Agllashca temata ricungapaj

Bibliami gentecunapa causaita cambiashca

Bibliami gentecunapa causaita cambiashca

¿IMAMANDASHI testigo de Jehovacunata nalicachij, tauca huarmicunata charij jarica testigo de Jehová tucurca? Shinallata ¿imamandashi Iglesia Pentecostal nishca religionmanda pastorca, pastor canataca saquirca? Cutin maltratai tucushpa viñashcamanda paimandallata nalicachirij huarmiguca ¿imashnata Taita Diosman quimirishpa chai nali yuyaicunataca saqui usharca? Shinallata ¿imamandata heavy metal nishca musicata ninandapacha gushtaj cashpapash shuj jariguca testigo de Jehová tucurca? Paicunapa causaimanda ricupashun.

“Cunanga ali cusami cani” (RIGOBERT HOUETO)

  • NACIRISHCA HUATA: 1941

  • LLACTA: BENÍN

  • PAIPA PUNDA CAUSAI: TAUCA HUARMICUNAHUANMI CAUSARCA. SHINALLATA TESTIGO DE JEHOVACUNATACA NIMAMANDA NA RICUNAYACHINLLU CARCA

ÑUCA PUNDA CAUSAI:

Ñucaca Benín llactapimi nacirircani. Católico cashpapash misamanga casi nunca na rinllu carcani. Chai tiempopica cai llactapica jaricunaca tauca huarmicunahuan cazaranallami carca. Chaimandami católico jaricunapash tauca huarmicunahuan causanlla carca. Ñucapashmi chuscu huarmicunata charircani.

1970 huatapica Benín llactapi ashtaca gentecunami gobierno contra alzarirca. Ñucanchi llactapa alipallatami canga yashpami ñucapash apoyai callarircani. Jipamanga politicapipashmi participai callarircani. Testigo de Jehovacuna política cosascunapi na participaj cajpimi, gobiernopa contra grupoca testigo de Jehovacunataca nimamanda na ricunayachin carca. Ñucapashmi testigo de Jehovacunata llaquichingapaca imacunatapash rurarcani. 1976 huatapica testigo de Jehovacunapa misionerocunatami Benín llactamandaca llujchishpa cacharca. Chaimandami paicunaca cutinga ñana tigramungachu yarcani.

BIBLIAMI ÑUCA CAUSAITA CAMBIARCA:

Gobiernopa contra bullayaicunaca 1990 huatapimi tucurirca. Chai jipallami testigo de Jehovacunapa misionerocunaca cutin tigramurca. Chaita ricushpaca manllarishcami quidarcani. Chaimi paicunataca Taita Diosllatami ayudajun yarin nishpa pensarircani. Chai tiempopillatami shuj trabajota tarircani. Shuj compañeromi testigo de Jehová cashcarca. Chaimi Bibliamanda parlahuashpaca Jehová Dios tucuita alita ruraj Taita Dios cashcata, juyaj Taita Dios cashcata ricuchij textocunata ricuchihuarca (Deuteronomio 32:4; 1 Juan 4:8). Chaita yachajunataca ninandami gushtarcani. Chaimi Bibliataca yachajui callarircani.

Testigo de Jehovacunapa tandanajuicunaman ri callarishpaca paicuna randimanda juyarijta ricushpami ninanda alicachircani. Paicunaca ima raza cajpipash, charij o na charij cajpipash tucuicunatami igual tratan carca. Paicuna shina cajta ricushpami paicunasi ciertopachami Jesusta catijcuna can yashpa pensarcani (Juan 13:35).

Jehová Diosta sirvingapaj munashpaca Iglesia Catolicataca saquina cashcatami cuenta japircani. Shinapash shinllimi cahuarca. Shujcunaca imatashi ninga yashpami pensan carcani. Shinapash tiempohuanga Jehová ayudajpimi Iglesia Catolicataca saqui usharcani.

Shinapash cambianarami carcani. Bibliapica jaricuna tauca huarmicunahuan causachun Taita Dios na munashcatami yachajurcani (Génesis 2:18-24; Mateo 19:4-6). Taita Diosca jaricuna shujlla huarmitalla charichunmi munan. Chaimandami ñucapa primera huarmihuanga civilpi cazarashpa, chaishuj huarmicunamanga jipaman ama imapash faltanajuchun paicunaman tucuita cushpa huasimandaca cacharcani. Tiempohuanga paicunamandaca ishcaipurami testigo de Jehovacuna tucurca.

¿IMA BENDICIONGUNATATA CHASQUIPASHCANI?:

Ñuca huarmigu Jehovata na sirvishpapash ñuca Jehová Diosta sirvichunga na jarcahuanllu. Paica ñuca ashtahuan ali cusa cashcatami cuenta japishca.

Pundaca politicapi chapurishpa ñucanchillata imatapash rurashpami ashtahuan ali, cushilla causashun yarcanimi. Shinapash cunanga Taita Diospa Reinolla cai mundopi tiashca tucui llaquicunata tucuchishpa shuj ali causaiguta apamunatami yachani (Mateo 6:9,10). Ciertopacha cushilla causai ushashcamandaca Jehová Diostaca ninandami agradicini.

“Ñuca causaipi cambianaca shinllimi cahuarca” (ALEX LEMOS SILVA)

  • NACIRISHCA HUATA: 1977

  • LLACTA: BRASIL

  • PAIPA PUNDA CAUSAI: IGLESIA PENTECOSTALMANDA PASTORMI CARCA

ÑUCA PUNDA CAUSAI:

Ñucaca São Paulo nishca llactamanda, Itu nishca pushtupimi viñarcani. Chaipica ashtaca shuacuna tiashcamandami rijsishca pushtu can.

Ñucaca millai millai, pitapash na respetaj, drogacunatapash jatujmi carcani. Shinapash chaicunata rurajpica carcelman apanata o huañuitapash ushashcatami cuenta japircani. Chaimandami chaita ruranataca saquircani. Chai jipaca Iglesia Pentecostalpa miembromi tucurcani. Jipaca chai Iglesiapa pastormi tucurcani.

Iglesiapi cashpaca shuj gentecunatapash ayudai ushasha yarcanimi. Chaimandami ñucaca chai religionba shuj programata radiopi yalichi callarircani. Chai programaca rijsishca rijsishcami tucurca. Shinapash asha ashami chai Iglesiamanda gentecunaca shuj gentecunata ayudangapaj na munashcata, Taita Diostapash na jatunyachijushcata cuenta japircani. Paicunapaca culquimi ashtahuan importante carca. Chaimandami chai Iglesiataca mejor saquishpa rircani.

BIBLIAMI ÑUCA CAUSAITA CAMBIARCA:

Testigo de Jehovacunahuan Bibliamanda yachajui callarishpaca paicunaca shuj religiongunamandaca diferente cashcatami cuenta japircani. Paicunaca Taita Diosta juyanamanda y shujcunata juyanamanda parlashpaca na parlana cashcamandalla parlanllu. Ashtahuangarin paicunaca chai juyaitaca ruraicunahuanmi ricuchin. Shinallata paicunaca politicapipash na chapurinllu, guerracunamanbash na rinllu (Isaías 2:4). Caita ricushpami ciertopacha cabalta yachachij religionda tarishcata, shinallata causaita causaiman apaj quichiji ñanda tarishcata cuenta japircani (Mateo 7:​13, 14).

Jehová Diospa ñaupajpi ali ricuringapaca cambiana cashcatami cuenta japircani. Ñucaca ñuca familiata cuidanapi, humilde canapimi mejorana carcani. Cambianaca shinllimi cahuarca. Shinapash Jehovapa ayudahuanmi cambiai usharcani. Ñuca huarmiguca ñuca cambiajta ricushpaca ninandami cushijurca. Chaimi paipash Bibliamanda ashtahuan yachajushpa catingapaj animarirca. Asha tiempo jipaca ishcandicunallatami testigo de Jehovacuna tucunata dicidircanchi. Ishcandimi chai punllallata bautizarircanchi.

¿IMA BENDICIONGUNATATA CHASQUIPASHCANI?:

Ñucanchi quimsa huahuacunata Jehová Diosman ashtahuan quimirichun ayudai ushashpaca cushillapachami sintirinchi. Familia enteromi cushilla causanchi. Jehová Dios paita rijsichun ñucata ayudashcamandaca ninandami agradicini. Bibliaca ciertopachami gentecunapa causaitaca cambiai ushan. Chaitaca ñuca causaipimi ricupashcani.

“Cunansi cushilla, tranquilo, alimi causapani” (VICTORIA TONG)

  • NACIRISHCA HUATA: 1957

  • LLACTA: AUSTRALIA

  • PAIPA PUNDA CAUSAI: MALTRATAI TUCUSHCAMI CAUSARCA

ÑUCA PUNDA CAUSAI:

7 huahuacunamandaca ñucami mayor cani. Ñucaca Newcastle llactapimi viñarcani. Ñuca taitaca machanata gushtaj, millai millaimi carca. Ñuca mamapashmi millai millai carca. Chaimandami ñucataca maltratashpa charihuan carca. Tucui punllacunami ñucataca, canga nalipachami cangui, infiernomanmi rigringui nihuan carca. Chaita uyashpaca ninandami manllanayahuan carca.

Tauca viajecunatami ñuca mamaca chugrichingacaman macahuan carca. Chaimi huaquinbica escuelamanbash na ri ushan carcani. Ñuca 11 huatacunata charijpica ñuca taitacuna ama maltratashpa catihuachunmi autoridadcunaca shuj conventoman apahuarca. Shinapash chaimandaca 14 huatacunata charishpami pacajushpa rircani. Ñuca huasimanllata ñana tigrangapaj munaimandami Kings Cross nishca barriopa callecunapi causai callarircani.

Callecunapi causajushpaca drogacunatapash, tragocunatapashmi ufiai callarircani. Shinallata pornografía nishcapi, huainayanacunapipashmi urmarcani. Shuj punllaca tragocunata, cervezacunata jatudorpa departamentopi quedajujpimi shuj tutaca trago jatudortaca ishcai jaricuna visitangapaj shamurca. Chaimi ñucataca cuartoman cachahuarca. Shinapash imata ninajujtami uyai pactarcani. Paicunaca ñucamanda culquita pagashpa Japón llactapi trabajachunmi barcopi apangapaj munanajushcarca. Chaita uyashpaca ninanda manllarishpami chaimanda llujshishpa rishpa ayudata mascangapaj rircani.

Chaimanda llujshishpaca shuj mishuhuanmi tuparircani. Tal vez asha culquiguta cushpa ayudahuangapashchari yashpami ñuca ima pasajushcata villarcani. Shinapash culquita caranapa randica paipa huasimanmi armachun, micuchunbash pushahuarca. Chai jipaca paihuanmi quidarcani. Y shuj huata jipaca cazararcanchimi.

BIBLIAMI ÑUCA CAUSAITA CAMBIARCA:

Testigo de Jehovacunahuan Bibliamanda yachajui callarishpaca Satanaspa culpamanda cunanbi tiashca llaquicuna tiashcata yachashpaca ninandami culirarcani. Ñucaca siempremi Taita Dios ñucanchicunata llaquichishpa sufrichin cashcata pensan cariani. Huahua cashpaca infiernopi Taita Dios llaquichinga yashpami ninanda manllan cariani. Pero Taita Dios ñucanchicunata shuj infiernopi na llaquichin cashcata yachaj chayashpaca tranquilami sintirircani.

Testigo de Jehovacunaca Bibliapi yachachishcatami paicunapa causaipi pactachin carca. Chaita ricushpami ninanda alicachircani. Paicunapaca ñucahuan parlanaca dificilpachami carianga. Imata nijpipash paicunaca siempremi juyaihuan, respetohuan tratahuan carca.

Ñucaca nimapapash na sirvinichu yashpami ñucallata na ricunayachirin carcani. Incluso bautizarishca jipapashmi shina pensashpa catinra carcani. Ñucaca Jehová Diosta juyashpapash Jehová Diosca ñucataca nunca na juyahuangachu yashpami pensan carcani.

Shinapash bautizarishcamanda quince huatacuna jipami shina pensanataca saquircani. Testigo de Jehovacunapa tandanajuipimi discursota cuj turica Santiago 1:23 y 24​manda parlarca. Chaipica Taita Diospa shimi Bibliaca shuj espejoshnami can ninmi. Bibliapimi Taita Dios imashna ñucanchita ricujushcataca ricui usharin nijurcami. Chaimi ñucapash Taita Dios imashna ñucata ricushcashnachu ricurijuni nishpa pensari callarircani. Shinapash Taita Dios juyachunga na miricinichu nishpa pensajurcanirami.

Huaquin punllacuna jipaca Isaías 1:18 textotami liircani. Chaipica Jehová Diosca randimanda parlaringapaj “shamuichi. Cangunapaj juchacuna puca telashna cajpipash, rasutashna yurajllagumanmi tigrachisha” ninmi. Chaita liishpaca Jehová Diospacha ñucata “Vicky shamui amigushun, can imashna cajtaca rijsinimi, imata rurashcatapash yachanimi, shinapash candaca juyanimi” nijujtashnami sintircani.

Chaita liishca jipaca chai tutaca na puñui usharcanichu. Shinallata Jehová Dios ñucata juyajtaca na cri ushajurcanichu. Shinapash Jesús ñucanchimanda huañushcapimi pensari callarircani. Y shina pensajushpami Jehová Diosca ñucataca siempre pacienciata charihuashcata, ñucata juyashcatapash ricuchihuashcata cuenta japircani. Jehová Diostaca “ñucataca na juyahuana canguichu, canba Churi huañushcajpipash ñucapa juchacunataca nunca na perdonai ushanguichu” nijuj cuendami cashcani. Y shina pensashpaca Jesús ñucanchimanda huañushcata na agradicijushcatami ricuchijurcani. Shinapash Jehová paipa Churita ñucanchimanda huañuchun cachamushcapi pensarinami Jehová ciertopacha juyahuajta sintichun ayudahuarca.

¿IMA BENDICIONGUNATATA CHASQUIPASHCANI?:

Cunanga tranquilo, cushilla, alimi causajuni. Ñuca cusaguhuanbash alimi causanajunchi. Ñuca experienciahuan shujcunata ayudai ushaimandaca cushillami sintirini. Shinallata cada punlla Jehová Diosman ashtahuan quimirijushcatami sintini.

“Jehová Diosmi ñuca mañaitaca contestahuarca” (SERGEY BOTANKIN)

  • NACIRISHCA HUATA: 1974

  • LLACTA: RUSIA

  • PAIPA PUNDA CAUSAI: HEAVY METAL NISHCA MUSICATAMI NINANDA GUSHTAN CARCA

ÑUCA PUNDA CAUSAI:

Ñucaca Vótkinsk nishca pushtupi shuj pobrella familiapimi viñarcani. Ñuca nacirishca pushtupica Piotr Ilič Chaikovski shuti famoso jaripashmi chaipillata viñashcarca. Ñuca taitaca ufianata gushtashpapash nalipacha nalimanga na carcachu. Ufiaimandami huasipica siempre butarinajun carian.

Escuelapica ali estudianteca na carcanichu. Chaimi tiempohuanga nimapapash na valinichu yashpa pensan carcani. Imatapash na rurai ushashpami tucuimanda pinganayan carca. Chaimi escuelaman rinaca dificilpacha cahuan carca. Escuelapi compañerocunapa ñaupajpi deberta presentana cashpaca manllaimandami imatapash na ni ushan carcani. Aunque chai debercunataca ñucalla cashpaca fácil ni ushanllami carcani. Colegiopi profersorcunaca ñuca libretapica “paica na ali parlai ushanllu. Pai imata yuyajushcatapash na ni ushanllu” nishpami escribishcarca. Chaita ricushpaca ninanda llaquirishpami nimapapash na sirvinichu yarcani. Chaimi imapashi causana canchi yashpa pensari callarircani.

Joven cashpaca tragotami ufiai callarircani. Callaripica ufiashpaca alimi sintirin carcani. Shinapash yapata ufiashpaca concienciapimi nali sintirin carcani. Na cushilla causai ushajurcanichu. Llaqui llaqui sintirishpami huaquinbicarin huasimandapash na llujshin carcani. Ñucallata huañuchirinatapashmi pensarcani.

20 huatacunata charishpami heavy metal nishca musicata uyai callarircani. Chai musicata uyashpaca alimi sintirin carcani. Nimatapash na manllan carcanichu. Chaimi chai musicacunata uyajcunahuanllata llevari callarircani. Jipamanga ajchatapash viñachishpami aretescunatapash churarircani. Chai musicacunata candajcunashnallatami ropatapash churajui callarircani. Asha ashami imatapash na manllashpa millai millai tucurcani. Chaimandami huasipica plituricuna tiarca.

Asha ashami huaglijurcani. Chai musicacunata uyashpaca cushilla sintirisha yarcanimi, shinapash na shina carcachu. Chai musicacunata candajcunapash nalicunata rurajushcata yachashpami nalipacha sintirircani.

Huañunatapachami pensarcani. Shinapash ñuca mamitapi pensanami ñucamandallata huañuchirinataca jarcahuarca. Huañungapaj munashpapash na huañuchiri ushaimandami na atinashca sintirircani.

Huañunapi ama pensajungapami librocunata lii callarircani. Shuj libropica shuj sacerdotemandami parlajurca. Chaimi ñucapash Taita Diosmanda yachajuna munaita, shuj gentecunatapash ayudana munaita chari callarircani. Chaimi Taita Diosta tucui shungu mañai callarircani. Imashina cushilla causai ushanata yachachihuai nishpami Taita Diostaca mañarcani. Shina mañajushpami tranquilo sintiri callarircani. Mañashca ishcai horas jipallami shuj testigo de Jehovaca Bibliamandami yachachijuni nishpa ñuca huasiman shamurca. Ñuca mañaitaca Taita Diospachami contestarca. Chai punllamandapachami cushilla causani.

BIBLIAMI ÑUCA CAUSAITA CAMBIARCA:

Heavy metal nishca musicata, chai musicamanda tucui imata charishcatapash saquinaca shinllimi cahuarca. Chai musicataca na fácil cungai usharcanichu. Huaquinbica chai musicacunata tocan cashca pushtucunata yalishpaca siempremi ima pasashcacunata yarin carcani. Taita Diosmanda ali yachajushcahuan nali cosascunahuan ama pandarijungapaca chai pushtucunata yalinatami saquircani. Shinallata pundacunapi pasashcacunata yari callarishpaca Jehová Diostami tucui shungu mañan carcani. Shinami Bibliapi nishcashna Taita Dios ‘casilla ali causaiguta’ caramujujtaca cuenta japi usharcani (Filipenses 4:7).

Bibliata yachajushpaca ñucanchi crishcacunata shujcunamanbash villachina cashcatami yachajurcani (Mateo 28:19, 20). Shujcunaman villachitaca na ushashachu yarcanimi. Shinapash Bibliata yachajushpaca tranquilo, cushillami sintirin carcani. Chaimandami Bibliamandaca shujcunamanbash yachachinapacha cashcataca ali yacharcani. Manllajushpapashmi shujcunamanga villachi callarircani. Chaita ruranaca ñucallata cushilla sintirichun, Jehovapa yachachishcacunatapash tucui shunguhuan crichunmi ayudahuarca.

¿IMA BENDICIONGUNATATA CHASQUIPASHCANI?:

Cunanga ñuca huarmiguhuanga cushillapachami causanchi. Ñuca mamitata, ñuca panitapash Taita Diosta rijsichun ayudai ushashcamandaca cushillapachami sintirini. Taita Diosta sirvina, shujcunatapash Jehová Diosta rijsichun ayudanaca ciertopachami cushilla causachun ayudahuashca.