Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

¡He Parau ˈāpī riva-riva mai te ˈAtua mo tātou!

 Kau 9

¿Pe hē te huaˈai ana rovaˈa te koa mau?

¿Pe hē te huaˈai ana rovaˈa te koa mau?

1. ¿O te aha te taŋata ana haˈipoˈipo?

A Iehoha te ˈAtua koa, ko vaˈai mai ˈā i te ŋā parau ˈāpī riva-riva nei, e ko haŋa ˈā mo koa mau te huaˈai (1 Timoteo 1:11). ˈAˈana te haˈipoˈipo i aŋa. Te haˈipoˈipo e vaˈai rō ˈā i te huru tano, titīka, mo hapaˈo te ŋā poki e mo rovaˈa i te koa mau i roto i te huaˈai. Te nuˈu here ki te ˈAtua e haˈipoˈipo a te huru haˈatere taŋata o toˈona kona noho.E taiˈo Lucas 2:1, 4, 5

¿He aha te meˈe manaˈu o te ˈAtua o ruŋa i te haˈipoˈipo? Te haˈipoˈipo mo te ˈAtua, he piri te taŋata ki te viˈe e ˈina ko haˈataˈa. A Iehoha ko haŋa ˈā mo noho te taŋata ki te viˈe nō e tahi e pe tū huru ˈā te viˈe (Hebreos 13:4). He enemī mau ˈoˈona te haˈataˈa (Malaquías 2:16). No atu rā meˈe e haˈatiˈa rō ˈā te haˈataˈa mo ai e tahi o roto i te haˈipoˈipo ko taiˈata ˈā, ko te meˈe nō nei te meˈe haˈatiˈa e te ˈAtua mo haˈataˈa.E taiˈo Mateo 19:3-6, 9.

2. ¿Pe hē te kenu e te viˈe ana haka tere i roto i te rāua haˈipoˈipo?

A Iehoha i aŋa ai i te taŋata e i te viˈe, mo here, mo hokorua e mo haˈūˈū te aŋa i roto i te rāua haˈipoˈipo (Génesis 2:18). Te kenu, he pūˈoko o toˈona hare e maˈana e maˈu i te rauhuru meˈe mo toˈona hare, pahe kai, kahu e te tahi meˈe, e takoˈa mo hāpī o ruŋa i te ˈAtua ki toˈona huaˈai. Peira ˈā te kenu e tapa i taˈana viˈe ˈe e haka tikeˈa toˈona here ki a īa. Te kenu e te viˈe e moˈa e here i roto i a rāua ˈā. I te ai e hara rō ˈā te kenu e te viˈe, e hāpī pe hē ana aŋa mo taˈe maˈu te riri, mo rovaˈa peira i te koa mau.E taiˈo Efesios 4:31, 32; 5:22-25, 33; 1 Pedro 3:7.

3. Mo ai ˈina he koa i roto i te haˈipoˈipo ¿e riva nō mo haˈataˈa?

Mo ai e ai rō ˈā te ˈati i roto i te haˈipoˈipo, e kimi te raveˈa mo haka titīka te ˈati hai here (1 Corintios 13:4, 5). Te vānaŋa o te Puka o te ˈAtua e kī rō ˈā, te haˈataˈa taˈe he ara mo haka titīka te ˈati o te nuˈu haˈipoˈipo.E taiˈo 1 Corintios 7:10-13.

 4. ¿He aha te meˈe haŋa o te ˈAtua mo te ŋā poki?

Ko haŋa ˈā Iehoha mo koa o te ŋā poki. Ōira e hāpī ena i te huru hopeˈa o te riva mo koa i roto i te rāua taŋa. Takoˈa, mo hāpī i te maramarama e huru haka tere o te matuˈa (Colosenses 3:20). Peira ˈā, ko haŋa ˈā Iehoha mo ŋaroˈa te ŋā poki i te koa mo aŋa ki a Īa e ki taˈana poki ko Ietū.E taiˈo Eclesiastés 11:9–12:1; Mateo 19:13-15; 21:15, 16.

5. ¿He aha te meˈe o te matuˈa mo aŋa mo rovaˈa rāua ŋā poki i te koa mau?

Te matuˈa e kimi i te raveˈa tano mo vaˈai i te kai, i te kahu e i te hare mo noho te rāua ŋā poki (1 Timoteo 5:8). Taˈe ko te ŋā meˈe nō nei te meˈe mo aŋa. Takoˈa e hāpī mo here e mo haka tere a te huru era o Iehoha (Efesios 6:4). Mo ai te matuˈa e haka tikeˈa rō ˈā i te rāua here ki te ˈAtua, he maˈa e he maˈu rō ai e te rāua ŋā poki nei here i roto i te rāua mahatu. Mo hāpī te ŋā poki hai Puka o te ˈAtua, he riva mo haka tere titīka te rāua manaˈu.E taiˈo Deuteronomio 6:4-7; Proverbios 22:6.

Te ŋā poki e haŋa takoˈa rō ˈā mo haka koa i a rāua, ōira te matuˈa e koa e haˈi i te rāua ŋā poki hora aŋa era i te meˈe riva-riva. Takoˈa, hora era mo aŋa i te meˈe rake-rake e riva nō mo ture mo haka titīka te rāua haka tere iŋa. Hora era e ture ˈā te matuˈa ki taˈana poki ˈina ko puˈa, ko vānaŋa hai riri. Mo aŋa pe nei te matuˈa i te rāua ŋā poki he koa nō te meˈe ka piri ena (Proverbios 22:15).E taiˈo Colosenses 3:21.

Te Taŋata Haka ˈIte o Ruŋa o Iehoha ko papaˈi ˈā rauhuru puka mo te matuˈa ko īa ko taˈana ŋā poki. Taˈatoˈa nei ŋā puka hai Puka o te ˈAtua i aŋa ai.E taiˈo Salmo 19:7, 11.