Agllashca temata ricungapaj

Temacunata ricungapaj

Ali canaca ¿imata can?

Ali canaca ¿imata can?

TUCUICUNALLATAMI ali gentecuna cashcata rijsichun munapanchi. Shinapash ‘ima alitapash na ricunayachij’ gentecunapurapi causanajuimandami ali gentecuna canaca shinlli can (2 Tim. 3:3). Chai gentecunaca ima ali cajta, ima nali cajta paicunallata agllashcamandami ‘nalitara alimi nishpa, alitara nalimi’ nishpa causan (Is. 5:20). Tucuicunallatami punda nalicunata rurashcamanda, juchayucuna cashcamandapash ali gentecuna canaca shinlli ricurishca. Jehovata ashtaca huatacunata sirvij shuj panigushna sintirinchipashchari. Chai paniguca nircami: “Ñucaca ali gente caitaca na ushanichu yanimi” nishpa.

Tucuicunallatami ali gentecuna caita ushapanchi. Ali canaca Diospa espíritu santo granota fucuchinshna fucuchishca cualidadmi can. Diospa espíritu santotaca ñucanchi nali munaicunapash, cai mundopi nali ruraicunapash na jarcaita ushanllu. Cunanga ali cana ima cashcata, ali gentecuna cashcata imashina ricuchi ushashcatami yachajupashun.

ALI CANACA ¿IMATA CAN?

Ali gentecunaca nalitaca na ruranllu. Paicunaca shujcunata imashina ayudanapimi siempre pensarin. Shinallata imagutapash rurashpami ayudan.

Ashtaca gentecunami paipa familiata, amigocunata ayudangapaj imagutapash ruran. Shinapash Diospa ñaupapi ali ricuri gentecunaca paicunapa familiatalla, amigocunatallaca na ayudanllu. Shujcunatapashmi ayudan. Ali gentecunaca ali rurangapaj esforzarishpapash juchayucuna caimandami imagupipash pandarinlla. Chaimi Bibliapica cashna nin: ‘Cai pachapica, imatapash [alita] ruraj, ima horapash juchata na ruraj runaca shujllapash napacha tianllu’ nishpa (Ecl. 7:20). Shinallata apóstol Pablopashmi cashna nirca: ‘Ñuca cuerpopica ñucallata aliguta ruranaca na tiajtami yachani’ nishpa (Rom. 7:18). Jehová Diosllami tucuita yali ali Dios can. Shinaca ali gentecuna cangapaca Jehová Dios imashina cashcatami yachajuna capanchi.

JEHOVÁ DIOSCA ‘ALI DIOSMI’ CAN

Jehová Diosllami ima ali cajta nina derechota charin. Salmos librota escribij shuj runaguca nircami: “Canga alimi cangui, imatapash alita rurajmi cangui. Pactachinajuchun can cushca shimicunataca yachachihuailla” nishpa (Sal. 119:68). Cai textopi Jehová Dios ali Dios cashcamanda ima nishcata ishcai yuyaicunata yachajupashunchi.

Jehová Diosca ali Diosmi can. Jehová Diosca siempremi ali ali cashca. Jehová Dios Moisesman ima nishcata ricupashunchi. Jehová Diosca nircami: “Ñucami, cambaj ñavipica, ñucapaj tucui alita ricuchisha” nishpa. Jehová Dios jatun Dios cashcata, alitalla ruraj cashcata Moisesman ricuchijujpimi cashna nij uyarirca: “¡Mandaj Dios, Mandaj Dios ñucami, tucuita ushaj, llaquij, juyaj, na ñapash fiñarij, ninanda llaquij, na llullaj cani! Huaranga huaranga miraicunacaman llaquijmi cani. Nalita rurashcata, na cazushcata, juchata rurashcatapash cungaj Diosmi cani. Shina cashpapash nalita rurajtaca, ima nalitapash na ruraj runatashnaca, na saquishachu” nishpa (Éx. 33:19; 34:6, 7). Imashinami ricupanchi Jehová Diosca ali ali cashcataca siempremi ricuchishca. Jesuspashmi cai alpapi cashpaca ali ali cashcata ricuchirca. Jesús shina ali ali cashpapash paica cashnami nirca: ‘Pipash alica na tianllu, Taita Diosllami ali’ can nishpa (Luc. 18:19).

Jehová Dios ali Dios cajtaca paipa rurashcacunapimi ricupanchi.

Jehová Diosca alita rurajmi can. Jehová Dios imata rurashcata ricushpami pai ali ali cashcata cuenta japipanchi. Bibliapica ninmi: “Mandaj  Diosca tucuicunapajmi aligumari. Tucui pai rurashcacunataca, llaquishpami charin” nishpa (Sal. 145:9). Jehová Diosca na ñavita ricushpami tucuicunaman ali ali cashcata ricuchishca. Shinallata gentecunamanga causaitapash, causangapaj imata minishtishcata cushpami pai ali cashcata ricuchishca (Hech. 14:17). Jehová Diosca ñucanchi juchacunata perdonashpapashmi pai ali cashcata ricuchishca. Salmos librota escribijca nircami: “Jatun Diosca, aligupachami capangui, nalita rurashcatapash cungajmi capangui” nishpa (Sal. 86:5). Shinaca Jehová “Diosca ima nalitapash na rurajcunataca”, imatapash alita rurashpa ayudajungallami (Sal. 84:11).

“ALITA RURANATA YACHAJUICHI”

Jehová Diosca gentecunataca paiman rijchajtami rurarca. Chaimandami ali gentecuna caita ushapanchi. Shinallata imagutapash alita rurashpa shujcunata ayudaita ushapanchi (Gén. 1:27). Shinapash Jehovata sirvijcunamanga Bibliapi cashnami nin: “Alita ruranata yachajuichi” nishpa (Is. 1:17). Shinaca ali gentecuna cangapaj imata rurana cashcataca quimsa yuyaicunata yachajupashunchi.

Punda yuyai, Diosta paipa espíritu santota mañapashunchi. Jehová Diospa espíritu santomi paipa ñaupapi ali ricuringapaj ayudaita ushan (Gál. 5:22). Shinallata Diospa espíritu santoca alita rurachun, nalita ama rurachunbashmi ayudan (Rom. 12:9). Bibliapica ninmi, Jehová Diosca “imata parlashpapash aliguta parlashpa, imata cashpapash aliguta rurashpa catichunmi” ayudanga nishpa (2 Tes. 2:16, 17).

Cati yuyai, Diospa Shimita liina capanchi. Shina rurajpica Jehová Diosca “ali cachun ruranata, tucuipi ali causanatapash” ñucanchitaca yachachinga. Shinami ‘aliguta rurachun’ ayudanga (Prov. 2:9; 2 Tim. 3:17). Bibliata liina, liishcapi pensarinami Jehovamandapash, paipa munai pactarinatapash tucui shunguhuan alicachichun ayudanga. Chaicunami minishtijuj horaspipacha ñucanchitaca ayudanga (Luc. 6:45; Efes. 5:9).

Ultimo yuyai, “aliguta rurashpa” catipashunchi (3 Juan 11). Bibliapica Jehovapash Jesuspash alita rurajcuna cashcatami yachachin. Shinallata Bibliapica alita ruraj gentecunamandapashmi yachajuita ushapanchi. Por ejemplo Tabita huarmigumanda, Bernabé runagumandapashmi yachajuita ushapanchi (Hech. 9:36; 11:22-24). Shinaca Bibliapi paicunamanda imata nijta, paicuna shujcunata ayudangapaj imata rurashcatami yachajuita ushapanchi. Shina yachajunajushpaca familiapi o congregacionbi pitapash ayudangapaj imata ruranata pensarishpa yachajupashunchi. Tabita, Bernabepash shujcunata ayudashcamandaca ashtaca bendiciongunatami chasquirca. Shinallatami ñucanchicunapash shujcunata ayudashpaca ashtaca bendiciongunata charipashun.

Shujcunata ayudaj huauquipanicunapipashmi pensarina capanchi. Por ejemplo, huauqui ancianocunaca huauquipanicunata cuidangapaj, alita  rurangapami esforzarin. Shinallata tucui shunguhuan sirvij panigucunapipashmi pensarina capanchi. Paicunaca imata nishpa, imata rurashpapash ‘alitallami ruran’ (Tito 1:8; 2:3). Roslyn shuti paniguca ninmi: “Ñuca amigaca turiñañacunata ayudanata, paicunata cushichinatami ninanda gushtan. Paica turiñañacuna imata minishtishcapi pensarishpami imagutapash carashpa o imagutapash rurashpa ayudan. Paica ali alimi can” nishpa.

Jehová Diosca paita catijcunataca “alita ruranata mascaichi” ninmi (Amós 5:14). Shina rurashpaca Jehovapa mandashcacunata alicachitallaca na alicachishunllu. Ashtahuangarin Jehovapa ñaupajpi alita rurangapami munashun.

Ali gentecuna cangapaj, shujcunata ayudangapami esforzaripanchi

Shinapash ali gentecuna cangapaca ashtaca cosascunata ruranaca na minishtirinllu. Cai chimbapuraipi pensaripashunchi. Shuj plantagu viñachunga tarpui na tarpuica ashtaca yacutaca na churanchichu. Ashtahuangarin plantagu ali viñachunga asha ashami yacuta churashpa catipanchi. Shina cuendami shujcunata ayudangapaca asha asha imagupipash ayudana capanchi.

Bibliapica ninmi, tucuicunallatami shujcunata ayudangapaca imatapash rurangapaj uchalla rurana canguichi nishpa (2 Tim. 2:21; Tito 3:1). Shinaca shujcunamanda preocuparishpaca, imata minishtishcata ricunami capanchi. Shinami imashi ayudanata yachashun. Shinallata paicuna “ali crishpa cushijuchunmi” ayudashun (Rom. 15:2). Chaita rurangapaca tal vez imagutapash caranami minishtiringa (Prov. 3:27). Tal vez pitapash ñucanchi huasipi micungapaj o imagutapash rurashpa cushilla yalingapami invitaita ushapanchi. Shinallata pipash ungüihuan cajta yachashpaca visitaita ushapanchi. Na cashpaca cartaguta escribita, celularpi shuj mensajeta cachaita o cayaita ushapanchi. Shinaca “shujcuna shinlli tucushpa catichunmi, ali canatalla parlana canguichi. Uyajcunapajpash aligupacha uyarichunmi, chashna parlana canguichi” (Efes. 4:29).

Ñucanchica Jehová Dioshnami shujcunata ayudangapaj esforzarinchi. Shinallata na ñavitalla ricushpami shujcunataca ali tratapanchi. Chaimandami tucuicunaman Diospa Reinomanda ali villaigucunata villachinchi. Jesús mandashcashnami ñucanchita na ricunayachijcunata ayudangapaj esforzaripanchi (Luc. 6:27). Ali gente cashpaca shujcunata respetohuan alimi tratashun. Bibliapica “cashna causajcunataca, mandashca shimicunaca imatapash na rurai ushangachu” ninmi (Gál. 5:22, 23). Pipash ñucanchicunata llaquichijpi o imapash llaquicunata charishpapash shujcunata ayudangapaj esforzarinami capanchi. Shinami paicunapash Bibliamanda yachajuna munaita charichun, Jehovata jatunyachichun ayudashun (1 Ped. 3:16, 17).

ALI CANACA ÑUCANCHIPALLATAMI ALI CAN

Bibliapica, ‘ali runaguca paipa causaimanda’ ashtaca bendiciongunatami chasquinga ninmi (Prov. 14:14). ¿Ima bendiciongunatata chasquinga? Por ejemplo ali gentecuna cajpica, tal vez shujcunaca ñucanchita alimi tratangapaj munanga (Prov. 14:22). Gentecuna ñucanchicunata nali tratajpipash ñucanchicuna ali gentecuna cajpica tal vez paicunapash ñucanchita alimi tratanga (Rom. 12:20).

Ashtacacunaca nalita ruranata saquishpa, alita rurai callarishcamandaca ashtaca bendiciongunatami chasquishca. Por ejemplo, Nancy huarmiguca ninmi: “Ñucaca pitapash na respetashpa, ñuca munashcata nalicunata rurashpami causarcani. Shinapash Diospa mandashcacunata yachajushpaca ñuca causaipi pactachishpami cushilla causai callarircani. Cunanga ñucallatami tranquila ali sintirini” nishpa.

Jehová Diosta cushichingapami ali gentecuna cangapaj esforzarina capanchi. Shujcuna ñucanchi imata rurashcata na ricujpipash Jehová Diosca tucuitami ricun. Paica ñucanchipa ali pensamientocunata, ñucanchipa ali ruraicunatapashmi ricuriajun (Efes. 6:7, 8). Ali gentecuna cangapaj esforzarishpaca ‘Mandaj Diospa juyaita’ charishpa paipa ñaupapi ali ricurishun (Prov. 12:2). Shinaca ali gentecuna cangapaj esforzaripashunchi. Shina rurashpaca Jehová Diosca “juyailla canatapash, ninanda alicachi tucunatapash, casilla ali causaigutapash” caranga (Rom. 2:10).