“Gentecuna, tucui huatacuna paitalla shuyaichiyari.” (SAL. 62:8)

1-3. ¿Imamandata apóstol Pabloca Jehová Diospi confiaita usharca? (Callari dibujota ricupangui.)

JESUSTA punda catijcuna Roma llactapi causanajushpaca ashtaca llaquicunatami charirca. Paicunataca Roma llactata rupachishcanguichimi, gentecunataca millanayachishpami ricunguichi nishpami gentecunaca juchachinajurca. Huaquin catijcunatacarin, animalcuna pedaziashpa huañuchichunmi animalcunapaman shitarca. Shujcunatacarin, jatun racu caspipi huarcushpami tuta punchayachichun nishpa causata rupachin carca. Chai punllacunapi Jesusta catijcunaca tucuicunami ima horapash llaqui apanataca yacharca.

2 Chashna jatun llaqui punllacunapimi apóstol Pabloca Roma llactapi cutin preso japi tucushca tiajurca. Huauquicuna ayudangapaj rinataca tal vez na shuyajushcangachu. ¿Imamandashi na shuyajushcanga? Apóstol Pablo punda preso cajpica huauquicunaca na ayudarcachu. Chaimandami Pabloca Timoteomanga escribirca: ‘Cacharihuachun yashpa, mandajcunapa ñaupajpi rimajujpica, shujllapash na ñucata ayudahuarcachu’ nishpa. Huauquicuna  na ayudashca cajpipash apóstol Pabloca nircami: ‘Apunchi Jesusmi ñucahuan carca, paimi ninan ushaita carahuarca’ nishpa. Jehová Dios Jesushuan ayudajpimi Pabloca llaquipi cashpapash shinlli tucushpa nirca: ‘Leonba shimimandami cacharichi tucurcani’ nishpa (2 Tim. 4:16, 17). *

3 Apóstol Pabloca Jehová Dios paita shinlli tucuchun ayudashcata yarishpami, cutin preso japi tucushpaca chai horascunapash, shamuj punllacunapash Jehová Dios ayudanata confiashcanga. Chaimandami paica nirca: ‘Tucui nalita ruranamandapash cacharichihuangami’ nishpa (2 Tim. 4:18). Apóstol Pabloca alimi yacharca, huauquipanicuna na ayudai ushana cajpipash Jehová Diospash Jesuspash paita siempre ayudanata.

¿IMA HORATA JEHOVAPI ASHTAHUAN CONFIANA CANCHI?

4, 5. a) Shujcuna na ayudai ushana cajpipash ¿pita ñucanchitaca ayudai ushan? b) Jehovata ashtahuan ali rijsishpa, paiman quimiringapaca ¿imatata rurana capanchi?

4 Huaquinbica ¿trabajota na tarimanda o imapash ungüi japijpichu pipash na ayudajpi sololla, llaquilla sintirijupashcangui? Jovengunapash ¿escuelapi, colegiopi cumbacunahuan problemacunata charishpachu llaquilla sintirishcanguichi? Ayudahuai nijpipash pipash na ayudajpica ashtahuanmi llaquirinchi. Huaquinbicarin ayudangapaj munashpapash gentecunaca problemacunata tucuchitaca na ushanllu. Shinaca ¿imatata rurashun? Bibliapica ninmi, ‘Mandaj Diosta canba tucui shunguhuan yariashpami’ paipi confiana cangui nishpa (Prov. 3:5, 6). Shinapash ¿imamandata Jehová Dios ayudanataca seguro caita ushanchi? Punda tiempocunapi ashtaca gentecunata Jehová Dios ayudashcata Bibliapi liishpami Jehová ayudanataca seguro canchi.

5 Shinapash quiquin munashcashna Jehová Dios na ayudajpica ama desanimaripanguichu. Llaquicunapi cashpaca apóstol Pablopa ejemplota catipashunchi. Paica llaquicunapi cashpami Jehovapi confiashcata ricuchingapaj munarca, Jehová ayudanatapash seguromi carca. Ñucanchipash shinallata pensarishpami Jehovata ashtahuan ali rijsishpa, paiman quimirita ushashun.

JEHOVÁ DIOSTA ALI RIJSIJCUNACA PAIPI CONFIANAMI CAN

6. Llaquicunapi cashpaca ¿imamandata Jehovapi confianaca shinlli can?

6 Llaquicunahuan napacha ushajushpaca tucui imata rurai ushashcata rurashpa, Jehovata mañashpa Jehová ayudanataca seguro cashunchi (Salmo 62:8; 1 Pedro 5:7, liingui). Jehová Diospi confiashpallami paita ali rijsishcataca ricuchinchi. Shinapash huaquinbica Jehovapi confianaca na facilchu can. ¿Imamandata na fácil can? Huaquinbica ñucanchi mañashcacunata na uchalla contestajpimi Jehovapi confianaca shinlli can (Sal. 13:1, 2; 74:10; 89:46; 90:13; Hab. 1:2).

7. ¿Imamandata Jehová Diosca ñucanchi mañashcacunataca na uchalla contestan?

7 ¿Imamandata Jehová Diosca ñucanchi mañashcacunataca na uchalla contestan? Biblia ima nijta ricupashun. Bibliapica ñucanchitaca huahuacunahuanmi chimbapuran. Cutin Jehová Diostaca taitahuanmi chimbapuran (Sal. 103:13). Taitacunaca ¿huahuacuna imatapash mañashcandichu cun? Na. ¿Imamandata na chai rato cun? Huaquinbica chai ratollami huahuacunaca imatapash mañaj tucunajun. Taitacunapash ima horas ashtahuan ali canata ricushpami huahuacuna mañashcata cun. Huaquinbicarin, huahuacunapallata o shujcunapa nali cana cajpimi taitacunaca huahuacuna mañashcataca na chai rato cun. Shinallata pensaripai.  Huahuacuna tucui mañashcacunata taitacuna cushpaca taitacuna huahuacunata cazunajushcatami ricuchin. Cunanga Jehová Diospi pensaripashun. Paimi ñucanchitaca rurarca, paimi mandajun, paica ñucanchi Taitami can. Chaimandami paica ñucanchipa ima ali canata ricushpa ñucanchi mañashcacunataca pai munashca horaspi contestan. Ashtahuangarin, Jehová Diosca ñucanchitaca juyanmi. Ñucanchi imata minishtijujtapash alimi yachan. Chaimandami Jehová Diospi confiashpa pai imashina contestanata shuyana canchi (Isaías 29:16; 45:9huan chimbapurashpa ricupangui).

8. Llaquicunahuan na aguantai ushajujpica ¿imatata Jehová Diosca rurashami nin?

8 Jehová Diosca ñucanchicuna maicamanlla llaquicunata aguantai ushanataca alimi yachan (Sal. 103:14). Paica ñucanchi Taita caimandaca siempremi ñucanchitaca ayudanga. Huaquinbica pensanajunchipashchari, ñucaca cai llaquitaca ñana aguantai ushanichu nishpa. Shinapash Jehová Diosca ninmi, ñucami llaquicunata aguantachunga ayudasha nishpa (1 Corintios 10:13, liingui). Paica ñucanchi imata aguantai ushanata, na aguantai ushanataca alimi yachan. Shinaca Jehovapi confiashunchi.

9. Jehová Dios na uchalla ayudajpica ¿imatata rurana capanchi?

9 Jehová Dios na uchalla ayudajpica na preocuparijunachu canchi. Pai ñucanchita ayudangapaj munajushcataca yariami cana canchi. Shinapash ima hora ñucanchi ciertopacha minishtijujta ricushpami ayudanga. Isaías 30:18pica ninmi: ‘Mandaj Diosca cangunata llaquingapaca shuyangarami. Mandaj Diosca [alita] ruraj Taita Diosmi. Paita yariashpa causajcunaca tucuicunami ninanda cushijun’ nishpa.

‘LEONBA SHIMIMANDA CACHARICHIRCA’

10. Jatun llaquipi cashpaca ¿imatata rurana capanchi?

10 Imashinami párrafo 2pi yachajuparcanchi, apóstol Pabloca ‘leonba shimimandami cacharichi’ tucurca (2 Tim. 2:14). Huaquinbica ñucanchipashmi imapash jatun llaquipi cashpaca apóstol Pabloshna sintirishcanchi. Shina sintirijushpaca ¿imatata rurana capangui? Llaqui apajushpa Jehovapi confianaca shinllimi can, shinapash chai horascunami Jehovapi ashtahuan confiashcata ricuchina canchi. Pensaripashunchi. Ungushca familiata ña unaita cuidajushcanguiman. Chai tiempopica llaquita aguantangapaj, ali decisiongunata rurangapaj nishpa Jehovataca mañajurianguimi. * Quiquin imashina llaqui apajujtaca Jehová Diosca ricujunmi. Paica quiquin aguantachun, ali sirvishpa catichunga ayudasha nijunmi (Sal. 32:8). Chaita yachashpaca ¿nachu tranquilo sintiripangui?

11, 12. a) Ungushca familiata cuidajushpaca ¿imamandata huaquingunaca ninanda llaquirin? b) Llaqui punllacunapi cashpapash Jehovapi confiashpaca ¿imatata cuenta japishun? Shuj ejemplota parlapai.

11 Ungushca familiata cuidajushpaca ¿imamandata huaquinbica pensanchi Jehová Diosca na ayudajunllu nishpa? Huaquinbica doctorcuna ima tratamiento ali cashcata na ucha nijpi o familiacuna ayudanapa randi problemata ashtahuan mirachijpimi ninanda llaquirinchi. Ninanda llaquirijushpapash Jehovata ayudahuai nishpa, paiman quimirishpami paipi confiana canchi (1 Samuel 30:3, 6, liingui). Shina rurashpami Jehová Dios ayudajujta cuenta japishpa paiman ashtahuan quimirishun.

12 Linda panigupa ejemplota ricupashun. Chai paniguca paipa taitamamacuna huañungacamanmi tauca huatacunata cuidarca. * Paica ninmi: “Ñuca taitamamacuna ungushca cajpica, ñuca cusapash, ñuca turipash, ñucapash imata ruranataca na atinanllu carcanchi. Huaquinbica ñucanchillami sintirircanchi. Shinapash chai punllacunata yarishpa cunanbi aliguta pensarijpica  minishtijuj horaspipacha Jehová ayudajushcatami cuenta japishcanchi” nin.

13. Jehová Diospi tucui shunguhuan confianaca ¿imashinata Rosa panigutaca ayudarca?

13 Shuj shuj llaquicuna ricurimujpica Jehovapi tucui shunguhuan confianami llaquicunata aguantachun ayudanga. Rosa panigupa ejemplota ricupashun. Rosa panigupa cusaca na Testigo carcachu. Cusa paita saquishpa divorciari callarijuj horaspipachami yachaj chayarca paipa turica lupus nishca nali ungüita charijta. Huaquin quillacuna jipallami turipa huarmipash huañurca. Shinami Rosa paniguca ña alillata sintirijushpa precursora regular tucurca. Shinapash chai jipallami paipa mamapash huañurca. ¿Imashinata chai paniguca chai tucui llaquicunata aguantai usharca? Chai paniguca ninmi: “Tucui punllacunami Jehovata mañan carcani. Uchilla decisiongunata ruragrijushpapash Jehová imata nijtami mascan carcani. Shina rurashpami Jehovata ashtahuan alipacha rijsishpa paiman ashtahuan quimirircani. Ashtahuangarin ñucapillata o shujcunapi confianapa randica Jehovapi confianatami yachajurcani. Paica siempremi ayudahuarca” nishpa.

Ñucanchi familiamanda pipash Jehovata saquijpica Jehovata cazunaca shinllimi can (Párrafo 14-16ta ricupangui)

14. Quiquinba familiata expulsajpica ¿imashinata Jehová Diosca ayudan?

14 Cunanga pensaripai, quiquinba familiata congregacionmanda expulsajpica ¿imatata rurapanguiman? Expulsashcacunahuan na parlanachu cangui nishpa Jehová Dios mandajujtaca alimi yachapangui (1 Cor. 5:11; 2 Juan 10). Shinapash, quiquinba familiata llaquimandaca Jehovata cazunaca shinllimi canga. Shinlli cajpipash ¿Jehovata tucuipi cazungapaj paillata ayudanataca confiai ushanguicha? ¿Jehovata cazushpa paiman ashtahuan quimiringapaj munanguimanlla?

15. ¿Imamandata Adanga Jehová Diosta na cazurca?

 15 Adanda yaripashun. Paica Jehová Diostaca na cazushachu yashcaca na purijurcachu. Bibliapi nishca shinaca “Adanga, na umai tucurcachu” (1 Tim. 2:14). Shinapash Adanga paipa huarmi Evata juyaimandami Jehovata cazunapa randica paipa huarmi nishcata uyashpa na micuna nishca quirumanda micurca (Gén. 3:6, 17).

16. ¿Pitata ashtahuan juyana capanchi, imamanda?

16 Imashinami Adanba ejemplopi ricupanchi, ñucanchi familiata juyana cashpapash Jehovatami ashtahuanga juyana canchi (Mateo 22:37, 38, liingui). Jehovata ashtahuan juyashpallami ñucanchi familia Testigo cajpi o na Testigo cajpipash ayudai ushashun. Expulsashca familia imatapash rurajujpi preocuparijushpaca Jehovaman villashpa tucuita parlapangui (Rom. 12:12; Filip. 4:6, 7). * Quiquinba familiamanda llaquirijushpapash Jehovaman ashtahuan quimiringapaj aprovechapangui. Shinami Jehovapi ashtahuan confiashpa paita cazushpalla ashtahuan ali causanata cuenta japipangui.

JEHOVÁ AYUDANGACAMANGA ¿IMATATA RURANA CANCHI?

Villachinapi ashtahuan preocuparishpa Jehovapi confiashcata ricuchipangui (Párrafo 17ta ricupangui)

17. Villachinapi preocuparijpica ¿imatata Jehová Diosca ruranga?

17 ¿Imamandata Jehová Diosca ‘leonba shimimanda’ apóstol Pablotaca cacharichirca? Apóstol Pablollatami nirca: ‘Paimi, villanata ñuca pactachijuchun ninan ushaita carahuarca. Chaimandami, na israelcunapash uyachun villajurcani’ nishpa (2 Tim. 4:17). Jehová Diosca ‘ali villaita villashpa’ paita ‘ayudajcuna’ cachunmi ñucanchitaca mandashca (1 Tes. 2:4; 1 Cor. 3:9). Paita cazushpa villachinapi preocuparijpica ama imapash faltachunmi Jehová Diosca cuidajushami nirca (Mat. 6:33). Shinaca, Jehová cuidajushami nishcata crishpa, villachinapi ashtahuan preocuparishunchi. Shinami Jehová ayudangacaman tranquilo shuyanajushun.

18. Jehová Diospi ashtahuan confiangapaca ¿imatata rurana capanchi?

18 Shinaca cunanllata aprovechapaichi, Jehovata ashtahuan ali rijsishpa paipi ashtahuan confianata yachajungapaj. Llaquipi cashpaca Jehovaman ashtahuan quimiringapaj aprovechapai. Bibliata liinata, estudianata, Bibliapi imata liishcapi pensarinata, Jehovata mañanataca ama shaijupanguichu. Shinallata, Jehovata sirvinapi ashtahuanga preocuparipangui. Jehovapi confianataca ama saquipanguichu, paillatami cunan punllacunapipash shamuj punllacunapipash llaquicunata aguantachun ayudanga.

^ par. 2 Ciertopacha leonba shimimanda parlajushcata o jatun llaquihuan chimbapurashpa apóstol Pablo parlajushcataca nali yachanchichu.

^ par. 10 Shuj ungüita charishpa o ungushca familiata cuidana cashpaca ¡Despertad! 8 de febrero de 1994; 8 de febrero de 1997; 22 de mayo de 2000; 22 de enero de 2001 revistacunata ricupangui.

^ par. 12 Shuticunata cambiashcanchimi.

^ par. 16 Ñucanchi familia Jehovata saquijpica cai temacunami ayudanga: La Atalaya 1 de septiembre de 2006 17-21 paginacuna; 15 de enero de 2007, 17-20 paginacuna.