAtua. Mo haka topa tātou te manaˈu o ruŋa i te roŋo nei, he aŋi-aŋi pe hē ana haka tere mo hapaˈo i a tātou o piri mai te ˈati i te kona aŋa, i te hare e i te taˈatoˈa kona.E taiˈo Hechos 17:28.

3. E rua roŋo hopeˈa o te nui-nui ¿Ko roŋo hē?

Ko vānaŋa a Ietū o ruŋa i te roŋo e rua. Te roŋo raˈe he haka tikeˈa mai mo te aha te ˈAtua i aŋa ai te taŋata: mo aŋi-aŋi o ruŋa i te ˈAtua, mo here e mo aŋa  ki a Īa. Taˈatoˈa meˈe mo aŋa, e tapa te roŋo nei mo haka tere i a tātou (Proverbios 3:6). Te taŋata haka tere hai roŋo nei he riro he ŋaruhoa o te ˈAtua, he rovaˈa i te koa mau e he ora ki te hopeˈa raˈa.E taiˈo Mateo 22:36-38.

Te rua roŋo, he haˈūˈū mai mo aŋa i te meˈe riva nō ki te tahi (1 Corintios 13:4-7). Mo aŋa peira e haka tere a tātou a te huru aŋa e te ˈAtua ki te taŋata taˈatoˈa.E taiˈo Mateo 7:12; 22:39, 40.

4. ¿Pe hē te roŋo ana haˈūˈū mai?

Te roŋo o te Puka o te ˈAtua e hāpī rō ˈā pe hē te huaˈai ana taˈe haˈataˈa e pe hē ana here ki a rāua (Colosenses 3:12-14). Peira ˈā e ai rō ˈā te roŋo he hāpī pe nei ē meˈe taˈe au te haˈipoˈipo mo haˈataˈa.E taiˈo Génesis 2:24.

Mo haka roŋo tātou i te roŋo o te Puka o te ˈAtua, he hapaˈo i a tātou o hape o kore te tātou kai, kahu e kona mo noho. Takoˈa he hapaˈo mai te tātou huru manaˈu e te tātou mahatu. Mo haˈauraˈa atu, te puˈoko haka tere o te rauhuru kona aŋa, he haŋa ki te taŋata haka tere a te ŋā roŋo nei o te ai he taŋata haka kē mo aŋa e ˈina he toke (Proverbios 10:4, 26; Hebreos 13:18). Takoˈa te vānaŋa o te ˈAtua e hāpī rō mai ˈā mo koa, mo ai e ai rō ˈā te tātou kai, kahu e kona mo noho. Peira ˈā e here ki te ˈAtua raˈe ki te taoˈa.E taiˈo Mateo 6:24, 25, 33; 1 Timoteo 6:8-10.

Te roŋo o te Puka o te ˈAtua e hāpī rō mai ˈā pe hē ana hapaˈo i te tātou hakari, e vānaŋa era pe nei ē ˈina ko unu te ava ki te taˈero o piri rō mai te ˈati rake-rake pahe maiūi o he mate mo haka tere te pereoˈa e taˈero rō ˈā (Proverbios 14:30; 22:24, 25; 23:20). A Iehoha e haˈatiˈa rō mai ˈā mo unu i te ava, ˈe e haka tano nō ana unu (Salmo 104:15; 1 Corintios 6:10). Te roŋo o te Puka o te ˈAtua he haˈūˈū takoˈa mai, mo uˈi mo taˈe poteko te tātou huru haka tere e i te tātou manaˈu (Salmo 119:97-100). Te pukuraŋa parautiˈā ˈina he haka roŋo mo te rāua riva nō, a rāua e haka roŋo ena o te ai e here e moˈa rō ˈā i a Iehoha.E taiˈo Mateo 5:14-16.

 

MO ATA ‘ITE ‘O’OU

Ka nonoˈi mo hāpī atu te Puka o te ˈAtua

Ka hāpī te Puka o te ˈAtua e ˈina koe ko ˈauhau, ka hāpī i te kona e i te hora haŋa ˈoˈou