Charishcaguma rina

Yachana partita ringahua

 14 PARTI

¿Imaraicuta Diosca paita sirviccunata shuglla llactata shina tandachin?

¿Imaraicuta Diosca paita sirviccunata shuglla llactata shina tandachin?

1. ¿Imaraicuta Diosca israelitagunata paiba llacta anauchun nisha anllara?

Diosca Abrahanmanda miraigunata shuc muntunda rashami pai mandashcagunata cura. Chi runagunaga Israel llactami tucunaura. Diosca paiba Shimita cushami paigunata yachachira imasa paita sirvina ashcata (Romanos 3:2). Chi Israel llactami, tucui shuc llactagunata yanapana ara. Hechos 3:25, leingui.

Diosca Israel llactatami anllara paiba testigo anauchun nisha. Ñaupa timpuibi chi Israel llactamanda cuintashcagunaga yachachinmi, Dios mandashcagunata cazushaga ali causaita charinata (Deuteronomio 4:6). Chiraicumi, Israel llactaga yanapana ara shuc runagunata sirtu Diosta ricsinauchun nisha. Isaias 43:10, 12, leingui.

2. ¿Imaraicuta Jesusta sirtuta caticcunaga shuc muntunlla anaun?

Israelitaguna Jehovata saquicpiga, paiga Jesusta caticcunataga paiba llacta anauchun nishami anllara (Mateo 21:43; 23:37, 38). Chimandami cunan punzhaibi Jesusta sirtu caticcunaga Jehovamanda cuintasha paita sirvinaun. Hechos 15:14, 17, leingui.

Jesusca paita caticcunata tandachirami mundu intiruibi camachisha ñucata caticcunata ragrichi nisha (Mateo 10:​7, 11; 24:14; 28:19, 20). Cai tucurina punzhagunaibimi chi camachishcagunaga mas uyariun. Ñucanchi punzhallaibimi Diosca tucui partimanda runagunata paita quirinauchun nisha tandachiushca (Apocalipsis 7:​9, 10). Tandalla ashami Jesusta sirtu caticcunaga yanapanacunata ushanaun. Astahuambas, tucuigunami Bibliamanda chi yachaigunallatata yachanaun. Hebreos 10:24, 25, leingui.

 3. Cunan punzhaibi Jehovahua testigogunaga ¿imasata tiai callarinaura?

1870 huataibimi, ashilla runagunaga Bibliata leingahua tandarisha, unai pacashca yachaigunata intindinaura. Paigunaga yachanaurami, Jesus paita caticcunata camachingahua tandachishcata. Chibimi mundu intiruibi Diospa Reinomanda yachachingahua callarinaura. 1931 huataibimi paigunaga Jehovahua testigo nisha shutichirinaura. Hechos 1:8; 2:​1, 4; 5:​42, leingui.

4. ¿Imasata Jehovahua testigogunaga mundu intiruibi camachinaun?

Jesus huañushca huashaga shuc llactamanda Jesusta caticcunata yanapangahuaga, Jesusta cazuc apostolguna, shuc ashilla huauquigunami cunac anaura. (Hechos 16:​4, 5). Chasnallatami cunan punzhaibis mundu intiruibi Jehovahua testigogunata yanapangahuaga cunasha yanapac muntun nishca ashilla huauquigunami tianaun. Chi cunasha yanapac muntun huauquigunaga mundu intiruibi sucursal oficinagunatas ricurianaun. Chi oficinagunaibiga 600 shimigunaibimi, Bibliamanda librogunata, revistagunata quillcanaun. Bibliata japishami chi cunasha yanapac muntun huauquigunaga 100 mil yali congregaciongunata yachachisha yanapanaun. Cuti caran congregacionbimi shuc huauquigunaga alita yachachishca anaun, Diospa huiba shina ac huauquigunata, panigunata llaquisha cuirangahua. 1 Pedro 5:​2, 3, leingui.

Jehovahua testigogunaga Bibliamanda camachisha, Jesusta caticcunata rangahuami tandarishcauna. Jesusta punda caticcuna shina, huasi huasibi camachinaun (Hechos 20:20). Diosta sirtuta ricsinata munac runagunataga Bibliahuanmi yachachinaun. Jehovahua testigogunaga mana paiguna tandarina huasillaibi ricsinacunaunzhu. Jehova paigunahua Yaya acpimi quiquin aillupura causac huauquiguna, paniguna shinami llaquinacusha causanaun (2 Tesalonicenses 1:3). Diosta quiric runaguna ashcamandami, sinzhiyanaun paita cushiyachingahua, shuc runagunatas yanapangahua. Jehovahua testigogunaga mundu intirumanda mas cushi aillu manaun. 1 Pedro 2:9; Hechos 20:35, leingui.