Charishcaguma rina

Yachana partita ringahua

 TEMA 9

Jeremiasca Jehovamanda rimanata mana saquirachu

Jeremiasca Jehovamanda rimanata mana saquirachu

Imaraicuta runagunaga Jeremiasta piñanaura

Jehovami Jeremiasta yanapara, yacuta surcuna uctumanda llucshingahua

Imasaibiga Jehovamanda rimacpi, runagunaga ñucanchita asisha piñanaun. Chasna racpi llaquirinchi. Chiraicumi maicanguna nishcauna: “Jehovamanda mana mas rimashachu” nisha. Can chasna yuyarishcanguichu... Bibliaga ninmi, shuc runa Jehovata llaquishahuas paimanda rimanata cadsi saquishcata. Chi runaga Jeremias nishca man. Ricushun ima tucushcata.

Jeremias malta ashcaibiga Jehovaga nirami, ñuca ali nishcagunata rimana mangui nisha. Paiga nina mara, mana ali causaita saquina manguichi nisha. Chita rimana sinzhi ashcamandami Jeremiasca manzharira. Chiraicumi paiga Jehovata nira: “Yapa malta mani. Mana imatas rimanata yachanichu”. Chasna nicpi Jehovaga nira: “Ama manzhaichu. Ñucami canda yanapashcangui” nisha.

 Chibimi Jeremiasca chi llactaibi causauc runagunama nira: “Canguna ñaupa causaita mana saquicpiga, castigai tucunguichimi” nisha. Chasna rimacpi Jeremiasta cadsunaurachu... Mana. Chi runagunaga piñarisha asinaura. Shuccunaga huanchishun ninaura. Imasashi Jeremiasca sintirira... Ashcata manzharishcamandami casna nira: “Mana mas Jehovamanda rimashachu” nisha. Sirtutachu nira. Paiga huiñaichu Jehovamanda rimanata saquira... Mana. Jeremias Jehovata ashcata llaquishcamandami rimasha catira. Mana sambayarachu. Chiraicumi Jehovaga mana ali runagunamanda quishpichira.

Shuc urasca, mana ali runagunami Jeremiastaga yacuta surcuna atun uctuibi shitanaura. Yacu chaquiricpimi turulla ara. Chibimi Jeremiasca pambariura. Micunata, upina yacutas mana charirachu. Chi runagunaga Jeremiasta huanchinata munanaura. Chimanda Jeremiasca quishpirachu. Indá, Jehovami paitaga chimanda quishpichira.

Caibiga yachashcanchimi, Jeremias manzhashahuas, Jehovamanda rimanata mana saquishcata. Imatata paimanda yachanata ushangui... Imasaibiga can Jehovamanda rimacpiga, shuc runagunaga piñasha asingauna. Chasna ashcamanda imasaibiga manzhaita, pingaita charinguimi. Chasna acpihuas Jehovamanda rimanataga mana saquina changui. Yuyarina mangui, Jehova Jeremiasta shina candas yanapanata.