Agllashca temata ricungapaj

Temacunata ricungapaj

 ALI EJEMPLOCUNA | NOÉ

Noeca canchispuracunandimi salvarirca

Noeca canchispuracunandimi salvarirca

CANLLAPI ushashcatapacha huairashpa tamiajujpimi, Noeca paipa familiandi arca ucupi ninanda manllarishpa shuj uchilla lamparaguhuan punchayachishcalla tianajun.

Paipa huarmipash paipa quimsa churicunapash quimsa jachungunapash paipa ladopi tianajujta ricushpaca Noeca ninandami cushijushcanga. Paipa juyashca familiapash salvarijushcamandaca paicunapash uyachunmi Noeca shinllita caparishpa Taita Diostaca pagui nijushcanga.

Noepa shinlli feta ricushpami Jehová Diosca paitapash paipa familiatapash salvarca (Hebreos 11:⁠7). Chai manllanai tamiamanda salvarishca jipa punllacunamanbash Noeca ashtahuan feta charishcatami ricuchina carca. Cunan punllacunapipash ñami tucuri punllacunapi causanajunchi. Chaimandami ñucanchipash shinlli feta charina canchi. Shinaca Noepa ejemplota imashina catinata yachajupashunchi.

40 PUNLLACUNA 40 TUTACUNA

40 punllacunata 40 tutacunata ninanda tamiajpimi yacucunapash ashtahuan ashtahuan jundarca (Génesis 7:​4, 11, 12). Shinami Noeca ricurca ali gentecunata Taita Dios imashina salvajta, cutin nali gentecunata llaquichijtapash.

Noepa punllacunapica ashtaca angelcunami Diablota catirca. Chaimandami cai Alpapi huarmicunata ricushpaca, chai huarmicunahuan cangapaj munashpa jahua cielota saquishpa cai Alpaman shamurca. Paicunapa huahuacunaca manllanai jatun jatuncunami carca (Judas 6; Génesis 6:⁠4). Chai huahuacuna mirashpa, Taita Dios rurashca gentecunata ninanda huaglichijpica Diabloca ashtacatami cushijushcanga.

Shinapash ninanda tamiajpimi nali angelcunaca paicunapa cuerpota saquishpa angelcuna causajushca pushtuman tigrarca. Cutinga aichayu, tulluyu cuerpotaca na chari usharcachu. Nali angelcunapa huarmicuna, huahuacunaca shuj gentecunandimi chaipi tucurirca.

Ushashcata tamiangapaj casi 700 huatacuna faltajpillatami Jehová Diosca nirca, nali gentecunata tucuchigrinimi nishpa (Génesis 5:24; Judas 14, 15). Shinapash gentecunaca ashtahuan ashtahuan huaglishpami millai millaicuna tucurca. Chaimandami paicunata llaquichina punlla chayamurca. Chai punlla chayamujpica ¿Noepash paipa familiapash cushijurcachu?

Na paicunaca cushijurcachu. Taita Diospash na cushijurcachu (Ezequiel 33:11). Gentecunata salvangapaj munashpami Taita Diosca Enocta mandarca, nalicunaca tucuchi tucugrinmi nishpa villachun. Noetapash mandarcami shuj arcata rurangui nishpa. Gentecuna ricujtami Noepash paipa familiapash arcataca ashtaca huatacunapi tucuchirca. Taita Diosca Noetaca nircami, canga ‘[alita] rurashpa causanata villajmi’ cangui nishpa. Noepash Enocpash Taita Diosca nali gentecunata tucuchigrinmi nishpami  villarca (2 Pedro 2:⁠5). Villajpica gentecunaca na uyarcachu. Chaimandami Jesusca nirca: ‘Yacuhuan tucuillata tucuchina punlla chayamungacamanmi gentecunaca’ na uyarca nishpa (Mateo 24:39).

Arca punguta Jehová Dios vichashca jipaca ¿imatashi Noepash paipa familiapash rurarca? 40 punllacunata ninanda tamiajuj tiempopica paicunapura cuidarinajushcangami, arca ucupi animalcunatapash cuidanajushcangami. 40 punllacunata tamiashpa yacucuna cai Alpata tapajpimi, arcaca caiman chaiman huambujurca (Génesis 7:17). Shinami Jehová Diosca ashtaca poderta chariscata ricuchirca.

Familiandi salvarinajuimandaca Noeca cushijushcami cashcanga. Shinallata, gentecunata Jehová Dios llaquishpa paicunaman villagripaichi nishpa cachashcamandapash cushijushcami cashcanga. Pensaripashunchi, Noeca huauquicunata, panicunata, sobrinocunatapash charishcangami. Shinapash chai familicunamandaca ni pi na uyangapaj munarcachu (Génesis 5:30). Ochopuralla arca ucupi salvarishca tianajushpaca ñucanchica villarcanchimi, gentecunami na uyangapaj munarca yashpaca tranquilomi sintirishcanga.

Jehová Diosca na cambianllu (Malaquías 3:⁠6). Jesusca nircami, tucuri punllacunaca ‘Noepa punllacunashnami’ canga nishpa (Mateo 24:37). Ñallami tucui nali gentecunaca tucuringa. Chaimandami cunan punllacunapi Diosta sirvijcunapash villanajun, nalicunaca ñallami tucuchi tucunga nishpa. Shina nishpa villajpica ¿quiquinga uyagripanguichu? Bibliapi mandashcacunata ña pactachijushpaca ¿shujcunamanbash villachigripanguichu? Ima cajpipash Noepa, paipa familiapa ejemplota catipashunchi.

YACU JAHUAPI ARCA HUAMBUJUJPIPASH SALVARIRCAMI

Yacucuna cai Alpata tapajpica arcaca manllanaitami caiman chaiman cuyujushcanga. Cunan punllacunapi gentecunaca ninmi arcaca maitashi aguantanman carca nishpa.  Shinapash yacucuna jundangami nishpa o cai arcaca na aguantachu nishpaca Noeca na manllarijurcachu. Jehová Diosca Noetaca nishcarcami ninanda tamiajpica candapash canba familiatapash salvashami nishpa. Chaita yarishpami Noeca feta charishcanga (Génesis 6:​18, 19). Bibliaca ninmi: ‘Crishcamandallami Noeca huambuna huasita’ o arcata rurarca nishpa (Hebreos 11:⁠7). Tucuita Ruraj Diosca arcatapash cuidangami nishpami, Noeca Taita Dios cuidanataca tucui shunguhuan crirca. Chaimandami yacu jahuapi arca huambujujpipash Noeca paipa familiandi salvarirca (1 Pedro 3:20).

Jesús shamungapaj casi 2.370 huatacuna faltajpi, más o menos diciembre quillapimi tamianataca saquirca. Chai punllacunapica jatun urcucunatapash tucuillatami yacuca taparca. Ashtaca ashtaca yacu jahuapimi arcaca huambujushcanga (Génesis 7:​19, 20). Chai tiempopica animalcunaman micuchingapaj, animalcuna limpio, sano cachunga Noepash paipa quimsa churi Sem, Cam, Jafetca ashtaca trabajotami charishcanga. Taita Diosllatami animalgucuna arcaman yaicushpa mansocuna cachun ricuriajushcanga. *

Noeca ima hora tamiai callarishcata, ima hora tamiai tucurishcataca aligutami villarca. Shinallata 150 punllacuna jipa tamia yacucuna chaquirishcatami Noeca villarca. Shinami abril quillapi 2369 huatapica ‘Ararat shuti urcu jahuacunapi’ arcaca asintarishpa quedarca. Cunanbica Turquía llactapimi Ararat nishca urcucunaca can. Shinapash, junio quillapica ñami urcu umacunaca ricuri callarirca. Chaimandami, septiembre quillapica Noeca ventana punguta alzashpa Indita ricurca, frescolla huairatapashmi sintishcanga. Shinapash, pundatallatami Noeca shuj yana angaguta cachashpa ricujurca causangapaj ali o nali cashcata. Shinapash, chai yana angaguca na maipi shayarita ushashpami tigrarca. Jipamanga shuj palomagutapashmi cacharirca. Chai palomagupash cutin cutinmi tigrarca. Shinami jipamanga maipi tiarinata tarishpa na tigrarca (Génesis 7:24–8:13).

Jatun llaquicunapi cashpapash Noeca paipa familia Jehová Diosmanda caruyachunga na saquircachu

Noeca Diostami ashtahuanbachaca sirvingapaj munarca. Noeca paipa familiandi tandanajushpami paicunata cuidajuj Taita Diostaca mañanajushcanga. Imata ruragrijushpapash Taita Dios ima nishcatami catin carca. Ña tucuilla yacucuna chaquirijpipash Jehová Dios arcamanda llujshichi ningacamanmi Noeca shuyajurca (Génesis 8:14).

Taitacunamanbash Noeca ali ejemplotami saquirca. Noeca ordenado, trabajadormi carca. Paipa familia ali cachunmi ricurian carca. Na ñapash fiñarinllu carca. Ashtahuanga Jehová Diospa munaitami pundapica ruran carca. Noepa ejemplota catijpica ñucanchi familiapash alimi catinga.

ARCAMANDA LLUJSHICHI

Ña ultimopica Jehová Diosca mandarcami, arcamanda ‘canbash, canba huarmipash, canba churicunapash canba churicunapa huarmicunapash llujshichi’. Shinallata ‘ima animal cashpapash chai animalpurallami’ llujshina can nishpa (Génesis 8:​15-19). Imashinami ricupanchi animalcunaca na maipash cachun yangata llujshircachu. Primeroca gentecuna jipamanga animalgucunami catiria llujshirca. Ña canllapi cashpaca Noepash paipa familiapash Ararat urcucunatami ricushcanga, shinallata frescolla huairagutami sintishcanga. Nali angelcunapash na tiarcachu. Jatun manllanai gentecunapash illarcami. * Shinami cai Alpapi gentecunaca cutin aliguta causai callarina carca.

 Noeca arcamanda llujshishcandimi Jehovata adorangapaj munashpa shuj altarta rurarca. Chaipimi Jehová Diospa ñaupajpi limpio ricurishca animalcunata rupachirca (Génesis 7:2; 8:20). Chaita ricushpaca ¿imashinata Taita Diosca sintirirca?

Bibliaca ninmi, ‘Mandaj Diosca ali mishquillagutami ashnachijurca’ nishpa. Nali gentecuna mirajpica Taita Diosca ninanda nalicachishpami ricurca. Cutin, Noepash paipa familiapash paita adorangapaj munajujta ricushpaca ninandami cushijurca (Génesis 8:21). Cunanga ricupashun imashinami Jehová Diosca gentecunata llaquishpa na ñapash fiñarij Dios cashcata.

Taita Diosca Adán, Eva na cazujpimi nirca, cangunamandami alpatapash ninanda nalicachini nishpa. Chaimandami alpata trabajanaca shinlli shinlli carca. Shinapash jipamanga ña na shinachu cana carca. Noepa taita Lamec shutica nircami, gentecunaca ña na alpataca shinllita trabajashpa catingachu nishpa. Noé shutica “samachina” nisha ninmi. Diospa shimicuna pactarinata yachashpa, alpata trabajana na yapa shinlli canata yachashpaca, Noeca ashtacatami cushijushcanga. Chaimandami Noeca tarpunacunapi ashtahuan preocuparishcanga (Génesis 3:​17, 18; 5:​28, 29; 9:20).

Arcamanda llujshishpaca shuj limpio, juyailla alpagutami Noepash paipa familiapash ricurca

Jehová Diosca Noepa huahuacunataca mandarcami, na huañuchinachu canguichi, yahuartapash respetanami canguichi nishpa. Ashtahuangarin cutinga na cai Alpata yacuhuan tucuchishachu nishpami cuichita churarca. Cunan punllacunapipash cuichita ricushpami yarinchi Jehová Diosca na cai Alpata yacuhuan tucuchina cashcata (Génesis 9:​1-17).

Noepa causaica yanga parlollami can nijpipash, Noeca ciertopachami causarca. Chai punllacunapi gentecunaca ashtaca ashtaca huatacunatami causan carca. Ninanda tamiashca jipaca 350 huatacunatami Noeca causashpa catirca. Paica ashtaca llaquicunatami charirca. Shuj punllaca machashca jipami ninanda pandarirca. Paipa nieto Canaanbash chai llaquita aprovechashpami paipa huahuacunatapash jatun llaquicunapi urmachirca. Noeca Nemrodpa punllapi gentecuna ninanda huaglijta, paipa familiacunapash yanga dioscunata adoranajujtami ricurca. Shinapash paipa churi Sem ali ejemplota cujujtapashmi ricurca (Génesis 9:​21-28; 10:​8-11; 11:​1-11).

Ñucanchicunapash Noepa ejemplota catishpami shinlli feta charina canchi. Gentecuna Taita Diosmanda na uyangapaj munajpipash o Taita Diosmanda caruyajpipash Taita Diosta catinami canchi. Na shaijushpa paitalla cazushpa causajpica Taita Diosca ninandami cushijun. Jesusca nircami: ‘Tucurimuicaman llaquicunata’ aguantajcunallami salvaringa nishpa (Mateo 24:13).

^ párr. 17 Huaquin gentecunaca ninmi, Taita Diosmi animalcunataca puñuchishcanga. Chaimandami animalcunaca na ashtacata yarjachirianga nishpa. Imashina cajpipash Jehová Diosca Noeta paipa familiatapash salvarcami.

^ párr. 22 Nara ninanda tamiajpica Taita Diosca ishcai querubín angelcunatami jardín de Edén nishcata cuidachun churarca. Shinapash ninanda tamiajpica jardín de Edenbashmi tucurirca. Shinami 1600 huatacunata chai jardinda cuidanajushpapash chai ishcai querubín angelcunaca jahua cieloman tigrarca (Génesis 3:​22-24).