Agllashca temata ricungapaj

Temacunata ricungapaj

 TEMA 41

“Ninandapacha llaquishpa juyaj” Taita Diostami sirvinchi

“Ninandapacha llaquishpa juyaj” Taita Diostami sirvinchi

“Mandaj Diosca tucuicunapajmi aligumari. Tucui pai rurashcacunataca, llaquishpami charin” (SAL. 145:9).

CÁNTICO 44 Ñuca mañashcata uyapai

CAITAMI YACHAJUPASHUN *

1. Shuj llaquij, juyaj personamanda uyashpaca ¿Jesús parlashca maijan chimbapuraitata talvez yuyaripanchi?

PIPASH shuj llaquij, juyaj personamanda parlajpica quiquinga seguromi chai personaca ali ali, generosomi canga yashpa pensaripangui. O talvez, Jesús parlashca samaritano runagumanda chimbapuraitami yuyaripangui. Jesús parlashca chimbapuraipica, samaritano runaguca shuj judiotami llaquishpa ayudarca. Chai judiotaca shuhuacunami japishpa, ninanda macashpa chaipi saquishcarca. Samaritano runaguca chai judiota ricushpaca ‘ninanda llaquishpami’ ayudarca (Luc. 10:29-37). Samaritano runagumanda chimbapuraipica Jehová Dios cada punlla ñucanchicunata juyaimanda llaquishpa tratan cashcatami yachachijun.

2. Pitapash llaquishcataca ¿imashinapashta ricuchi ushapanchi?

2 Pipash imapash nalita rurashcata yachashpapashmi paita llaquishcataca ricuchi ushapanchi. Jehová Diosca ñucanchicunataca ninanda llaquishpami tratan. Chaimi shuj salmota escribij runaguca nirca: Jehová ‘Diosca ñucanchi juchacunata rurashcashnallatapash na cushcachu’ nishpa (Sal. 103:10). Shinapashmi Jehová Diosca huaquinbica pipash shuj jatun juchata rurashca cajpica corregina tucushca.

3. Cai yachajuipica ¿ima tapuicunamandata yachajugripanchi?

3 Cunanga cai quimsa tapuicunamandami yachajugripanchi: Jehová Diosca ¿imamandata ñucanchicunataca llaquishpa aliguta tratan? Shujcunata corregina cajpipash paicunata llaquishcataca ¿ricuchi ushapanchichu? Shinallata shujcunata llaquishpa tratachunga ¿imata ayudanga?

JEHOVÁ DIOSCA ¿IMAMANDATA ÑUCANCHITACA LLAQUISHPA ALIGUTA TRATAN?

4. Jehová Diosca ¿imamandata llaquishpa aliguman tratan?

4 Juyaimandami llaquishpa, aliguta tratan. Apóstol Pabloca Jehová Dios yarichijpimi ‘Taita Diosca ninandapacha llaquishpa juyajmi’ can nirca. Caita nishpaca, apóstol Pabloca Jehová Dios ungidocunata,  paicuna juchayucuna cajpipash jahua cielopi causangapaj cushca esperanzagumandami parlajurca (Efes. 2:4-7). Shinapash Jehová Diosca na ungidocunatallachu llaquishpa ali tratan. Rey Davidca shuj salmopica: “Mandaj Diosca tucuicunapajmi aligumari. Tucui pai rurashcacunataca, llaquishpami charin” nircami (Sal. 145:9). Jehová Diosca tucui gentecunata ninanda juyaimandami pitapash llaquishpa tratana cajpica llaquishpa aliguman tratan.

5. Jehová Dios llaquij, juyaj cashcataca Jesusca ¿imashinata yachajurca?

5 Jesusca Jehová Dios gentecunata llaquishpa aliguta tratajtaca ali alimi yachan. Jesús cai alpaman nara shamushpaca ashtaca ashtaca huatacunatami paipa Taitahuan cielopi causarca (Prov. 8:30, 31). Chaimandami paipa Taita juchayu gentecunata llaquishpa, aliguta tratajtaca ashtaca viajecunata ricurca (Sal. 78:37-42). Jesusca gentecunaman paipa Taitamanda yachachijushpaca, cutin cutinmi Jehová Dios shuj llaquij Dios cashcata yachachirca.

Tucuita yanga tucuchishca jovenba taitaca churita nali sintichinapa randica, ninanda juyashcatami ricuchirca. (Párrafo 6​ta ricupangui). *

6. Jehová Dios llaquishpa perdonaj cashcata ricuchingapaca Jesusca ¿ima chimbapuraimandata parlarca?

6 Jehová Dios llaquishpa perdonaj Dios cashcataca, Jesusca tucuita yanga yanga tucuchishca churimanda parlashpami intindichirca. Chaitaca caina semanami yachajuparcanchi. Bibliapica chai churica “tucui nalicunata rurashpa, pai ima charishcataca yanga yanga tucuchijurca” ninmi (Luc. 15:13). Tiempohuanga, cai churica pai nalita rurashcata cuenta japishpami paipa taitapa huasiman cutin tigranata decidirca. Paipa huasiman tigrajpica paipa taitaca ¿imashinata chasquirca? Jesusca nircami: ‘Paipaj churigu caruta shamujujta taita ricushpaca, ninandami llaquirirca. Shina llaquirishpaca, calpashpa tuparishpami, ugllarishpa mucharca’ nishpa. Cai churigu paipa huasiman tigrajpica, taitaca tacurinapa randica juyaihuan chasquishpami pai juchacunata rurashca cajpipash perdonarca. Cai chimbapuraipi parlashca taitaca Jehová Diostami ricuchin. Jesusca cai chimbapuraihuanga shungumanda pipash arrepintirijpica Jehová Diosca perdonangapaj shuyajun cashcatami ricuchirca (Luc. 15:17-24).

7. Jehová Diosca llaquij Dios cashpapash ¿imashinata ali yachaita charishcataca ricuchin?

7 Ali yachaita charimandami llaquishpa aliguta tratan. Jehová Diosca ima decisionda japishpapash tucuicunapa alipami decidin. Bibliapica ‘jahua pachamanda shamujuj ali yachaica, llaquinata, imatapash aliguta ruranatami yarichimun’ nijunmi (Sant. 3:17). Jehová Diosca shuj juyaj taitashna caimandami llaquishpa perdonanaca tucuicunapallata ali cashcata yachan (Sal. 103:13; Is. 49:15). Juchayucuna cashpapash Jehová Dios llaquishpa perdonaj Dios cashcamandami jipa punllacunapi shuj ali causaiguta charita ushapashun. Jehová Diosca ali yachaita charimandami pitapash llaquishpa tratana cajpica llaquishpa, juyaihuan  tratanlla. Shinapash ali yachaita charimandaca pipash nalita rurajujpica na yangata saquinllachu.

8. Pipash shuj jatun juchata rurashpa na arripintirijpica ¿imatata rurana can? ¿Imamandata chaita rurana can?

8 Cunanga caipi yuyapashunchi, shuj huauquica yachashca jahua shuj jatun juchata rurashcanman. Chaita rurajpica ñucanchicunaca ¿imatata rurana capanchi? Apóstol Pabloca nircami: ‘Maijanbash crijmi cani nijushpapash imapash nalita rurajujhuanga na tandanajushpa purinachu canguichi’ nishpa (1 Cor. 5:11). Juchata rurashca jahua na arripintirijcunataca congregacionmanda expulsanami tucun. Shuj juchata rurajta expulsanaca congregacionmanda shuj huauquipanicunata cuidachunbashmi ayudan. Shinallata Jehová Dios shuj santo Dios cashcata ricuchingapapashmi ayudan. Shinapash huaquin huauquipanicunaca congregacionmanda pitapash expulsajpica, Jehová Dios na llaquij Dios caimandami expulsan ninmi. Pero chaica ¿ciertochu can? Cai cati parrafocunapi ricupashunchi.

PITAPASH EXPULSASHPACA ¿NA LLAQUIJCUNA CAIMANDACHU EXPULSAN?

Irquilla llamaguta chaishuj llamacunamanda separashpapash irquilla llamagutaca siempremi michij runaguca cuidanga. (Párrafo 9-11 ricupangui).

9, 10. a) Hebreos 12:5, 6​pi nishcashnaca ¿imamandata congregacionmanda expulsashpaca chai personata llaquishcatami ricuchinchi nipanchi? b) ¿Ima ejemplohuanda chaitaca intindi ushapanchi?

9 Congregacionbi ñucanchipa shuj juyashca familiarta o amigota “paica ñana testigo de Jehová cashpa catinllu” nishpa anunciajpica llaquillami sintiripanchi. Huaquinbica chaita uyashpami ¿paitaca expulsanapachacha carca? nishpa tapuripanchi. Shinapash Jehová Diosca pitapash expulsashpaca llaquimandami expulsan. ¿Imamandata shina nipanchi? Pipash imapash nalita rurajujpica disciplinanaca minishtirishcapachami can. Disciplinashpami ali yachaita charishcata, juyashcatapash ricuchita usharin (Prov. 13:24). Juchata ruradorta congregacionmanda expulsashpaca, pai nalita rurashcamanda arripintirishpa paipa causaipi cambiai ushachunmi ayudan. Expulsai tucushcacuna congregacionman cutin tigramushpaca paicuna, paicunapa causaipi cambiachun ninanda ayudashcatami cuenta japishca. Shinallata expulsai tucushpami paicunaca arripintirishpa cutin Jehová Diospaman tigrai ushashca (Hebreos 12:5, 6ta liipangui). *

10 Cai ejemplopi yuyapashun, shuj michij runagu pai cuidajuj llamagucunamanda shuj llamagu irquilla cajta ricushpaca ¿imatata ruran? Cai michij runaguca cai irquilla llamaguta aliguta jambi ushangapami shuj pushtupi paitalla churan. Llamagucunaca llamacunapura cangapami munan. Shinapash shuj llamagutalla shuj pushtupi churajpica, talvez cai llamaguca huacangami. Shinaca michij runagu chai irquilla llamaguta jambi ushangapaj, paitalla shuj pushtupi churashcamandaca ¿cai llamaguta llaquinaita tratashcatachu ricuchijun? Na, chaipa randica cai michij runaguca tucui llamagucunata juyashcatami ricuchin. Cai irquilla llamaguta chaishuj llamagucunahuan saquijpica, talvez cai llamagupa unguica tucui llamacunapamanmi yalita ushanman. Chaimi michij runaguca chai irquilla llamaguta paigutalla shuj pushtupi churashpaca chaishuj llamagucunata cuidangapaj munashcata ricuchin (Levítico 13:3 y 4​huan chimbapurashpa ricupangui).

11. a) ¿Imamandata shuj expulsashcaca “shuj irquilla llamagushnami can” nipanchi? b) Expulsashcacunaca ¿ima ayudacunatallata charin?

11 Congregacionmanda expulsashcacunaca Jehovapa ñaupapi shuj irquilla llamagucunashnami can (Sant. 5:14). Contagioso unguicunaca shujcunamanga yalinllami, shina cuendami pipash Jehovapa ñaupapi ñana ali ricurijujpica congregacionmanda huauquipanigucunata llaquichita ushan. Chaimi juchata rurashpa chaicunamanda na arripintirijcunataca congregacionmanda expulsana can. Juchata ruradorta expulsashpaca Jehová Diosca congregacionmanda tucui huauquipanicunata juyashcatami ricuchin. Shinallata  juchata ruradorpash shungumanda arripintirichunmi ayudan. Expulsashcacunaca tandanajuicunaman rita, publicaciongunatapash charita ushanmi. JW Broadcasting® programatapashmi ricushpa catita ushan. Chaicunami paitaca Jehovaman ashtahuan quimirichun, Jehovapi tucui shunguhuan cutin crichunbash ayudanga. Y paipa causaipi cambiocunata rurajujta ricushpaca ancianocunapashmi ashtahuan consejogucunata cushpa ayudanga y shinallata congregacionman cutin tigrachunbash ayudaita ushanga. *

12. Pipash shuj jatun juchata rurashca jahua na arripintirijpica, ancianocunaca ¿imatata rurana can?

12 Pitapash expulsashpaca pai juchata rurashcamanda na arripintirijpimi expulsan. Chaitaca anciano huauquicunaca yariami can. Chaimi imatapash nara decidishpallata Jehovapa ayudata mascan. Shinallata Jehová Diosca imashna corregina cashcatalla corrigin cashcatapashmi ancianocunaca yaria can (Jer. 30:11). Ancianocunaca congregacionmanda tucui huauquipanicunata juyaimandami tucuicunallata Jehovapa ñaupapi ali cachun munan. Chaimi pipash shuj juchata rurashpa na arripintirijpica juchata ruradortaca expulsana tucun.

13. Corinto congregacionmanda shuj jaritaca ¿imamandata expulsana tucurca?

13 Apostolcunapa punllacunapi, Corinto congregacionmanda shuj jari juchata rurashcamanda na arripintirijpi, apóstol Pablo imata rurashcata ricupashunchi. Chai jarica paipa taitapa huarmihuanmi pacta causajurca. Chaica nalipachami carca. Jehová Diosca israelitacunataca nishcarcami: ‘Maijan cashpapash, paipa taitapa huarmihuan siririshpaca, paipa taitapa lluchullatami ricun. Chaimi jaripash, huarmipash, ishcandi huañuchi tucunga’ nishpa (Lev. 20:11). Apóstol Pabloca chai runataca huañuchinami canguichi nishpaca na mandarcachu. Pero congregacionmanda expulsanami canguichi nircami. Cai jaripa nali ruraica congregación enterotami llaquichijurca. Huaquingunacarin paica na juchapi causajunllu nishpami ña pensai callarinajurca (1 Cor. 5:1, 2, 13).

14. Corinto congregacionmanda jarita llaquishcataca ¿imashinata apóstol Pabloca ricuchirca? ¿Imamandata paitaca llaquirca? (2 Corintios 2:5-8, 11).

14 Shuj tiempo jipaca chai juchata rurador shungumanda arripintirishcatami apóstol Pabloca yachaj chayarca. Chai juchata rurador congregacionda nalipi quedachishca cajpipash apóstol Pabloca ancianocunataca caita nishpami mandarca: Paitaca “ama yapa llaquihuan huañujuchunmi, cangunaca chai nalita rurashcataca cungashpa, paitaca cushichina canguichi” nishpa mandarca. Juchata rurador arripintirishcata yachashpami apóstol Pabloca chai jaritaca llaquishpa ricurca. Shinallata  pundacuna juchata rurashcamanda ama yapata culparijuchunmi paitaca ayudanami canguichi nishpa mandarca (2 Corintios 2:5-8, 11ta liipangui).

15. Ancianocunaca ¿imashinata llaquishcata, juyashcatapash ricuchin?

15 Ancianocunaca Jehová Dioshnallatami huauquipanicunataca llaquishpa juyaihuan tratan. Y pipash shuj jatun juchata rurashca cajpi y expulsana tucujpica expulsanllami. Pero cutin shungumanda arripintirijpica llaquishcata, juyashcatapash ricuchinmi. Imapash nalita rurajpi na disciplinashpaca yangata huahuayachishpa charijuj cuendami ricurinman. Pero congregacionman tigramushcacunataca ¿ancianocunallachu llaquishpa, juyaihuan tratana can?

LLAQUISHPA JUYAIHUAN TRATACHUNGA ¿IMATA AYUDANGA?

16. Proverbios 21:13​pi nishcashnaca, pitapash na llaquishpa tratajcunataca Jehová Diosca ¿imashata tratan?

16 Tucui huauquipanicunami Jehová Dioshnallata shujcunataca llaquishpa tratana capanchi. ¿Imamandata llaquishpa tratana capanchi? Shujcunata na llaquishpa tratajpica Jehová Diosca ñucanchi mañaicunataca na uyangachu (Proverbios 21:13ta liipangui). Jehová Dios ñucanchi mañaicunata uyachun munaimandami shujcunataca llaquishpa, juyaihuan tratana capanchi. “Imagutapash na charij runagu caparishpa mañajujpica”, ñucanchicunaca siempremi paita uyangapaj listo cana capanchi. Bibliapica: “Shujcunata na llaquijcunataca, Diospash na llaquishpami llaquichijunga” ninmi. Chaimandami ñucanchicunaca shujcunataca llaquishpa, juyaihuan tratana capanchi (Sant. 2:13). Ñucanchicunaca shujcuna ñucanchita llaquishpa juyaihuan tratachunmi munapanchi. Chaimi ñucanchipash shujcunataca shinallata llaquishpa ali tratana capanchi. Ashtahuanbachaca congregacionman tigramushca huauquita o panitami llaquishpa, juyaihuan tratana capanchi.

17. Rey Davidca ¿imashata shujcunata llaquishpa tratashcataca ricuchirca?

17 Bibliapica tauca jaricuna, huarmigucunapash shujcunata llaquishpa tratashcatami ricupanchi. Por ejemplo, rey Davidca siempremi shujcunata llaquishpa tratarca. Rey Saulca ashtaca viajecunatami Davidta huañuchingapaj munarca. Shinapash Jehová agllashca reytaca Davidca siempremi respetarca. Shinallata rey Saulmanda ima horapash vengarishami yashpaimanga nunca na pensarcachu (1 Sam. 24:9-12, 18, 19).

18, 19. Davidca ¿ima ishcai casocunapita shujcunata na llaquishcata ricuchirca?

18 Davidca na siemprechu shujcunata llaquishcataca ricuchirca. Por ejemplo shuj viajeca Nabal mitsaj runaca, cangunamanga micunagutaca na carashachu nishpami Davidta, paipa soldadocunatapash shinllita rimarca. Chaimi Davidca ninanda culirashpa Nabaltapash y paipa huasipuracunatapash tucuillata huañuchisha nirca. David chaita ruragrijujta yachaj chayashpami Nabalpa huarmigu Abigailca inocente gentecunata ama huañuchichun yashpami, paica uchalla Davidta tuparishpa paihuan parlangapaj rirca (1 Sam. 25:9-22, 32-35).

19 Shuj punllaca profeta Natanga Davidmanga shuj charij charij runamanda, shinallata shuj pobre pobre runagumandami parlarca. Charij charij runaca pobre pobre runagupa shujlla charishca llamagutami shuhuarca. Chaita uyashpami Davidca ninanda culirashpa “Mandaj Diosca causajumbachami. Maijan chashna rurashca cashpapash, huañuchi tucunapachami” can nirca (2 Sam. 12: 1-6). Davidca Moisesman cushca Leycunapi nishcashnaca, pipash shuj llamata shuhuashpaca chai llamamanda chuscu llamacunata tigrachina cashcataca alimi yacharca (Éx. 22:1). Shinapash chai runaca huañuchi tucunapachami can nishpaca, Davidca yapatami chai runataca juzgajurca. Cai chimbapuraimanda parlashpaca Natanga chai charij runatapash yali rey David jatun juchacunata rurashcata intindichunmi ayudangapaj munarca. Davidca ashtaca jatun juchacunatami rurarca. Shinapash Jehová Diosca paitaca llaquishpami tratarca. Cutin Davidca, charij charij runagutaca llaquishpa tratanataca na pensajurcachu (2 Sam. 12:7-13).

Rey Davidca Natán parlashca chimbapuraimanda charij charij runataca na llaquircachu. (Párrafo 19, 20​ta ricupangui). *

20. Rey Davidpa ejemplomandaca ¿imatata yachajupanchi?

20 Davidca ninanda culirashca caimandami Nabalta, paipa huasimanda gentecunatapash huañuchingapaj munarca. Jipamanga profeta Natán parlashca charij charij jaritapashmi huañuchingapaj munarca. Rey Davidca ¿imamandata chaita rurangapaj munajurca? Chai ratoca Davidca Jehovapa ñaupapica nalimi carca. Paipa concienciapipash nalimi sintirijurca. Chaimi shujcunataca ñapash juzgai callarircalla. Ñucanchicunapash pitapash ñapash juzgai callarishpaca Jehovapa ñaupapi nali cashcatami ricuchinajunchiman. Jesusca nircami: “Pitapash na yangamanda juchachinachu canguichi. Na chashna rurajpimi, Diospash cangunataca na llaquichinga. Shujcunata imashnami nalicachinguichi, chashnallatami cangunatapash Diosca llaquichinga” nircami (Mat. 7:1, 2). Shinaca ñucanchicunaca Jehová Dioshnallatami shujcunata llaquishpa tratangapaj esforzarina capanchi. Pitapash na yangata juzganallachu capanchi.

21, 22. Llaquishpa juyashcataca ¿imacunata rurashpata ricuchi ushapanchi?

21 Shujcunata juyashcata, llaquishcataca paicunamanda imagutapash rurashpami ricuchi ushapanchi. Chaimi ñucanchica talvez familiapi o congregacionbi o villachinajushpapash pipash paita animachun minishtijujta yachashpaca ayudana capanchi. Paicunata ayudangapaj munashpaca imapash comprasguta rurashpa, chaiguta carashpa o imashapash ayudashpami paicunata juyashcata y llaquishcataca ricuchi ushapanchi. Shinallata chairalla congregacionman tigramushca huauquipanicunatapashmi animaita, ayudaita ushapanchi. Shinapash tucuicunallatami gentecunamanga Diospa Reinomanda ali villaigucunata parlashpaca animaita ushapanchi. Caita rurashpami tucui gentecunata llaquishcata, juyashcatapash ricuchipashun (Job 29:12, 13; Rom. 10:14, 15; Sant. 1:27).

22 Shujcunata ayudangapaj munashpaca pi ayudata minishtijujtami pendiente cana capanchi. Shinami shujcunata ayudangapaj ashtaca oportunidadcunata charipashun. Shinallata “ninandapacha llaquishpa juyaj” Jehová Diostapashmi ninanda cushichipashun.

CÁNTICO 43 Jehová Diosta agradicingapaj mañapashunchi

^ párr. 5 Jehová Diosca llaquishpa juyaj Diosmi can. Tucui ñucanchicunami paishnallata shujcunata llaquishpa tratana capanchi. Cunanga, Jehová Dios imamanda llaquishpa trataj cashcata, shinallata pitapash corregishpaca imashina llaquishcata ricuchijtapashmi yachajupashun. Ultimopica ñucanchicunapash imamanda shujcunata llaquishpa tratana cashcatami yachajupashun.

^ párr. 9 Hebreos 12:5, 6, (TNM): “Huahuacunamanshna consejashca shimicunatapash cungaitapachami cungashcanguichi. Quiquingunataca cashna nishpami consejarca: ‘Ñuca huahualla, Jehová Dios quiquinda corrigishcataca na yangapi churanachu cangui. Shinallata, nalitami rurajungui nishpa consejajpica, na desanimarinachu cangui. 6 Porque Jehová Diosca juyaimandami pitapash corrigin. Ashtahuangarin, pitapash huahuatashna chasquishca caimandami paitaca astin’ ninmi”.

^ párr. 11 Cai revistapillata llujshishca “¿Imashinata Jehová Dioshuanga cutin ali amigo tucuita ushapangui?” temaca expulsashcacuna congregacionman tigrashpa Jehovapa ñaupapi cutin ali ricuringapaj imata ruranata yachachunmi ayudanga. Shinallata ancianocuna imashina paicunata ayudana cashcatapashmi ricuchijupan.

^ párr. 61 CAI FOTOPICA: Tucuita yanga tucuchishca joven paipa huasiman tigrajujtami ricuchin. Taitaca ricui pactashpami paita ugllangapaj calpashpa llujshin.

^ párr. 65 CAI FOTOPICA: David paipa concienciapi nali sintirimanda Natán parlashca chimbapuraimanda charij charij runaca huañunami can nijujtami ricuchin.