Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista  |  Diciembre de 2015

Jalluca ushaita charinmi, aliguta pensarishpa parlashunchi

Jalluca ushaita charinmi, aliguta pensarishpa parlashunchi

‘Ñuca shimihuan nishcacuna canba ñaupajpica chasqui ushanalla cachun.’ (SAL. 19:14)

CÁNTICO 21, 35

1, 2. ¿Imapita ninapash jallupash igual can?

HUATA 1871pica, Wisconsin (Estados Unidos) llactapimi shuj jatun bosque manllanaita rupashpa tucurirca. Chaipica, mil 200 yali gentecunami huañurca. Shinallata, ñapashmi 2 millón yali quirucuna rupashpa tucurirca. Shinapacha llaquica ima horapash na chai llactapica tiashcarcachu. ¿Imamandata shina rupai callarirca? Shuj tren chai bosque ladota yalijujpi, ashala nina chispagu urmajpillami shina manllanaita rupai callarishca yarin. Shina pasashcata ricushpami, Santiago 3:5pi shimicunaca cierto cashcata intindinchi. Chaipica ninmi: “Shuj uchilla ninapash shuj jatun sachataca tucuchinllami” nishpa. Shinapash ¿imamandata discípulo Santiagoca shina nirca?

2 Santiago 3:6pica ninmi: ‘Jalluca ninashnami’ can nishpa. Imashinami ninaca ninanda llaquichita ushan, shinallatami jallu o ñucanchi parlocunaca ninanda llaquichita ushan. Chaimandami Bibliapica nin: “Jallullatami huañuipajpash, causaipajpash ushaita charin” nishpa (Prov. 18:21). Shinaca ¿shujcunata llaquichinata manllaimandallachu parlanataca saquina canchi? Na. Imashinami rupanata  manllashpapash ninata ali utilizashpa catinchi, shinallatami ñucanchi jalluta o parlocunataca ali utilizana canchi. ¿Nachu ninaca yanungapaj, cunungapaj, yana yana pushtucunapi punchayachingapaj ali can? Ñucanchi jallutapash ali utilizashpaca Jehovata jatunyachishpa, shujcunata ayudashpami cushijushun (Sal. 19:14).

3. ¿Imashinata shujcunahuan aliguta parlaita ushapanchi?

3 Jehová Dios ñucanchicunaman parlana ushaita cushcamandami imata pensajushcata, imashina sintirijushcata shujcunaman ñucanchi shimihuan parlashpa o maquihuan señasta rurashpa nita ushanchi. Shinaca ¿imashinata shujcunahuan aliguta parlaita ushanchi? (Santiago 3:9, 10, liingui.) Imata parlagrijushpapash imata nina cashcata, imashina nina cashcata, ima horas nina cashcatami ricuna canchi.

¿IMA HORATA NINA CANCHI?

4. ¿Ima horata upalla cana capanchi?

4 Parlaita ushashpapash na punlla entero parlashpa yalinachu canchi. Bibliapi nishca shinaca, upalla cangapajpashmi tiempo tian (Ecl. 3:7). Chaimandami, shujcuna parlajujpi ñucanchira satirishpaca na parlana canchi (Job 6:24). Ashtahuanbash, pipash culirachijpi o imatapash na villana cajpita jallu cacharishcata parlanaca nalichu can (1 Ped. 3:10, 11; Prov. 20:19).

5. Parlana ushaitaca ¿imashinata ali utilizana capanchi?

5 Bibliapica ninbashmi, parlangapajpash tiempo tianmi nishpa (Ecl. 3:7). Shuj ali amigo shuj regaloguta carajpica pagui nishpa, chai regalota aliguta utilizashpami agradicishcata ricuchinchi. Ñucanchicunapash Jehová Dios ñucanchiman parlana ushaita carashcata agradicingapaca aligutami utilizana canchi. Shujcunata animashpa, Jehovata jatunyachishpa, ñucanchicuna imata minishtijushcata, imashina sintirishcata paiman villashpami chaitaca pactachinchi (Sal. 51:15). Shinapash, ima horas parlanataca alimi ricuna canchi.

6. Ima horas parlana ali cashcata ricuchingapaca, Bibliaca ¿ima chimbapuraitata churan?

6 ¿Imamandata ima horas parlanataca ali ricuna canchi? Bibliapi nishca shinaca, ali shimicunata ima horas ninata agllanaca, orohuan rurashca manzanacunata imatapash plata nishca materialhuan rurashpa chai jahuapi churashcashnami can (Prov. 25:11, NM). ¿Imatata cai shimicunaca nisha nin? Orohuan rurashca manzanacunaca juyaillami can. Chai manzanacunata plata nishca materialhuan rurashca jahuapi churajpicarin, ashtahuan juyaillagumi ricurin. Ñucanchi parlashcacunahuanbash shinallatami can. Huaquinbica ñucanchicunaca pimanbash ali shimicunata ningapami munanchi. Shinapash, ñucanchi parlashca shimicuna ali cachunga, ima horas parlana ali cashcatami ricuna canchi. Caita intindingapaca shuj ejemplota ricupashun.

7, 8. Japón llactamanda huauquipanicunaca ¿imashinata Jesuspa ejemplota catirca?

7 Ali yuyaita charinaca, imata nigrijushpapash ima horas ali cashcata ricuchunmi ayudanga. Alita nigrijushpapash, ima horas parlana ali cashcata na ricushpaca pitapash na ayudashunllu (Proverbios 15:23, liingui). Shuj ejemplota ricupashun. Marzo de 2011pica, marpi olacuna jahuata jatarishpami Japón llactapa huaquin llactacunata tucuchirca. Chaipica 15 mil yali gentecunami huañurca. Chai llactacunapi Testigocunaca chai jatun llaquita apajushpapash, Bibliamanda parlashpami shuj gentecunataca ayudanajurca. Bibliamanda parlashpapash huañushcacuna causarinamandaca na parlarcachu. ¿Imamandata huañushcacuna causarinamandaca na parlarca? Chai llactapi ashtaca gentecunaca Bibliataca na rijsinllu, buda nishca diosta adorajcunami can. Chaimandami, ñucanchi huauquipanicunaca huañushcacuna causarinamanda na parlarca. Chaipa randica ali shimicunata  nishpa, imamanda ali gentecunata llaquicuna japijta intindichishpami gentecunataca animarca.

8 Jesusca alimi yacharca ima horas parlanata, ima horas na parlana cashcatapash (Juan 18:33-37; 19:8-11). Shuj punllaca, Jesusca paipa apostolcunamanga cashnami nirca: ‘Cangunaman villanataca ashtacatami charini. Shina cajpipash cunanda yachajuitaca na ushanguichichu’ nishpa (Juan 16:12). Japón llactamanda huauquipanicunaca Jesuspa ejemplota catimandami, chai llactapi jatun llaqui tiashcamanda ishcai huata chaupi jipaca, ¿Huañushca gentecunaca cutin causaringacha? nishca tratadohuan shuj campañapi participai usharca. Ashtaca gentecunami chai tratadotaca chasquirca. Chai horasmi gentecunaca huañushcacuna causarinamanda uyangapaj tranquilo carca. Cai Alpapica shuj shuj gentecuna, shuj shuj religiongunami tian. Chaimandami, ñucanchicunapash ima horas parlana cashcataca ali ricuna canchi.

9. ¿Imacunapita ima horas parlana cashcata ali ricuna capanchi?

9 ¿Imacunapita ashtahuan ima horas parlana ali cashcata ricuna canchi? Pipash imatapash nishpa culirachijpica ¿imatashi ruranchiman? Ñapash imatapash nishpaca jipamanga nalimi sintirishun. Chaimandami imatapash nara nishpalla, aliguta pensarishpa imatapash ninacha cani o nacha nina cani nishpa tapurina canchi. Shinallata, imamandashi shina nirca nishpami aligu pensarina canchi. Shina pensarishca jipa imatapash nina cashpapash, culira cashca horasca na imatapash ninachu canchi (Proverbios 15:28, liingui). Na Testigo familiacunahuan parlajushpapash aligutami pensarina canchi. Paicunapash Jehovata rijsichun munashpapash imatapash na culirashpa, aliguta pensarishpami parlana canchi. Aliguta yarishpa, ima horas parlana cashcata ali ricushpaca, paicunapa shunguman chayaita ushashunmi.

¿IMATATA NINA CANCHI?

10. a) Parlagrijushpaca ¿imamandata ali pensarina capanchi? b) ¿Imatata Jesusta catijcunaca na rurana capanchi?

10 Ñucanchi shimicunahuanga cushichita o llaquichitami ushanchi. Chaimandami imata nigrijushpapash ali pensarishpa parlana canchi (Proverbios 12:18, liingui). Cunanbi ashtaca gentecunaca millai nalicunami can. Shuj espadahuan o shuj flechahuan chugrichinshna parlashpami llaquichin (Sal. 64:3). Shina parlanataca peliculacunapi, televisionbi ricushpami yachajun. Shinapash, Jesusta catijcunaca shujcunata asichingapallapash nunca na shina parlajunachu canchi. Huaquinbica parlajushpa imagutapash nishpa shujcunata ashata asichinaca na juchachu can. Shinapash, shujcunata asichingapalla pimandapash burlarina, imatapash nishpa nali sintichinaca nali canllu. Bibliapica yachachinmi, llaquichij shimicunataca na parlanachu canguichi. Chaipa randica shujcunata cushichij, shinlliyachij shimicunatami parlana canguichi nishpa (Efes. 4:29, 31).

11. ¿Imata yaipi charinata juyaihuan, ali shimicunahuan parlachun ayudanga?

11 Jesusca nircami: “Imata rimachumbash shungupi ninanda yarichijujpimi, shimica riman” nishpa (Mat. 12:34). Shinaca, imata parlashpapash ñucanchi shungupi ima tiashcata, shujcunamanda imata pensashcatami ricuchinajunchi. Ñucanchi shungupi shujcunata juyana, llaquina yuyaicunata charishpaca juyaihuan, ali shimicunahuanmi parlashun.

12. Juyailla shimicunahuan parlachunga ¿imata ayudanga?

12 Ñucanchi shimicunaca shungupi ima tiashcata ricuchishpapash, ñucanchi yuyaipi imata pensajushcatapashmi ricuchin. Rey Salomonga alipacha yuyaj cashpapash, aliguta pensarishparami ‘juyailla shimicunataca’ escribirca (Ecl. 12:9, 10). Imashinami ricunchi, juyailla shimicunahuan parlangapaca ninandami esforzarina  canchi. Shinaca ¿imata ayudanga? Bibliata, publicaciongunata liinami juyailla shimicunata yachajuchun ayudanga. Shuj shimita na intindishpaca, chai shimi imata nisha nishcata yachangapami esforzarina canchi. Jesuspa ejemplotapashmi catita ushanchi. Jesusca nircami, llaquilla causaj gentecunata cushichij, shinlliyachij shimicunataca Jehová Diosmi yachachihuarca nishpa (Is. 50:4). Ashtahuanbash, imata nigrijushpapash aliguta pensarishpaca, ali shimicunahuan parlanaca ashtahuan facilmi canga (Sant. 1:19). Shinallata cashna tapuripashunchi: “Chashna nijpica ¿gentecunaca intindihuangacha? ¿Imashinashi sintiringa?” nishpa.

13. ¿Imamandata intindirinalla shimicunahuan parlana capanchi?

13 Israel llactapi imagutapash gentecunaman villangapaca trompetacunatami huacachin carca. Israelitacunaca trompeta imashina huacajta uyashpami yachan carca tandanajuna cashcata, carpa huasicunata alzana cashcata o contracunahuan macanajuna cashcata. Shinapash, trompetacunata maitapash huacachijpica, soldadocunaca imata mandajushcata nali intindishpami llaqui apanman carca. Shinallata, ñucanchicuna na aliguta parlajpi, na ninacunatara nijpica ñucanchihuan parlajcunaca imata ningapaj munashcataca nali intindingachu. Chaimandami, imata ningapaj munashcata ali intindichun munashpapash, na yangata maipash cachunga parlanachu canchi (1 Corintios 14:8, 9, liingui).

14. ¿Imamandata ninchi, Jesusca intindirinalla shimicunata utilizashpami parlarca nishpa? Shuj ejemplota nipai.

14 Jesusca siempremi ali, juyailla shimicunahuan parlan carca. Mateo capítulo 5-7pi Jesús imashina yachachishcata yaripashun. Jesús yachachijushpaca na intindirinalla, millai shimicunahuanga na parlanllu carca. Chaipa randica intindirinalla, rijsishca shimicunata utilizashpa, aliguman parlashpami gentecunapa shunguman chayan carca. Jesusca importante yuyaicunata yachachishpapash, intindirinalla shimicunahuanmi parlan carca. Shuj ejemplota ricushun. Jesusca gentecuna cada punlla micunata charingapaj preocuparijtaca alimi yacharca. Chaimandami gentecuna ama yapata preocuparijuchunga, alasyu animalcunamanda parlashpa Jehová imashina chai animalcunata cuidashcata parlarca. Jipaca Jesusca tapurcami: “¿Nachu cangunaca, chaicunatapash ashtahuan yali valishca canguichi?” nishpa (Mat. 6:26). Shinami Jesusca importante yuyaicunata intindirinalla, juyailla shimicunahuan gentecunamanga yachachirca.

¿IMASHINATA NINA CANCHI?

15. ¿Imamandata juyaihuan parlana capanchi?

15 Imata ninata aliguta pensarishpapash, imashina ninatapashmi ali ricuna canchi. Nazaret llactamanda tandanajui huasipi, Jesús aliguta yachachijujta ricushpaca gentecunaca ninanda cushijushpami quedarca (Luc. 4:22). Ñucanchicunapash aliguta parlajpica, gentecunaca ñucanchi imata nijushcata uyashpami aliguta chasquinga (Prov. 25:15). Shinaca, Jesuspa ejemplota catingapaca ¿imatata rurana canchi? Aliguta, juyaihuanmi parlana canchi. Shinallata, gentecuna imashina sintirijtapashmi yaipi charina canchi. Jesusca paita uyangapaj gentecuna ninanda esforzarijujta ricushpami, paicunata llaquishpa ashtaca cosascunata “yachachi callarirca” (Mar. 6:34). Contracuna plitunajujpipash Jesusca nali shimicunahuanga na tigrachircachu (1 Ped. 2:23).

16. ¿Imashinata Jesuspa ejemplota catishpa ñucanchi familiacunahuan, amigocunahuan parlana capanchi? (Callari dibujota ricupangui.)

16 Ñucanchi rijsicunahuan ali llevarimandaca paicunahuan cashpa juyaihuan, aliguman parlanaca ashtahuan dificilmi can. Ñucanchi familia o shuj ali amigo cajpica, paitaca imatapash ninallami cani yanchimi. Shinapash pensarishunchi. Jesusca paipa apostolcunahuan ali amigocuna caimandaca ¿paicunataca  maipash cachun, imashnapash tratanallami cani yarcachu? Na. Chaipa randica, apostolcuna ñucami ashtahuan importante cani nishpa paicunapura culirarinajujpipash, Jesusca shuj uchila huahuaguta japishpami aliguman parlashpa paicunataca ayudarca (Mar. 9:33-37). Congregacionbi anciano huauquicunacarin, Jesuspa ejemplota catishpami ima consejota cugrijushpapash, juyaihuan parlana can (Gál. 6:1).

17. Aliguta pensarishpa parlanamanda shuj ejemplota nipai.

17 Pipash culirachijpica ¿imatata rurana canchi? Juyaihuan, ali pensarishpami parlana canchi (Prov. 15:1). Shuj ejemplota ricupashun. Shuj paniguca paillami ña solteroyajuj churiguta viñachijurca. Shinapash, churica pacallami nalita rurashpa causajurca. Chaimandami, shuj paniguca alitami nijuni yashpa chai panigutaca nirca:“Llaquimi can, canba churigutaca nali viñachi ushashcanguichu” nishpa. Shina nijpica ¿imatashi chai paniguca rurarca? Nara imatapash nishpallatami aliguta pensarishpa nirca: “Ciertomi ñuca churica nali purijupan. Shinapash, paita ayudangapami esforzarishpa catigripani. ¿Imashpata Armagedón jipa na parlapanchi?” nishpa. Chai panigu aliguta pensarishpa parlashcamandami, ishcandi panigucunapuraca ali llevarishpa catirca. Shinallata, chai panigupa churica paipa mama imashina aliguta parlajujta uyajushcamandami, mama paita juyashcata cuenta japishpa, nali amigocunata saquishpa ali puri callarirca. Jipamanga bautizarishpa, huaquin tiempo yalishca jipaca Betelpi sirvingapami rirca. Shinaca ñucanchi familiahuan, huauquipanicunahuan, na rijsicunahuan parlanajushpapash siempremi cachihuan mishquichishcashna parlana canchi (Col. 4:6).

18. ¿Imashinata Jesuspa ejemplota cati ushapanchi?

18 Ñucanchicuna imata pensashcata, imashi sintirishcata shujcunaman parlai ushanaca, Jehovamanda shuj jatun regalomi can. Chaimandami, Jesuspa ejemplota catishpa imata ninata, imashina ninata, ima horas ninata aliguta pensarishpa parlana canchi. Shinami shujcunata ayudashun, Jehovata agradicishcatapash ricuchishun.