Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista  |  Agosto de 2015

 CALLARI TEMA | HUAÑUSHPACA ¿IMATA TUCUNCHI?

Huañujpica ¿tucuichu tucurin?

Huañujpica ¿tucuichu tucurin?

¿Huañushcacunaca causaringacha?

BIBLIAPICA NINMI: “Huañushpa pambai tucushcacunaca, tucuillami ñuca rimajta uyanga. Chai punllacunaca, ñami chayamujun” (Juan 5:28, 29).

Jesusca nircami, shamuj punllacunapica huañushpa pambai tucushcacunataca tucuillacunatami causachisha nishpa. Yalishca temapica Fernandomandami parlarcanchi. Paica ninmi: “Juan 5:28, 29ta liishpa, huañushcacuna causarinata intindishpami ninanda cushijurcani” nishpa.

Jobpash Taita Dios paita causachinata crishpami nirca: ‘¿Runa huañushpaca cutin causaringachu? Ñucapa quishpirina chayamungacamanmi shuyajushalla. Chashna shuyajujpi can cayajpimi tigrachisha’ nishpa (Job 14:14, 15).

Lazarota causachishcamandami huañushcacuna causarinata crinchi

Lázaro runagupa pani Martapash huañushcacuna causarinata crircami. Chaimandami Lázaro huañushca jipaca Jesusca nirca: “Cambaj turiguca causaringami” nishpa. Chaimi Martaca nirca: “Tucurimui punllapi huañushcacuna causarijpimi, ñuca turigupash causaringa” nishpa. Chaimandami Jesusca nirca: “Ñucami causachijpash, causaita causagrinata carajpash cani. Ñucata crijcunaca, huañushca cashpapash causaringami” nishpa (Juan 11:23-25). Chai jipami Jesusca Lazarota causachirca. Chaita yachanami shamuj punllacunapi mundo enteropi ashtaca ashtaca millón gentecuna causarinata crichun ayudan.

¿Cielopi causangapaj gentecuna causaringacha?

BIBLIAPICA NINMI: Jesusca na chai 8 gentecuna shina causarircachu nishpa. ¿Imamandata shina nin? Chai 8 gentecunaca cai Alpapimi causarirca. Shinapash Jesusmanda parlashpaca Bibliapica ninmi: “Cristoca, jahua pachaman rishpami. Taita Diospaj ali ladoman tiajun” nishpa (1 Pedro 3:21, 22). ¿Jesusllachu cielopi causangapaj causarirca? Jesusca paipa catijcunataca nircami: “Ñuca rishpami, canguna causanata alichisha. Chai jipami, ñuca causajuj llactapi ñucahuan causachun, cangunataca pushangapaj tigramusha” nishpa (Juan 14:3).

Jesusca paipa catijcunapuramanda huaquinguna cielopi causachunmi segurangapaj rirca. Bibliapi nishca shinaca, 144 mil gentecunami cielopi causangapaj ringa (Apocalipsis 14:1, 3). Cielopica ¿imatashi paicunaca ruranga?

Bibliapica ninmi: “Punda causarina chayajpi causarinata charij, Diospalla causajcunaca, ninanda cushijunguichi. Cangunataca, jipa huañuica na llaquichi ushangachu. Ashtahuangarin paicunaca Taita Diospajta, Cristopajta ruraj  curacunami canga. Paicunami, huaranga huatacaman Cristohuan mandanajunga” nishpa (Apocalipsis 20:6). Imashinami ricunchi, paicunaca reycuna, sacerdotecuna shinami Jesushuan jahua cielomanda cai Alpata mandanga.

¿Cai Alpapi causangapaj gentecuna causaringacha?

BIBLIAPICA NINMI: ‘Imatapash cashcatapacha rurajcuna, imatapash cashcatapacha na rurajcunapash Taita Dios causachinatami cushijushpa shuyajuni. Paicunapash chashnallata crishpami shuyanajun’ (Hechos 24:15). Cai shimicunataca apóstol Pablomi escribirca.

Bibliapica ashtaca ashtaca millón gentecuna causarinatami yachachin

‘Imatapash cashcatapacha rurajcunaca’ ¿picunata can? Profeta Danielta yaripashun. Paica Taita Diosta sirvijmi carca. Chaimandami Taita Diosca Danieltaca nirca: “Canga, huañui punllacaman catinguilla. Samajushca jipa, tucurimui punllapi jatarishpami, can japinataca japingui” nishpa (Daniel 12:13). Danielca ¿maipishi causaringa? Bibliapi nishca shinaca, alita rurajcunaca cai Alpapimi para siempre causanga (Salmo 37:29). Jesuspash nircami: ‘Na ñapash fiñarijcunaca ninandami cushijun. Paicunami cai pachata japinga’ nishpa (Mateo 5:5). Taita Diosta ali sirvijcunapash, profeta Danielpash cai Alpapi para siempre causangapami causaringa.

Cutin ‘imatapash cashcatapacha na rurajcunaca’ ¿picunata can? Taita Diosmanda, Bibliamanda yachajuna oportunidadta na charishpallata huañushcacunami can. Paicuna causarishpaca Jehová * Diosmanda, Jesusmanda yachajushpami paicunata sirvina oportunidadta charinga (Juan 17:3). Jehová Diosta sirvishpaca para siempremi causanga.

Taita Diosta tucui shunguhuan sirvijcunaca para siempremi causanga

¿Imashinashi cai Alpapica causashun?

BIBLIAPICA NINMI: ‘Taita Diosmi paicunapa ñavimandaca tucuilla viquita fichanga. Huañuipash, huacaipash, llaquipash, nanaipash na ashtahuan tiangachu’ (Apocalipsis 21:4). “Huasicunata shayachishpami, chaipi causanajunga. Uvas chagrata tarpushpami, chaipi fucushcata micushpa causanajunga” (Isaías 65:21).

¿Quiquinba familiahuan shina juyaillaguta causangapaj munapanguimanllu? Shinapash tapuripanguipashchari: ¿Ciertopachachu huañushcacunaca causaringa? nishpa.

^ par. 15 Bibliapica ninmi, Taita Diospa shutica Jehovami can nishpa.