Agllashca temata ricungapaj

Temacunata ricungapaj

‘Cangunami ñucapa testigocuna canguichi’

‘Cangunami ñucapa testigocuna canguichi’

“Cangunami ñucapa testigocuna canguichi.” (HECH. 1:7, 8, NM)

1, 2. a) ¿Pita tucui testigocunata ashtahuan yali testigo can? b) Jesús shutica ¿imatata nisha nin? c) Judiocuna Jehová Diospa ñaupajpi cutin ali ricurichunga ¿imatata Jesusca rurarca?

ROMA llactamanda gobernador Poncio Pilatopa ñaupajpi cashpaca Jesusca nircami: ‘Na llullashpa villangapami cai pachapi huacharimurcani’ nishpa (Juan 18:33-37, liingui). Jipa huatacunamanbash apóstol Pabloca nircami, Jesusca Poncio Pilatopa ñaupajpimi imatapash na manllashpa aliguta villarca nishpa (1 Tim. 6:13). Ñucanchicunapash Diablo mandajuj nali mundopimi causanajunchi. Chaimandami Jesushna ‘imata ricushcata, imashina cashcata na llullashpa villangapaca’ shuj testigo cuenda shinlli shayarishpa, na manllashpa villana canchi (Apoc. 3:14).

2 Judiocunaca tucuillami Jehová Diospa testigocuna carca (Is. 43:10). Shinapash tucuilla judiocunamandaca Jesusmi ashtahuan ali testigo carca. Jesús nara nacirijpica shuj angelmi Josetaca nirca, canba huarmi tucuna Mariaca ‘shuj jari huahuagutami ungunga. Chai huahuagutaca Jesús shutita shutichingui. Paica gentecunata juchamanda quishpichina cashpami, chashna shutiguta charinga’ nishpa (Mat. 1:20, 21). Jesús shutita hebreo shimipi ricujpica ¿imatata nisha nin? Jesús shutica  “Jehová Diosmi salvanga” nijunmi. Jehová Diosca gentecuna cutin paipa ñaupajpi ali ricurichun munashpami Jesustaca gentecunapa juchamanda huañuchun cai Alpaman cachamurca. Jesuspash judiocunataca nircami, Jehová Dios chasquichun munashpaca cangunapa juchacunamanda arripintirinami canguichi nishpa (Mat. 10:6; 15:24; Luc. 19:10). Chaimandami Jesusca Taita Diospa Reinomanda villashpa purirca. Marcos 1:14, 15​pica ninmi: ‘Jesusmi Galilea llactaman shamushpa, Taita Dios mandajujmanda ali villaita villajurca. Paica cashnami nijurca: “Chai juyailla punllacunaca, ña pactamushcami. Juchayu cashcamanda ninanda llaquirishpa, Diospaman tigrarichi. Cai ali villaitaca crinami canguichi. Taita Dios mandanaca, ñami pactamushca”’ nishpa. Chai punllacunapi judiocunata ñaupaman pushajcunatapash na manllashpa rimajpimi paicunaca Jesusta huañuchingapaj purinajurca (Mar. 11:17, 18; 15:1-15).

‘TAITA DIOSPA JUYAILLA RURASHCACUNA’

3. Jesusta llaquinaita huañuchishcamanda quimsa punllacuna jipaca ¿imata pasarca?

3 Jesusta llaquinaita huañuchijpica quimsa punllacuna jipami Jehová Diosca Jesusta causachirca. Shinapash gentecunashna cuerpohuanga na causachircachu. Espíritu cuerpohuanmi causachirca (1 Ped. 3:18). Espíritu cuerpohuan causachijpipash paipa catijcuna causarishcata crichunmi, Jesusca gentecunashna cuerpohuan paicunamanga ricurirca. Jesusca causarishca punllapillatami picha viajeta paipa shuj shuj catijcunaman ricurirca (Mat. 28:8-10; Luc. 24:13-16, 30-36; Juan 20:11-18).

4. a) Paipa catijcunamanga ¿imatata Jesusca intindichirca? b) Jesusca ¿imatata paipa catijcunataca mandarca?

4 Ña picha viaje tucujpica apostolcunapash shujcunapash tandanajushca tianajujpimi Jesusca ricurirca. Chaipimi Jesusca ‘Dios escribichishca Shimicunapi imata nijushcatapash yachai ushachun, paicunapa yuyaita pascarca’. Shinami paicunaca contracuna huañuchijpipash Jesús causarinata Bibliapi parlajushcata intindirca. Chai tandanajuita tucuchingapaca Jesusca mandarcami, ñucapa shutipimi ‘Jerusalenmanda callarishpa, tucui llactacunapi causajcunamanga, ninanda llaquirishpa, Taita Diospaman tigrarichi. Shina rurajpica Taita Diosmi cangunapaj juchacunata anchuchinga’ nishpa villanguichi nirca. Ashtahuangarin ‘chai tucui villashcacuna pactajtaca, cangunami ricunguichi’ nircami (Luc. 24:44-48).

5, 6. a) ¿Imamandata Jesusca nirca, “ñucapa testigocunami canguichi” nishpa? b) Jesuspa catijcunaca ¿imatata yachachi callarina carca?

5 Jesusca 40 punllacuna jipami último viajeta paipa catijcunaman ricurishpa nirca: “Cangunami Jerusalenbi, tucui Judea llactapi, Samaria llactapi, caru caru llactacunapipash ñucapa testigocuna canguichi” nishpa (Hech. 1:8, NM). Jesús imata mandashcataca paipa catijcunaca alimi intindishcanga. Shinapash paipa catijcunaca israelitacuna caimandaca ñami Jehovapa testigocuna carca. Shinaca ¿imamandata Jesusca nirca, ñucapa testigocunami canguichi nishpa?

Jesusta catijcunaca Jehová Dios imata ruragrijujta villanataca na shaijunchichu (Párrafo 5, 6ta ricupangui)

6 Jesuspa catijcunaca Jehová Dios Jesusta cai Alpaman cachamushpa gentecunata salvajushcatami shujcunamanga yachachi callarina carca. Chai punllacamanga egipciocunamandapash, babiloniocunamandapashmi Jehová Diosca israelitacunata salvashcarca. Shinapash Jesusca huañushcacunamanda causarishpami gentecunataca juchamanda, huañuimandapash tucuicunata salvarca. Ashtahuangarin,  ungidocunaca Taita Diospa espirituta chasquishpami huata 33, Pentecostés fiestapica ‘Taita Diospa juyailla rurashcacunata’ villachirca. Shinami ashtacacunaca chai ali villaicunata chasquirca. Jesusca huañushcacunamanda causarishpami cielopi mandangapaj ashtaca autoridadta chasquirca. Shinami Jehová Diosca gentecunata salvangapaj Jesusta utilizajurca (Hech. 2:5, 11, 37-41).

‘ASHTACACUNATA QUISHPICHINGAPAMI SHAMURCA’

7. Pentecostés punllapica ¿imatata Jehová Diosca ricuchirca?

7 Pentecostés punllapi ima pasashcata ricushpami cuenta japinchi, gentecunata salvangapaj Jesús paipa causaita cujpi Jehová Dios alicachishpa chasquishcata (Heb. 9:11, 12, 24). Jesusca nircami: ‘Ñucata sirvihuaichi ningapaca, na shamurcanichu. Ashtahuangarin shujcunata sirvishpa, ashtacacunata ñuca huañushpa quishpichingapami shamurcani’ nishpa (Mat. 20:28). “Ashtacacuna” nishpaca ¿arripintirishca judiocunamandallachu parlajurca? Na judiocunamandallachu parlajurca. Jesusca ‘huañushpami cai pachapi causajcunapa juchata anchuchin’. Shinaca “ashtacacuna” nishpaca tucui gentecunamandami parlajurca (1 Tim. 2:4-6; Juan 1:29).

8. a) Jesusta catijcunaca ¿imashinata Jesusmanda villachi usharca? b) Jesusta catijcunaca ¿maicamanda villachirca?

8 Chai punllacunapi Jesusta catijcunaca Taita Diospa espíritu santo fuerzata cujpimi Jesusmandaca na manllashpa villachishpa catirca (Hechos 5:31, 32, liingui). Chaimandami, huata 33 Pentecostés punllamanda 27 huatacuna jipaca nirca: ‘Na llullashpa villajuj ali villaicunataca’ ‘cai pachapi tucui miraicunamanmi villanajunchi’ nishpa (Col. 1:5, 23).

9. Jesús nishca shinaca ¿imata congregaciongunapica pasajurca?

9 Jesús nishca shinaca, Taita Diosmanda caruyashca gentecunata utilizashpami Diabloca chai tiempo congregaciongunapi pandata yachachi callarirca (Hech. 20:29, 30; 2 Ped. 2:2, 3; Jud. 3, 4). Chai panda yachachishcacunaca ‘tucuri punllacunacamanmi’ tiana carca (Mat. 13:37-43). Jehová Diosca 1914 huatapi, octubre quillapimi Jesusmanga Diospa Reinopi mandachun autoridadta  curca. Chai huatapimi Diablopa nali mundopa ‘tucuri punllacunaca’ callarirca (2 Tim. 3:1).

10. a) Ungidocunaca ¿imatata pundamandallata villachinajurca? b) Huata 1914pica ¿imata pasarca? c) ¿Imamandata 1914 huatapi Jesús mandai callarishcata crinchi?

10 Profeta Danielpa profeciaca nijurcami, shuj jatun quiruta cuchujpimi, ‘canchis huatacuna’ jipaca cutin retoñanga nishpa (Dan. 4:16). Chai shimicunata intindishpami ungidocunaca nara 1914 huata tucujpillata villachinajurca 1914 huatapi, octubre quillataca imapash importante cosascunami pasanga nishpa. Jesuspash pai rey tucushcata yachachun, shinallata tucuri punllacuna callarishcata yachachunmi huaquin señalcunata curca. Chai señalcuna 1914 huatamanda pactarijpimi, 1914 huatapi Jesús mandai callarishcata crinchi (Mat. 24:3, 7, 14; Luc. 21:24). Huata 1914pi Diospa Reinopi Jesús mandai callarishcapash ‘Taita Diospa juyailla rurashcacunami’ can.

11, 12. a) Taita Diospa Reinopi mandai callarishpaca ¿imatata Jesusca rurarca? Huaquin huatacuna jipaca ¿imata pasarca? b) Huata 1935pica ¿imata ricuri callarirca? (Página 24ta ricupangui).

11 Diospa Reinopi Jesús mandai callarishpaca, “Babilonia shuti jatun pueblo” ungidocunata pandachishpa catichunga na saquircachu (Apoc. 18:2, 4). Chaimandami 1919 huatapi Primera Guerra Mundial tucurishca jipaca mundo enteropi ali villaicunata ungidocunaca villachi callarirca. Villachishpaca nircami, Jesusta cachamushpami Jehová Diosca gentecunata salvarca, Jesusca ñami jahua cielopi mandajun nishpa. Shinami ashtacacunaca yachajushpa, Diospa Reinopi Jesushuan mandangapaj agllai tucurca.

12 Ashtahuangarin, ungidocuna villachijpimi 1935 huatapica “shuj llamagucuna” nishca gentecunapash ricuri callarirca. Chai gentecunami tucui llactamanda ‘na cuentai ushanalla ashtaca gentecuna’ nishca can. Ungidocuna ñaupaman pushajpimi paicunapash na manllashpa villachinajun. Na shaijushpa villachishcamanda, Jesuspi feta churashcamandami ‘ninan manllai llaqui’ punllacunapi Diablopa nali ruraicunata tucuchijpica salvaringa (Juan 10:16; Apoc. 7:9, 10, 14).

NA MANLLASHPA VILLASHUNCHI

13. a) ¿Imatata rurashpa catingapaj munapanchi? b) ¿Imashinata punda tiempopi Jesusta catijcunapa ejemplota catipashun?

13 Jehová Dios imata rurashcata, imata ruranataca villashpa catinami canchi. Shinapash huaquinbica shinllimi can. Huaquin llactacunapi gentecunaca na uyangapaj munanllu, burlarinajunmi. Huaquinbicarin macangapami munan. Chashna llaquicunapi cashpaca apóstol Pablo, paipa cumbacuna imata rurashcatami catina canchi.  Paica nircami: ‘Ñucanchi Taita Dios shinlli tucuchun, ñucanchiman ushaita carajpimi, villachun na munajpipash, Taita Diosmanda ali villaitaca cangunaman villarcanchi’ nishpa (1 Tes. 2:2). Shinaca Diablopa nali mundo tucuringacamanga Jehová Diosman mingarishpa imata nishcata pactachishunchi, ama shaijushunchichu (Is. 6:11). Punda tiempopi Jesusta catijcunapa ejemplota catishpa, ñucanchicunapash llaquicunata aguantangapaca Jehová Diospa ninan ushaita mañashunchi (2 Corintios 4:1, 7, liingui; Luc. 11:13).

14, 15. a) Punda tiempopi Jesusta catijcunataca ¿imashinata shuj gentecunaca ricun carca? b) Apóstol Pedroca ¿imashinata Jesusta catijcunataca animarca? c) Villachijpi pipash nali tratajpica ¿imatata yarina capanchi?

14 Cunan punllacunapica ashtaca gentecunami nin, Jesusta catinchimi, Taita Diosta adoranchimi nishpa. Shinapash, ‘paicunapa nali rurashcacunahuanmi Diospi na crishcata ricuchinajun’ (Tito 1:16). Punda tiempopi Jesusta catijcunata yaripashunchi. Gentecunaca ninanda nalicachishpami paicunataca ricun carca. Chaimandami apóstol Pedroca cashna nishpa animarca: ‘Cristota catishcamanda nalicachishpa rimai tucujushpaca, ninanda cushijunguichi. Cangunapa shungupica Diospa espiritumi causajun’ nishpa (1 Ped. 4:14).

15 Cai shimicunata uyashpaca ñucanchicunapashmi animarina canchi. Ñucanchicunaca Jehovapa testigocuna cashpapash, Jesuspa testigocunapashmi canchi. Chaimandami Jesusca ñami mandajun nishpa villachinchi. Jehová Diosmanda llaquichi tucushpaca Jesusmandapash llaquichi tucujuj cuendami canchi. Jesusca paipa contracunataca nircami: “Ñucaca, ñuca Taitapaj shutipimi shamurcani. Shina cajpipash, ñucataca na chasquishpami causanguichi” nishpa (Juan 5:43). Shinaca villachijujpi pipash nali tratajpica na llaquilla sintirijunachu canchi. Rimajpica Taita Dios ñucanchita alicachishpa ricujujta, paipa espirituta charishcatami yarina canchi.

16, 17. a) Ashtaca llactacunapica ¿imata pasajun? b) ¿Imatata rurashpa catina capanchi?

16 Shinallata yaripashunchi, ashtaca llactacunapica uyangapaj munaj gentecuna tianrami. Huaquinbica cutin cutin villachijushca pushtucunapillatami yachajungapaj munaj gentecunata tarishcanchi. Shinaca uyangapaj munaj gentecunataca na cungashpa cutin visitashunchi. Usharijpicarin Jehová Diosman mingarishpa, bautizarichun Bibliata yachachishunchi. Sudáfrica llactamanda Sarie shuti panigupa ejemplota ricupashun. Paica 70 yali huatacunatami cushijushpa villachijushca. Paica ninmi: “Jesús salvangapaj shamujpi Jehová Diosman ashtahuan quimiri ushashcamandaca ninandami agradicini. Paipa shutita shuj gentecunaman yachachi ushashcamandapash ninandami cushijuni” nishpa. Paica paipa cusandimi paicunapa quimsa huahuacunatapash shuj gentecunatapash Jehová Diosta sirvichun ayudashca. Chai paniguca ninbashmi: “Villachishpallami jatun cushijuita tari ushanchi. Jehová Dios paipa espíritu santohuan ayudajpimi shuj gentecunapash salvarichun ayudai ushanchi” nishpa.

17 Bautizarishca cashpa o ña bautizaringapaj munanajushpapash Jehová Diospa testigocunahuan tandanajui ushashcamanda agradicishunchi. Shinaca Diablopa nali mundomanda caruyashpa ashtahuan villachishpa catishunchi. Shina rurashpami ñucanchi Taita Jehová Diosta alicachijushcata, paipa shutita charishcamanda ninanda cushijushcata ricuchishun.