Agllashca temata ricungapaj

Temacunata ricungapaj

Oracionda rurana: Taita Diosta mañanaca ¿ciertopachachu ayudan?

Oracionda rurana: Taita Diosta mañanaca ¿ciertopachachu ayudan?

ASHTACA gentecunaca Diosta mañanaca imapipash na ayudan cashcatami pensan. Shinapash Bibliapica Diosta mañana ayudan cashcatami yachachin (Lucas 22:40; Santiago 5:13). Diosta mañanaca ñucanchicuna cushilla, ali sintirichunmi ayudan. ¿Imamandata shina nipanchi?

Caipi pensaripashun: shuj huahuaguman shuj regalota carashpaca taitacunaca pagui ninami cangui nishpami yachachin. Paicunaca pagui ninata yachajushpami shungumanda agradecido canata yachajun. Cutin Jehová Diosman oracionda rurajushpaca ¿imata nishpata mañana capanchi? Huaquin yuyaicunata ricupashun.

Oracionda rurashpaca agradicishcata ricuchipashunchi. Oracionda rurajushpa Taita Diosta tucuimanda pagui nishpaca Taita Dios ñucanchicunata bendiciajushcatami cuenta japishun. Shinallata agradecido canata yachajushpaca cushilla, alimi sintirishun (Filipenses 4:6).

Ejemplo: Oracionda rurashpaca Jesusca paipa Taita paipa mañaita uyashcamandami pagui nirca (Juan 11:41).

Oracionda rurashpaca perdonahuai nishpa mañashunchi. Ñucanchi pandarishcacunamanda Taita Diosta perdonahuai nishpa mañashpaca ñucanchicunallatami tranquilo sintirinchi. Shinallata juchata rurana llaquicunaman apajta yachajushun. Shinami ñucanchi conciencia ali yachajushca cachun ayudashun.

Ejemplo: Oracionda rurashpaca Rey Davidca arrepentido cashcatami ricuchirca (Salmo 51).

Oracionda rurajushpaca ali yachaita carahuai nishpa, ayudahuai nishpapashmi mañai ushanchi. Taita Diosta ayudahuai nishpa mañanami ñucanchicuna humilde cachun, na tucuita rurai ushashcata cuenta japichun ayudan. Ashtahuangarin ñucanchipi confianapa randica Jehová Diospi confiachunmi ayudan (Proverbios 3:5, 6).

Ejemplo: Oracionda rurashpaca Salomonga ali yachaita carahuai, ali rey cangapapash imata rurana cashcata yachachihuaiyari nishpami Diostaca mañarca (1 Reyes 3:5-12).

Oracionda rurajushpaca ñucanchi llaquicunatapashmi villai ushapanchi. Imamandapash llaquilla o preocupado sintirijushpaca shungumanda Taita Diosta mañanami tranquilo sintirichun ayudanga. Shina mañashpami Taita Diospa ayudata siempre mascana cashcata yachajushun (Salmo 62:8).

Ejemplo: Contracuna paicunata atacangapaj munajta yachashpami rey Asaca Taita Diostaca ayudahuai nishpa mañarca (2 Crónicas 14:11).

Oracionda rurashpaca ayudata minishtinajujcunamandapashmi mañai ushapanchi. Shujcunamandapash mañashpami humilde cashcata ricuchishpa paicunamanda preocuparishcata, llaquishcata ricuchinchi.

Ejemplo: Jesusca paipa discipulocunata ayudapai nishpami Taita Diostaca mañarca (Juan 17:9-17).

Oracionda rurashpaca Taita Diostami jatunyachi ushanchi. Jehová Dios imashina cashcata yarishpa paipa rurashcacunata ricushpaca paitaca ashtahuan juyashpami respetanchi. Taita Diosman cashna oraciongunata rurashpami paiman ashtahuan quimirita ushapanchi.

Ejemplo: Rey David oracionda rurashpaca Taita Diospa rurashca cosascunata alicachishcatami ricuchirca (Salmo 8).

Oracionda ruranaca shuj shuj cosascunapipashmi ayudaita ushan. Oracionda rurajpica casilla, ali o tranquilo “causaitaca Taita Diosmi caramunga” (Filipenses 4:7). Cai nali mundopi tranquilo, cushilla causai ushanaca shuj jatun bendicionmi can. Shinallata tranquilo causanaca ñucanchi saludpallata alimi can (Proverbios 14:30.) Pero ¿imashinata tranquilo causai ushapanchi? Tranquilo causai ushangapaca ¿pipa ayudatata minishtipanchi?

Oracionda ruranaca ñucanchillata ali cachun, cushilla cachun, Taita Diospi ashtahuan confiachunbashmi ayudan