Bibliaca punda tiempo libromi can. Bibliataca 3.500 huatacuna huashamanmi escribi callarirca. Chai tiempocunapica, Shang nishca llactamanda reycunami China llactapica mandanajurca. Shang nishca llacta mandajushcamandaca ashtaca pruebacunami tian. Chai punllacunamanda 1.000 huatacuna jipaca budismo nishca religionmi India llactapica tiai callarirca. ( “Bibliaca ¿imashinata can?” nishca recuadrotapash ricupangui.)

Bibliaca gentecuna yachangapaj munashca tapuicunata yachachunmi ayudan

Maijan libro cashpapash intindirinalla, ali consejocunata charishpaca alimi can. Chaimandami Bibliaca ali libro can. Bibliaca gentecuna yachangapaj munashca tapuicunatami yachachin.

Shuj ejemplota ricupashun: Huaquin gentecunaca cai Alpapi imashina causai tiai callarishcatami yachangapaj munan. Chaita yachangapaj munashpaca Génesis capítulo 1ta, 2tami ricuna can. Chaipi nishca shinaca, “callaripi” o ashtaca millón huatacuna huashamanga ñami cai Alpapash, jahua cielopash, jahua cielomanda ashtahuan jahuaman tiashca estrellacunapash galaxia nishcacunapash tiarca (Génesis 1:1). Ashtahuangarin, cai capitulocunapica yachachinmi, gentecunapash, animalcunapash, plantacunapash cai Alpapi imashina asha asha tiai callarishcata. Shinallata cai Alpapash, jahua cielopash imapa tiashcatami Bibliapa callari capitulocunapica yachachin.

INTINDIRINALLAMI CAN

Bibliaca gentecuna ali causachunmi ali consejocunata cun. Shinapash ¿imamandata chai consejocunaca intindirinalla can? Ishcai yuyaicunata ricupashun.

Bibliapica intindinalla, juyailla, ali uyarijuj consejocunami tian. Ashtahuangarin, intindirinalla shimicunapimi nin imata ruranata. Shinlli yuyaicunatapash jahuallagutami intindichin.

Shuj ejemplota ricupashun. Jesusca gentecunapa shunguman chayangapaj munashpami, shuj punllaca urcuman rishpa gentecunapa causaipi tiashca cosascunamanda parlarca. Chai alipacha yachachishcaca Mateo capítulo 5, 6, 7pimi tiajun. Bibliamanda parlashpaca shuj runaguca nircami, Mateo capítulo 5manda 7camanga imata ruranata, imashina causanatami yachachijun. Na yanga parlocunallachu can. Alipacha discursomi can” nishpa. Chai quimsa capitulocunataca 15 ó 20 minutocunapi liinallami can.  Ashalla shimicuna cashpapash gentecunapa shungu ucucamanmi chayaita ushan.

Bibliaca yanga parlocunatalla, cuentocunatalla parlaj libroca na canllu. Chaimandami Bibliataca jahualla intindi usharin. Shuj enciclopedia libroca ninmi, Bibliaca “gentecuna macanajushcata, autoridadta charij gentecunapash na autoridadta charij gentecunapash imata ali rurashcata, imashina pandarishcatami parlan” nishpa. Bibliapi parlashca cosascuna, gentecunaca ciertopachami tiashca. Tucuicunatami ayudai ushan. Ashtahuangarin, Bibliapi parlashca gentecunamandaca ali yuyaicunatami yachajui ushanchi, intindirinallami can (Romanos 15:4).

TUCUICUNAMI CHARI USHANCHI

Shuj librota lii ushangapaca gentecuna parlashca shimipimi cana can. Chaimandami Bibliataca maipi causashpapash quiquin parlashca shimipi chari ushapangui. Shinapash ¿imashinata ashtaca shimicunapi tiashca? Ricupashun.

Traducción. Bibliataca hebreo, arameo, griego nishca shimicunapimi callaripica escribirca. Chaimandami huaquin gentecunalla Bibliataca liin carca. Shinapash jipa huatacunamanga ashtaca traductorcunami shuj shuj shimicunaman traducingapaj esforzarinajushca. Chaimandami Bibliapa huaquin librocunatalla cashpa o tucuilla librocunata cashpapash 2.700 yali shimicunaman traducishca tian. Shinaca, mundo enteropica casi tucuilla gentecunami Bibliapa huaquin librocunatalla cashpapash paicunapa shimipi liita ushan.

Ashtacatami mirarca. Callaripica papiro nishca fangacunapi, animal caracunapimi Bibliataca escribirca. Shinapash chaicunaca huaglishpa tucurinallami carca. Chaimandami Bibliapa punda escribishcacuna parachunga cutin cutin copiacunata ruran carca. Chai copiacunaca valishcapachami carca. Chaimandami huaquin gentecunalla chai copiacunataca randi ushan carca. Jipamanga Gutenberg nishcami imprenta maquinata llujchirca. Chaimandami Bibliapa copiacunaca ñapash mirarca. Cunangamanga casi 5 mil millón Bibliacunatami imprimishca.

Bibliashna shuj libroca na tianllu. Bibliatallami ushashcata imprimishca. Tucui gentecunami Bibliataca chari ushan. Intindina ashata shinllilla ricurijpipash Bibliata intindichun ayudajcunaca tianmi. ¿Picunata can? ¿Maipita tari ushanchi? Chaitaca shamuj temapimi yachajupashun.