“Jesusca viñashpandi, aliguta yachajushpandimi catijurca. Shinallata Taita Diospash, gentecunapash ninanda juyajpimi causajurca.” (LUC. 2:52)

CÁNTICO 41, 11

1, 2. a) ¿Imamandata solteroyajuj huahuacunata charij taitamamacunaca ninanda pinarin? b) Solteroyajuj huahuacunaca ¿imatata rurai ushan?

JESUSTA catij taitamamacunaca huahuacuna bautizarijpica ninandami cushijun. Berenice paniguca chuscu huahuacunatami charin. Paipa huahuacunaca nara 14 huatacunata charishpallatami bautizarirca. Paica ninmi: “Ñucanchi huahuacuna bautizarishca punllataca nunca na cungashunllu. Paicunapash Jehovata sirvingapaj munashcata ricushpaca ninandami cushijurcanchi. Shinapash, huahuacuna solteroyanajushpa problemacunata charinatapash yacharcanchimi” nishpa. Quiquinbash solteroyajuj o viñarijuj huahuacunata charishpaca, Berenice panigu ima nishcataca intindinguimi.

2 Shuj sicologoca ninmi, huahuacuna solteroyajujpica paicunapapash, taitamamacunapapash shinllimi can nishpa. Huaquin taitamamacunaca yanmi solteroyajuj huahuacunaca imacunatapash yangata, uchila huahuacunashna ruranllami nishpa. Shinapash sicologoca ninmi, huahuacunaca chai edadpimi imacunatapash rurangapaj munan, paicunapa yuyaicunapash, munaicunapash cambian. Amigocunahuanmi tiempota yalingapaj munan nishpa. Huahuacunaca chai edadpimi ashtahuan villachita, Jehovaman quimirita, bautizarita ushan. Paicunallata ali decisiongunata agllanatapash yachajui ushan. Ashtahuanbash,  Jesús shinami ali amigocunata agllai ushan (Lucas 2:52, liingui). Shinaca, solteroyajuj huahuacunata charishpaca ¿imashinata paicunapash Jehovata sirvichun ayudai ushanguichi? Jesuspa ejemplota catishpami taitamamacunaca huahuacunamanga juyaita, humilde cashcata, paicunata intindishcata ricuchina canguichi.

JUYAITA RICUCHIPAI

3. ¿Imamandata ninchi, Jesusca paipa catijcunahuanga ali amigocunami carca nishpa?

3 Punda tiempopi gentecunaca, paicunapa esclavocunamanga imata rurangapaj munashcata o imashina sintirishcataca na parlanllu carca. Shinapash, Jesusca paipa catijcunata mandana derechota charishpapash, amigocunata shinami juyaihuan tratan carca (Juan 15:15, liingui). Shinallata, Jesusca paipa catijcunaman pai imashina sintirishcata parlangapaj, paicunahuan yalingapaj, paicuna imashina sintirishcata uyangapami tiempota llujchin carca (Mar. 6:30-32). Jesús shina tratajpimi paipa catijcunaca Jesushuan ali amigocuna carca, jipa punllacunapi jatun responsabilidadcunata chasquingapajpash listo carca.

4. Taitamamacunaca ¿imashinata huahuacunapa amigo caita ushan? (Callari dibujota ricupangui.)

4 Michael huauquica shuj churita, shuj ushitami charin. Paica ninmi: “Taitacunaca huahuacunata mandana derechota charishpapash, paicunapa amigocuna caita ushanmi” nishpa. Huahuacunapa amigo cangapaca ¿imatata taitamamacunaca rurana can? Huahuacunahuan yalingapaj trabajomanda o shuj ruraicunamanda tiempota llujchinaca minishtirishcapachami can. Chaipaca Jehová Diostami mañana can. ¿Imatata ashtahuan rurana can? Huahuacuna imata gushtashcatami ricuna can. Pensaripai: Quiquinba huahuacunaca ¿ima musicata, ima pugllaita o ima peliculatata gushtan? Italia llactapi causaj Ilaria shuti panigupa taitamamacunaca pai imata gushtashcatami ricun carca. Paica ninmi: “Ñuca taitamamacunaca ñuca ima musicata uyajtami paicunapash uyan carca. Ñuca taitaca ñucapa ali amigomi tucurca. Chaimandami, ñuca taitahuanga imatapash parlanlla carcani” nishpa. Taitamamacunaca na pensanachu canguichi, Jehovaman huahuacuna quimirichun paicunapa amigo tucushpaca, mandana derechota ñana charishunllu nishpa (Sal. 25:14). Huahuacunapa amigo cajpica, confianzata quiquingunapi charishpa, paicunata juyashcata sintishpami quiquingunataca respetashpa imata nijpipash cazunga. Ima problemata charishpapash na manllashpami quiquingunahuan parlanga.

5. Cushilla causangapaca ¿imatata Jesuspa catijcuna rurana carca?

5 Jesusca Jehovata sirvishpa, villachishpami cushilla causarca. Paipa catijcunapash shinallata causachunmi munarca. Chaimandami, Jesusca paicunataca shujcunaman villachinapi, yachachinapimi ashtahuan ocuparina canguichi, cangunataca siempremi ayudajusha nirca (Mat. 28:19, 20).

6, 7. ¿Imamandata ninchi, espiritual cosascunata rurangapaj arreglota charishpaca, taitamamacunaca huahuacunata juyashcatami ricuchin nishpa?

6 Quiquinba huahuacunapash Jehovapa ali amigo cachun munanguipashchari. Jehová Diospash huahuacunaman paimanda yachachichun, ali ñanda pushachunmi munan (Efes. 6:4, NM). Chaimandami, huahuacunamanga Bibliamanda cutin cutin yachachina cangui. Pensaripai: ¿Imamandata huahuacunataca escuelaman cachangui? ¿Nachu paicunataca shamuj punllacunapi ali causachun nishpa, ali yachajuchun nishpa escuelamanga cachangui? Jesusta catij taitamamacunapash huahuacuna Jehovamanda yachajushpa, shamuj punllacunapi imata ruranata yachajuchunmi munan. Chaimandami huahuacunapash tandanajuicunaman, Jatun Tandanajuicunaman richun, Familiahuan Adorana Tutapi cachun ninanda esforzarin (Prov. 24:14). Imashinami paipa catijcunata Jesús yachachirca, shinallatami huahuacunataca ali villachichun yachachina can. Shinaca ¿imata rurana capangui? Huahuacuna villachichun, gentecunahuan Bibliamanda parlana munaita charichunmi ayudana cangui.

7 Tucui semanacuna villachingapaj, Bibliata yachajungapaj,  tandanajuicunaman ringapaj huahuacunata ayudanaca ¿alichu can? Sudáfrica llactamanda Erin shuti paniguca ninmi: “Ñucapash ñuca turicunapash villachinata, Bibliamanda yachajunata, tandanajuicunaman rinataca na gushtanllu carcanchi. Huaquinbicarin Familiahuan Adorana Tutata ama charingapami imatapash ruran carcanchi. Shinapash, ñuca taitamamacunaca ñucanchicunata yachachinataca nunca na saquircachu. Chaimandami ñucapash chai ejemplota catishpa, cunanbica espiritual cosascunata ruranataca nimamanda na saquingapaj munani. Ñuca taitamamacuna yachachingapaj na esforzarishca cajpica, tandanajuiman na rishpapash na llaquirimanllu” nishpa.

HUMILDECUNA CAPAICHI

8. a) ¿Imashinata Jesusca humilde cashcata ricuchirca? b) ¿Imashinata Jesuspa ejemploca paipa catijcunata ayudarca?

8 Jesusca jucha illaj cashpapash na tucuita rurai ushashcata, Jehovapa ayudata minishtishcatami ricuchirca (Juan 5:19, liingui). Chaimandami paipa catijcunaca Jesusta ashtahuan respetashpa, paipi confianzata charin carca. Jipa punllacunacarin, Jesuspa ejemplota catishpami paicunapash humilde cashcata ricuchirca (Hech. 3:12, 13, 16).

9. Imapi pandarishpapash humilde cashcata ricuchij taitamamacunataca ¿imashinata huahuacunaca ricun?

9 Ñucanchicunaca juchayu caimandami imapipash pandarinchilla. Chaimandami, taitamamacunaca imapipash pandarishpaca juchayu cashcata yarishpa, humilde cashcata ricuchina can (1 Juan 1:8). Pensaripai: Quiquinba jefetaca ¿imamandata respetanguiman, ñucapash pandarinimi disculpahuai nijpi o tucuita yachaj tucushca cajpi? Huahuacunahuanbash shinallatami can. Quiquinguna imapipash pandarishpa disculpahuai nijpica, quiquindaca ashtahuanmi respetanga. Paicunapash imapipash pandarishpaca disculparinatami yachajunga. Rosemary paniguca shuj churita, ishcai ushicunatami charin. Paica ninmi: “Ñucanchicuna imapipash pandarishpa disculparijpica, huahuacunaca ñucanchipi confianzata charishpami paicunapa problemacunata parlan carca. Shinallata, paicuna imatapash tapujpica na tucuita contestai ushanllu carcanchi. Chaimandami, paicunallata huaquin problemacunata arreglachun yachachircanchi. Ashtahuan ayudachun minishtijpica publicaciongunahuan, paicunahuan igual Jehovata mañashpami ayudan carcanchi” nishpa.

10. Jesusca paipa catijcunata mandashpapash ¿imashinata humilde cashcata ricuchirca?

10 Jesusca paipa catijcunata mandana derechota charircami. Shinapash, imata mandashpapash imamanda cazuna cashcata intindichishpami humilde cashcata ricuchirca. Por ejemplo: Diospa Reinota, Diospa justiciata pundapi churashpa causana canguichi nishpapash, Jesusca intindichircami “shina causajpica, tucui chaicunata canguna munashcataca jahuan jahuan caramujungallami” nishpa. Cutin shuj viajeca Jesusca nircami, na shujcunataca nalicachishpa ricujunachu canguichi nishpa. Shina nishca jipaca, “shujcunata imashnami nalicachinguichi, chashnallatami cangunatapash Diosca llaquichinga. Shujcunata imata rurajpipash, chashnallatami cangunamambash Diosca mirashpa tigrachinga” nishpami intindichirca (Mat. 6:31–7:2).

11. Imata nishpapash ¿imamandata taitamamacunaca huahuacunamanga ali intindichina can?

11 Solteroyajuj huahuacunaca taitacuna imamanda imatapash nijujta o mandajujta ali intindishpaca facilmi cazunga. Chaimandami, quiquingunaca imata mandashpapash imamanda shina mandajushcata intindichina canguichi. Sudáfrica llactapi causaj Barry shuti huauquica chuscu huahuacunatami charin. Paica ninmi, solteroyajuj huahuacunaca taitamamacuna imata decidishpapash ali intindichijpimi, paicunaca taitamamacunapi confianzata charin nishpa. Taitamamacunaca huahuacuna ñana uchila cashcatami intindina canguichi. Chaimandami, imata decidishpapash paicunaman intindichichun minishtin. Huahuacunaca aliguta pensarishpa imatapash  ruranatami yachajunajun. Barry huauquica ninbashmi: “Imata ruranatapash na yangata musparishpa ruranatami solteroyajuj huahuacunaca yachajuna can” nishpa (Sal. 119:34). Chaimandami, taitamamacunaca huahuacunaman imata nishpapash humilde cashcata ricuchishpa ali intindichina canguichi. Shinami, huahuacunaca paicunata respetashcata sintishpa paicunallata ali decisiongunata agllanata yachajunga.

SOLTEROYAJUJ HUAHUACUNATA INTINDIPAICHI

12. ¿Imashinata Jesusca apóstol Pedrotaca ayudarca?

12 Jesusca paipa catijcunata imapi ayudanataca alimi yacharca. Shuj viajeca, apóstol Pedroca Jesustaca nircami, na huañuchichun saquinachu cangui nishpa. Jesusca alimi yacharca, juyaimanda Pedro shina nijushpapash pandata nijushcata. Shinaca ¿imashinata Pedrotapash, shujcunatapash Jesusca ayudarca? Pundapica Jesusca Pedrotaca tacurircami. Jipaca, llaquicuna ricurijpi Taita Diospa munaita na pactachijcunahuan ima tucunatami intindichirca. Chai jipaca, Diospa munaita pundapi churajcunaca bendiciongunata chasquinatami parlarca (Mat. 16:21-27). Shina yachachishcamandami Pedroca ali yachajurca (1 Ped. 2:20, 21).

13. Huahuacuna espiritualmente chiriyajujtaca ¿imashinata ricui ushapangui?

13 Solteroyajuj huahuacunata intindingapaj, ayudangapaca taitamamacunaca Jehovapa ayudatami mañana can (Sal. 32:8). Pensaripai, huahuacuna espiritualmente chiriyajujtaca ¿imashinata ricui ushanguiman? Huaquin huahuacunaca aburridomi sintirin, paicunalla cangapami munan. Huauquipanicunamandapash nalita parlan o imatapash nalita rurajuj shinami purin. Shinata ricushpaca na ñapash yanachu can, cai huahuaca imatapash pacallami rurajun, juchatami rurashca yarin nishpa. Shinapash, ñallami yalichinga nishpaca na yangata saquinachu can. *

Huahuacuna congregacionbi ali amigocunata charichun ayudaichi (Párrafo 14ta ricupangui.)

14. Huahuacuna imata pensajta, imashina sintirijta yachangapaca ¿imatata taitamamacunaca rurana can?

14 Huahuacuna ima pasajujta yachangapaca, Jesuspa ejemplota catishpami taitamamacunaca aliguman, respetohuan tapuchina can. Pensarishun, shuj pozomanda yacuta valdehuan llujchijushpa, cabiata yangata aisajpica yacuca casi gulpimi jicharinman. Huahuacunahuanbash shinallatami pasan. Quiquingunahuan parlachun nishpa yangata  tapuchijujpillaca, huahuacunaca imata pensashcata, shungupi imashina sintirishcataca na parlangachu (Proverbios 20:5, liingui). Ilaria paniguta yaripashunchi. Paica ninmi: “Solterayajushpaca congregacionbi turiñañacunahuan cangapaj munashpapash, colegiopi cumbacunahuanbashmi cangapaj munan carcani. Chaimandami nali sintirin carcani. Ñuca taitamamacunaca chaita cuenta japishpami, shuj tutaca imamandata llaquilla cangui, imapash problemata charinguichu nishpa tapuhuarca. Ñucaca huacai callarishpami imashina sintirishcata parlashpa ayudahuaichi nircani. Ñucata ugllashpami can imashina sintirishcataca intindinchimi, candaca ayudashunmi nihuarca” nishpa. Chai panigupa taitamamacunaca uchallami congregacionbi huauquipanicunahuan ali amigocuna tucuchun ayudarca.

15. Jesusca ¿imashinata shujcunata intindishcata ricuchirca?

15 Jesusca paipa catijcuna imata rurai ushashcata, imata na rurai ushashcatapash alimi yacharca. Natanael runaguhuan ima pasashcata ricushun. Nazaretmanda Jesús shamujujta uyashpaca Natanaelca nircami: ‘¿Nazaret pueblomandaca ima alipash Ilujshingacha?’ nishpa (Juan 1:46). Shina nishpaca, Natanaelca ¿feta na charishcata, nali yuyaita charishcatami ricuchirca ninguimanllu? Shinapash Jesusca na shina pensarcachu. Paica ñavitallaca na ricunllu carca. Chaipa randica ima ali cualidadcunata charishcatami ricun carca. Chaimandami Jesusca nirca: Natanaelca ali, ‘umachinata na yachaj’ runagumi can nishpa (Juan 1:47). Jesusca gentecunapa shungupi ima tiashcata yachaimandami, gentecuna ima ali cualidadcunata charijta ricun carca.

16. Huahuacuna esforzarishpa catichunga ¿imashinata taitamamacunaca ayudaita ushan?

16 Quiquingunaca huahuacunapa shungupi ima tiashcataca na yachai ushanguichichu. Shinapash, Jehovapa ayudahuanga huahuacuna imata pensajta yachai ushanguichimi. Quiquingunaca huahuacunapa ali cualidadcunatami ricuna canguichi. Huahuacunataca na ninachu canguichi, imapapash na valinguichu, nunca na cambianguichu nishpa. Chaipa randica, imatapash rurangapaj esforzarijujta ricushpami, alitami rurajungui nishpa cushichina canguichi. Ashtahuanbash, asha ashami imagutapash rurachun mingashpa paicunallata responsablecuna cachun ayudana canguichi. Jesusca shinami paipa catijcunataca yachachirca. Paipa catijcunapurapica Natanaelpashmi carca (paica Bartolomé shutitapashmi charirca). Paita rijsishcamanda shuj huata chaupi yalishca jipaca, Jesusca Natanaeltaca apóstol cachunmi agllarca. Jesús imata mingajpipash Natanaelca tucuitami ali pactachirca (Luc. 6:13, 14; Hech. 1:13, 14). Chaimandami, quiquingunaca solteroyajuj huahuacunata animanata, alitami rurajungui nishpa cushichinataca na cungana canguichi. Shinami huahuacunaca imatapash nali rurajunichu yanapa randica, Jehová Diospa ñaupajpi valishca cashcata sintinga.

HUAHUACUNATA ALI YACHACHISHPACA NINANDAMI CUSHIJUNGUICHI

17, 18. Huahuacunata ali yachachishpaca ¿imashinashi sintiringui?

17 Apóstol Pabloca ashtaca huauquipanicunapaca taita cuendami carca. Paicunata ninanda juyaimandami pinarin, llaquirin carca. ¿Nachu casi tucui taitamamacunaca apóstol Pablo shina sintiringuichi? (2 Cor. 2:4; 1 Cor. 4:15.) Huauqui Victorca ishcai churicunata, shuj ushitami viñachirca. Paica ninmi: “Huahuacuna solteroyajpica shinllimi carca. Shinapash huaquinbi llaquilla cashpapash, ashtaca viajetami cushilla yalircanchi. Jehovami ñucanchi huahuacunahuan ali amigocuna tucuchun ayudarca” nishpa.

18 Taitamamacuna, huahuacuna Jehovamanda ama caruyachun yachachinataca nunca na saquinachu canguichi. Paicunata juyashcatapash ricuchinami canguichi. Quiquingunapa huahuacuna Jehová Diosta ali sirvinajujta, ‘aliguta catinajujta’ ricushpaca ninandami cushijunguichi (3 Juan 4).

^ par. 13 Lo que los jóvenes preguntan. Respuestas prácticas, volumen 1 libropa página 317pi, volumen 2 libropa página 136-141pimi huaquin ali yuyaicuna tian.