Charishcaguma rina

Yachana partita ringahua

Notaguna

Notaguna

1 JEHOVA

Diospa shutiga Jehova man. Cai shutiga “pai ima munashcata pactachic” nisha nin. Jehovaga Tucuita Rac Dios man. Tucui pai munashcata pactachina ushaitami charin.

Hebreo shimibi, Diospa shutitaga chuscu letrahuan quillcashca man. Ahuallacta shimibiga, YHWH o JHVH letraguna manaun. Bibliaibi, hebreo shimibiga Diospa shuti 7.000 cutin quillcashca tiyan. Runagunaga paiguna quiquin shimibi Jehova shuti imasa uyarishcata rimanaun.

Cap. 1, parr. 15

2 BIBLIAGA “DIOSLLATA QUILLCACHISHCA SHIMI” MAN

Bibliataga Diosmi quillcachira, shuc jefe paiba secretariota quillcachishca shina man. Secretario cartata quillcashca acpihuas, chibi tiyac yuyaigunaga jefehua yuyai man. Chasna shinami, Diosca runagunata paiba samaihuan paiba yuyaita quillcachira. Bibliata quillcaccunata Diosca paiba samai espirituhuan muscuchisha pagllaibi shina ricuchisha quillcachic ara.

Cap. 2, parr. 5

3 BIBLIAMANDA CUNAIGUNAGA ALITA RANGAHUA YACHACHIN

Bibliamanda cunaigunaga alita rangahuami ñucanchita yanapan. Por ejemplo, Bibliaibi nin: “Canguna mana ali runagunahuan purishaga cangunahuas mana ali tucunguichimi”. Caiga ali amigogunata anllasha, alita causanata yachachin (1 Corintios 15:33). Chasnallata, Biblia nin: “Dios mana pugllaibacchu. Imatas tarpushaga chillatatami pallangui”. Caiga yachachinmi, mana alita rashaga, mana alitachu ri tucushun (Galatas 6:7).

Cap. 2, parr. 12

  4 PROFECIAGUNA

Profeciaga Dios rimashca man. Profeciaga Dios ima munashcata, imasna causanata, Dios mandashcata pai taripanata riman. Chasnallata shamungarauc punzhaibi ima tucungaraushcata riman. Bibliaibi ñaupata rimashcaga ña pactarishcaunami.

Cap. 2, parr. 13

5 MESIASMANDA RIMASHCA PROFECIA

Mesiasmanda rimashcaga Jesuspimi pactarira. “ Mesiasmanda profeciaguna.” nishca recuadrota ricui.

Cap. 2, parr. 17, notata ricui

6 IMARAICUTA DIOSCA ALLPATA RUNAGUNATAS RARA

Jehovaga paraiso Allpaibi paita llaquic runaguna causachun munara. Jehova pai munashcata pactachingami. Diosca nallami mana ali causaita tucuchisha, paita casuccunata huiñai causaita cunga.

Cap. 3, parr. 1

7 SATANAS SUPAI

Jehova Diospa angel ashallata paita mana casusha Diospa contra tucura. Satanas nishaga “Diosta piñac” nisha nin. Paiga Jehova Diosta piñasha mana casuna munan. Supai nishaga “yanga llullac” nisha nin. Jehovamanda yanga llullasha runagunata umasha pandachic acpimi chasna nin.

Cap. 3, parr. 4

  8 ANGELGUNA

Allpata chara mana rashallata Jehova angelgunata rara. Paigunataga cieloibi causangahua rara. 100 millon yali angelgunami tiyanaun (Daniel 7:​10). Chasnallata, caran angelgunami shutiyuc anaun, chimandas caranmi chican anaun. Cai angelguna humilde asha, runaguna adorachun mana munanaunzhu. Angelgunaga chican chican tarabanatami charinaun. Maicangunaga, Jehovahua mayanbi anaun, Dios rimashcata pasachinaun, Diosta Allpaibi sirviccunata cuiranaun. Chasnallata Dios mandashcata pactachinaun, Diospa Reinomandas cuintangahua yanapanaun (Salmo 34:7; Apocalipsis 14:6; 22:​8, 9). Diospa angelgunaga Armagedon guerraibi Jesusta yanapangauna (Apocalipsis 16:​14, 16; 19:​14, 15).

Cap. 3, parr. 5; cap. 10, par. 1

9 UCHA

Uchaga mana ali munaihuan, mana ali yuyaihuan Dios munashcata mana rana munaita charina man. Uchata rashaga Diospa amigo mana tucuna ushashunzhu. Chiraicumi uchai mana urmangahua Diosca Bibliaibi ali cunaigunata, mandashcagunata saquishca. Punda callarishcaibiga tucuita ucha illacta rara. Chasna ashahuas, Adan y Eva Diosta mana casusha uchai urmanaura. Uchata rashami rucuyasha huañunaura. Ñucanchihuas Adanmanda mirai ashami uchayuc anchi. Chimandami rucuyasha huañunchi.

Cap. 3, parr. 7; cap. 5, parr. 3

10 ARMAGEDON GUERRA

Armagedon guerraibiga Diosmi Supai mandashca munduta tucuchinga. Chasnallata mana aligunata tucuchinga.

Cap. 3, parr. 13; cap. 8, parr. 18

 11 DIOSPA REINO

Diospa Reinoga ahua pachai Dios churashca gubirnu man. Cai Reinoibi mandacca Jesucristo man. Shamungarauc punzhaibi Jehova paiba Reinohuan mana ali causaita tucuchinga. Diospa Reinomi tucui Allpata mandanga.

Cap. 3, parr. 14

12 JESUCRISTO

Diosmi Jesusta punda rara. Runagunamanda huañungahua Jehovami Jesusta cai Allpama cachara. Pai huañushca huasha, Jehova causachira. Cunanga cieloibi Jesusca Diospa Reinoibi mandaun.

Cap. 4, parr. 2

70 SEMANAMANDA RIMASHCA PROFECIA

Bibliaga Mesias ima uras shamunata rimara. 69 semanaguna nishca profecia pactarishca huasha Mesias shamuna mara. Caiga, 455 (a.e.c.) Jesus chara mana shamugllaita callarisha, Jesus shamushca huasha 29 (e.c.) huataibi tucurira.

Cai timpumanda Jesus shamushca huasha 29 huataibi tucurishcata imasata yachanchi. 69 semanaga Jesus chara mana shamugllaita 455 huataibi callarira. Chibi Nehemias Jerusalenbi pactasha cai llactata cuti alichi callarira (Daniel 9:​25; Nehemias 2:​1, 5-8). “Docena” nicpi 12 numerota yarishca shina, “semanata” uyasha 7 punzhata pinsachin. Cai profeciaibi rimashca semanaga mana 7 punzhatachu riman, astahuanbas 7 huatatami riman. Caiga profeciaibi “shuc punzha, shuc huata” rimashca profecia shina man (Numeros 14:34; Ezequiel 4:6). Caita casna intindinchi, caran senama 7 huatata charin, chasnallata 69 semanagunaga 483 huata tucun (69 x 7 multiplicai). Jesus chara mana shamushcamanda 483 huatata 455 huatahuan yupacpiga Jesus shamushca huasha, huata 29bi pactarin. Chi 29 huataibi Jesus bautisarisha Mesias tucura (Lucas 3:​1, 2, 21, 22).

 Cai profeciaga shuc semana o 7 huata masta riman. Chi timpuibi Mesiasta huanchina anaura. Huata 33​pi Jesus huañushcai pactarira. 36 huataibi Diospa Reinomanda ali cuintaigunata mana judio runagunata yachachi callarinaura (Daniel 9:​24-​27).

Cap. 4, parr. 7

 14 YAYA DIOS, DIOSPA CHURI, DIOSPA SAMAI SHUCLLA DIOS NISHCAGA MANA SIRTU CHAN

Bibliaga ninmi: Jehova Tucuita Rac Dios man nisha. Chasnallata, Jehovami cai munduta chara mana rashallata Jesusta rara (Colosenses 1:​15, 16). Jesusca Dios shina mana tucui ushaita charinzhu. Paiga, Dios shina mani nisha mana rimarachu. Astahuanbas, paiga nirami: Ñuca Yaya ñucamandas mas atun mannisha (Juan 14:28; 1 Corintios 15:28). Maican religiongunaga Trinidadmanda yachachinaun. Yaya Dios, Diospa Churi, Diospa samai quimsa runaguna ashahuas shuclla Dios man nisha yachachinaun. Chasna acpihuas, Trinidad shimiga Bibliaibi mana tiyanzhu. Runaguna yanga yachachishca man.

Diospa samai o espiritu santo nishcaga Diospa ursa man. Mana ricuibac ushai man. Cai ushaihuan Diosca pai munashcata pactachin. Diospa samaiga mana runa chan. Por ejemplo Bibliaga nin, Jesusta punda caticcunaga “Diospa espiritu santohuan undarinaura”. Chasnallata Jehova nira: “Tucui runagunata ñuca espiritu santota talisha” (Hechos 2:​1-4, 17, NM).

Cap. 4, parr. 12; cap. 15, parr. 17

15 CRUZ

Jesusta sirtu caticcunaga Diosta adorangahua imahuata mana cruzta charinaun

  1. Yanga religiongunaga ashca huataguna huashamandami cruzta charishcauna. Ñaupa timpuibiga cruzta yanga dioscunata adorangahua, mana ali irus raigunata rangahua cruzta charic anaura. Jesus huañushcamanda 300 huata pasacpihuas, Jesusta caticcunaga Diosta adorangahua cruzta mana charic chanaura. Chasna ashahuas, Roma llactata mandac Constantino nishca runa, Jesusta adorangahua nisha cruzta churara. Cai cruztaga paiguna mas ricsishca tucungahua churanaura. Chasna ashahuas, Jesusca mana cruzpi huañurachu. Catolicohua libro nin: “Jesus chara  mana shamugllaita runaguna cruzta utilizac manaura. Chasnallata, Jesusta mana caticcunahuas cruzta utilizanaun”.

  2. Jesusca mana cruzpichu huañura. Cruzta griego shimima pasachicpiga, suni caspi shan nin. Shuc bibliaibi nin: Griego shimibi Nuevo Testamentoga “mana ishcai caspi man ninzhu” (The Companion Bible). Jesusca shuc suni caspibimi clavashca huañura.

  3. Jehova Diosca paita adorangahua santogunata, cruzgunata charichun mana munanzhu (Exodo 20:​4, 5; 1 Corintios 10:14).

Cap. 5, parr. 12

16 JESUS HUAÑUSHCATA YUYARINA

Jesusca paita caticcunata pai huañushcata yuyarinauchun nisha mandara. Judioguna quillaibi 14 de nisanbi Jesusta caticcunaga caran huataibi pai huañushcata yuyarinaun. Chi punzhallaita israelita nishca runagunaga Pascua istata rac anaura. Jesus huañushcata yuyaringahua tandarinaibi panda, vinota pasachinaun. Chi pan Jesuspa ucha illac aichatami ricuchin. Vinoga Jesuspa ucha illac rahuaita ricuchin. Jesushuan ahuapachama mandangahua ringarauccunallami cai panda micusha, vinotas upinaun. Cai Allpaibi huiñai causanata munaccunaga Jesus huañushcata yuyaringahua tandarishahuas, panda mana micunaunzhu, vinota mana upinaunzhu.

Cap. 5, parr. 21

17 ALMA

Traducción del Nuevo Mundo nishca Bibliaibi alma nishaga 1) runagunata, 2) animalgunata, 3) runahua o animalhua causaita riman. Caimanda, Bibliaibi rimashcagunata yachashun.

  • Runaguna. “Noe punzhagunaibiga [...] 8 almagunami yacumanda quishpirinaura” (1 Pedro 3:​20, NM). Caibi alma  nishaga runagunatami niun. Noe, paiba huarmi, paiba quimsa churiguna, paiguna huarmigunahuas manaura.

  • Animalguna. “Dios nira: ‘Allpa tucui tunu causac almagunata cuchun, huiba animalta, piña animalta, cuyuric animalta, tucui tunu piña animalbas mirachun’. Chasnami tucura” (Genesis 1:​20, 24).

  • Runahua causai o animalhua causai. Jehova Moisesta nira: “Canba almata mascauc runaguna huin huañushcauna” (Exodo 4:​19). Jesus Allpai aushcaibi nira: ‘Ñucaga ovejagunata ali cuiraccuinta mani. Alita cuirac amuga ovejagunamanda quiquin almata [o causaita] cusha huañungami’ (Juan 10:11).

    Chasnallata, Biblia tucui almahuanmi pactachishca nishaga, mana quillasha, alita rashcatami nin (Mateo 22:37; Deuteronomio 6:5). Bibliaibi alma nishaga, causac runa munashcata nin ushan. Chimandahuas, Bibliaibiga huañushca runata “huañushca alma” nin (Numeros 6:6; Proverbios 13:2; Ageo 2:​13).

Cap. 6, parr. 5; cap. 15, parr. 17

18 ESPIRITU

Traducción del Nuevo Mundo Bibliaibi hebreo y griego shimibi “espiritu” nishaga chican chican yuyaigunata nin. Chasna ashahuas, espiritu nishaga huairata shina mana ricuibacta o runagunahua y animalgunahua samaita nin. Chasnallata, cieloibi causaccunata, espiritu santo o Diospa ushaita nin. Bibliaga mana ninzhu huañushca huasha shuc partima causasha catishcata (Exodo 35:21; Salmo 104:29; Mateo 12:43 NM; Lucas 11:13).

Cap. 6, parr. 5; cap. 15, parr. 17

19 GEHENA

Gehenaga Jerusalen mayanbi tiyac pistu mara. Chibi basurata rupachic anaura. Jesuspa timpuibi Gehena pistuibi runagunata, animalgunatas causacta rupachishcata mana  maibihuas ninzhu. Chiraicu, Gehena pistuga mana runaguna huañusha rupasha causana pistu chan. Jesus maican runaguna Gehenama ringauna nishaga huañusha huiñai tucurinata niura (Mateo 5:​22; 10:28).

Cap. 7, parr. 20

20 PADRENUESTRO ORACION

Cai mañaitaga Jesusmi paiba discipulogunata yachachira. Cai Padrenuestro oracionbi Jesusca caimanda yachachina munara:

  • “Canba shuti balichishca achun”

    Runaguna Jehovahua shutita llullasha mana alita saquichishcamandami limpio achun nisha mañanchi. Chasna racpi, tucui Allpai causac runaguna, cieloibi causaccunahuas Diospa shutita balichisha respetangauna.

  • “Canba ali mandana” shamuchun

    Diospa Reino supai mandaushca munduta tucuchisha, Allpata paraisota rachun nisha tapunchi.

  • Cai pachaibi can munashcata rashca achun

    Diospa munai cai Allpaibi pactarichun nisha mañanchi. Diosta casuc runaguna ucha illac tucusha paraisoibi huiñai causanatas mañanchi. Jehova Diosca punda runagunata rashaga chasna huiñai sumac causanata munara.

Cap. 8, parr. 2

21 JESUS QUISHPICHISHCA

Jehovaga runagunata uchamanda, huañuimanda quishpichingahua Jesusta cachara. Adan ucha illac causaita pirdishcamandami, ucha illac causaita cuti charingahua, shuc ucha illac runa quishpichinata minishtiranchi. Chasnallata, Diosca runaguna paihuan aliyanacungahua, paina uchata perdonangahuas Jesusta cachara. Jesus huañushcamandami, huin runaguna ucha illac tucusha huiñai causaita charishun.

Cap. 8, parr. 21; cap. 9, parr. 13

 22 1914 HUATAGA IMARAICUTA BALISHCA HUATA AN

Daniel capitulo 4ibi nishca profecia 1914 huataibi Diospa Reino mandai callarinata yachachi tucunchi.

Profecia: Jehovaga rey Nabucodonosorta shamungarauc punzhaibi ima tucunata muscuchira. Muscuibi reyga shuc atun ruyata cuchushcata ricura. Chi cuchushca sapi “canzhis timputa” mana huiñachun nisha irumanda, cobremanda anillota churanaura. Canzhis timpu tucuricpi, chi ruya cuti huiñana ara (Daniel 4:​1, 10-​16).

Cai profeciaga imatata nisha nin: Cai ruyaga Diospa mandanata ricuchin. Ashca huatagunata Diosca israelmanda runagunata pushangahua Jerusalenbi ac reygunata saquira (1 Cronicas 29:23). Chasna ashahuas, cai reyguna mana casusha mana alita racpi, mandana tucurira. Jerusalenga Jesus chara mana shamugllaita 607 huataibi tucurira. Chi huataibi “canzhis timpuguna” callarinaura (2 Reyes 25:​1, 8-​10; Ezequiel 21:​25-​27). Jesusca nirami “shuc mana israel runaguna Jerusalen llactata binsisha paiguna mandana uras tucurinagama” Jerusalen llactata yapa turmintachingami nisha. Cai turmintachina timpuga “canzhis timpu” shinallata man (Lucas 21:24). Cai “canzhis timpuga” Jesus cai Allpai aushcaibi mana tucurirachu. Jehovaga “canzhis timpu” tucurishcaibi shuc Reyta churasha nira. Cai Reyga Jesus man. Jesusmi Allpaibi Diosta sirviccunata ali causaita cusha bendicianga (Lucas 1:​30-​33).

“Canzhis timpu” masna timpu tan: “Canzhis timpu” nishcaga 2.520 huatata pasanata nisha nin. Jesus chara mana shamugllaita 607 huatamanda, 2.520 huatata yupacpiga 1914 huataibi pactanchi. 1914 huataibi Jehovaga Jesucristota cieloibi Reyta shina churara.

 “Canzhis timpuga” 2.520 huata ashcata imasata yachanchi. Bibliaga nin, “quimsa huata chaupi” 1.260 punzhaguna acta (Apocalipsis 12:​6, 14). Chasna asha, “canzhis timpu” nishcata ishcai cutin yupacpiga 2.520 punzhaguna man. Profeciagunamanda rimasha Bibliaibi “shuc punzha shuc huata” nin. Chiraicu 2.520 punzhaga 2.520 huata man (Numeros 14:34; Ezequiel 4:6).

Cap. 8, parr. 23

23 ARCANGEL MIGUEL

“Arcangel” nishaga “angelgunata mandac” nisha nin. Bibliaibiga shuc arcangel nishcallata riman. Paiba shutiga Miguel man (Daniel 12:1; Judas 9).

Miguelga Diosta casuc angelgunata pushac man. Bibliaibi ninmi: “Mandauc angel Miguelmi paihua angelgunandi dragonhuan macanacunaura” (Apocalipsis 12:7). Chasnallata, Diospa angelgunata mandac Jesus man. Chiraicu, Jesuspa shuc shutiga Miguel man (Apocalipsis 19:​14-​16).

Cap. 9, par. 4

24 TUCURIC PUNZHAGUNA

Tucuric punzhaguna nishaga Diospa Reino cai Supai munduta mana tucuchigllaita Allpaibi ima tucunata nin. Bibliaibi cai punzhagunamanda rimashaga “tucurina punzha”, “Diospa churi shamuna punzhata” nin (Mateo 24:​3, 27, 37). 1914 huataibi Diospa Reino cieloibi mandai callaricpi “tucurina punzha” callarira. Cai “tucurina punzhaga” Armagedon nishca guerraibi tucuringa (2 Timoteo 3:​1; 2 Pedro 3:​3).

Cap. 9, parr. 2

 25 HUAÑUSHCAGUNA CAUSARINGAUNA

Jehova Diosca huañushcagunata causachingami. Bibliaga 9 runaguna huañushcamanda causarishcatami riman. Diosca Eliasta, Eliseota, Jesusta, Pedrota, Pablota huañushcagunata causachina ushaita cura. Jehovaga “ali causaccunata mana ali causaccunata” Allpaibi tiyangahua causachishami nira (Hechos 24:15). Bibliaga maican runagunaga cieloibi causangauna nin. Cai runagunaga cieloibi Jesushuan mandangahua anllashcaguna manaun (Juan 5:​28, 29; 11:25; Filipenses 3:11; Apocalipsis 20:​5, 6).

Cap. 9, parr. 13

26 ESPIRITISMO

Espiritismoga brujogunama, adivinogunama risha huañushcagunahuan cuintanacuna man. Caita ranaga mana ali chan. Espiritismoibi quiric runagunaga huañushca huasha shuc partibi causasha catin nisha quirinaun. Chiga mana sirtu chan. Demoniogunaga Diosmanda runagunata caruyachinata munanaun. Paigunaga adivinasha, magiata rasha, brujota ricuchisha, runagunata umasha pandachinaun. Chimandas, demoniogunaga ashca librogunaibi, revistagunaibi, horoscopogunaibi, peliculagunaibi, musicagunaibihuas magiata alita shina ricuchinaun. Runa huañushcaibi rana costumbreguna mana ali chan. Cai costumbregunaga, velorioibi mana pichana, huañushcata apausha ushpata shitana, pantiunma huañushcagunaraicu micunata apanagunahuas man. Shuccunaga mana tamiacpi piripirinaun. Casna ranagunataga Yaya Diosca mana imallahuas gustanzhu. Maican runagunaga demonioguna ushaita charingahua huanducta, ayahuascata upinaun (Galatas 5:​20; Apocalipsis 21:8).

Cap. 10, parr. 10; cap. 16, parr. 4

 27 JEHOVAMI MANDANA ORDENDA CHARIN

Jehovami tucui ushayuc, mundu intiruta rac Dios an (Apocalipsis 15:3). Chiraicumi, tucui cai mundui rashcaguna paibaglla an. Astahuanbas, Diosllami pai rashcata mandana ordenda charin (Salmo 24:1; Isaias 40:​21-​23; Apocalipsis 4:​11). Jehovaga pai tucui rashcaibi leygunata churasha saquishca. Astahuanbas, pi mandana ushashcata Jehovallami anllana ushan. Diosta llaquisha paita casushaga Dios mandana ushaita charishcata respetashun (1 Cronicas 29:11).

Cap. 11, parr. 10

28 HUICSAYASHA HUAHUATA ICHUNA

Huicsayasha huahuata ichunaga mana ali chan. Huarmi huicsayashca punzhamanda chi huahuata Dios balichin. Huicsa ucuibi auc huahuaga causac runa man.

Chap. 13, par. 5

29 RAHUAITA CHURARINA TRATAMIENTOGA IMA TAN

Rahuaita churarina tratamientoga rahuaita o fracciones de sangre nishcata shuc runahua aichaibi churana man. Fracciones de sangre nishcaga: plasma, globulos rojos, globulos blancos, plaquetas nishcaguna man. Cai rahuaiga shucpa rahuaita o amuhua rahuaita huacaichishca man.

Cap. 13, parr. 13

 30 CUSCANZHINA

Bibliaibi cuscanzhina nishaga mana castiganatachu nin. Astahuan, ñucanchita yachachisha, cunasha, alita causangahua yanapasha Jehova Dios llaquisha cuscanzhin. Paiga mana yapacta piñasha cuscanzhic chan (Proverbios 4:​1,2). Jehova llaquihuan cuscanzhicpi, paita mas llaquinchi (Proverbios 12:1). Jehovaga paita sirviccunata llaquishami yachachisha cuscanzhin. Ñucanchi pandacpi imasa alichinata Dios yachachin. Astahuanbas, Diosca alita yuyasha pai munashcata rangahua yanapan. Yayaguna paiba huahuagunata cuscanzhiushaga, Jehova shina ana manaun. Imahua casuna ashcata intindichina anaun. Chimandas, huahuaguna Jehovata llaquichun, Bibliaibi tiyac yuyaigunata pasacta intindichun yanapana anaun.

Cap. 14, parr. 13

31 DEMONIOGUNA

Demoniogunata mana ricuna ushanchichu. Paigunaga ñucanchimanda mas yali ushaita charinaun. Diosta mana casusha paiba enemigo tucuc angelguna manaun (Genesis 6:2; Judas 6). Cai angelgunaga Jehovamanda caruyasha Supai parti tucunaura (Deuteronomio 32:17; Lucas 8:30; Hechos 16:16; Santiago 2:19).

Cap. 16, parr. 4