Agllashca temata ricungapaj

Temacunata ricungapaj

 TEMA 33

Huañushcacunata causachingami

Huañushcacunata causachingami

“Huañushcatapash Taita Dios causachinatami cushijushpa shuyajuni” (HECH. 24:15).

CÁNTICO 151 Jehová Diosmi causachinga

CAITAMI YACHAJUPASHUN *

1. Jehová Diosca ¿imamandata tucui tucuita rurarca?

PUNDAPICA Jehová Diosca paillami carca. Pailla cashpapash cushijushcami carca. Jehová Diosca juyaj Dios caimandami paica tucui tucuita rurai callarirca (Sal. 36:9, NM; 1 Juan 4:19).

2. Jehová Dios tucui tucuita rurajujpica ¿imashinata Jesuspash, angelcunapash sintirirca?

2 Callaripica Jehová Diosca paipa Churi Jesustami rurarca. Chai jipaca ‘jahua pachapi, cai pachapi ima tiachumbash Diosca, paipa Churihuanllatami tucuita rurarca’. Ashtaca millón angelcunatapashmi rurarca (Col. 1:16). Jesusca paipa Taitata ayudai ushashcamandami cushilla sintirirca (Prov. 8:30). Jehová Dios paipa Churihuan tucui tucuita ruranajujta ricushpami angelcunaca ‘tucuilla cushijunajurca’. Shina cushijushpami Jehová Diosta alabanajurca. Jehová Diosca tucuita rurashca jipaca gentecunatami rurarca (Job 38:7; Prov. 8:31). Jehovapa tucui rurashcacunami Jehová Dios juyaj Dios cashcata, ali yachaj cashcatapash ricuchin (Sal. 104:24; Rom. 1:20).

3. Jesús huañushcamandaca 1 Corintios 15:21, 22​pi nishca shinaca ¿imatata chasqui ushapanchi?

3 Jehová Diosca tucui gentecuna cai juyailla Alpapi para siempre causachunmi munarca. Shinapash Adanbash Evapash paipa juyashca Taita Jehovata na cazushpami paicunaca juchayucuna tucushpa huañuitapash huañurca. Chaimi tucuicunallata huañunchi (Rom. 5:12). Jehová Diosca gentecunata  juchamanda, huañuimandapash salvangapami paipa shujlla Churita cai Alpaman huañuchun cachamurca. Jesús huañushcamandami cada uno Jehovata cazunata o na cazunatapash decidi ushapanchi. Jehovata cazushpaca para siempre causaigutami chasqui ushapanchi (Gén. 3:15; Juan 3:16; Rom. 6:23; 1 Corintios 15:21, 22, liingui).

4. Cunanga ¿ima tapuicunamandata yachajugripanchi?

4 Jehová Diosca huañushca gentegucunata causachisha ninmi. Chaita uyashpami cashna tapuripanchi: Huañushcacunaca ¿imashinashi causaringa? Causarishca familiata o amigocunataca ¿rijsita ushashunllu? Gentecuna causarijpica ¿imashinata sintirishun? Huañushcacunata causachishpaca ¿imashinata Jehová Dios juyaj Dios cashcata, ali yachaita charishcata, pacienciata charishcata yachai ushapanchi? Cai tapuicunamanda ashtahuan yachajupashunchi.

HUAÑUSHCACUNACA ¿IMASHINASHI CAUSARINGA?

5. ¿Tucui huañushcacunachu chai ratopillata causaringa?

5 Jehová Diosca Jesús huañushcamandami ashtaca millón gentecunata causachinga. Shinapash huañushcacunataca chai ratopillataca na causachingachu. ¿Imamandata shina nipanchi? Jehová Diosca gentecunata causachishpaca na maipash cachunga causachingachu. Shinami causarishca gentecuna tranquilo cachun ayudanga (1 Cor. 14:33). Gentecunata nara rurashpaca Jehová Diosca paipa Churi Jesushuanmi cai alpataca asha asha rurarca. Shinami ali yachaita charishcata, pacienciata charishcatapash ricuchirca. Diospa Reinopi mil huatacunata mandajushpaca Jesuspashmi ali yachaita charishcata, pacienciata charishcatapash ricuchinga. Chai huatacunapimi Jesusca Armagedonda  yalishca huauquipanicunapa ayudahuan cai alpataca shuj paraisota ruranga. Shinami causarishca gentecunaca chaipi cushilla causaita ushanga.

Armagedonda yalishca huauquipanicunami causarishca gentegucunamanga Jehovapa Reinomanda, Jehovapa mandashcacunamandapash yachachina can. (Párrafo 6​ta ricupangui). *

6. Hechos 24:15​pi nishca shinaca ¿picunata causachi tucunga?

6 Armagedonda yalishca huauquipanicunaca Jehovapa Reinomanda, paipa mandashcacunamandapashmi causarishca gentegucunamanga yachachinga. Picunamanda ¿yachachina canga? Bibliapi nishca shinaca ‘imatapash cashcatapacha na ruraj’ gentecunami causaringa. Paicunamanmi yachachina canga (Hechos 24:15, liingui). Causarishcacunaca Jehovamandaca nima nimata na yachangachu. Chaimi paicunaman yachachinaca shinlli canga. Yachajushpaca Jesús paicunamanda huañushcata yachaimandami paicunapa causaipipash cambiangapaj munanga. Causarishca gentegucunamanga ¿cunanbishnachu Bibliamanda yachachigrinchi? ¿O congregacionllu chaitaca pactachinga? Causarishca gentecunaman Bibliamanda yachachingapaca ¿pipashchu alipacha yachachina can? Shinapash Jesús ña Mil huatacunata mandajujpi ‘tucui cai pacha Mandaj Diosta rijsina yuyaihuan junda cajtaca’ alipachami yachapanchi (Is. 11:9). Shinaca mil huatacunataca ninan ocupadomi yalishun. Chaica shuj jatun cushijuimi canga.

7. Jehovata sirvijcunaca ¿imashpata causarishca gentegucunata consideracionda charishcata ricuchinga?

7 Chai mil huatacunapica tucuilla Jehovata sirvijcunami paicunapa causaipi cambianga. Shinami Jehovata ciertopacha cushichita ushanga. Jehovata sirvijcunaca chairalla causarishca gentegucunata consideracionda charishpami Jehová Dios munashcashna causachun yachachinga. Shinallata paicunapa nali munaicunata saquichunbashmi ayudanga (1 Ped. 3:8). Jehová Diosta sirvijcuna humildecuna cashcata ricushpami causarishca gentecunapash paicunapa causaipi cambiangapaj, Jehovata alabangapaj munanga (Filip. 2:12).

CAUSARISHCA FAMILIATA O AMIGOCUNATACA ¿RIJSITA USHASHUNLLU?

8. Causarishca familiata o amigocunataca ¿rijsita ushashunllu?

8 Causarishca familiata o amigocunata rijsita o na rijsita ushashcata yachajupashunchi. Por ejemplo, causarishca gentegucuna nara huañushpallata chai yuyaihuanllata, chai cuerpohuanllata, pai parlashca parlohuanllata causarinatami Bibliapica ricuchin. Shinallata huañushcacunamanda parlashpaca puñuitallami puñujun nishpami Jesusca nirca. Shinaca huañushca gentegucuna causarishpaca pipash puñujujmanda rijchari cuendallami canga (Mat. 9:18, 24; Juan 11:11-13). Pipash puñujushpa rijcharishpaca chai yuyaihuanllata, chai cuerpohuanllata, pai parlashca shimihuanllatami jatarin. Cunanga Lázaro jarigumanda yaripashunchi. Lázaro huañushcaca chuscu punlla caimandami ña ashnajurianga. Shinapash Lazarota Jesús jatarichijpica chai cuerpohuanllata, chai yuyaihuanllata jatarichijpimi paipa panicunataca Lazaroca jaicata rijsirca (Juan 11:38-44; 12:1, 2).

9. Huañushcacunataca ¿imashina cuerpohuanda Jehová Diosca causachinga?

9 Jehovapa Reinopi Jesús mandajujpica: “Ñucaca huañujunimi” nishpaca pipash na ninajungachu (Is. 33:24; Rom. 6:7). Gentegucunata Jehová Dios causachishpaca sano cuerpohuanmi causachinga. Shina causachishpapash jucha illaj cuerpohuanga nara causachingachu. Jucha illaj cuerpohuan ñucanchita causachijpica ñucanchi juyashca familia o amigocunapash na rijsita ushanmanllu. Jehovapa Reinopi Mil huatacunata Jesús  mandajujpimi tucuilla gentegucuna asha asha jucha illaj cuerpota chari callaringa. Chai jipaca Jesusca chai Reinotaca paipa Taita Jehovamanmi tigrachinga (1 Cor. 15:24-28; Apoc. 20:1-3).

GENTECUNA CAUSARIJPICA ¿IMASHINATA SINTIRISHUN?

10. Gentegucuna causarijpica ¿imashinata sintiripashun?

10 Gentegucuna causarijpica ¿cushillachu sintiripashun? Cushijuimanda ¿huacaitachu huacashun? Cushijuimanda ¿Jehovata agradicishpachu canticocunata candagripanchi? Imata ruraitapash na atinaringachu. Shinapash gentegucunata Jehová Dios causachinata yachashpaca Jehovata, Jesustapash ninandami juyapanchi.

11. Jehovapa mandashcacunata cazujcuna Juan 5:28, 29​pi nishca shinaca ¿imashina causaitata chasquinga?

11 Causarishca gentegucuna causarishpaca Jehovapa mandashcacunata cazushpaca paicunapa causaipi nalicunata saquishpami paicunallata cushilla causaita ushanga. Jehovapa mandashcacunata cazujcunaca ‘causaitami causanajunga’. Cutin na cazujcunaca Paraisopi causachunga Jehová Diosca na saquingachu (Juan 5:28, 29, liingui; Is. 65:20).

12. Jehová Diosca ¿imashina causaitata ñucanchimanga caragrin?

12 Jehovapa Reino cai Alpata mandajujpica tucuilla Jehovata sirvijcunaca Proverbios 10:22​pi: “Mandaj Dios bendiciamushcami charijyachin. Chaihuanga, ima llaquitapash na mirachinllu” nishcatami yarishun. Jehovapa espíritu santo ñucanchita ayudajpimi ñucanchica Jesús cuenda tucuita ushashun. Shinami jucha illaj cuerpota chari callarishun (Juan 13:15-17; Efes. 4:23, 24). Cada punllami ali gentecuna cashpa catishun. Shinallata sano, ñana rucuyashunllu. Chaica shuj jatun cushijuimi canga (Job 33:25). Gentegucunata causachinata yarinaca ¿imashinata ñucanchitaca ayudan?

JEHOVÁ DIOSCA JUYAJ DIOSMI CAN

13. Salmo 139:1-4​pi nishca shinaca Jehovamandaca ¿imatata ni ushapanchi?

13 Gentegucunata causachishpaca paicuna imashna cashcashnallatami Jehová Diosca causachinga. Gentecuna nara huañujpi imata yuyajushcata, imashina sintirishcata, imata ruranata gushtashcataca Jehová Diosca alimi yachan. Chaimi chai gentegucunata causachishpaca chai yuyaihuanllata, chai munaihuanllata causachinga. Chaita ruranaca Jehová Diospaca facilmi can. Rey Davidca nircami cada gentecunatami Jehová Diosca alipacha rijsin nirca (Salmo 139:1-4, liingui). Jehová Dios ñucanchita alipacha rijsijta yachashpaca ninandami cushijupanchi.

14. Jehová Dios ñucanchita rijsijta yachashpaca ¿imashinata sintiripanchi?

14 Jehová Diosca ñucanchicunata ali alimi rijsin. Chaimi ñucanchicunaca cushilla sintirina capanchi. Shina ali rijsishpaca ñucanchita ninanda juyashcatami ricuchin. Ñucanchicuna imashna causashcatapash alimi yachan. Jehová Dios ñucanchita alipacha rijsijta yachashpaca tranquilomi sintirina capanchi. Shinallata nimahora ñucanchillaca na sintirinachu capanchi. Imapi ayudanatapash Jehová Diosca siempremi ricuriajun. Chaitaca na cunganachu capanchi (2 Crón. 16:9).

JEHOVÁ DIOSCA ALI YACHAITA CHARIJ DIOSMI CAN

15. Jehová Diosca ¿imashinata ali yachaita charishcata ricuchin?

15 Cai mundotaca Diablomi mandajun. Diabloca gentecunataca huañunata manllaitami gentecunapa shungupica churashca. Chaimi gentecunaca huañunata uyashpaca ninanda manllanayachin. Chai manllaita charijta  ricushpami Diabloca umachichun, Jehovata ama sirvishpa catichun imacunatapash rurachun amigocunata, familiacunatallata utilizan. Shinapash Testigocunataca Diabloca na umachita ushangachu. Ñucanchi contracuna ñucanchita huañuchijpipash Jehová Dios causachinataca tucui shunguhuanmi cripanchi (Apoc. 2:10). Diablo imata rurajpipash Jehová Diosta juyaimanda sirvinataca nimahora na saquinachu capanchi (Rom. 8:35-39). Gentecunata causachishpami Jehová Diosca ali yachaita charij Dios cashcata ricuchin. Chaita ali yachaimandami Diablo imacunahuanbash ñucanchicunata llaquichijujpipash Jehovataca sirvishpa catina capanchi.

¿Ima minishtirishcaguta Jehová Dios cunapichu tucui shunguhuan confiani? (Párrafo 16​ta ricupangui). *

16. ¿Imacunatata tapurina capanchi?

16 Jehovata sirvijuimanda pipash huañuchijpica, Jehová Dios ñucanchita causachinataca ¿tucui shunguhuanllu cripanchi? Chaita yachangapaca cashna tapuripashunchi: “¿Imashinata cada punlla Jehovapi confiashcata ricuchipani?” (Luc. 16:10). “¿Ima minishtirishcaguta Jehová Dios cunapichu tucui shunguhuan confiani?” (Mat. 6:31-33). Jehovapi confiashpaca ima llaquicunata charishpapash aguantashpami catita ushapashun (Prov. 3:5, 6).

JEHOVÁ DIOSCA PACIENCIATA CHARIJ DIOSMI CAN

17. a) Jehová Diosca ¿imashinata pacienciata charishcata ricuchin? b) Ñucanchicunaca ¿imatata rurangapaj munana capanchi?

17 Jehová Diosca cai nali mundota tucuchingapaca ñami shuj punllata, shuj horasta charin (Mat. 24:36). Huañushca gentegucunata causachingapaj ña munashpapash nara chai tiempo cajpimi pacienciahuan chai tiempo chayachun shuyajunra (Job 14:14, 15; Juan 5:28). Jehová Dios pacienciata charijta ricushpami ñucanchicunaca agradecido sintiripanchi. Shina pacienciata charishcamandami ashtaca gentecunaca arrepintirishpa Jehová Diosta rijsishca (2 Ped. 3:9, NM ). Jehová Diosca tucuilla gentecuna salvarishpa para siempre causachunmi munan. Shina cashpaca ‘causaita causagringapaj munaj gentecunatami’ mascangapaj esforzarina capanchi. Shinami paicunapash Jehovata sirvishpa causachun, paita juyachunbash ayudapashun (Hech. 13:48, NM ). Shinami paicunapash Jehová Dios pacienciata charishcata cuenta japinga.

18. Huauquipanicuna o ñucanchi familiamanda pipash imapash llaquita charijpica ¿imashinata tratana capanchi?

18 Ñucanchicuna jucha illaj tucungacamanmi  Jehová Diosca pacienciahuan mil huatacunata shuyana tucun. Chai tiempo chayangacamanga tucuicunata perdonangapami shuyajun. Jehová Dioshna cangapami ñucanchicunapash huauquipanicunapa ali rurashcacunata alicachishpa ricuna capanchi. Shinallata paicunataca pacienciahuanmi tratana capanchi. Cunanga shuj panigupa causaimanda ricupashunchi. Paipa cusaguca yapata preocuparishpami, llaqui llaqui sintirishpa tandanajuicunamanbash ñana rirca. Chai paniguca ninmi: “Chaita ricushpaca ninandami llaquirircani. Tucui imata rurashun nishcapash chaipimi quidarca”. Shina llaquita yalijushpapash chai paniguca paipa cusataca juyaihuan, pacienciahuanmi tratarca. Shinallata Jehová Dios paita ayudanapimi tucui shunguhuan confiarca. Shina rurashpaca Jehová Dioshna cashcatami chai paniguca ricuchirca. Shinallata chai paniguca paipa cusa alita rurangapaj esforzarijujtami ricurca. Ñucanchicunapash congregacionmanda huauquipanicuna, ñucanchi familia ucupi pipash imapash llaquicunata charijpica juyaihuan, pacienciahuan tratangapaj esforzaripashunchi.

19. Huañushcacuna causaringacamanga ¿imatata rurana capanchi?

19 Cai Alpata Jehová Dios rurajujpica Jesuspash, angelcunapash ninandami cushijurianga. Jipa punllacunapi paraíso Alpagupi jucha illaj, Jehovatalla juyashpa, Jehovatalla sirvishpa causaj gentecuna tiajta ricushpacarin paicunaca ninandami cushijunga. Ungidocunapashmi jahua cielomandaca gentecuna cushilla causanajujta ricushpaca ninanda cushijunga (Apoc. 4:4, 9-11; 5:9, 10). Chai punllacunapi ungüicunapash, llaquicunapash, huañuipash ñana tiajpimi cushijuimanda huacaitapash huacashun (Apoc. 21:4). Chai punlla chayamungacamanga Jehová Dioshnami shujcunataca juyaihuan, pacienciahuan tratana capanchi. Shinallata ali yachaita charishcatapashmi ricuchina capanchi. Shina rurashpaca ima llaquicunata charishpapash cushillami aguantashpa catita ushapashun (Sant. 1:2-4). ‘Huañushcacunata Taita Dios causachinatami cushijushpa shuyanajupanchi’. Chaimi Jehová Diostaca agradicina capanchi (Hech. 24:15).

CÁNTICO 141 Causaica shuj jatun bendicionmi can

^ par. 5 Jehová Diosca huañushcacunata causachisha nishpaca juyaj, ali yachaita charij, pacienciata charishcatapashmi ricuchin. Caitaca paipa tucui rurashcacunapipashmi ricui ushapanchi. Cunanga huañushcacuna causarinamanda, Jehová Dios juyaj, ali yachaita charij, pacienciata charishcamandapashmi yachajupashun.

^ par. 59 CAI FOTOPICA: Jesús mil huatacunata mandajujpimi punda tiempopi causashca shuj jarigu causarishcata ricupanchi. Armagedonda yalishca shuj huauquigumi chai jarigumanga Jesús huañushcapi crinapacha cashcata yachachijun.

^ par. 61 CAI FOTOPICA: Shuj huauquiguca paipa jefemanmi semana enterotaca tutacamanga na trabajai ushashachu nishpa nijujta ricuchin. Semanapi huaquin tutacunaca Jehovamanda ashtahuan yachajungapami chai tiempogutaca utilizani nishpa nin. Ashtahuan horascunata trabajana cajpica shuj punllacuna trabajashalla nijtami ricuchin.