• NACIRISHCA HUATA: 1964

  • LLACTA: INGLATERRA

  • PAIPA PUNDA CAUSAI: CHAIRA VIÑAJ CASHPALLATAMI HUAHUAYU TUCUSHPA NALI PURIJURCA

ÑUCA PUNDA CAUSAI

Londres (Inglaterra) llacta ladopi ashtaca gentecuna causaj Paddington llactapimi nacirircani. Chaipica ñuca mamandi, ñuca quimsa paya ñañacunandimi causarcanchi. Ñuca taitaca yapata machashpalla purimandami huasimanbash huaquinbi huaquinbilla chayamun carca.

Uchilla cajpillatami ñuca mamaca cada tuta Diosta mañachun yachachihuarca. Shuj uchilla Bibliatami charircani, chai Bibliaca Salmos librocunatallami charirca. Chai Salmocunata candangapaca ñucallata pensarishca musicahuanmi candan carcani. Shuj viajeca shuj librota liijushpa “shuj punllaca ñana causai tiangachu” nishca shimicunata ricushpaca ninandami manllarircani. Chai shimicunata yarishpami puñuitapash na tarin carcani. Shamuj punllacunapi ima tucunatami pensarin carcani. Chaimandami cashna yuyarcani: “Cai causaillacha tian, ¿imapata ñucaca caipi cani? nishpa. Ñucaca na huañungapaj munanllu carcani.

Brujería cosascunamanda yachajungapaj munashpami, huañushcacunahuan parlangapaj escuelamanda cumbacunahuan pantionman rin carcanchi. Shinallata manllanayai peliculacunatami ricungapaj tandanajun carcanchi. Chaita ricushpaca ninandami manllanayan carca. Shinapash chai peliculacunata ricunataca gushtanmi carcanchi.

10 huatacunatalla charishpami ña tabaco chupai callarircani, chaitaca nimamanda na saqui usharcanichu. Jipamangarin drogatami chupai callarircani. Cutin ña 11 huatacunata charishpaca tragotami malircani, ufianata na gushtashpapash, machashca cashpaca alimi sintirin carcani. Musicata uyanata, bailanata ninanda gushtaimandami fiestacunaman, discotecacunaman rin carcani. Huasimandaca tutacuna pacalla llujshishpami, ña punllayajujta pipash na ricujta yaicun carcani. Shaijushca caimandami tauca viajeta escuelamanga ñana rin carcani. Cutin escuelaman rishpaca chaipipash ufianllami carcani.

Último huatata escuelapi cajpica ñuca calificaciongunaca nali carcachu. Ñuca imashina portarijushcata ñuca mama yachaj chayashpaca ninanda llaquirishpami, ñucahuan culirarca. Chaimandami culirarishpa huasimanda rircani. Asha tiempotaca ñuca novio Tonyhuanmi causarcani. Paica shuhua, drogata jatujmi carca. Culira, millai caimandami rijsishcapacha carca. Jipamanga vijsayumi  quedarcani, 16 huatacunatalla charishpami ñuca punda huahuata charircani.

BIBLIAMI ÑUCA CAUSAITA CAMBIARCA

Soltera cashpallata huahuacunata charij huarmicunata ayudangapaj gobiernocuna churashca huasipi causajushpami, testigo de Jehovacunataca rijsircani. Huahuata charij shuj jovenguta visitangapami ishcai testigo de Jehová huarmicuna chayan carca. Shuj punllaca paicuna parlanajujpimi chai huarmicuna pandarishca cashcata ricuchisha yashpa ñucapash parlangapaj tiarircani. Shinapash paicunaca, imata tapujpipash tranquilo, intindirinalla shimicunahuanmi Bibliapi ricuchishpa contestarca. Shina cushilla, juyaihuan tratajpimi ninanda alicachircani. Chaimandami paicunahuan Bibliamanda yachajui callarircani.

Huahuamandapachami huañunataca manllan carcani. Shinapash Bibliata yachajui callarijpica ñuca causaica cambiarcami. Bibliapica huañushcacuna causarinamanda Jesús imata yachachishcatami yachajurcani (Juan 5:28, 29). Shinallata Taita Diosca ñucata cuidangapaj munashcatapashmi yachajurcani (1 Pedro 5:7). Jeremías 29:11​pi shimicunaca ñuca shungumanmi chayahuarca. Chaipica ninmi: “Cangunaman ñuca imatalla ruranata yarijushcataca, ñucami yachani. Casilla ali causaita caranatami yarijuni, llaquicunataca na cachashachu. Canguna shuyanajushcatami caragrini” nishpa. Ñucapash cai Alpa shuj juyailla paraíso tucujpi chaipi causanatami cri callarircani (Salmo 37:29).

Testigos de Jehovacunaca juyaihuanmi ñucataca tratahuarca. Primera vez Testigocunapa tandanajuiman rijpica tucuicunami ali ali chasquihuarca, chaipi canatami gushtarcani (Juan 13:34, 35). Ñuca iglesiapi imashina tratashcahuan ricujpica Testigocunaca shujpachami carca. Testigocunaca ñuca imashina causajushcata ricushpaca imatapash nalicachishpaca na rimanajurcachu. Chaipa randica ñucahuan parlashpa, juyaita ricuchishpa, shuj cosascunapipashmi ayudahuarca. Shuj jatun familiata charishca cuendami sintirircani.

Bibliata yachajushpaca Jehovapa mandashcacunata pactachingapaj ñuca causaipi cambiana cashcatami cuenta japircani. Tabacota chupanata saquinaca shinllipachami carca. Shinallata huaquin musicacunata uyashpa drogata chupana munai shamujtami cuenta japircani. Chaimi musicata uyagrijushpaca ali agllashpa uyan carcani. Fiestacunapi, discotecacunapi cashpa tragota ufiana munai japinata yachashpami chai pushtucunaman rinatapash saquircani. Shinallata chai nali ruraicunata saquichun ayudaj ali amigocunatami mascarcani (Proverbios 13:20).

Chai tiempopillatami Tonypash testigo de Jehovacunahuan Bibliamanda yachajujushcarca. Tapuicunata Bibliahuan contestajta ricushpami Taita Diosmanda cabalta yachajujushcata cri callarirca. Paipa causaipica tauca cosascunapimi cambiarca: nali amigocunamanda caruyarca, shuhuanata, drogata chupanatapash saquirca. Jehová Dios munashcashna causangapaj, ñucanchi huahuapash tranquilo aliguta viñachun munashpami huata 1982​pica cazararcanchi.

“Shamuj punllacunapi ima pasanamanda, huañunamandaca ñana preocuparinichu”

Ñuca causaipi cambiangapaca La Atalaya y ¡Despertad! * revistacunapimi ñucashnallata problemacunata charij shuj gentecuna imashina cambiai ushashcata liingapaj mascan carcani. Chai experienciacunaca ninandami animahuarca. Na shaijushpa ñaupaman catichunbashmi ayudahuarca. Jehová Diostaca ñucata ama saquichun nishpami mañan carcani. Tonypash, ñucapash julio de 1982 huatapi bautizarishpami testigo de Jehová tucurcanchi.

IMASHINATA BENEFICIARISHCANI

Jehová Dioshuan ali amigo tucuimandami ñuca causaita salvashca. Tonypash, ñucapash imapash shinlli cosascuna pasajpipash Jehová Diospa ayudatami ricushcanchi. Ima pasajpipash Jehovapi confianatami yachajushcanchi. Ñucanchicunata tucuipi cuidajtapashmi cuenta japishcanchi (Salmo 55:22).

Ñucanchi churitapash, ushitapash Jehová Diospa amigocuna cachun ayudashcamandaca ninandami cushijunchi. Shinallata ñucanchi nietocunapash Jehovata rijsijujta ricushpaca ninandami cushijunchi.

Cunanbica shamuj punllacunapi ima pasanamanda, huañunamandaca ñana preocuparinichu. Tonypash, ñucapash cada semana testigo de Jehovacunapa shuj shuj congregaciongunata visitashpa, huauquipanicunata animashpami ocupado causanchi. Shinallata huauquipanicunahuanmi gentecunapash Jesuspi feta charishpa para siempre causai ushachun yachachinchi.

^ par. 17 Cai revistacunatapash testigo de Jehovacunami llujchishca.