Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista  |  Octubre de 2015

“Ali crina ushaita carahuai”

“Ali crina ushaita carahuai”

“Ashtahuan tucui shunguhuambacha cringapaj ayudahuai.” (MAR. 9:24)

CÁNTICO 54, 24

1. ¿Imamandata feta charinaca minishtirishcapacha can? (Callari dibujota ricupangui.)

TUCUICUNAMI huaquinbica cashna tapuripashcanchi: “Jatun Manllanai Llaqui Punllacuna shamujpica ¿Jehová Diosca salvahuangacha?” nishpa. Cai mundopa nali ruraicuna tucurijpi salvaringapaca, huaquin cosascunatami pactachina canchi. Ashtahuanbachaca Hebreos 11:6pi consejotami pactachina canchi. Chaipica ninmi: “Taita Diospajman quimiringapaj pipash munashpaca, pai tiajtaca crinapachami” can nishpa. Crina o feta charina facilshnalla cajpipash, na tucuicuna feta chari ushanllu. Chaimandami, 2 Tesalonicenses 3:2pica nin: “Na tucuicuna cringapaj munanllu” nishpa. Imashinami cai ishcai textocunapi ricunchi, shinlli feta charinaca minishtirishcapachami can.

2, 3. a) ¿Imamandata feta charinaca minishtirishcapacha can? b) ¿Ima tapuicunatata yachajupashun?

2 Apóstol Pedroca nircami, ‘alipacha crishpa catijushcataca ricuchinami’ can nishpa (1 Ped. 1:7, Mushuj Testamento Quichua Imbabura). Jatun Manllanai Llaqui Punllacuna ñalla chayamunata yachashpami, salvaringapaca “aligutapacha crijpuracuna” cana canchi (Heb. 10:39). Chaimandami, ñucanchi fe shinlli cachun esforzarina canchi. Chaimi nali mundota tucuchijushpaca, Jesusca ñucanchita salvanga. Ñucanchicunapash “ashtahuan tucui  shunguhuambacha cringapaj ayudahuai” nishpami, Jesusta shuj runa mañashcashna mañana canchi. Apostolcunapash Jesustaca cashnami nirca: “Ashtahuan ali crina ushaita carahuai” nishpa (Luc. 17:5).

3 Cai temapica cai tapuicunatami yachajushun: “Fe shinlli cachunga ¿imatata rurana canchi? Feta charishcataca ¿imashinata ricuchi ushanchi? Ashtahuan feta charingapaj mañajpi Jehová Dios uyajtaca ¿imashinata yachanchi?”.

JEHOVÁ DIOSCA SHINLLI FETA CHARICHUNMI MUNAN

4. ¿Picunapa ejemplota ñucanchi fe shinlli cachun ayudanga?

4 Bibliapica ninmi: “Ñucanchi yachajuchunmi, Diosca ñaupallata escribichishca” nishpa (Rom. 15:4). Chaimandami Bibliapica feta charishca jaricuna, huarmicunamanda parlan. Huaquingunaca Abrahán, Sara, Isaac, Jacob, Moisés, Rahab, Gedeón, Baracmi can. Paicunamanda liinaca ñucanchi fe shinlli cachunmi ayudanga (Heb. 11:32-35). Cunan punllacunapi shinlli feta charishca huauquipanicunamandapashmi yachajui ushanchi. *

5. a) ¿Imashinata Eliasca shinlli feta charishcata ricuchirca? b) Eliaspa ejemploca ¿imashinata ñucanchicunataca ayudan?

5 Bibliapica tauca ejemplocunami tian. Profeta Elías shinlli feta imashina ricuchishcata ricupashun. Eliasca rey Acabtaca nircami, Jehová Diosca ñana tamiachingachu nishpa. Jehová nishcata tucui shunguhuan crishpami Eliasca cashna nirca: ‘Taita Diosca causajunbachami. Cai huatacunapica na tamiangachu, jamzi paramullapash na urmangachu. Ñuca mandajpillami tamianga’ nishpa (1 Rey. 17:1). Shinallata Eliasca paitapash, shujcunatapash chai huatacunapi Jehová Dios cuidanatami crirca (1 Rey. 17:4, 5, 13, 14). Cutin shuj viajeca, Eliasca shuj viuda huarmigupa churita Jehová Dios ciertopacha causachinata crishpami mañarca (1 Rey. 17:21). Cutin Carmelo urcupi cashpaca, jahua cielomanda ninata cachamushpa sacrificiocunata Jehová rupachinatami, Eliasca tucui shunguhuan crirca (1 Rey. 18:24, 37). Shinallata, ña tamiana punlla chayagrijujpica, Eliasca Jehová Dios tamiachi callarinata tucui shunguhuan crishpami, rey Acabtaca cashna nirca: “Micushpa, ufiashpa tiajungapaj vichai rilla. Ñamari ninan tamia uyarimujun” nishpa (1 Rey. 18:41). Eliasmanda liishpaca cashnami tapurina capanchi: ¿Ñucanchi fepash Eliaspa fe shinachu can? nishpa.

¿IMASHINATA FETA SHINLLIYACHINA CANCHI?

6. Feta shinlliyachingapaca ¿imatata minishtipanchi?

6 Shinlli feta charingapaca, Jehová Diostami paipa espíritu santota cuchun mañana canchi. Espíritu santomi ñucanchi fe shinlli cachun ayudanga (Gál. 5:22). Jesuspash ashtahuan espíritu santota mañanguichi nircami. Paipa consejota catishpami ñucanchicunapash Jehovata mañana canchi. Jesusca nircami, imata mañajpipash Jehová Diosca uyangami nishpa (Luc. 11:13).

7. Ñucanchi fe shinlli catichunga ¿imatata rurana capanchi? Shuj chimbapuraita parlapai.

7 Ñucanchi fe ña shinlli cajpica, shinlli catichunmi ricuriana canchi. Ñucanchi feca nina cuendami can. Ninata japichijpica ninaca ninandami rupai callarin. Shinapash, na yamdata catichijpica, ninaca asha asha huañushpami uchufalla quedan. Cutin yamdata catichiriajpica ninaca rupajungallami. Ñucanchi fepash shinlli catichunga, yamdata catichijuj cuendami cada punlla Bibliata liina, yachajuna canchi. Shinami Bibliatapash, Jehová Diostapash  ashtahuan juyashun. Ñucanchi fepash shinllimi catinga.

8. Ñucanchi fe shinlli cachunga ¿imata ashtahuan ayudanga?

8 Imashinami yachajushcanchi, nara bautizarishpa yachajushcahuanllaca na quedanachu canchi (Heb. 6:1, 2). Bibliapi profeciacuna ña pactarishcata yachajushpa catinami, ñucanchi fe shinlli cachun ayudanga. Bibliata yachajushpapash ñucanchi causaipi shinlli feta charishcata ricuchingapami esforzarina canchi (Santiago 1:25; 2:17, 24, liingui).

9, 10. Shinlli feta charichunga: a) ¿imashinata ñucanchi huauquipanicunaca ayudan? b) ¿imashinata tandanajuicunaca ayudan? c) ¿imashinata villachinaca ayudan?

9 Apóstol Pabloca nircami: ‘Shujmanda shujmanda yarichirina’ animarinami canguichi nishpa (Rom. 1:12). Huauquipanicunahuan canaca, randimanda feta shinlliyachichunmi ayudan. Llaquicuna ricurijpipash ñaupaman catij huauquipanicunacarin ashtahuanmi ayudan (Sant. 1:3). Ali amigocunaca ñucanchi fe shinlli catichunmi ayudan. Cutin nali amigocunaca asha ashami ñucanchi feta huañuchin (1 Cor. 15:33, NM). Chaimandami Bibliapica nin, tandanajuicunamanga na faltanachu canguichi nishpa. Tandanajuicunapimi ‘caishujmanda chaishujmanda aliguta yarichirita’ ushanchi (Hebreos 10:24, 25, liingui). Ashtahuanbash, tandanajuicunapi yachajunami ñucanchi feta shinlliyachun ayudan. Chaimandami apóstol Pabloca nirca: “Villajujta uyashpallami crinajun” nishpa (Rom. 10:17). Shinaca tapuripashunchi: ¿Tucui tandanajuicunamanllu rijuni? nishpa.

10 Shujcunaman villachinapash gentecunapa feta shinlliyachingapaj, ñucanchi feta shinlliyachingapajpashmi ayudan. Shujcunaman villachinami Jesusta punda catijcuna shina Jehová Diospi confiachun, na manllashpa villachichun ayudashca (Hech. 4:17-20; 13:46).

11. a) Josuepash Calebpash ¿imamandata shinlli feta charirca? b) Paicunapa ejemplota catingapaca ¿imatata rurana capanchi?

11 Ñucanchi mañaicunata Jehová Dios uyashpa imashina ayudajta ricushpaca, ñucanchi feca ashtahuanmi shinlliyan. Canaán alpacunata chapangapaj rijpica, Josuetapash Calebtapash shinlli feta charinami ayudarca. Shinallata, tucui paicunapa causaipi Jehová Dios cutin cutin ayudajta ricunami paicunataca ashtahuan shinlli feta charichun ayudarca. Chaimandami, Josueca israelitacunataca cashna nirca: “Cangunata Mandaj Taita Diosca, pai imashna aliguta rurasha nishcataca tucuitami pactachishca” nishpa. Ashtahuanbash nircami: ‘Mandaj Diosta manllashpa, ima nalitapash na rurashpa, na llullashpa paitalla sirvishpa causaichi. Ñucahuan, ñuca familiacunahuanga Mandaj Diostami sirvishpa causashun’ nishpa (Jos. 23:14; 24:14, 15). Ñucanchi fepash shinlliyashpa catichunga, Jehová Diospi confiashpami ñucanchita juyashcata crina canchi (Sal. 34:8).

FETA CHARISHCATACA RICUCHINAMI CANCHI

12. ¿Imashinata shinlli feta charishcataca yachai ushapanchi?

12 ¿Imashinata shinlli feta charishcataca yachai ushanchi? Discípulo Santiagoca nircami: “Ñuca crij cajtaca, alita ruranacunata rurajushcahuanmi ricuchisha” nishpa (Sant. 2:18). Shinaca, ñucanchi ruraicunahuanmi shinlli feta charishcata o na shinlli feta charishcataca ricuchinchi. Huaquin ejemplocunata ricushun.

Villachingapaj ninanda esforzarishpaca shinlli feta charishcatami ricuchinchi (Párrafo 13ta ricupangui)

13. ¿Imamandata ninchi, villachishpaca shinlli feta charishcatami ricuchinchi nishpa?

13 Ñucanchi fe shinlli cashcata ricuchingapaca villachinami canchi. ¿Imamandata shina ninchi? Tucuri punllaca ñallami chayamunga, “na unayangachu” nishpa  villachingapaca fetami minishtinchi (Hab. 2:3). Chaimandami cashna tapurina canchi: “¿Villachinaca ñucapaca importantechu can? ¿Tucuicunahuan Bibliamanda parlangapaj esforzarinichu?” nishpa (2 Cor. 13:5). Imashinami yachajushcanchi, ‘quishpiringapaj villachishpaca’ shinlli feta charishcatami ricuchishun (Romanos 10:10, liingui).

14. ¿Imashinata ñucanchi causaipi feta charishcata ricuchi ushapanchi?

14 Imapash llaquicuna ricurijpi aguantashpapashmi shinlli feta charishcata ricuchinchi. Desanimarishca cashpa, ungushca cashpa, pobre cashpa o llaqui llaqui parajushpaca Jehová Diospash, Jesuspash ñucanchi minishtishca horas ayudanapimi confiana canchi (Heb. 4:16). Feta charishpaca espiritualmente ali cangapaj, ñucanchi causaipi imaguta minishtishpapash Jehová Diosta ayudahuai nishpami mañashun. Jesusca nircami, “ñucanchi micunagutaca, cunan punllagupash carahuailla” nishpami mañana canguichi nishpa (Luc. 11:3). Ñucanchicunata Jehová Dios imashina ayudanataca Bibliapica cutin cutinmi ricunchi. Eliasta cutin yarishun. Israel llactapi unaita na tamiajpica, yacupash micunapash Eliaspa ama faltachunmi Jehová Diosca ricuriarca. Bibliapi nishca shinaca, Eliasmanga ‘cuervo nishca animalcunaca tutamandapash tandata aichata, chishipash tandata aichatallatami apamun carca. Yacutapash chai jatun larcamandami ufian carca’ (1 Rey. 17:3-6).

Ima problema japijpipash aguantashpaca shinlli feta charishcatami ricuchinchi (Párrafo 14ta ricupangui)

15. Rebecca panigupash paipa familiapash ¿imashinata shinlli feta charishcata ricuchirca?

15 Jehová Diosta sirvijcunaca, Bibliapi mandashcacunata cazushpaca, minishtirishca cosascuna nunca na faltanataca alimi yachanchi. Asia llactapi shuj familiahuan ima pasashcata ricupashun. Rebecca shuti paniguca, paipa familiandimi Mateo 6:33pi mandashcashna Jehová Diospa munaita pundapi churarca. Chai munaita pactachingapaca, Proverbios 10:4pi nishca shinami ninanda esforzarirca. Rebecca paniguca ninmi, ñuca cusaca paipash espiritualmente ali cangapaj, familiapash ali cachunmi trabajomanda llujshina tucurca. Shinapash, chuscu huahuacunatami mantinina carcanchi. Chaimandami micunata  yanushpa jatui callarircanchi. Ñami tauca huatacunata shina causanchi. Shinapash Jehová Diosca nunca na saquishcachu, micunagupash ima horapash na faltashcachu nishpa. ¿Ima horapash cai familia cuenda feta charishcata ricuchita ushashcanguichu?

16. Jehová Diospi confiashpaca ¿imashinashi causashun?

16 Jehová Diosta cazunaca ñucanchipallatami ali can. Chaitaca nunca na cunganachu canchi. Apóstol Pabloca Habacucpa shimicunata yarishpami cashna nirca: “Imatapash [alita] ruraj runaca, crishcamandallami causanga” nishpa (Hab. 2:4; Gál. 3:11). Ñucanchicunaca tucui shunguhuanmi Jehová Dios ayudanapi feta charina canchi. Apóstol Pabloca Jehová Diosmanda parlashpaca nircami: “Imaguta japingapaj yarijujtapash ashtahuan yalita rurangapajmi, ushaita charin” nishpa (Efes. 3:20). Jesusta catijcunaca Jehová Diosta cushichingapami ninanda esforzarinchi. Shinapash, ñucanchicuna na tucuita ali rurai ushashcataca alimi yachanchi. Chaimandami Jehová Dios ayudanapi confianchi. Jehová Dios ñucanchicunata ayudanata yachashpaca ¿nachu ninanda agradicinchi?

FETA CHARINGAPAJ JEHOVATA MAÑAJPICA UYANGAMI

17. a) ¿Imashinata Jesuspa catijcunapa mañaica pactarirca? b) ¿Imashinata yachanchi feta charingapaj mañajpica Jehová Dios uyanata?

17 Cai temata yachajushca jipaca, Jesusta catijcunashnachari ñucanchicunapash ninchi: “Ashtahuan ali crina ushaita carahuai” nishpa (Luc. 17:5). Chai mañaica huata 33 Pentecostespimi pactarirca. Chaipimi, Jesusta catijcunaca espíritu santota chasquishpa, Jehová Diospa munai ima cashcata ali intindirca. Chaimandami paicunapa fe shinlliyajpi ashtahuan villachi callarirca (Col. 1:23). Ñucanchicunapash ashtahuan feta charingapaj mañajpica ¿Jehová Diosca uyangacha? Bibliapica ninmi: “Pai munashcashna ñucanchi imaguta mañajujtapash, Diosca uyanllami” nishpa (1 Juan 5:14).

18. Shinlli feta charingapaj esforzarijpica ¿imashinata Jehová Diosca bendicianga?

18 Jehová Diospi tucui shunguhuan confiajpica, paica ninandami cushijun. Ashtahuan feta charingapaj mañajpipash Jehová Diosca ñucanchicunata uyangami. Ashtahuanbash, shinlli feta charishpallami “Taita Dios mandajuj” Alpapi causashun (2 Tes. 1:3, 5).

^ par. 4 Lillian Gobitas Klose (¡Despertad! del 22 de julio de 1993), Feliks Borys (¡Despertad! del 22 de febrero de 1994) Josephine Elias (¡Despertad! de septiembre de 2009) huauquipanicunapa experienciata ricupangui.