‘Imatapash aliguta rurashpaca causaita causanatami japinguichi.’ (1 TIM. 6:18, 19)

CÁNTICO 43, 40

1, 2. a) Paraíso Alpagupica ¿imashinata causashun? (Callari dibujota ricupangui.) b) Paraisopica ¿imata rurashpata ashtahuanbachaca cushijushun?

APÓSTOL PABLOCA ‘causaita causanamanda’ parlashpaca para siempre causanatami nijurca (1 Timoteo 6:12, 19, liingui). Jehová Diosta sirvijcunamanda ashtacacunaca paraíso Alpagupimi cushijushpa para siempre causashun. Chai punlla ucha chayamuchunmi chapariashpa shuyanajunchi. Pensaripai, cada punlla ima nanaipash illaj, sano, tranquilo rijcharishpaca ¿nachu cushijunchiman? (Is. 35:5, 6.) Shinallata ñucanchi familiacunahuan, amigocunahuan chaipi cashpaca ninandami cushijushun. Ñucanchi huañushca familiacunapashmi chaipi canga (Juan 5:28, 29; Hech. 24:15). Ashtahuanbash ñucanchi huasicunata shayachinata, imatapash tocanata, animalcunamanda, plantacunamanda yachajunata o ñucanchi gushtashca cosascunatami rurai ushashun.

2 Chai tucui ruraicunahuan ninanda cushijushpapash Jehová Diosta sirvishpami ashtahuanbachaca cushijushun. Shinallata, tucui gentecuna Diospa shutita respetashpa paitalla  cazujpica ninandami cushijushun (Mat. 6:9, 10). Ashtahuanbash, Jehová Diospa munai cai Alpapi pactarijpimi ñucanchicunaca asha asha jucha illaj tucushun, Jehová Diosmanbash ashtahuan quimiri ushashun (Sal. 73:28; Sant. 4:8).

3. ¿Imapata cunanmandallata segurarina capanchi?

3 ¿Imamandata tucui chaicunata Jehová Dios ciertopacha pactachinata crinchi? Jesusca nircami:“Taita Diospaca, tucui ushanallami” can nishpa (Mat. 19:25, 26). Chai paraíso Alpagupi para siempre causangapaj munashpaca, cunanmandallatami ñucanchi causaipi Jehová Diospa munaita pactachingapaj shinllita esforzarina canchi. Shinallata, tucuri punlla chayamunataca yariami causana canchi. Paraisopi causangapajpash alimi segurarina canchi. Shinapash ¿imashinata segurarina canchi?

¿IMASHINATA SEGURARINA CANCHI?

4. Paraisopi causangapaca ¿imashinata segurarina capanchi? Shuj chimbapuraita nipai.

4 Paraíso Alpagupi causangapaca ¿imashinata segurarina canchi? Pensaripashun. Caru llactapi causangapaj rina cashpaca ¿imashinashi chai llactapi causangapaj seguraripanguiman? ¿Nacha chai llactapi ima shimita parlajta, ima costumbrecunata charijta, ima micunacuna tiajta yachajuna ali canman? Shinallata, chai llactapi ña causajunshna causanapash alimi canman. Shinami caru llactaman rishpaca uchalla yacharinguiman. Paraisopi causangapajpash cunanmandallatami Paraisopi causajunshna causashpa segurarina canchi. Shinaca Paraisopi causangapaj imashina segurarinata yachajupashun.

5, 6. ¿Imamandata cunanmandallata Jehovapa organizacion mandashcacunata cazuna capanchi?

5 Cunanbica, Diablomi casi tucui gentecuna paicuna munashcata rurashpa causachun pandachijun. Chaimandami ashtacacunaca nin, ñuca rurashcacunataca ni Diospash, ni pipash na ricunata charinllu nishpa. Shina causaimandami gentecunaca jatun llaquipi urmashpa ninanda sufrinajun (Jer. 10:23). Paraíso Alpapica shina gentecunaca ñana tiangachu. Jehová Dioslla mandana derechota charishcata intindishpami tucuicuna paitalla cazushun.

6 Chai punllacunapica Jehová Diospa ayudahuanmi cai Alpa shuj juyailla Paraíso tucuchun, huañushcacuna causarishpa paicunapash Taita Diosta rijsichun ayudashun. Shina ayudashpaca ninandami cushijushun. Shinapash pensaripai, Jehovapa organización imapash ñucanchi na gushtashcata rurachun mandajpica ¿imatashi rurashun? ¿Tucui shunguhuan cazushpa, cushijushpa pactachishunlla? Chaimandami cunanmandallata Jehová Diospa organización mandashcacunata cazuna canchi. Shinami paraíso Alpapi causangapaj segurarinajushcata ricuchishun.

7, 8. a) ¿Imamandata apoyana munaita charina capanchi? b) Huaquin huauquipanicunaca ¿ima cambiocunatata chasquishca? c) Paraíso Alpagupi maipi causana cashpapash ¿imashinashi causashun?

7 Paraíso Alpagupi causangapaca ¿imatata ashtahuan rurana canchi? Jehová Diospa organizacionda ñaupaman pushajcuna imaguta mandajpipash uchalla cazushpami cushijushpa apoyana canchi. Shuj mushuj asignacionda chasquishpaca cushijushpami pactachina canchi. Cunanmandallata shina rurashpaca paraíso Alpapi cazushpa causanaca ashtahuan facilmi canga (Hebreos 13:17,  liingui). Israelitacunata yaripashun. Israelitacuna Taita Dios carasha nishca Alpaman chayashpaca paicuna causangapaj munashca pushtutaca na japircachu (Núm. 26:52-56; Jos. 14:1, 2). Ñucanchicunapash Paraisopi cashpaca ñucanchi causangapaj munashca pushtutaca tal vez na japishunllu. Shinapash, Jehovapa organizacionda tucuipi apoyanata yachajushpaca, maipi causana cajpipash Jehová Diostaca cushilla sirvishpami causashun.

8 Jesús mandajujpi paraíso Alpapi causanaca shuj jatun bendicionmi canga. Chaimandami Jehová Diospa organización imata rurachun mingajpipash cunanmandallata ali pactachingapaj esforzarina canchi. Estados Unidos llactamanda Betelpi sirvij huaquin huauquipanicunataca shuj ladopi sirvichunmi cachashca. Shina sirvichun cachajpipash paicunaca cushijushpami sirvinajun. Huaquin superintendente huauquicunatapash ña mayorlla caimanda, paicunapa causaipi imapash cambiashcamandami precursor especial shina sirvichun cachashca. Shinaca, ima asignacionda charishpapash cushilla cangapaj, chai asignacionda ali pactachingapaj Jehová Diospa ayudata mañashpaca, llaqui punllacunapi causajushpapash Jehová Diospa bendiciondami chasquishun (Proverbios 10:22, liingui). Shinapash, paraíso Alpapi cashpa maipi causanata ña pensashca cajpipash, shuj ladopi causachun cachajpica ¿imatashi rurashun? Maipi causana cashpapash paraíso Alpagupi cachun saquishcamanda Jehová Diosta agradicishpami cushilla causashun (Neh. 8:10).

9, 10. a) ¿Imamandata Paraisopi cashpapash pacienciata charina minishtiringa? b) ¿Imashinata cunanmandallata pacienciata charishcata ricuchina capanchi?

9 Paraisopi ña causajushpapash pacienciata charinami minishtiringa. Pensaripashun, shuj familiaca paicunapa huañushca familia ña causarishcamandami cushijushca can. Cutin ñucanchi familiamanda pipash nara causarijpica ¿imatashi rurashun? ¿Ñucanchipash paicunamanda cushijushpachu ñucanchi familiacuna causaringacaman shuyashun? (Rom. 12:15.) Cunanbillata Jehovapa nishcacuna pactarichun pacienciahuan shuyanata yachajushpaca, shamuj punllacunapipash shuyaita ushashunmi (Ecl. 7:8).

10 Shinallata Bibliapa mushuj entendimientocuna llujshijpica pacienciata charinami minishtirin. Tapuripashunchi, publicaciongunata liijushpa imatapash na uchalla intindi ushashpaca ¿imatata rurana canchi? Chai mushuj entendimientocunata yachajungapaj tiempota llujchishpami, chai cambiocunata catingapaj esforzarina canchi. Shinami Paraisopi Jehová Dios mushuj instrucciongunata cujpi cazunaca fácil canga (Prov. 4:18; Juan 16:12).

11. ¿Imamandata cunanmandallata perdonanata yachajuna capanchi?

11 Paraisopi causangapaca shujcunata perdonanatapash yachajunami canchi. ¿Imamandata perdonanata yachajuna canchi? Huaranga huatacunata Jesús mandajujpi causajushpapash juchayucunarami cashun. Ñapashca na jucha illajcuna tucushunllu (Hech. 24:15). Shinaca, Paraisopi causajushpa pipash pandarijpica ¿uchalla perdonashpa, juyaihuan tratai ushashunlla? Cunanmandallata perdonanata, shujcunata juyaihuan tratanata yachajushpaca, tucuicunami Paraisopica ali causashun (Efesios 4:32, liingui).

12. ¿Imamandata cunanmandallata Paraisopi causangapaj segurarina capanchi?

12 Paraisopi causajushpaca tucui ñucanchi munashcata charingapaca tal vez shuyanarami tucunga. Cunanmandallata  imaguta charishcacunahuan cushijushpa, agradicishca causashpaca Paraisopipash cushillami causashun. Cunanmandallata Paraisopi causajunshna causashpaca, ali cualidadcunata charishpami aliguta causanata yachajushun. Shinami Jehová Diostalla cazushpa causana Alpagupi causangapaj segurarijushcata, chaipi causangapaj tucui shunguhuan munashcata ricuchishun (Heb. 2:5; 11:1).

METACUNATA CHURARISHUNCHI

Cushijushpa villachipai

13. Paraisopica ¿imata ashtahuan importante canga?

13 Paraisopi causangapaca ¿imatata ashtahuan rurana canchi? Paraíso Alpagupica ñucanchi ima minishtishcata charishpami cushijushun. Shinapash espiritualmente ali caimanda, Jehová Diospa ñaupajpi ali ricurimandami ashtahuanbachaca cushijushun (Mat. 5:3). Jehová Diosta sirvishpa ocupado caimandami ali sintirishun (Sal. 37:4). Shinaca, cunanmandallata Diospa munaita pundapi churashpa causashunchi. Shinami Paraisopi causangapaj listo cashun (Mateo 6:19-21, liingui).

14. Jovenguna, Paraisopi causanata yaipi charingapaca ¿imatata rurana capanguichi?

14 Jehová Diosta ashtahuan cushijushpa sirvingapaca ¿imatata rurana canchi? Espiritualmente ashtahuan metacunatami churarina canchi. Joven cashpallata tiempo completopi sirvingapaj pensarijushpaca, imashina ashtahuan sirvi ushashcata publicaciongunapi ricupai. * O ¿imashpata na tauca huatacunata tiempo completopi sirvijcunahuan parlapangui? Tiempo completopi sirvishpaca Paraisopi causangapaj maijan escuelapipash na yachachishca cosascunatami yachajungui.

Jehová Diosta sirvingapaj ashtahuan esforzaripai

15. ¿Ima metacunatata churari ushapanchi?

15 Jehová Diosta ashtahuan sirvingapaca metacunatami churarina canchi. Gentecunaman ali villachingapaj, ali yachachingapami esforzarina canchi. Shinallata Bibliapi mandashcacunata ali intindishpa ñucanchi causaipi imashina pactachinatapashmi yachajui ushanchi. Discursocunata, comentariocunata ashtahuan ali cungapami esforzarina canchi. Shina metacunata churarinami Jehová Diosta cushijushpa sirvichun, shamuj punllacunapi Paraisopi causangapaj listo cachun ayudanga.

 TUCUIMANDA ASHTAHUAN ALI CAUSAI

Publicaciongunamanda Jehovata agradicipai

16. ¿Imamandata Taita Diosta sirvinaca tucuimanda ashtahuan ali can?

16 Huaquinbica yanchipashchari: “Cunanmandallata shamuj punllacunapa segurarijushpaca ¿nacha cunanbi imatapash ruranata saquijuni?” nishpa. Shinapash na shina pensanachu canchi. Jehová Diosta sirvishpa causanami tucuimanda ashtahuan ali can. Ñucanchicunaca pipash obligajpilla o salvaringapallaca na Jehová Diostaca sirvinajunchichu. Paita sirvina yuyaihuan ñucanchita Jehová rurashcamandami cushilla sirvishpa causanchi. Jehová Diosta na sirvishpaca yanga causajushcashnami sintirinchiman. Chaimandami Jehová Diosta sirvishpa paipa juyaita sintishpaca ninanda cushijunchi (Salmo 63:1-3, liingui). Imashinami ricunchi, Jehová Diospa bendiciongunata chasquingapaca Paraisopi causangacamanga na shuyanachu canchi. Unai huatacunata sirvijcunaca cunanbillatami Jehová Dios ashtacata bendiciajta ricushca (Sal. 1:1-3; Is. 58:13, 14).

Bibliapa consejocunata cazupai

17. Paraisopica ¿imata rurashpata ashtahuanbachaca cushijushun?

17 Paraíso Alpapi causajushpaca ñucanchi gushtashca cosascunatami rurai ushashun. Jehová Diosca shina causana yuyaihuanmi ñucanchitaca rurarca (Ecl. 2:24). Chaimandami Bibliapica nin, Jehová Diosca ‘causaita charijcunataca tucuicunatami ninanda bendiciajunga’ nishpa (Sal. 145:16). Cunanbishnami Paraisopipash samangapaj, ñucanchi imaguta gushtashcata rurangapapash tiempota charishun. Shinapash, Jehová Diosta pundapi sirvishpami ashtahuanbachaca cushilla causashun. Cunanmandallata Taita Diosta pundapi churashpaca ashtaca bendiciongunatami chasquishun (Mat. 6:33).

18. Paraíso Alpapi causangapaca ¿imashinata segurarina capanchi?

18 Paraíso Alpagupica ashtahuan cushijushcami causashun. Chaimandami cunanmandallata chaipi causangapaj munashcata, Jehová Diospa ñaupajpi ali ricuringapaj munashcata ricuchina canchi. Ashtahuanbash, Diospa Reinotara pundapi churashpa cushijushpa villachishunchi. Ñallami Jehová Diosca cai Alpataca shuj juyailla Paraisota ruranga. Shinaca, cunanmandallata paraíso Alpapi ña causajunshna causashunchi.

^ par. 14 Lo que los jóvenes preguntan. Respuestas prácticas (volumen 2) libropa 311-318 paginacunata liipangui.