INGLATERRA llactapi huata1923​pimi nacirircani. Ñuca rucu turica Bob shutimi carca. Chai tiempopi religionda ñaupaman pushajcunaca paicuna yachachishcata paicunapa causaipica na pactachinllu carca. Chaimi ñuca taitaca paicunataca na ricunayachin carca. Ñuca 9 huatacunata charijpimi, panda religionguna llullacunata yachachishpa gentecunata umachijtami ñuca taitaca shuj libropi liirca. Chaita liishpaca ñuca taitaca manllarircami. Huaquin huatacuna jipaca Bob Atkinson shuti jarimi ñucanchi huasiman shamushpa, shuj gramófono nishcapi turi Rutherfordpa discursota uyachirca. Chaipimi panda religionmanda parlaj librotaca paicuna llujchishca cashcata cuenda japircanchi. Chaimi ñuca taitamamaca Bibliamanda ashtahuan yachachichun Bob Atkinson jaritaca cada chishi ñucanchihuan micuchun invitarca. Chai turica tandanajuicunamanmi ñucanchitaca invitarca. Tandanajuicunataca shuj turigupa huasipimi ruran carca. Carupi cajpipash invitashcandimi tandanajuimanga ri callarircanchi. Chai jipallami ñucanchi llactapi shuj uchilla congregación tiai callarirca. Jipamanga, siervo de zona nishca turigucunatami ñucanchi huasipi mingachi callarircanchi (superintendente de circuito huauquicunatami siervo de zona nishpa rijsin carca). Shinallata huasipi micuchunmi precursorcunata invitan carcanchi. Paicunahuan canaca ninandami ayudahuarca.

Ñuca familiaca chairami shuj negociota callarishcarca. Chaipimi ñuca taitaca, ñuca turitaca nirca: “Precursor shina sirvingapaj munajpica negociota saquishunllami” nishpa. Shina nijpimi ñuca turi Bobca 21 huatacunata charishpa precursor shina sirvingapaj rirca. Ishcai huatacuna jipaca ña 16 huatacunata charishpami precursora tucurcani. Chaupi semanaca casi siempremi ñucalla villachin carcani. Chaipaca gramófono nishcata, tarjeta de testimonio nishcata apashpami rin carcani. Shina villachijushpami Bibliamanda yachajungapaj munajta tarircani. Pai ñapash espiritualmente ñaupaman catijujpimi Jehová Dios bendiciahuajun yarcani. Tiempohuanga paipa familiacunapashmi Bibliamanda yachajui callarirca. Huata jipaca Mary Henshall shuti ñañaguhuan precursora especial shina sirvichunmi, Testigo na tiaj Cheshire llactaman cachahuarca.

Chai punllacunapica, Segunda Guerra Mundialmi tiarca. Chaimi huarmicunatapash soldadocunata apoyachun mandarca. Chai tiempopica iglesiapi yachachijcunata, ñaupaman pushajcunatapash juezcunaca guerraman richunga na obliganllu carca. Chaimi ñucanchitapash tiempo completo especialpi sirvijuimandaca  guerraman richunga na obligangachu yarcanchi. Shinapash guerraman na ringapaj munaimandami quilla enterota carcelpi vichahuarca. Shinapash shuj huata jipaca ña 19 huatacunata charishpami ñuca conciencia na saquijpi guerramanga na ringapaj munarcani. Chaimandami ishcai tribunalcunaman rina tucurcani. Chai ishcai tribunalcunami ñucataca libre saquihuarca. Chai punllacunapica Jehová Dios ñucata paipa espíritu santohuan ayudajushcata, shinllichijushcatami cuenta japircani (Is. 41:10, 13).

1946 huatapica Arthur Matthews turigutami rijsircani. Paitaca guerraman na ringapaj munaimandami quimsa quillacunata carcelpi vichashcarca. Carcelmanda llujshishpami paipa huauquihuan sirvingapaj rishcarca. Paipa huauqui Dennisca precursor especial shinami Hemsworth llactapi sirvijurca. Paicunamanga huahuamandapachami paipa taita Bibliamanda yachachishcarca. Paicunaca chairalla viñajcuna cashpallatami bautizarishcarca. Hemsworth llactaman Arthur chayashca jipalla, paipa huauqui Dennista Irlanda llactaman villachichun cachajpimi, Arthurca pailla chai llactapi Jehovata sirvijushcarca. Chaimi ñuca taitamamaca ñucanchipa huasipi causachun Arthurtaca invitashcarca. Paica tucuicunahuanmi ali ali, alipacha precursor cashcarca. Ñuca familiata visitangapaj rishpa micushca jipa platocunata maillajujpica Arthurpashmi ayudangapaj quimirin carca. Jipamanga escribiri callarircanchi. Shinapash huata 1948​pica Arthurtaca cutinmi quimsa quillacunata carcelpi vicharca. Huata 1949​pi enero quillapimi cazararcanchi. Cazarashca jipapash tiempo completopi Jehovata sirvishpa catingapami munarcanchi. Chaimi culquitaca na yangata gashtan carcanchi. Shinallata huaquin punllagucunataca frutacunata pallashpami trabajan carcanchi. Jehová Diosmi precursor shina sirvichunga ayudarca.

Casi shuj huata jipaca, Irlanda llactapi Jehovata sirvichunmi invitarca. Chaiman nara rishpallatami Armagh, Newry llactacunaman rircanchi. Chai llactacunapica casi tucui gentecunami catolicocuna carca. Shinallata chai llactacunapi religionmanda shuj shuj yuyaicunata charijpimi villachijushpaca cuidatota charina carcanchi. Tandanajuicunataca shuj Testigo cusahuarmipa huasipimi ruran carcanchi. Paicunaca ñucanchi causajuj huasimandaca 16 kilometrocuna carupimi causan carca. Ochopuracunallami tandanajuiman rin carcanchi. Chai huasipi puñungapaj quedashpaca alpapimi puñuna tucun carca. Shinapash cayandi tutamandaca mishqui micunagutami micun carcanchi. Chai llactapi ashtaca turiñañacuna tiajta yachashpaca ninandami cushijuni.

Ñuca turica, Lottie shuti paipa huarmigundimi precursor especial shina Irlanda del Norte llactapi sirvinajurca. Chaimi huata 1952​pi Belfast llactapi shuj jatun tandanajuiman paicunandi rircanchi. Ñucanchica shuj turigupa huasipimi mingarircanchi. Chai huasipica Gran Bretaña llactapi siervo de sucursal shina sirvijuj Pryce Hughes turigupashmi cashcarca. Irlanda llactapi causaj gentecunapi pensarishpa chairalla llujchishca El camino de Dios es el de amor nishca folletomandami shuj tutaca parlanajurcanchi. Chaipimi Pryce Hughes turica nirca: Cai Irlanda llactapi causaj católico gentecunaman villachinaca shinllimi can. Huauquipanicunata llaquichichunmi sacerdotecunaca gentecunaman imacunatapash ninajun, mingarina huasicunamandapash mi huauquipanicunataca llujchishpa cachanajun nishpa. Chai jipaca nircami: “Cai folletohuan llacta entero villachichunmi carrota charij cusahuarmita minishtinchi nishpa”. * Chaita uyashpaca callaripi nishca shimicunatami nircanchi: “Ñucanchi rishunllami” nishpa.

 Dublín llactapi precursorcunaca siempremi Rutland shuti ñañagupa huasipi mingarin carca. Paica ashtaca huatacunatami Jehová Diosta tucui shunguhuan sirvishcarca. Chai ñañagupa huasipi ña shuj tiempota yalishca jipaca, ñucanchipa huaquin cosascunatami jaturcanchi. Chai jipaca shuj carrota randingapami ñuca turipa carretaguta charij shuj motopi chuscundi junda rircanchi. Segunda mano carrogutami randircanchi. Manejanata na yachaimandami carrota jatuj runagutallata huasipi saquigripai nircanchi. Ñuca cusaguca carrota imashina manejanatami pensarijurca. Cayandi tutamandaca ñuca cusagu garajemanda carrota llujchijuj horasmi, Mildred Willet shuti ñañagu chayamurca (paica misionerami carca. Jipamanga John Barr shuti turiguhuanmi cazararca). Chai ñañaguca carrota manejanataca alimi yacharca. Chaimi manejanata yachachirca. Chai ratollata carrota manejanata yachajushpami ringapaj ña listo carcanchi.

Cunanga maipi causanatami mascana carcanchi. Huasishnalla carrogupi cusanajujpimi shujcunaca cashna nirca, ama chaipi causanajuichichu nali gentecunaca rupachingami nishpa. Huasita mascashpapash na tarishpami, ñucanchi carropillata puñuna tucurcanchi. Cayandi punllaca, camata charij shuj huasishnalla carrogutami tarircanchi. Chaipimi causagrinajurcanchi. Chai pushtupi causaj gentecunaca ali alicuna caimandami ñucanchi huasishnalla carroguta paicunapa alpacunapi shayachichun saquinlla carca. Huasishnalla carroguta saquishca pushtumandaca 20 kilometrocunata rishpami villachin carcanchi. Chai jipaca huasishnalla carroguta shuj pushtupi shayachishpami, shuj ladocunaman villachingapaj rin carcanchi.

Irlanda llactamanda shuj pueblocunapipash villachishpami 20 mil yali folletocunata saquircanchi. Shinallata Bibliamanda ashtahuan yachajungapaj munaj gentecunapa shuticunataca Gran Bretaña llactapi Betelmanmi cacharcanchi. Cunanbi, chai pueblocunapi ashtaca testigo de Jehovacuna tiajta yachashpaca ninandami cushijuni.

Huaquin huatacuna jipaca Londres llactapi sirvichunmi cacharca. Chai llactaman chayashca huaquin semanacuna jipallami, ñuca cusataca Betelmanda cayashpa cashna nishcarca, caya punllamandallatami superintendente de circuito shina sirvichun munapanchi nishpa. Ñuca cusagutaca semana enterotami superintendente de circuito shina sirvichun yachachirca. Chai jipaca Escocia llactapi congregaciongunata visitangapami chaiman rircanchi. Ñuca cusaguca discursocunata prepararingapaca na tiempota charircachu. Shinapash ima asignaciongunata cujpipash chasquinllami carca. Paipa ejemploca ninandami animahuan carca. Shina sirvishpaca cushillami sintirin carcanchi. Ashtaca huatacunatami Testigo na tiaj pushtucunapi villachishcanchi. Ashtaca turiñañacunahuan canaca shuj jatun bendicionmi cashca.

1962 huatapica Galaad Escuelaman richunmi ñuca cusagutaca invitarca. Chai escuelaca 10 quillacunatami paran carca. Ñuca cusagutalla invitashcamandami, shuj shinlli decisionda agllana tucurcanchi. Pai rijpi ñucalla quedana cashpapash, ñuca cusagulla Galaad Escuelaman rinataca ishcandimi decidircanchi. Ñucataca ñuca llactamanmi precursora especial shina sirvichun cachahuarca. Shuj huata jipa ñuca cusagu tigramujpica superintendente de distrito shina sirvi callarirca. Chaimi ñucanchica Escocia, Inglaterra, Irlanda del Norte llactacunatami visitarcanchi.

1964 huatapica ñuca cusaguca shuj mushuj privilegiotami chasquirca. Cunanga Irlanda llactapimi siervo de  sucursal shina sirvigrijurca. Ñuca cusagu superintendente de circuito y distrito shina sirvijushpa shuj mushuj privilegiota chasquigrijujpimi, ñucaca asha manllaihuan carcani. Shinapash Betelpi sirvina privilegiota charishcamandaca, cunanbica ninandami agradicini. Ñucanchi na gushtashca asignaciongunata chasquishpa chaicunata pactachijpi Jehová Dios bendiciashcatami ricushcani. Betelpica oficinapi, publicaciongunata cartongunapi churashpa, yanushpa, limpiashpami trabajan carcani. Huaquinbica ñuca cusaguca superintendente de distrito shina sirvin carca. Shina sirvijujpimi chai llactapi ashtaca turiñañacunata rijsircanchi. Shinallata ñucanchihuan Bibliamanda yachajujcuna espiritualmente ñaupaman catijushcatami ricurcanchi. Chai tucui cosascunamandami Irlanda llactapi turiñañacunataca ninanda juyan carcanchi. Chaica shuj jatun bendicionmi carca.

Dublín, (Irlanda) llactapica 1965 huatapimi primera vez shuj asamblea internacional tiarca. * Chai asamblea ama tiachun jarcajpipash, chai asambleaca alipachami carca. Chaimanga 3.948 gentecunami rirca. Shinallata 65​mi bautizarirca. Shuj shuj llactacunamanda 3.500 turiñañacunatami Dublín llactapi shuj shuj huasicunapi mingachirca. Chai turiñañacunata mingachij gentecunamanga pagui nishpami shuj cartaguta escribishcarca. Shinallata ali alicuna cajta ricushpami shuj gentecunaca turiñañacunata alicachishpa ricurca. Irlanda llactamanda ashtaca gentecunami chai asambleataca ninanda alicachirca.

Irlanda llactapica gobiernocunamanda, religionmanda shuj shuj yuyaicunata charimandami, shuj yuyaillaca na causanajurca. Shina cajpipash testigo de Jehovacunaca, huata1966​pica tucuilla Irlanda llactata Dublín llactamanda Betel ricuriajujpimi shujlla yuyaihuan Jehovata sirvinajurca. Catolicocuna, protestante religionmanda gentecunapash Bibliata yachajuimanda shujllashna Jehová Diosta sirvijujta ricushpaca ninandami cushijurcani.

2011 huatapimi ñucanchi causai cambiarca. Gran Bretaña llactapi Betelhuan, Irlanda llactapi Betelhuan tandanajushpami shujlla tucurca. Chaimi ñucanchitaca Londres llactapi Betelman cacharca. Chai tiempopica ñuca cusagu irqui cajpimi ninanda preocuparishca carcani. Doctorcunaca nircami, Parkinson nishca ungüitami quiquinba cusaguca charin nishpa. Ñuca cusaguhuanga 66 huatacunatami Jehová Diosta igual sirvircanchi. Ñuca juyashca cusaguca 20 de mayo de 2015 huatapimi huañuparca.

Cai huatacunaca llaqui llaquimi causajushcani. Ishcandimi imagutapash igual ruran carcanchi. Chaimandami ñuca cusagutaca ninanda yarini. Shina llaquicunata chimbapuranaca, Jehová Dioshuan ashtahuan ali amigo tucuchunmi ayudahuashca. Shinallata shuj turiñañacuna ñuca cusaguta alicachishcata yachashpaca ninandami cushijuni. Gran Bretaña, Irlanda, Estados Unidos llactamandapashmi cartacunata ñucanchi amigocuna cachamushcatami chasquishcani. Ñuca cusagupa huauqui Dennispashmi ninanda animahuashca. Dennispa huarmi Mavis, paipa huahuacuna Ruth, Judypash ashtacatami ayudahuashca. Paicuna ayudashcata imashina agradicitapash na ushanichu.

Isaías 30:18​pi shimicunaca ninandami animahuan. Chaipica ninmi: Jehová Diosca, “cangunata llaquingapaca shuyangarami. Shinamandami, cangunata llaquishcamandaca, jatumbi churai tucunga. Mandaj Diosca, imatapash cashcatapacha ruraj Taita Diosmi. Paita yariashpa causajcunaca, tucuicunami ninanda cushijun” nishpa. Jehová Dios ñucanchi llaquicunata ñalla tucuchinata yachashpaca alimi sintirini. Shinallata Jehová Dios paraíso alpagupi shuj shuj ruraicunata mingajpimi cushilla causanajushun.

Ñuca causaipi pensarishpami Irlanda llactapi testigo de Jehovacuna mirashcata, Jehová Dios bendiciajushcata cuenda japini. Chaipi ashagutallapash ayudai ushashcamandaca ninandami cushijuni. Jehová Dios paipa munaita pactachijpi ashtacata bendicianataca seguromi capani.