Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

¡He Parau ˈāpī riva-riva mai te ˈAtua mo tātou!

 Kau 2

¿Ko ai te ˈAtua?

¿Ko ai te ˈAtua?

1. ¿O te aha tātou ana haˈatura ki te ˈAtua?

O te ai ˈaˈana i aŋa te meˈe taˈatoˈa peira ˈā i a tātou. Ōira ki a Īa nō tātou ana haka roŋo e haˈatura. Mai muˈa ˈā te ˈAtua i noho ai i ruŋa i te raŋi, ˈina ˈoˈona mahana poreko e ˈina a Īa e ko mate (Salmo 90:2). E ˈaˈana te parau ˈāpī riva-riva papaˈi ena i ruŋa i taˈana Puka (1 Timoteo 1:11).E taiˈo Revelación 4:11.

2. ¿Pe hē te huru o te ˈAtua?

Ata nui-nui te huru o te ˈAtua ki te huru o te taŋata o te ai a Īa he kuhane e tahi, ōira e ko riva e tahi taŋata mo tikeˈa i a Īa (Juan 1:18; 4:24). No atu te taˈe tikeˈa i a Īa, e riva nō tātou mo aŋi-aŋi toˈona huru hai mataˈitaˈi a ruŋa i taˈana meˈe aŋa taˈatoˈa era. Mo haˈauraˈa atu, ka uˈi te huru kē huru kē tiare e te rauhuru tumu kai, rā meˈe he haka aŋi-aŋi mai i toˈona maramarama e toˈona here ki a tātou. Takoˈa te nui-nui o te ˈAo taˈatoˈa he haka ˈite mai i toˈona mana pūai.E taiˈo Romanos 1:20.

Te rua raveˈa mo aŋi-aŋi tātou pe hē te huru o te ˈAtua, hai taiˈo i taˈana Puka. Hai Puka nei he haka aŋi-aŋi hē taˈana meˈe haŋa e hē taˈana meˈe taˈe haŋa. Takoˈa, he aŋi-aŋi tātou pe hē te ˈAtua e aŋa ena ki te taŋata, e pe hē toˈona manaˈu o te tātou haka tere riva-riva e o te tātou haka tere rake-rake.E taiˈo Salmo 103:7-10.

3. ¿E ai rō ˈā te ˈīŋoa o te ˈAtua?

Kī ˈā e Ietū: “E te Matuˈa o mātou o te raŋi ē, ka moˈa te taŋata taˈatoˈa i tū ˈīŋoa” (Mateo 6:9). Te taŋata e raŋi ena ki te ˈAtua hai rauhuru ˈīŋoa, te parautīˈa e tahi nō ˈoˈona ˈīŋoa mau. Te ˈīŋoa nei e kī rō ˈā i te rauhuru tumu ˈarero, ko Iehoha i te ˈarero rapanui.E taiˈo Salmo 83:18.

Ko toˈo ˈā te ˈīŋoa o Iehoha mai ruŋa i te rahi o te Puka o te ˈAtua e ko mono ˈā ki te rauhuru ˈīŋoa pahe ˈAtua o Matuˈa. I papaˈi era te Puka o te ˈAtua i muˈa ˈā i papaˈi rō te ˈīŋoa ko Iehoha a ruŋa ki te hitu tautini. Takoˈa i haka aŋi-aŋi rō e Ietū te ˈīŋoa o Iehoha e hāpī era ki te taŋata o ruŋa i a Īa. E taiˈo Juan 17:26.

Pahe huru here o te matuˈa tane nei ki taˈana poki, peira ˈā te ˈAtua e tapa rō mai ˈā i te hora nei e pe muˈa ka oho ena

 4. ¿Tapa rō mai ˈā e te ˈAtua?

Mo ai, e here rō mai ˈā Iehoha ki a tātou, ¿O te aha e haˈatiˈa ena mo piri mai te taŋi-taŋi e i te mamāe? Kē nuˈu e manaˈu ena e hāˈito ˈā e te ˈAtua mo aŋi-aŋi ana ˈai e here rō ˈā tātou ki a Īa. Manaˈu nei taˈe he parautīˈa.E taiˈo Santiago 1:13.

Ko haˈatiˈa mai ˈā e Iehoha mo uˈi a ara hē tātou ana haka tere. Ōira e mauru-uru ki a Īa o te haˈatiˈa mai mo uˈi ki ˈa ˈai tātou ana haka roŋo. Te meˈe hopeˈa o te riva-riva mo tātou e haka tere a te ara era mo aŋa tātou ki a Īa (Josué 24:15). Te ˈati, rahi nō te taŋata e haka tere ena i te rāua ara mo aŋa i te meˈe rake-rake, ōira e rahi ena te ˈati i ruŋa i te ˈAo, nei ŋā meˈe e haka mamāe rō ˈā i a Iehoha.E taiˈo Génesis 6:5, 6.

I te rahi o te here o Iehoha e i toˈona haŋa mo koa mo oho tātou, nā he haka kore tahi te mamāe e i te ˈino. I te hora nei ko te piri iŋa mai ˈā te meˈe rake-rake. E ai rō ˈā te haˈauraˈa o te aha te ˈAtua e haˈatiˈa ena i rā meˈe. I te kau vaˈu he pahono atu te ˈui nei.E taiˈo 2 Pedro 2:9; 3:7, 13.

5. ¿Pe hē tātou ana hahine ki te ˈAtua?

A Iehoha e tapa rō ˈā i a tātou, ōira ko vaˈai mai ˈā te raveˈa mo hahine ki a Īa: e vānaŋa tātou ki a Īa a roto i te vaha era o te pure (Salmo 65:2; 145:18). Takoˈa, ko haŋa ˈā mo haka kore te tātou hara, o te ai e tikeˈa rō ˈā pe hē tātou e haka uhu ena mo aŋa i taˈana meˈe haŋa. No atu te taˈe rovaˈa rā meˈe paurō te mahana, e riva nō tātou mo riro he ŋaruhoa ˈoˈona.E taiˈo Salmo 103:12-14; Santiago 4:8.

E here tātou hai mahatu ki a Iehoha raˈe ki te tahi, o te ai ˈaˈana tātou i aŋa (Marcos 12:30). Mo haka tikeˈa i te tātou here ki te ˈAtua, e hāpī o ruŋa i a Īa ˈe e haka roŋo i taˈana roŋo. Peira he ata hahine tātou ki a Īa, e a Īa ki a tātou.E taiˈo 1 Timoteo 2:4; 1 Juan 5:3.