Agllashca temata ricungapaj

Temacunata ricungapaj

 CALLARI TEMA

Quiquinda juyaimandaca ¿imatata Taita Diosca rurashca?

Quiquinda juyaimandaca ¿imatata Taita Diosca rurashca?

“Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa.” (Juan 3:​16)

Cai textotaca ashtaca gentecunami rijsin. Cai textomi Taita Dios ñucanchita juyajta, imashina salvarinata yachachin. Chaimandami ashtaca llactapi gentecunaca imapash pugllaicunapi, presentaciongunapi, carrocunapi, cartelcunapi cai textoca escribishpa churan.

Chai gentecunaca ninmi, Taita Diosca juyanmi, para siempre causanatami caranga nishpa. Shinapash quiquinga ¿imatata nipanguiman? Quiquinda juyaimandaca ¿imatata Taita Diosca rurashca?

‘CAI PACHAPI CAUSAJCUNATACA NINANDAMI JUYARCA’

Ashtaca gentecunaca ninmi, Taita Diosmi jahua cielota, cai Alpata, gentecunatapash rurarca nishpa. Gentecunaca alipacha rurashca cuerpotami charinchi. Shinaca alipacha yachaita charij Taita Diosmi ñucanchicunataca rurashcanga. Shinallata ashtaca gentecunaca Taita Diosmandami causanchi nishpami Taita Diostaca ninanda agradicin. Ashtahuangarin ninmi, Taita Diosmi causaitapash, tamiatapash, inditapash, yacutapash, tucui ima micunatapash carajun nishpa.

Tucuimanda Taita Diosta agradicinaca alimi can (Salmo 104:​10-28; 145:​15, 16; Hechos 4:24). Taita Diosca ñucanchicunata juyaimandami tucuita ñucanchimanga  cun. Apóstol Pabloca nircami, Taita Diosmi ‘causaita, samaita, imata munashcatapash tucuicunaman caramujun. Paimandami causanchi, purinajunchi, imatapash ruranchi’ nishpa (Hechos 17:​25, 28).

Taita Diosca paimanda yachajuna munaitami ñucanchi shungupi churarca. Paimanda ali yachajuchunbash ashtaca ayudacunatami cushca (Mateo 5:⁠3). Paimanda yachajushpa, paita cazushpaca paipa huahuacunashnami tucuita ushanchi (Romanos 8:​19-21).

Juan 3:16​pi nishca shinaca, Taita Diosca ñucanchicunata ninanda juyaimandami paipa Churi Jesustaca cai Alpaman cachamurca. Jesuspash Taita Diosmanda yachachingapaj, ñucanchimanda huañungapami cai Alpaman shamurca. Shinapash ¿imamandata Jesusca huañuna carca? Taita Diosca ¿imashinata paipa Churita ñucanchimanda huañuchun saquishpa ñucanchicunata juyashcata ricuchirca? Chai tapuicunataca ashtaca gentecunaca na yachanllu. Shinaca cai tapuicunata Bibliahuan yachajupashun.

‘PAIPA SHUJLLA CHURITAMI CARAMURCA’

Taita Diosca gentecuna na ungushpa, na mayor yashpa tucushpa cai Alpapi causachun munashpami, Adanda Evata rurashpaca shuj juyailla paraíso Alpagupi churarca. Shinapash Adanga Taita Diosta na cazurcachu. Chaimandami Adanbash ñucanchicunapash huañunchi (Génesis 2:17). Apóstol Pabloca nircami: ‘Juchata ruranaca shujlla runamandami cai pachapica callarirca. Chai juchamandami huañuipash callarirca. Shinallata tucuicuna juchata rurashcamandami huañuipash tucuicunaman yalijun’ nishpa (Romanos 5:12).

Taita Diosca alita ruraj Diosmi can (Salmo 37:28). Paica Adanba culpamanda tucui gentecuna huañuchunga na munarcachu. Tucui gentecuna Paraíso Alpagupi causachunmi munarca. Diospa Leypi nishca shinaca, pitapash huañuchishpaca chai huañushcapa causaimanda paganami carca (Éxodo 21:​23). Adanga jucha illaj causaitami chingachirca. Shinaca ¿pita jucha illaj causaita cushpa pagarca?

Jesusca ñucanchimanda huañushpa juchamanda huañuimanda salvangapami cai Alpaman shamurca

Adanba huahuacunaca tucuillami juchayucuna carca (Salmo 49:​6-9). Jesusllami Adanshnallata jucha illaj nacirirca. Jesusllami gentecunataca Adanba juchamanda salvaita usharca (Romanos 3:​23, 24; 6:23). Shinaca ñucanchicunata ninanda juyashpa salvashcamandaca ¿imatata rurashun?

“PIPASH PAITA CRISHPACA”

Juan 3:16​ca ninbashmi: “Pipash paita crishpaca,  na chingaita chingagringachu, ashtahuangarin causaitami causagringa” nishpa. Shinaca para siempre causangapaj munashpaca Jesuspi crishpami pai mandashcata cazuna canchi.

Shinapash huaquingunaca ninmi: Juan 3:16​pica Jesuspi crinamandallami parlajun, Jesusta cazunamandaca na parlajunllu nishpa. Shinapash Jesuspi crinimi nishpaca, Jesusmanda salvarishcata, Jesuspi apoyarishpa Jesuspa mandashcacunata cazunami canchi. Shinami Taita Diospa ñaupajpica ali ricurishun. Crinimi nishpa o feta charinimi nishpapash na imatapash rurajpica chai feca na imapapash sirvinllu (Santiago 2:26). Jesuspi feta charishpaca Jesús mandashcata pactachishpami causangapaj munashun.

Apóstol Pabloca nircami: ‘Cristopa juyaimi ñucanchitaca yarichimujun: Shujllami tucuicunamanda huañurca. Ama paicunapa munaihuanlla causachunmi Cristoca tucuicunamanda huañurca. Ashtahuangarin Cristopalla causachunmi paicunamandaca huañushpa causarirca’ nishpa (2 Corintios 5:​14, 15). Jesús ñucanchicunamanda huañushcata agradicishpaca cambianami canchi. Ñucanchi munaicunata huashaman saquishpami Jesuspa mandashcata pundapi churana canchi. Cambianchi nishpaca Jesús munashcashnami causana canchi. Imata rurajushpa, imata rurasha yajushpapash Jesuspa munashcatami rurana canchi. Shinapash Jesuspi crishcamandaca ¿ima bendiciongunatata charishun?

‘AMA CHINGAITA CHINGAGRICHUN CAUSAITA CAUSAGRICHUN’

Juan 3:16​ca ninbashmi Jesús causaita cushcapi crishpa paipa mandashcacunata pactachishpaca causaitami causagringa o para siempremi causanga nishpa. Shinapash tucui gentecunaca ¿maipita causanga?

Huaquin gentecunaca jahua cielopimi causanga. Jesusca paipa catijcunataca nircami, cangunapash jahua cielopi cachunmi shuj pushtuguta seguragrini nishpa (Juan 14:​2, 3; Filipenses 3:​20, 21). Chai gentecuna causarishpaca ‘Taita Diospajta, Cristopajta ruraj [sacerdotecunami] canga. Paicunami huaranga huatacaman Cristohuan mandanajunga’ (Apocalipsis 20:⁠6).

Jesushuan jahua cielopi mandangapaj rinacunaca ashagucunallami canga. Jesusca nircami: ‘Ñuca llamagucuna cangunaca ashalla cashpapash na manllanachu canguichi. Cangunapa Taitaca [Reinota] cangunaman carasha nijunmi’ nishpa (Lucas 12:32). Ashagucunalla cashpapash ¿mashnata canga? Apocalipsis 14: 1,4​pica ninmi: ‘Chaita ricushca jipaca Sión shuti urcu jahuapi Llama shayajujtami ricurcani. Paihuanga [144 mil] gentecunami chaipi carca. Paicunaca maltun Llamagupa shutita, paipa Taitapa shutitami frentepi escribishca [charirca]. Paicunaca tucui gentepuracunamanda quishpichishca cashpami Taita Diosmanbash, Llamagumanbash punda carai tucushcacuna’ carca nishpa. Cai Alpapi gentecunahuan ricujpica 144 milcunaca ashagullami can. Cai textopi nishca shinaca, reycunami canga. Shinapash ¿picunatashi mandanajunga?

Jesusca nircami: ‘Na cai corralmanda shuj llamagucunatapash charinimi. Paicunatapash pushamunami cani. Paicunami ñuca villashcata uyashpa cazunga. Shujlla corralmi tucunga, ñucallami michijusha’ nishpa (Juan 10:16). Cai textopi ‘shuj llamagucuna’ nishpaca cai Alpapi causana gentecunamandami parlajun. ¿Imamandata shina ninchi?

Bibliaca cutin cutinmi nijun, cai Alpapica juyailla ali causaimi tianga nishpa. Quiquinba  ñavihuanbacha ricungapaj munashpaca quiquinba Bibliapillata cai textocunata mascashpa ricupai: Salmo 37:​9-11; 46:​8, 9; 72:​7, 8, 16; Isaías 35:​5, 6; 65:​21-23; Mateo 5:5; Juan 5:​28, 29; Apocalipsis 21:⁠4. Cai textocunapimi nijun, guerracuna tucuringami, ungüicunapash chingaringami, yarjaipash, huañuipash tucuringami nishpa. Ashtahuangarin ninmi, shamuj punllacunapica paicunallata huasichishpa, cozechashpami gentecunaca causanga. Tranquilo, ali alpagupimi huahuacunatapash viñachinga nishpa. * Shinaca ¿nachu cashna juyailla causaiguta charingapaj munapanguiman?

TAITA DIOSCA ASHTACATAMI CARASHCA

Imashinami cai temapi ricupashcanchi Taita Diosca ashtacatami ñucanchimanga carashca. Paimi causaita, pensamientota, ñucanchi causashpa catichun imata minishtishcatapash cushca. Ashtahuangarin, imashinami Juan 3:16​pi yachajushcanchi, ñucanchicuna ashtaca bendiciongunata charichunmi paipa shujlla Churita ñucanchimanda huañuchun cachamushca.

Ungüicuna illaj, huañuipash chingarishca Alpapimi micunapash yapalla para siempre cushijushpa causashun. Shinapash chai bendiciongunata japingapaca ¿imatata cada uno rurana capanchi? ¿Imatata Taita Diosmandaca ruranajupanchi?

^ par. 24 Bibliapa profeciacunamanda ashtahuan yachangapaj munashpaca testigo de Jehovacuna llujchishca ¿Imatata Bibliaca yachachin? libropi capítulo 3ta ricupangui.