Charishcaguma rina

Yachana partita ringahua

 9 PARTI

Aillugunaga ¿imasata cushi causanata ushanaun?

Aillugunaga ¿imasata cushi causanata ushanaun?

1. ¿Imaraicuta apugunaibi cazarana anchi?

Cushi Diosmandami, ali cuintaigunaga shamun. Chiraicumi paiga munan ailluguna cushi causanauchun nisha (1 Timoteo 1:​11). Diosmi cazaranataga callarichira. Apugunaibi cazarashami, churigunata huiñachingahua, cushi causangahua yanapan. Jesusta ali caticcunaga registro civil nishca cazarana huasibimi cazarana anaun. Lucas 2:​1, 4, 5, leingui.

Diosca cazaranata churashami, shuc carita shuc huarmihuan cazarachira huiñaigama causanauchun nisha. Jehovaga munanmi amu huarmillahuan, amu carillahuan causanauchun nisha. Mana shughuan ashiyana chanaun (Hebreos 13:4). Divorciarinataga Diosca mana munanzhu (Malaquias 2:​16). Bibliaga ninmi, cari o huarmi ashiyagllaibi, culpa illac huarmi asha o cari asha, munashaga, divorciarisha cuti cazaranata ushanmi nisha. Mateo 19:​3-6, 9, leingui.

2. ¿Imasata cazarashcagunaga causana anaun?

Jehovaga carita, huarmita rarami paigunapura yanapanacusha causanauchun nisha (Genesis 2:​18). Cariga ailluibi uma ashcamandami, tarbasha ailluta cuiran, Diosmandahuas ailluta yachachin. Huarmita llaquishcamandaga cariga mana pai munashcata rana chan. Cazarashcagunaga llaquinacusha, ima nishcatas uyasha causana manaun. Ishcandiguna juchayuc ashcamanda, ailluibi cushilla causangahuaga perdonda tapunata yachana manaun. Efesios 4:​31, 32; 5:​22-​25, 33; 1 Pedro 3:7, leingui.

 3. Cazarashca huasha mana alita causaushaga ¿jichunacunalla chan?

Cazarashcaguna mana alita causaushaga, ishcandigunami llaquinacusha causangahua sinzhiyanacuna anaun (1 Corintios 13:​4, 5). Bibliaga mana ninzhu, cazarashcaguna piñanacuita alichingahua jichunacuna man nisha. 1 Corintios 7:​10-​13, leingui.

4. ¿Imatata Diosca churigunaraicu munan?

Diosca munanmi, churiguna cushi anauchun nisha. Chiraicumi, yachachin, malta causaibi astahuan cushi causanauchun nisha. Chasnallata Diosca munanmi, canguna yayagunahua ali yachaigunata japinauchun nisha (Colosenses 3:​20). Astahuambas, Diosca munanmi churiguna paita, Jesustahuas sirvisha cushi anauchun nisha. Eclesiastes 11:9–​12:1; Mateo 19:13-​15; 21:15, 16, leingui.

5. ¿Imasata yayaguna churigunamaga cushi causaita cunata ushanaun?

yagunaga sinzhita tarbasha micunata, causana huasita, llachapatas churigunama cuna manaun (1 Timoteo 5:8). Chigunata cucpihuas, churigunaga mana chigunallahuanzhu cushi angauna. Churiguna Diosmanda yachasha paita llaquinatami yayagunaga yachachina anaun (Efesios 6:4). Yayaguna Diosta tucui shunguhuan llaquishcata ricuchicpiga, churigunahuas Diosta llaquingaunami. Diospa Shimita japisha yachachicpiga, churigunahua yuyaigunata, allpa mangata sumac huihuishcushca shinami alichinga. Deuteronomio 6:​4-7; 2 Timoteo 3: 15, leingui.

Yayagunaga churigunata nina man, alitami rashcangui, chasnalla rasha catingui nisha. Imasaibiga, cunasha libachina minishtirinmi. Chasna racpiga mana ali raigunaibi urmanamanda anchuringami (Proverbios 22:15). Libachishahuas, mana upacuinta asutina chan. Colosenses 3:21, leingui.

Jehovahua testigogunaga ashca librogunatami yayagunaraicu, churigunaraicu quillcashcauna. Chi librogunaga Bibliamanda manaun. Salmo 19:​7, 11, leingui.