Charishcaguma rina

Cai ali tapuigunamanda yachanata munanguichu

Cai ali tapuigunamanda yachanata munanguichu

IMA TAPUIMANDA. Runagunaga cai balishca tapuigunatami rashcauna. Canllatachari huaquinbiga tapurishcangui:

  • Diosca ñucanchita llaquinzhu.

  • Ima punzhata guerrasguna, turmintugunas tucuringa.

  • Huañushaga imata tucunchi.

  • Huañushcagunaga causaringaunachu.

  • Dios uyahuachun nishaga imasata paita tapuna anchi.

  • Imasata cushi causaita tupangui.

Cai tapuigunamanda yachangahua maibita mascanguima. Ashca runagunaga colegioma, universidadma rishca runagunatami tapunaun. Astahuanbas, shucta shucta rimashami pandarinaun. Huaquinbiga chi rimashca yuyaigunaga ali shinami ricurishca, randiga paiguna rimashca mana balicpiga , mushuc yuyaigunata churashami alichishcauna.

Chimandahuas alita, pasacta yachachic libromi tian. Jesucristo, Diosta tapusha nira: “Camba shimiga sirtu man” (Juan 17:17). Cunanga chi libroga Diospa Shimi actami ricsinchi. Ahuaibi tiac tapuigunamanda yachangahua , Biblia ima nishcata ricushun.

 Diosca ñucanchita llaquinzhu

IMARAICUTA CHASNA TAPURINCHI. Susirina, huanchina, shuhuaguna tiashca munduibimi causanchi. Astahuanbas ashca religiongunaga cai turmintugunataga Diospa munai man nisha yachachishcauna.

BIBLIAGA CASNAMI YACHACHIN. Yaya Diosca maicandahuas mana llaquichinzhu. Job 34:10, Traducción del Nuevo Mundo nin: “Mana alita ranamanda Diosca caruibi man”. Yaya Diosca llaquic ashcamanda shamuc punzhagunai runagunama ali causaita cungahuami munan. Chiraicu, Jesus imasna Diosta tapuna ashcata yachachira: “Ñucanchi jahuapachaibi tiyac Yaya [...]. Camba ali mandanaga tucuibi mirarishca tucuchun. Jahua pachaibi can munashcata rashca cuinta, cai pachaibihuas chasnallata rashca achun” (Mateo 6:​9-13). Diosca ñucanchita yapa llaquin. Chiraicu, paiba munai pactarichun nisha, paiba shuglla Churita cai allpama huañungahua cachara (Juan 3:16).

Cai textogunatahuas leipangui: Genesis 1:​26-28 ; Santiago 1:​13; 1 Pedro 5:​6, 7.

Ima punzhata guerrasguna, turmintugunas tucuringa

IMARAICUTA CHASNA TAPURINCHI. Guerrasgunaga tucui munduibi ashca runagunata huanchisha catin. Astahuanbas, chican chican turmintugunata charisha ashcata llaquirinchi.

BIBLIAGA CASNAMI YACHACHIN. Yaya Dios cai allpata mandacpiga tucuigunami cungailla causashunchi. Runagunaga guerrasgunaibi mana susiringaunachu. Randiga, “paiguna espadagunata, tarbana saulita rangauna” (Isaias 2:​4). Chasnallata, Yaya Diosca mana aligunata, turmintugunatas tucuchinga. Chiraicu, Diospa Shimi casna nin: “Diosca paiguna huacashca ñahui yacutas pichasha chaquichingami. Huañunahuas illangami, huacanahuas, llaquirisha caparinahuas, nanaigunahuas tucuringami. Tucui chi ñaupa tiyaccuna ña tucurishca manga” (Apocalipsis o Revelacion 21:​3, 4).

Cai textogunatahuas leipangui: Salmo 37:​10, 11; 46:​9; Miqueas 4:​1-4.

Huañushaga imata tucunchi

IMARAICUTA CHASNA TAPURINCHI. Ashca religiongunaga huañushca huashaga alma causasha catin nishami yachachishcauna. Huaquingunaga huañushcaguna yanapan, causaccunata turmintachin ninaunmi. Shuccunaga, Dios mana aligunata ucu pachama cachasha rupachin nishami yuyarinaun.

BIBLIAGA CASNAMI YACHACHIN. Eclesiastes 9:5 nin: “Huañushcagunaga [...] mana imatahuas yachanzhu”, mana yuyanaunzhu, mana sintinaunzhu, mana imatas rai ushanaunzhu. Chiraicu, causaccunatas mana turmintachinaunzhu, yanapaitas mana ushanaunzhu (Salmo 146:​3, 4).

Cai textogunatahuas ricupangui: Genesis 3:19; Eclesiastes 9:​6, 10.

 Huañushcagunaga causaringaunachu

IMARAICUTA CHASNA TAPURINCHI. Tucuigunami ñucanchi llaquishca aillugunahuan huangulla, cushiyasha causanata munanchi. Chiraicu, ñucanchi huañushca aillugunahuan cutillata tupanacunata munanchi.

BIBLIAGA CASNAMI YACHACHIN. Ashca huañushcagunaga causaringami. Chiraicu, Diospa Shimi casna nin: ‘Huañushcahuasha cuti causaringaunami’ (Hechos 24:​15). Cuti causaric runagunaga shuc paraiso tucushca allpaibimi causangauna. Chasna achun nishami Yaya Diosca callarimanda munara (Isaias 65:21-25). Sumac allpa shamungaraushcaibiga Diosta shungumanda cadsuccunaga mana ungusha, huiñaibac cushi causaitami charingauna. Diospa Shimi casna nin: “Alita raccunami allpata apingauna. Paigunami chibi huiñaibac causangauna” (Salmo 37:29).

Cai textogunatahuas leipangui: Job 14:​14, 15; Lucas 7:​11-17; Hechos 24:​15.

Dios uyahuachun nishaga imasata paita tapuna anchi

IMARAICUTA CHASNA TAPURINCHI. Tucui religionmanda runaguna Yaya Diosta tapunaun. Randi, ashca runagunaga paiguna tapuimanda mana uyashcatami sintishcauna.

BIBLIAGA CASNAMI YACHACHIN. Yaya Diosta imasna tapunata yachachisha Jesus nira: Diosta tapushaga “ama chillatata cuti, cuti yangalla rimanguichichu” (Mateo 6:​7). Dios ñucanchita uyahuachun nishaga pai munashca shina tapuna anchi. Chiraicu, Yaya Dios nishcata yachana anchi, pai munashca shina tapungahua. Imasnami 1 Juan 5:​14 nin: “Imatahuas Dios munashcata shina mañasha tapucpiga pai uyangallami”.

Cai textogunatahuas leipangui: Salmo 65:2; Juan 14:​6; 1 Juan 3:​22.

Imasata cushi causaita tupangui

IMARAICUTA CHASNA TAPURINCHI. Cullquita, titulogunata charishaga cushi causanata tupashunmi nisha yuyarinaun. Chiraicu, ashca runagunaga chigunallata mascasha causanaun. Chita charishahuas mana cushi chanaun.

BIBLIAGA CASNAMI YACHACHIN. Jesus nira: ‘Maican runa Diospa shimita uyasha pactachiccunaga [...] mas yali cushi’ causaita charingauna (Lucas 11:28). Jesus nishca shina, cushi causangahua Dios mandashcata yachasha, pactachina anchi. Chi mandashcaguna Bibliaibi tian. Diospa Shimi yanapaihuan, aligunata rashun, ali causaitas charishun (Mateo 5:​3).

Cai textogunatahuas leipangui: Proverbios 3:​5, 6, 13-18; 1 Timoteo 6:​9, 10.

 Cai pangaibi ricushcanchi sucta Bibliamanda tigrachiccunata. Mas yachasha catinata munanguichu. Yaya Diosmanda yanapaita minishtishaga, mas yachanata ushanguimi. Cunan caita yuyapai: Dios ñucanchita llaquic ashaga, imaraicuta casna llaquiguna tian nisha tapurishcanguichu. Ailluhuan cushilla causangahua imatata rana ani nisha tapurishcanguichu. Bibliaga cai tapuigunata shuc tapuigunatahuas alita yachachishami yanapan.

Randiga, ashca runagunaga mana Diospa Shimita yachanata munashcaunachu. Intindingahua sinzhi libro man nishami yuyanaun. Ashca runaguna chasna yuyacpihuas, can Diospa Shimimanda mas yachasha catinata munanguichu. Canda yanapangahua Jehovahua testigogunaga imatata rashcanchi.

Jehovahua testigogunaga Diosmanda gustu cuintaiguna nishca folletotami llucshichishcanchi. Cai folletoga balishca tapuigunamanda Bibliaibi ima nishcata yachangahua rashca man. Sallata runagunahua huasima Bibliamanda ashilla ashilla yachachingahua rinchi. Can munacpiga, shuc Jehovahua testigo camba huasima Bibliamanda caran semana yachachingahua rinata ushanmi. Bibliamanda yachachishaga, mana cullquita tapunchichu. Bibliamanda yachashaga, ashca runaguna cushiyasha nishcauna: Diospa sirtu shimita tupashcanchi nisha.

Cambas, Bibliaibi yachachishcaguna sirtu ashcata yachanata ushangui. Bibliamanda ali yachaigunaga, llullamanda, ima manzhaimandahuas llucshichinata ushan. Chiraicu Jesus nira: “Chasna asha sirtu shimitahuas yachanguichimi. Chi sirtu shimimi cangunataga lugaryachinga” (Juan 8:32). Imasami yachashcanchi Diospa Shimiga cushi, ali causaitami cun.