Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista  |  Agosto de 2014

Minishtijuj horaspimi Taita Diosca yachachijun

Minishtijuj horaspimi Taita Diosca yachachijun

CUNAN punllacunapica ninan llaqui punllacunapimi causanajunchi (2 Tim. 3:1-5). Jehová Diosta juyashpa cada punlla paipa mandashcacunata cazunaca shinllimi can. Jesusca cashna llaqui punllacunata ultimocaman aguantachunmi paipa catijcunamanga aliguta cazushpa, aliguta yarishpa sirvij esclavota churarca (Mat. 24:45, 46). Chai esclavomi ‘micuna horas chayajpi’ micunaguta caranshna yachachijuna carca (Mat. 24:3, 13; 28:20).

Aliguta cazushpa, aliguta yarishpa sirvij esclavoca 1919 huatamandami “sirvijcuna” nishcacunamanga yachachijushca. Chai sirvijcunaca shuj shuj shimita parlaj ashtaca millón gentecunami can. Paicunapashmi Jehová Diospa organizacionhuan tandanajushpa yachajunajun (Mat. 24:14; Apoc. 22:17). Shinapash, huaquin publicaciongunaca na tucui shimicunapichu tian. Shinallata na tucuicunachu Internetpi jw.org direccionman yaicushpa videocunata, librocunata, revistacunata ricui ushan. Shinaca ¿tucui chai publicaciongunata na ricui ushashcamandachu na shinlli feta charinga? Chaita yachangapaca chuscu tapuicunata ricupashun.

 1 Jehová Dios carashca micunagupica ¿imata minishtirishcapacha can?

Diabloca Jesustaca nircami, cai rumicunata tandaman tigrachi nishpa. Shina nijpimi Jesusca nirca: “Gentecunaca na tandahuanlla causangachu. Ashtahuangarin Taita Dios rimashca tucuilla shimicunahuanmi causanga” nishpa (Mat. 4:3, 4). Taita Diospa rimashca shimicunaca Bibliapimi tiajun (2 Ped. 1:20, 21). Shinlli feta charichunmi Taita Diosca Bibliata carashca (2 Tim. 3:16, 17).

Jehová Diosca ‘tucuicuna quishpirichunmi munan. Paimanda na llullashpa villajuj Shimitapash yachachunmi munan’ (1 Tim. 2:3, 4). Chaimandami Jehová Diospa organizacionga Traducción del Nuevo Mundo de las Santas Escrituras Bibliataca enterota cashpa o Escrituras Griegastallapash 120 yali shimicunapi liichun carashca. Cada huatami shuj shuj mushuj shimicunapipash llujshin. Shinallata shuj Bibliacunapashmi tauca huaranga shimicunapi tian. Ashtahuangarin, Taita Diosca tucuitami ricujun. Yachajungapaj munajujcunataca paipaman quimirichun ayudashpami paicuna imata minishtijujta ricushpa yachachin (Heb. 4:13; Mat. 5:3, 6; Juan 6:44; 10:14).

2 Librocuna, revistacunaca ¿imashinata shinlli feta charichun ayudan?

Shinlli feta charingapaca Bibliata liishca jahuapash Bibliapi imata liishcata intindishpami pactachina canchi (Sant. 1:22-25). Ñaupa punllacunapica Etiopía llactamanda runagumi Taita Diospa Shimita liijurca. Chaita ricushpami Felipeca nirca: ‘¿Can liijushca imata nijujtaca yachai ushanguichu?’ nishpa. Shina nijpimi chai runaguca nirca: ‘Pipash na yachachijpica ¿imashinata yachashayari?’ nishpa (Hech. 8:26-31). Shina nijpimi Felipeca Taita Diospa Shimita aliguta intindichirca. Aliguta intindishpami chai runagupash bautizarirca (Hech. 8:32-38). Cunanbipash Jehová Dios cushca publicaciongunami ñucanchitaca Bibliapi yachachishcacunata aliguta intindichun ayudashca. Chai yachachishcacuna shunguman chayajpimi imata yachajushcata ñucanchi causaipi pactachinchi (Col. 1:9, 10, NM).

Jehová Diosca publicaciongunahuanmi ashtaca micunaguta caranshna yachachijun (Is. 65:13). Villajun revistaca 210 yali shimicunapimi llujshin. Chai revistami profeciacunata, Bibliapi yachachishcacunata aliguta intindichun, Bibliapi consejocunata pactachishpa causachun ayudan. ¡Despertad! revistapash casi 100 shimicunapimi llujshin. Chai revistapimi Taita Diospa rurashcacunamanda, Bibliapi consejocunata imashina pactachinatapash yachachin (Prov. 3:21-23; Rom. 1:20). Ashtahuangarin, aliguta cazushpa, aliguta yarishpa sirvij esclavoca 680 yali shimicunapimi shuj shuj publicaciongunata llujchin. Shinaca ¿cada punlla Bibliata liingapaj tiempota llujchipanguichu? Quiquinba shimipi revista chayamujpi o mushuj publicacionguna llujshijpica liipanguichu?

Librocunata, revistacunata cushca jahuapash Jehová Diospa organizacionga tucuilla tandanajuicunapi huauquicuna discursocunata cuchunmi, bosquejo hojacunata llujchishca. Shinaca Bibliamanda dramacunata, demostraciongunata, entrevistacunata, discursocunataca ¿alicachishpachu uyanchi? Tucui chaicunataca Jehová Diosmi na mitsashpa, cushijushpa carajun (Is. 25:6).

 3 Ñucanchi shimipi huaquin publicacionguna na tiajpica ¿micunagu faltajuj cuendachu canchi?

Ñucanchi shimipi huaquin publicacionguna na tiajpipash espiritualmenteca na micuna faltajuj cuendachu canchi. Apostolcunata yaripashun. Apostolcunaca ashtaca cosascunatami yacharca. Cutin Jesuspa catijcunaca asha cosascunatallami yacharca (Mar. 4:10; 9:35-37). Shinapash espiritualmente parlashpaca paicunaca na yarjai pasanajurcachu. Paicuna minishtishca micunatami charirca (Efes. 4:20-24; 1 Ped. 1:8).

Shinallata Jesús cai Alpapi cashpa tucui imatalla nishcata, imatalla rurashcataca Mateo, Marcos, Lucas, Juan librocunapica na escribishca tiajunllu. Apóstol Juanga nircami: ‘Jesusca ashtaca ashtacata rurashpami purijurca. Pai imatalla rurashcata escribijpica, chai librocunapi churangapaca cai pachapash na pactanmanllu’ nishpa (Juan 21:25). Imashinami ricupanchi, chai punllacunapi Jesusta catijcunaca alimi Jesustaca rijsirca. Ñucanchita yali Jesusta rijsishca cajpipash Jehová Diosca Jesusta ali catichunmi ñucanchicunamanga imata minishtijujta ricushpa ali yachachijun (1 Ped. 2:21).

Apostolcunapash tauca cartacunata escribishpami congregaciongunaman cacharca. Chai tucuilla cartacunamandaca por lo menos apóstol Pablopa shuj cartaca na Bibliapi tiajunllu (Col. 4:16). ¿Shuj carta Bibliapi na tiajushcamandachu ninchiman, espiritualmente yachajunaca faltajunchimi nishpa? Jehová Diosca ñucanchicuna espiritualmente imata minishtijujtaca ricuriashpami cujun (Mat. 6:8).

Jehová Diosca ñucanchicuna espiritualmente imata minishtijujta ricushpami carajun

Cunanbipash huaquin shimicunapica ashtaca publicaciongunami tian. Cutin shuj shimicunapica ashalla publicaciongunami tian. Quiquinba shimipi ashalla publicaciongunata charishcamandaca na llaquirijunachu capangui. Jehová Diosca tucuicunatallatami ricuriajun. Chaimandami quiquinba shimipi tiashca publicaciongunata liishpa yachajunataca na saquina capangui. Ushashpaca quiquin intindishca shimipi tandanajuicunaman ripangui. Jehová Diosllatami shinlli feta charichun ayudanga (Sal. 1:2; Heb. 10:24, 25).

4 jw.org direccionbi tiaj informacionda na ricui ushashcamandaca ¿espiritualmente micuna faltajuj cuendachu canchi?

Bibliata yachajungapaca jw.org direccionbimi ñucanchi organizacionba revistacunata shuj publicaciongunatapash lii ushanchi. Ashtahuangarin cazarashcacunapa, jovengunapa, taitamamacunapa, huahuacunapapash ashtaca informacionmi tian. Chaicunahuanga Familiahuan Adorana Tutapica yachajunallami can. Ashtahuangarin jw.org direccionbimi Galaad Escuelapi graduarishcacunata, ñucanchi organizacionba huata tandanajuipi imata parlashcata, huaquin llactacunapi huauquicuna imashina llaqui pasanajujta, ima juiciocunata charishcata villajun (1 Ped. 5:8, 9). jw.org direccionga, caru llactacunapi gentecunaman villachingapaj o gobiernocuna na villachun saquishca llactacunapi villachingapapash alipachami can.

Internetta charishpa o na charishpapash shinlli feta chari ushanchimi. Aliguta cazushpa, aliguta yarishpa sirvij esclavoca cada uno, librocunata, revistacunata japishpa liishpa, yachajuchunmi ashtacata esforzarijushca. Shinaca jw.org direccionbi tiashca publicaciongunata ricungapaj nishpa imapash aparatocunata randinaca na minishtirinllu. Internetta na charij huauquipanicunaman nishpa huaquin temacunata imprimishpa llujchingapaj munashpaca cada unomi ricuna can. Shinapash jw.org direccionbi tiashca temacunata imprimishpa llujchinaca na congregacionba obligacionllu can.

Jesusca paipa nishcata pactachishpami espiritualmente ali micushca cachun ñucanchitaca cuidariajushca. Shina cuidariajushcamandaca ninandami agradicinchi. Cai turi punllacuna tucuringacaman, ‘minishtijuj horaspi’ Taita Dios yachachishpa catinataca na cunganachu capanchi.