Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

 CALLARI TEMA | ¿TAITA DIOSCA QUIQUINDA YARINLLU?

Taita Diosca paiman quimirichunmi munan

Taita Diosca paiman quimirichunmi munan

“Ñucata cachamuj Taita ñucapajman pushamujpillami pipash shamun.” (JUAN 6:44)

¿IMATATA GENTECUNACA NIN? Ashtaca gentecunaca Taita Diospi crishpapash Taita Diosca carupimi can ninmi. Irlanda llactamanda Cristinaca tucui semanacunami iglesiaman rin carian. Paica ninmi: “Taita Dios tucuita rurashcata crishpapash Taita Diostaca na rijsircanichu” nishpa.

¿IMATATA BIBLIACA YACHACHIN? Taita Diosmanda carupimi cani yajujpipash Taita Diosca nunca na ñucanchitaca saquingachu. Jesusca nircami, shuj runaguca ‘100 llamagumanda shuj llamaguta chingachishpaca ¿nacha 99 llamacunata urcupi saquishpa, chai chingashca llamagutara mascangapaj rinman? nishpa. Taita Diosca ‘shujllapash chingagrichunga na munanllu’ nishpami Jesusca shina nirca (Mateo 18:12-14).

Taita Diospaca tucuillacunami juyailla llamagucunashna can. Chingarishcacunataca paipaman pushamushpami ayudan.

¿Picunata huasin huasin rishpa villachin? ¿Picunata callecunapica Taita Diosmanda villachin?

Pundapica Taita Diosmi gentecunataca mascan. Huaquin ejemplocunata ricupashun. Apostolcunapa punllacunapica Etiopía llactamanda runagu na intindi ushajujpimi Taita Diosca Felipeta cacharca paiman aliguta intindichichun (Hechos 8:26-39). Shuj punllapash romano soldadocunata mandaj Corneliomi Taita Diosta aliguta sirvingapaj munashpa mañajurca. Chaimandami Taita Diosca apóstol Pedrotaca Corneliopa huasiman cacharca paita ayudachun (Hechos 10:1-48). Shinallata Taita Diosmi apóstol Pablotapash cumbacunatapash yuyachirca, Filipos llacta canllata yalijuj huaicuman rishpa Taita Diosta sirvijuj Lidia shuti huarmiguman villachichun. ‘Pablo villajujta aliguta uyachunga Jesusmi [“Jehovami”, NM] chai huarmipa shunguta pascarca’ (Hechos 16:9-15).

Gentecuna paita rijsingapaj munajpica Jehová Diosllatami paita rijsichun ayudan. Cunanbica ¿picunata huasin huasin rishpa villachin? ¿Picunata callecunapica Taita Diosmanda villachin? ¿Nachu testigo de Jehovacuna chashna villachinajun? Shinaca pensaripai: ¿Taita Diosca paicunata villachichun cachashpachu quiquindapash mascajun? Taita Diosman quimiringapaj munashpaca paicunapa ayudata chasquipai. *

^ par. 8 Ashtahuan yachangapaj munashpaca Internetpi www.jw.org/qvi direccionbi ¿Imamandata Bibliata yachajuna capanchi? videota ricupangui.