Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista  |  Agosto de 2014

Huarmicunaca ¿imashinata Jehová Diospa pactachin?

Huarmicunaca ¿imashinata Jehová Diospa pactachin?

‘Ali villaitaca ashtaca huarmicunami [“soldadocuna cuenda”, NM] villachinajun.’ (SAL. 68:11)

1, 2. a) Jehová Diosca ¿imatallata Adanmanga cararca? b) ¿Imamandata Jehová Diosca shuj huarmiguta Adanmanga cararca? (Callari dibujota ricupangui.)

JEHOVÁ DIOSCA gentecuna ‘causachunmi’ cai Alpataca rurarca (Is. 45:18). Adanda rurashpaca jucha illajtami rurarca. Pai causachunga shuj juyailla alpagutami cararca. Chaipica juyailla jatun quirucunata ricushpa, yacu yalijujta uyashpa, animalgucuna pugllatapash ricushpami causarca. Shinapash Adanga paillami carca. Chaimandami Taita Diosca nirca: “Jarica, pailla causanaca nalichu. Paita ayudashpa causachun, shuj cumbata rurasha” nishpa. Shinami Jehová Diosca Adanda huañujta puñuchishpa, shuj costillas tulluta llujchishpa shuj huarmita rurarca. Rijcharishpa chai huarmita ricushpaca Adanga ninanda cushijushpami nirca: ‘Cunangarinbash, paica ñuca tullumanda rurashca ñuca tullullatami. Ñuca aichamanda rurashca ñuca aichallatami. Shina cashcamandami paica, Huarmi shuti canga. Paica jarimanda llujchishcami’ can nishpa (Gén. 2:18-23).

2 Jehová Diosca jucha illaj cumba huarmigutami Adanmanga cararca. Ashtahuangarin chai huarmigumi huahuacunatapash charina carca. Chaimandami Adanga nirca, ‘tucui gentecunapa mama tucuna  cajpimi, Eva shutita shutichini’ nishpa (Gén. 3:20). Imashinami ricupanchi, Jehová Diosca Adanbash Evapash jucha illaj huahuacunata charishpa cai Alpata jundachichunmi munarca. Chai gentecunami tucui cai Alpata juyaillata rurashpa tucuilla animalgucunata cuidana carca (Gén. 1:27, 28).

3. a) Jehová Diospa tucuilla bendiciongunata chasquingapaj munashpaca ¿imatata Adán y Evaca rurana carca? b) Shinapash ¿imata pasarca? c) Cai temapica ¿ima tapuicunatata yachajupashun?

3 Jehová Diospa tucuilla bendiciongunata chasquingapaj munashpaca Adán y Evaca Jehová Diostami cazuna carca, shinallata Jehová Dioslla mandana cashcatami yarina carca (Gén. 2:15-17). Shinapash paicunaca ‘pundamandapacha causajuj culebra’ Diablopa shimita uyashpami, Jehová Diosta na cazurca (Apoc. 12:9; Gén. 3:1-6). Paicuna na cazushcamandaca ¿imata huarmicunataca pasashca? Punda tiempocunapi Jehovata ali sirvij huarmicunaca ¿imatata rurarca? ¿Imamandata cunan punllacunapi panicunataca [“soldadocuna cuendami”, NM] ashtacacuna nin? (Sal. 68:11.)

TAITA DIOSTA NA CAZUJPICA ¿IMATA PASARCA?

4. Jehová Diospa ñaupajpica ¿pita culpata charirca?

4 ¿Imamandata na cazurcangui? nijpica Adanga nircami: ‘Ñuca cumba cachun can carashca huarmimi, yuramanda japishpa carahuarca. Shina carajpimi, ñucapash micurcani’ nishpa (Gén. 3:12). Pandarishcanimi ninapa randica Taita Dios carashca huarmitami Adanga culparca. Ishcandicunallata Jehová Diosta na cazushca cajpipash Jehová Diospa ñaupajpica Adanllami culpata charirca. Chaimandami apóstol Pabloca escribirca ‘juchata ruranaca, shujlla runamandami cai pachapica callarirca. Chai juchamandami huañuipash callarirca’ nishpa (Rom. 5:12).

5. Jehová Diosca ¿imamandata gentecunallata mandachun saquirca?

5 Diabloca Adán y Evataca crichircami, Jehová Diosca na cangunata mandanachu can nishpa. Shinaca ¿pita mandana derechota charirca? Pi mandana cashcata ricuchingapami Jehová Diosca gentecuna mandachun saquirca. Gentecuna mandajpica ashtaca ashtaca llaquicunami tiashca. Yalishca 100 huatacunapica casi 100 millón jaricuna, huarmicuna, huahuacunami guerracunapi huañushca. Shinami gobiernocunaca gentecunata na ‘mandai ushashcata’ ricuchishca (Jer. 10:23). Chaimandami ñucanchicunaca Jehová Dios ñucanchita mandachun munanchi (Proverbios 3:5, 6, liingui).

6. Ashtaca llactacunapica ¿imashinata huarmicunataca tratan?

6 Cai mundota Diablo mandajujpimi jaricunapash huarmicunapash sufrinajun (Ecl. 8:9; 1 Juan 5:19). Shinapash huarmicunami ashtahuanbachaca sufrin. Shuj ejemplota ricupashun. Mundo enteropica, cada quimsa huarmicunamandami shuj huarmitaca cusallata o paihuan parejo causajujllata macashpa saquin o violan. Cutin huaquin llactacunapica, jari huahuata ungujpica ninandami cushijun. Paica ñuca apellidotaca na chingachingachu, paimi viñashpaca ñucanchitapash, abuelocunatapash mantininga nin. Shuj llactacunapicarin huarmi huahuacunataca na charingapaj munashpami abortanlla.

7. Taita Diosca ¿imashinata jaritapash huarmitapash rurarca?

7 Jehová Diosca huarmicunata maltratanataca millanayachinmi. Paica jaritapash huarmitapash igualmi respetohuan tratan. ¿Imashinata yachanchi? Ricupashun. Evata rurashpaca jucha illajtami rurarca. Paitaca Adanda ayudachun, Adanba cumba cachunmi rurarca. Evata esclavatashna charichunga na rurarcachu. Chaimandami tucuita rurai tucuchishca jipaca Taita Diosca nirca: ‘Cai rurashcacunaca aligupachami can’ nishpa (Gén. 1:31). Shinaca, Taita Diospa ñaupajpica jaripash huarmipash aliguta rurashcacunami carca.

 ¿MAIJAN HUARMICUNATATA JEHOVÁ DIOSCA ALICACHISHPA AYUDARCA?

8. a) Gentecunaca ¿imashinata can? b) Jehová Diosca ¿picunatata ayudan?

8 Adán y Eva na cazushca jipaca shuj gentecunapashmi ashtahuan huaglirca. Cai tucuri punllacunapicarin ashtahuan ashtahuanmi gentecunaca huaglinajun. Bibliapi nishca shinaca, gentecuna ashtahuan huaglinajujpimi ‘jatun llaqui punllacunapi causanajunchi’ (2 Tim. 3:1-5). Shinapash huaquin jaricuna, huarmicunaca Jehová Diospi confiashpa, paita cazushpa, pai mandachunmi chasquishca. Chaimi ‘Jatun Mandaj’ Jehová Diospash paicunata alicachishpa ayudashca (Salmo 71:5, liingui).

9. a) Manllanai Jatun Tamiamandaca ¿mashna gentecunata salvarirca? b) ¿Imamandata salvarirca?

9 Noepa punllacunapica shinllita tamiachishpami Jehová Diosca ashtaca nali gentecunata tucuchirca. Asha gentecunallami salvarirca. Chai punllacunapica Noepa huauquicuna, panicuna causanajushca cashpapash, Manllanai Jatun Tamiapimi tucurirca (Gén. 5:30). ¿Picunallata salvarirca? Noé paipa huarmindi, paipa quimsa churicuna, quimsa jachungunami salvarirca. Shinaca chuscu jari, chuscu huarmimi salvarirca. Cazujpi, paipa munaita pactachijpimi Jehová Diosca paicunata salvarca. Cunan punllacunapi ashtaca millón gentecunaca chai ochopurapa huahuacunami canchi (Gén. 7:7; 1 Ped. 3:20).

10. Jehová Diosca ¿imamandata Abrahanba huarmita, Isaacpa huarmitaca alicachishpa cuidarca?

10 Jipa huatacunamanga Abrahanba huarmi Sarata, Isaacpa huarmi Rebecatapashmi Jehová Diosca alicachishpa cuidarca (Jud. 16). Saraca siempremi paipa cusa Abrahandaca respetashpa cazurca. Ur llactapi ali causaita saquishpa, caru llactacunapica na causangapaj munanichu nishpa quejarijunapa randica, Abrahanda cazushpami Saraca ‘ñucata mandaj’ nin carca (1 Ped. 3:6). Isaacpa huarmi Rebecapash ali ali huarmigumi carca. Chaimandami paita ricushpaca Isaacca ‘ninanda juyarca. Mama huañujpi llaquilla cashpapash’ paimandami cutin cushijurca (Gén. 24:67). Cunan punllacunapipash Sarashna Rebecashna Jehovata ali sirvij panigucunata charimandaca ninandami cushijunchi.

11. Ishcai parteracunaca ¿imashinata na manllashcata ricuchirca?

11 Israelitacuna Egipto llactapi esclavocuna cuenda causanajushpaca ninandami mirarca. Chaimandami Egiptomanda faraonga israelita parteracunataca mandarca, israelita huarmicuna jari huahuacunata ungujpica chai huahuacunataca huañuchinami canguichi nishpa. Shinapash Sifrá shuti, Puá (Fua) shuti parteracunaca faraón mandashcataca na cazurcachu. Paicunami shuj parteracunataca ricun cashcanga. Paicunaca faraonda manllanapa randica Jehová Diosta ashtahuan manllashpami israelita jari huahuacunataca na huañuchirca. Chaita ricushpami Jehová Diospash chai partera huarmigucunataca huahuacunata charichun bendiciashpa familiata mirachirca (Éx. 1:15-21).

12. Deboramanda, Jaelmandaca ¿imatata nipanchiman?

12 Jipa punllacunamanga juezcunami Israel llactapi tiarca. Chai punllacunapipashmi Jehová Diosca Débora shuti profeta huarmiguta alicachishpa ayudajurca. Deborami juez Baractaca animashpa, israelitacunatapash contracunamanda quishpirichun ayudarca. Shinapash nircami, Canaán llactamanda soldadocunata mandaj Sisarataca na shuj jarichu huañuchinga, shuj huarmimi huañuchinga nishpa. Débora nishca shinaca, na israelita cashpapash Jael shuti huarmimi Sisarataca huañuchirca (Juec. 4:4-9, 17-22).

13. Bibliapica ¿imatata Abigailmandaca yachachin?

13 Cunanga Abigailpa ejemplota ricupashun. Paica Jesús shamungapaj casi mil cien huatacuna faltajuj punllacunapimi causarca. Abigailca imatapash aliguta pensarishpami ruran carca. Cutin paipa cusa Nabalca juizu illaj, shinlli shungu, nalita rurajmi carca (1 Sam. 25:2, 3, 25). Shuj  punllaca Nabalpa sirvijcunata, animalcunata cuidashca cashpami, Davidca micunata carahuai nishpa paita cumbashpa purinajuj runacunata Nabalpaman cacharca. Shinapash Nabalca nimatapash na cushpami Davidpa sirvijcunataca rimashpa, pingaichishpa cacharca. Chaita yachaj chayashpami Davidca ushashcata culirashpa Nabaltapash paipa sirvijcunatapash huañuchingapaj rijurca. Abigailca David huañuchingapaj shamujujta yachashpami Davidman, paipa sirvijcunamanga micunata, yacuta carangapaj rirca. Shinami Abigailca ashtaca gentecunata David ama huañuchichun trancarca (1 Sam. 25:8-18). Chaimandami jipamanga Davidca nirca: “Israelcunata Mandaj Taita Diosca, alicachi tucushca cachun. Paimi candaca, ñucahuan cunan tuparichun cachamushca” nishpa (1 Sam. 25:32). Nabal huañushca jipaca Abigailhuanmi Davidca cazararca (1 Sam. 25:37-42).

14. a) Salumba ushicunaca ¿ima trabajopita ayudanajurca? b) Cunan punllacunapi panigucunapash ¿imashinata Salumba ushicunapa ejemplota catinajun?

14 Jesús shamungapaj 607 huatacuna faltajuj punllacunapimi babiloniocunaca Jerusalén llactatapash, Diospa huasitapash tucuchirca. Chaipica ashtaca jaricuna, huarmicuna, huahuacunami huañurca. Shinapash 455 huata jipami Jerusalenba jatun pircacunataca cutin shayachi callarirca. Nehemiasmi pircacunata cutin aliguta shayachichunga ricuriajurca (Neh. 3:12). Chai trabajocunapica Salumba ushicunami, jatun mandajpa ushicuna cashpapash humilde trabajocunapi ayudanajurca. Cunan punllacunapi ashtaca panigucunapash Jehovapa organización imapash construccionda rurajujpica cushijushpami imagupipash ayudan.

JESUSPA PUNLLACUNAPIPASHMI JEHOVÁ DIOSTA ALI SIRVIJ HUARMICUNA TIARCA

15. Jehová Diosca ¿imashinata Mariata bendiciarca?

15 Jipa huatacunapica shuj huarmicunatapashmi Jehová Diosca bendiciarca. Cunanga Mariapa ejemplota ricupashun. Mariaca ali alimi carca. Paica Josehuanmi cazaragrijurca. Jehová Diospa espíritu santopa ayudahuanmi nara cazarashpallata vijsayu quedarca. Shinapash ¿imamandata Jehová Diosca Mariata agllarca paipa Churita viñachichun? Mariami Taita Diospa jucha illaj Churitaca ali viñachi ushana carca. Jesuspa mama canaca shuj jatun bendicionmi carca (Mat. 1:18-25.)

16. Jesusca ¿imashinata huarmicunataca tratan carca? Shuj ejemplota nipai.

16 Jesusca huarmicunataca llaquishpa aligutami tratarca. Shuj punllaca shuj huarmigumi 12 huatacunata yahuar shamuj ungüihuan ungushcalla parajurca. Chaimandami ashtaca gentecunapa chaupipi Jesús rijujpica huashata rishpa Jesuspa ropata tacarirca. Tacarishcamanda rimanapa randica ali shimicunahuan parlashpami Jesusca nirca: ‘Ñuca huahualla, ñucata tucui shunguhuan crishpami quishpirishcangui. Cunanga, ninanda cushijushpa rilla. Llaquichijuj nanaica, cutinga na llaquichingachu’ nishpa (Mar. 5:25-34).

17. Huata 33 Pentecostés punllapica ¿imata pasarca?

17 Paipa catijcunahuan Jesús villachishpa purijujpica huaquin huarmigucunapashmi paicuna imata minishtijujta ricushpa ayudanajurca (Luc. 8:1-3). Huata 33 Pentecostés punllapipash casi 120 jaricuna, huarmicunami Taita Diospa espíritu santota chasquirca (Hechos 2:1-4, liingui). Jehová Diosca nishcarcami: ‘Ñuca espiritutami talinshna tucui gentecunaman cachamusha. Shina cachamujpimi, cangunapa churicunapash, ushicunapash ñucamanda villanajunga. Chai punllacunapica, sirvishpa causaj jaricunamanbash, huarmicunamanbashmi ñuca espirituta talinshna cachamusha’ nishpa (Joel 2:28, 29). Imashinami ricunchi, Jehová Diosca paipa espíritu santohuanmi huaquin jaricunata, huaquin huarmicunata agllarca, paipa Israel tucuchun (Gál. 3:28; 6:15, 16, NM). Apostolcunapa punllacunapipash Felipepa chuscu ushicunami ali villaicunata villachirca (Hech. 21:8, 9).

 HUARMICUNACA SOLDADOCUNA CUENDAMI ASHTACACUNA CAN

18, 19. a) Jehová Diosca ¿imashinata jaricunatapash huarmicunatapash bendiciashca? b) Salmistapa ¿ima shimicunata cunan punllacunapipash pactarijun?

18 Ña 1875 huata tucujujtaca tauca jaricuna, huarmicunami Taita Diostaca aliguta adorangapaj munanajurca. Paicuna villachi callarishpami Jesuspa cai shimicuna pactarichun ñanda pascashpa saquirca: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” nishpa (Mat. 24:14).

19 Chai punllacunapica Bibliamanda Yachajujcunaca ashagucunallami carca. Shinapash asha asha mirashpami cunanbica casi 8 millón testigo de Jehovacuna canchi. 2013 huatapica 11 millón yali gentecunami Jesús Huañushcata Yaringapaj tandanajurca. Chaipica casi tucui llactacunapimi huarmicuna ashtahuanbacha tandanajurca. Tiempo completopipash millón yali testigocunami sirvinajun. Chai tucuillacunamandaca huarmicunami ashtahuan can. Imashinami ricunchi, Jehová Diosca huarmicunatapashmi bendiciashca paipa shutipi parlachun. Cai punllacunapipash salmistapa cai shimicunami pactarijun: ‘Jatun Diosllatami villachijurca, ali villaitaca ashtaca huarmicunami [“soldadocuna cuenda”, NM] villanajunga’ nishpa (Sal. 68:11).

Ali villaita villaj huarmicunaca soldadocuna cuendami ashtacacuna can (Párrafo 18, 19ta ricupangui)

JEHOVÁ DIOSTA ALI SIRVIJ HUARMICUNACA ASHTACA BENDICIONGUNATAMI CHARINGA

20. Familiahuan Adorana Tutapi o estudio personalpica ¿picunamandata yachajui ushapanchiman?

20 Bibliapi tiaj ashtaca huarmicunapa ali ejemplocunata caipi yachajuitaca na pactaringachu. Shinapash Familiahuan Adorana Tutapi o ñucanchi estudio personalpica Rutpa, reina Esterpa ali ejemplocunamandaca yachajuita ushanchimi (Rut 1:16, 17). Ñucanchi publicaciongunapi Rutmanda, Estermanda liishpami ñucanchi feta shinlliyachishun.

21. Ashtaca panigucunaca ¿imashinata llaqui punllacunapipash Jehová Diosta cazushca?

21 Panigucuna villachishpa purinajujpica Jehová Diosca ashtacatami bendician. Llaquicunapi cajpipash ayudanmi. Shuj ejemplota ricupashun. Adolf Hitler Alemania llactata mandajujpi, comunista gobiernocuna mandajujpica Jehová Diosmi ashtaca panicunataca paipa mandashcacunata cazuchun ayudarca. Ashtaca panigucunaca Jehová Diosta cazuimandami ninanda sufrirca, huañuitapash huañurca (Hech. 5:29). Cunan punllacunapipash ashtaca huauquicuna, panicunami Jehová Dios paicunata mandachun munan. Chaimandami Jehová Diosca imashina punda tiempo israelitacunata ayudarca, shinallata cunan punllapi Jesusta catijcunatapash nin: “Na manllanachu canguichi, ñucami ayudasha” nishpa (Is. 41:10-13).

22. Jehová Diosta sirvijcunaca ¿imatata jipa punllacunapica rurai ushanga?

22 Ñallami Jehovata sirvij jaricunapash, huarmicunapash cai Alpataca shuj juyailla paraíso Alpaguta ruranga. Paicunami ashtaca millón huañushca gentecuna causarijpica Jehová Diospa munaita yachachinga. Shinapash chai punlla chayamungacamanga huauquicunapash panicunapash ‘shujllashna’ tandanajushpa Jehová Diosta sirvishunchi (Sof. 3:9).