Charishcaguma rina

Yachana partita ringahua

 TEMA 6

Davidga mana manzhac chara

Davidga mana manzhac chara

Manzhai tiacpiga imatata rana angui... Camba yayagunahua yanapaita mascana angui. Chasna acpihuas mas ali yanapac tian. Chiga pi tan... Indá, Jehova man. Canda yanapachun nishaga, paitami caran uras tapuna angui. Chitami Davidga caran uras rara. Davidga Jehova yanapanata yachashami mana manzhac ara. Davidmandaga Bibliaibimi cuintan.

David ichilla ashcaibimi paiba yayagunaga Jehovata llaquinata yachachinaura. Chiraicumi mana manzhac ara. Shuccuna manzhacpihuas, David mana manzharachu. Paiga, Jehovami ñuca amigo an, paimi yanapahuanga nic ara. Shuc punzhaga David paiba ovejagunata cuiraushcaibi, shuc leon shamusha ovejata apasha rira. Davidga imatata rara. Leonda catinacusha, paiba quiquin maquihuanzhari huanchira. Chi huasha shuc oso paiba ovejata apasha ricpi, Davidga chitahuas huanchira. Pita Davidtaga mana manzhangahua yanapara... Sirtu man, Jehovami yanapara.

Shuc punzhaga piña runagunahua chaupibi ashahuas, Davidga mana manzharachu. Israel runagunaga filisteo runagunahuan macanacuunaura. Filisteo soldadomandaga Goliat nishca manzhanaita atun runarucu tiara. Goliatga Israel runagunamanda, Jehovamandahuas pai munaita asiura. Soldadogunata nira: “Mana manzhac ashaga, macanacungahua shamuichi”. Huinguna manzhashcamandami mana pihuas caillayanaura. Goliatta uyashami Davidga nira: “Ñuca mana canda manzhanichu. Jehovami yanapahuanga canda binsingahua” nira. Ricunguichu David mana manzhac acta... Indá, mana manzhac chara. Chi huasha imata tucura.

Davidga pichca chiujlla rumita, huaragana huascatas apisha chi manzhanaita atun runahuan macanacungahuami llucshira. David ichilla malta ashcata ricusha Goliat paimanda asira. David randi nira: “Canga shuc atun saulihuan shamungui. Ñuca randi, Jehovahua ushaihuan canma riuni”. Davidga manzhanayacta runa mayanma callpasha rira. Chi huasha shuc rumita paiba huaragana huascaibi churasha tucsira. Chi rumi urintibi paquicta yaicucpi Goliat huañusha urmara. Filisteo runagunaga Goliat urmashcata  ricusha manzharisha atiún callpanaura. Davidga ichilla ashallata Goliat nishca manzhanaita atun rucuta binsira. Imahuata binsira... Jehova yanapacpimi binsira. Jehovaga maican manzhanaita runagunamandahuas mas sinzhi man.

Davidga mana manzhac chara Jehova yanapacta yachasha

David rashcamandaga imatata yachanchi... Yachanchimi Jehova tucuimanda mas yali ushayuc ashcata. Chiraicumi manzhaita charishaga camba amigo Jehovata yarina angui. Paimi manzhaita binsingahua yanapanga.

DIOSPA SHIMIBI RICUSHUN: