Charishcaguma rina

Yachana partita ringahua

 TAPUI 1

Ima tunu runa tani

Ima tunu runa tani

IMARAICUTA BALISHCA AN

Shuccuna canda caita rai nicpiga can ima tunu runa ashcata yachana yanapai tucungui.

CAN IMATA RANGUIMA

Caita yari: Karenga 10 minutogunata shuc fiestai aun, cungaimanda, ricsishca shimita pai huashai uyan:

“Imahuata sapalla aungui”.

Bulltiarisha ricucpiga, pai amiga Rebecata ishcai cervezahuan shamuuta ricun. Shucta cusha nin: “Ña mana huahua changui. Ansahuata upishaga alitami sintiringui”.

Karenga chara huahua ashcamanda mana upinata munan. Chasna ashahuas, pingaibi saquirinata mana munanzhu. Chimandahuas, Rebeca ali malta huarmihua man. Upicpiga mana yapa ucha changa. “Mana drogata chupana shina chan. Shuc cervezalla man” nisha pinsarin.

Karen ashaga, imatata ranguima.

ALITA PINSARI

Casna shinaibi aushaga, alita rangahua ima sami runa ashcata yachana yanapai tucungui. Imata pinsarina, imata rana, imata quirinatas yachashaga ima sami runa ashcata intindingui. Caita alita intindishaga maican runa caita rai nicpihuas, mana manzhasha imatas alita rangui (1 Corintios 9:​26, 27).

Caita rangahua imata yanapai tucungui. Callaringahua cai tapuigunata ricui:

 1 IMATATA ALITA RANI

Imasami runa ashcata yachashaga, imatas mana manzhasha alita rangui.

BIBLIAMANDA EJEMPLO. Apostol Pablo quillcara: “Ñuca ali rimanata mana ushashahuas, Yaya Diosmandaga alitami yachani” (2 Corintios 11:6). Pabloga Diospa shimi nishcata alita ricsishcamandami shuccuna imata nicpihuas mana pingarira. Paiga shuccuna yanga rimashcata uyasha mana manzharachu (2 Corintios 10:​9, 10; 11:5).

CANLLAITA PINSARI: Can imata ali rashcata quillcai:

Cunanga can imasa ashcata quillcai: (ali shungu, mana mitsa, mana llullac, pactachic ashaga quillcai)

2 IMAIBITA PANDARINI

Imasami shuc cadena pitirinalla ashca partibi pitirin, chasnallatami can imaibihuas pandaricpiga ali pinsanata, alita ranata, imata quirinata cungaimanda saquingui.

BIBLIAMANDA EJEMPLO. Pabloga pai imasa ashcata alita ricsira. Chiraicu quillcara: “Ñuca shungu ucuibiga Dios mandashcagunata yuyarisha ali manaun nishami cushiyani. Chasna agllaita ñuca aichaibi shuc yuyai tiyashcata yachani, juchata rana yuyai. Dios mandashcagunaga ali manaun nisha yuyarigllaitami jucha rana yuyai Dios mandashcagunahuan macanacunaun. Chasna macanacusha chi ñuca aichaibi jucha rana yuyai ñucata japisha huatashcacuinta charihuan” (Romanos 7:​22, 23).

CANLLAITA PINSARI: Imatata mana rana munangui:

 3 CAITA PACTACHINA MUNANI

Shuc taxita apisha, gasolina tucurinagama bueltata cui ninguimachu. Chita mana ranguimachu. Chasna rashaga cullquita yangami gastangui. Caimanda imatata yachangui. Can imata ranata yachashaga mana yangachu imatas rangui. Chasna rashaga imata ranata, imasa ranatas yachanguimi.

BIBLIAMANDA EJEMPLO. Pablo quillcara: “Yanga callpac runa mana imatas apingachu” (1 Corintios 9:26). Yangalla imatas rana randiga Pabloga imata rasha nishcata pactachina yuyaihuan imatas rac ara (Filipenses 3:12-14).

CANLLAITA PINSARI: Cunanga can cai huataibi 3 pactachina munashcata quillcai:

4 IMATATA QUIRINI

Can ima sami ima tunu runa ashcata yachashaga, sinzhi huairaibihuas mana urmac, sinzhi sapiyuc ruya shina mangui.

Imata quirishcata mana alita yachashaga, imata ranata mana yachac runa shina mangui. Canba amigoguna shina angahua imatas rashaga, shuc camaleon shina mangui. Cai animalga pai aushca pistuibi shina ricuringahua paiba colorta cambian. Chasna rac runaga, pai amullata ima tunu runa ashcata mana yachanzhu.

Chimandahuas can imata rana munashcata yachashaga shuccuna imata racpihuas can imasami runa ashcata mana saquinguichu.

BIBLIAMANDA EJEMPLO. Danielga aillumanda caruyachishcaibiga malta chari ara. Chasna ashahuas, Diosta shungumanda cadsunata munara (Daniel 1:8). Pai ima sami runa ashcata yachanauchun nisha, tucuita alita rasha causara.

CANLLAITA PINSARI Imaibita quiringui. Diospi quiringuichu. Imaraicuta quiringui. Imasata Dios sirtu ashcata yachangui.

Diospa ñaupacpi ima ali acta, ima mana ali acta yachanaga yanapai tucunguichu. Imaraicuta yanapai tucungui.

Imashinata ana munangui: Shuc huaira apashca panga shina, o sinzhi huairaibihuas mana urmac ruya shinachu ana munangui. Sinzhi ruya shina ana munashaga, can imata quirishcata, imata pinsashcata, imata rashcatas shuccunata alita yachachi. Caimi cai tapuita cutichingahua yanapanga: Ima tunu runa tani.