Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Carretacunapash, shuj coronapash ¿imatata ricuchin?

Carretacunapash, shuj coronapash ¿imatata ricuchin?

‘Cangunata Mandaj Dios rimashca shimita cazujpimi chashna tucunga’ (ZAC. 6:15).

CÁNTICO 61, 22

1, 2. Zacariaspa tiempopi israelitacunaca ¿imashinata Jerusalenbica causanajurca?

PROFETA Zacariasca muscuipishna shuj canasto ucupi tiajuj shuj huarmita ricushcapimi pensarijushcanga. Chai muscuipishna ricushcacunaca na honrado gentecunata Jehová Dios llaquichinatami ricuchijurca. Chaimi Zacariasca ninanda animarishcanga. Shinapash ashtaca israelitacunaca shuhuashpa, nali cosascunata rurashpami causanajurcara. Israelitacunaca Jehovapa templo huasita cutin shayachinatapashmi cungashcarca. Paicunaca ¿imamandata Jehovapa templo huasita cutin shayachinata cungashcarca? ¿Paicunaca ali causangapallachu Jerusalenmanga tigrarca?

2 Zacariasca, Jerusalenman tigramushca israelitacuna Jehovapi feta charishcataca alimi yacharca. Bibliapica ninmi: Jerusalenman ‘rina yuyaita paicunapa shungupi Taita Dios cujpimi’ Babilonia llactapi ali huasicunata, negociocunatapash saquishpa rirca nishpa (Esd. 1:2, 3, 5). Ashtaca israelitacunami Jerusalén llacta imashina cajta na rijsishpapash ali causaita saquishpa  chaiman rigrinajurca. Diospa templo huasita cutin shayachinami paicunapaca ashtahuan importante carca. Chaimi peligroso, nali ñangunata rina cajpipash 1.600 kilometrocunata chaquilla rirca.

3, 4. Jerusalenman trigrashpaca ima jarcaicunatallata israelitacunaca chimbapurana carca?

3 Israelitacuna Jerusalenman tigranajushpaca, chai llacta imashina canata pensarishpandimi rinajushcanga. Huaquingunaca chai llacta juyaillagu cashcatami uyashcarca. Cutin mayor gentecunaca Diospa templo huasi jatun, alipacha cashcatami ricushcarca (Esd. 3:12). Ñucanchipash israelitacunahuan rijushpa, Jerusalenda primera vez ricushpaca ¿imashinashi sintirinchiman carca? ¿Jerusalenba pircacuna urmashcata, jihualla jundata ricushpaca nacha llaquirinchiman carca? Babilonia llactapica jatun ancho ancho pircacunami tiarca. Cutin Jerusalenbica pungucuna, jatun torrecunapa randica utujucunallami tiarca. Chaita ricushpaca ¿nacha Babiloniahuan, Jerusalén llactahuan chimbapurashpa ricunchiman carca? Shinata ricushpapash israelitacunaca na desanimarircachu. Chaipa randica Jerusalenman trigranajujpi Jehová Dios imashina ayudashcatami ricurca. Chaimi Jerusalenman chayai na chayai israelitacunaca templo huasi tiashca pushtupi shuj altarta rurashpa cada punlla Jehovaman sacrificiocunata ruranajurca (Esd. 3:1, 2). Israelitacunaca cushijushcapacha caimandami, paicunata nima na desanimachinashnalla ricurirca.

4 Diospa templota shayachishca jahuapash, paicunapa llactata, huasicunatapashmi cutin shayachina carca. Shinallata familiata mantiningapami alpacunatapash tarpuna carca. Israelitacunaca ashtacatami rurana carca (Esd. 2:70). Paicunapa contracuna paicunata jarcangapaj munajpipash, callaripica israelitacunaca trabajashpami catirca. Shinapash contracuna 15 huatacunata jarcajuimandami israelitacunaca asha asha desanimarishpa catirca (Esd. 4:1-4). Ashtahuanbash Jesús cai Alpaman nara shamushca 522 huatapica, Persia llactamanda reyca Jerusalén llactapi israelitacuna imatalla ruranajushcata saquichunmi mandarca. Jerusalén llactata cutin shayachinashnallaca na ricurircachu (Esd. 4:21-24).

5. Israelitacunataca ¿imashinata Jehová Diosca ayudarca?

5 Israelitacuna imashina sintirishcataca Jehová Diosca alimi yacharca. Chaimi Zacariasman último muscuipishna ricuchishpa israelitacunata juyashcata, paicunata agradicishcatapash ricuchirca. Israelitacunataca caitapashmi yarichirca, Diospa templo huasita cutin shayachijpica Jehovallata ayudana cashcata. Zacariasta utilizashpami Diospa templo huasita cutin shayachinamandaca Jehová Diosca nirca: “Cangunata Mandaj Taita Dios rimashca shimita uyashpa cazujpimi, chashna tucunga” nishpa (Zac. 6:15).

ASHTACA ANGELCUNA

6. a) Zacariaspa último muscuipishna ricushcaca ¿imashinata callarin? (Callari dibujota ricupangui). b) ¿Imamandata caballocunaca shuj shuj colorcuna can?

6 Zacariaspa último muscuipishna ricushcami ñucanchi feta ashtahuan shinlliyachin (Zacarías 6:1-3, liingui). Profeta Zacarías imata ricushcapi yuyapashunchi. Paica broncehuan rurashca ishcai urcu chaupimanda chuscu carretacuna ñapash Ilujshimujtami ricurca. Carretacunata aisanajuj caballocunaca puca, yana, yuraj, pintado colorcunami carca. Shina shuj shuj colorcuna cashpami carretacuna na igual cashcata ricuchin. Chaipimi Zacariasca cashna tapurca: “Ñucata mandajlla,  ¿caica imata capan?” nishpa (Zac. 6:4). Zacariaspa último muscuipishna ricushcacunaca ñucanchitapashmi ayudan. Chaimi cai muscuipishna ricushcacunaca ¿imatata ricuchin? nishpa tapurinchi.

7, 8. a) Chai ishcai urcucunaca ¿imatata ricuchin? b) ¿Imamandata chai ishcai urcucunaca broncehuan rurashca can?

7 Bibliapica urcucuna nishpaca gobiernocunamandami parlajun. Zacariaspa muscuipishna ricushca ishcai urcucunaca Danielpa profeciapi parlashca urcucunahuan igualmi can. Chai urcucunamanda shujca Jehová Dioslla tucuita para siempre mandana cashcatami ricuchin. Cutin chaishujca Diospa Reinopi Jesús mandana cashcatami ricuchin (Dan. 2:35, 45). Huata 1914​pi Jesús mandai callarishcamandapachami, ishcandi urcucuna tandanajushpa Jehovapa munai cai alpapi pactarichun ricurianajushca.

Cunanbipashmi Jehová Diosca angelcunata utilizashpa paipa llactata shinllichishpa, cuidashpa catijun

8 Chai ishcai urcucunaca ¿imamandata broncehuan rurashca can? Oropash, broncepash valishcacunami can. Chaimi Jehová Diosca mandarca tabernáculo nishcata, Jerusalenbi templo huasitapash orohuan, broncehuan rurana canguichi nishpa (Éx. 27:1-3; 1 Rey. 7:13-16). Brocehuan rurashca urcucunaca Jehovapa mandana, Jesús mandanapash alipacha, ni maijanhuan na igual cashcatami ricuchin. Paicuna cai alpata mandajpimi gentecunaca cushilla, seguro causanga. Ashtaca bendiciogunatapashmi chasquinga.

9. a) Carretapash, carretapi rijujcunapash ¿imatata ricuchin? b) ¿Imatata paicunamanga mingarca?

9 Carretapash, carretapi rijujcunapash ¿imatata ricuchin? Aliguta organizarishca angelcunatami ricuchin (Zacarías 6:5-8, liingui). Paicunaca ‘cai pachata mandaj Jatun Diospa ñaupamandami’ Diospa mingashcata pactachingapaj rinajun. ¿Imatata paicunamanga mingarca? Jehovapa llactata paicunapa contracuna ama llaquichichunmi angelcunataca maimanbacha rina cashcata ricuchirca. Ashtahuanbachaca Babilonia ‘jahua lado llactamanda’cuidachunmi cacharca. Jehová Diosca paita sirvijcuna Babilonia llactapi prezo cachunga ñana saquigrijurcachu. Chaita yachashpaca, Zacariaspa punllacunapi Diospa templo huasita shayachinajuj israelitacunaca ninandami cushijushcanga. Paicunaca paicunapa contracunamanda Jehová Dios cuidanataca seguromi cashcanga.

10. Zacariaspa muscuipishna ricushcacunaca ¿imamandata cunan punllapi seguro cachun ayudan?

10 Zacariaspa punllacunapishnami, Jehová Diosca angelcunata utilizashpa paipa llactata shinllichishpa, cuidashpa catijun (Mal. 3:6; Heb. 1:7, 14). Jehovapa llactaca huata 1919​pimi Babilonia Jatun pueblomanda libre quedarca. Chai huatamandapachami, contracuna jarcangapaj munajpipash ali religionga ashtahuan mirashpa catishca (Apoc. 18:4). Angelcunata utilizashpami Jehová Diosca ñucanchita cuidajun. Chaimi panda religionbi prezoshna causachunga ñana saquinga (Sal. 34:7). Ashtahuangarin cushillami Jehovatalla sirvishpa ñaupaman catishun. Zacariaspa profeciapi pensarinami Jehovapash, Jesuspash ñucanchita cuidanata seguro cachun ayudan.

11. Ninan Manllanai Llaqui Punllacunapi Diospa llactata llaquichinataca ¿imamandata na manllana capanchi?

 11 Ñallami Diablopa nali mundomanda gobiernocunaca paicunapura tandanajushpa Diospa llactata llaquichinga (Ezeq. 38:2, 10-12; Dan. 11:40, 44, 45; Apoc. 19:19). Ezequielpa profeciapica ninmi: Chai gobiernocunaca fuyushnami cai alpataca quilpanga nishpa. Shinallata ninbashmi, caballopi tiarishca ninan shinllicuna shamushpami ushashcata fiñarishpa Jehovapa llactata llaquichinga nishpa (Ezeq. 38:15, 16). * Shinaca ¿manllanachu capanchi? Na, na manllanachu capanchi. Jehová Diosmi ñucanchita ayudanga. Ninan Manllanai Llaqui Punllacunapica Jehová Diosca paipa angelcunahuanmi paipa llactata cuidanga. Shinallata Jehovapa angelcunaca Jehovalla mandana derechota na apoyangapaj munajcunataca tucuchishpami saquinga (2 Tes. 1:7, 8). Chai punllacunaca ninan cushijuimi canga. Shinapash ¿pita Jehovapa angelcunataca ñaupaman pushanga?

JEHOVÁ DIOSCA SHUJ SACERDOTETAMI REY CACHUN SHUJ CORONATA CHURACHIN

12, 13. a) Jehová Diosca ¿imatata Zacariasmanga mandarca? b) ‘Tronco sapimanda mushuj yura’ nishpa Jesusmanda parlajushcataca ¿imashinata yachanchi?

12 Zacarías libropica 8pura muscuipishna ricushcacunatami parlan. Chai muscuicunatashnaca Zacariasllami ricurca. Diospa templo huasita shayachinajuj israelitacunata animangapaca ¿imata rurachunda Zacariasmanga Jehová Diosca mandarca? (Zacarías  6:9-12, liingui). Jehová Diosca Zacariastaca nircami, Babiloniamanda chairalla chayamushca Heldai, Tobiya, Jedayá runacunata culquitapash, orotapash mañangui nishpa. Profeta Zacariasca ‘culquita, orota japishpami shuj coronata’ rurana carca (Zac. 6:11). Chai coronaca ¿pipata cana carca? ¿Judá familiapuramanda, Davidpa mirai Zorobabel mandajpachu cana carca? Zorobabel mandajpaca na carcachu. Jehová Diosca Zacariastaca nircami, sumo sacerdote Josuemanmi chai coronataca churachina cangui nishpa. Chaita ricujcunaca manllarishcangami.

13 ¿Shinaca sumo sacerdote Josué runaguchu rey tucugrijurca? Na, paica na rey tucugrijurcachu. Josueca Davidpa miraimandaca na carcachu. Davidpa miraimandallami reyca llujshina carca. Josueman coronata churachishpaca, jipa punllacunapi shuj sacerdoteman rey cachun shuj coronata churachinatami ricuchijurca. Chai sacerdotetami ‘tronco sapimanda mushuj yura’ nishpa rijsin. ¿Pimandata parlajurca? Bibliapica ‘tronco sapimanda mushuj yura’ nishpaca Jesusmandami parlajun (Is. 11:1; Mat. 2:23). *

14. Jesusca ¿imatata rurajun?

14 Jesustaca rey cachunbash sumo sacerdote cachunbashmi Jehová Diosca agllashca. Chaimi Jehová Diospa angelcunataca Jesús ñaupaman pushajun. Shinallata cai nali mundopi causashpapash Jehová Diosta sirvijcuna ali seguro causachunmi Jesusca ricuriajun (Jer. 23:5, 6). Ñallami Jesusca tucui llactacunata mishashpa Jehová Dioslla mandana derechota apoyanga. Shinallata chai punllacunapica Jehovata sirvijcunatapashmi cuidanga (Apoc. 17:12-14; 19:11, 14, 15). Chai punlla chayamungacamanga Jesús o ‘tronco sapimanda mushuj yuraca’ ¿imatata pactachinara can?

DIOSPA TEMPLOTAMI SHAYACHINGA

15, 16. a) Jesusta ali catij congregaciondaca ¿pita cutin callarichirca? ¿Imashinata chaitaca rurarca? b) Jesús cai alpata mil huatacunata mandai tucuchijujpica ¿imashinata gentecunaca causanajunga?

15 Jesustaca rey cachun sumo sacerdote cachun agllashca jahuapash ‘Diospa huasita shayachichunbashmi’ Jehová Diosca mandarca (Zacarías 6:13, liingui). Chai mandashcata pactachishpami, Jesusca 1919 huatapi Diospa llactata Babilonia Jatun pueblopa panda yachachishcacunamanda libre quedachun ayudarca. Shinami Jesusta ali catij congregacionda cutin callarichirca. Chai huatapillatami cai alpapi gentecuna Diosta ali sirvishpa catichun ‘aliguta cazushpa, aliguta yarishpa  sirvij’ esclavota agllarca (Mat. 24:45). Ashtahuanbash mapata anchuchinshnami, Jehovapa llacta Jehová munashcashna adorachun Jesusca ayudajushca (Mal. 3:1-3).

16 Cai alpata Jesús, 144 mil agllashcacunahuan mil huatacunata mandanajushpaca Jehovata tucuipi cazujcunata jucha illaj tucuchunmi ayudanga. Chai jipaca Jehovata ali adorajcunallami cai alpapi causanajunga. Chai punllapimi mundo enteropi gentecuna Jehová Diostalla adoranajunga.

JEHOVATA APOYASHUNCHI

17. a) Jehová Diosca israelitacunaman ¿imata villachunda Zacariastaca mandarca? b) Chaita uyashpaca israelitacunaca ¿imashinata sintirirca?

17 Jehová Diosca Zacariasmanga cashnami nirca, israelitacuna ñuca templo huasita tucuchichunga ñucallatami paicunataca cuidasha, ayudasha nishpa. Chai shimicunaca israelitacuna Diospa templo huasita rurai tucuchinata seguro cachunmi ayudashcanga. Shinapash ¿imashinata ashallacuna cashpapash paicunaca Diospa templo huasita rurai tucuchigrinajurca? Zacariasca cutinmi Jehová Dios nishcata villarca, ‘Diospa templo huasita’ shayachichunga Jehovata ali sirvij Heldai, Tobiya, Jedayá, shuj runacunapashmi cangunataca ayudanga nishpa. Chaita uyashpaca israelitacunaca cushilla, seguromi sintirishcanga (Zacarías 6:15, liingui). Israelitacunaca Jehová Dios paicunata ayudanataca seguromi carca. Diospa templota ama shayachichun Persia llactamanda rey mandashcaca shuj jatun urcushnami israelitacunapa carca. Shina cajpipash israelitacuna shayachishpa catichunmi Jehová Diosca ayudarca. Shinami Jesús cai Alpaman nara shamushca huata 515​pi Diospa templo huasita shayachi tucuchirca (Esd. 6:22; Zac. 4:6, 7). Shinapash Zacariaspa shimicunaca cunanbimi ashtahuanbachaca pactarijun.

Ñucanchicuna Jehovata juyaimanda imatalla rurashcataca paica nunca na cungangachu. (Párrafo 18, 19​ta ricupangui).

18. Zacarías 6:15​pi shimicunaca ¿imashinata cunanbipash pactarijun?

18 Cunan punllacunapica ashtaca millón gentecunami Jehová Diosta sirvinajun. Paicunaca Jehovata juyaimandami paicuna ‘charishca imalla alicunata’ cushpa ayudanajun. Chaimi paicunapa tiempota, culquita, fuerzata utilizashpa Jehovata ali adoranata apoyanajun (Prov. 3:9). Jehová Diosca ñucanchicuna paita tucui shunguhuan juyashcata, tucuipi apoyashcataca ninandami alicachin. Caita yaripashunchi. Heldai, Tobiya, Jedayá jaricunaca Zacariasmanmi shuj coronata rurachun orota, culquitapash curca. Chai coronaca chai jaricuna Jehovapa ali adoracionda apoyashcata “yarinajuchunmi” sirvirca (Zac. 6:14). Ñucanchicuna Jehovata juyaimanda imatalla rurashcataca Jehová Diosca nunca na cungangachu (Heb. 6:10).

19. Zacariaspa muscuipishna ricushcacunaca ¿imata rurachunda animan?

19 Cai tucurimui punllacunapi Jehovata ali adorana ashtahuan mirajushcamandami Jehová Dios ayudajushcata, Jesús ñaupaman pushajushcatapash ricupanchi. Jehovata sirvijcunaca nunca na tucurina organizacionbimi capanchi. Jehová Diosca paitalla ali adorachunmi munan. Chaitaca ñallami pactachinga. Chaimandami congregacionbi ima responsabilidadcunata charishpapash cushijushpa pactachina capanchi. Ashtahuanbash, “Taita Dios rimashca shimita uyashpa” tucuipi cazushunchi. Chaimi Jesuspash, angelcunapash ñucanchita ayudanga. Shinallata tucui shunguhuan Jehovapa ali adoracionda apoyangapaj esforzarishunchi. Shina rurajpica tucuita mandaj Jehová Diosca tucurimui punllacunapi ñucanchita salvashpami para siempre cuidanga.

^ par. 11 Ashtahuan yachangapaca Villajun 15 de mayo de 2015 revistapi 29, 30 paginacunapi “Gentecunaca tapunmi” nishcata ricupangui.

^ par. 13 Nazareno shimica Hebreo shimipi tronco sapimanda mushuj yura ningapami munan.