Agllashca temata ricungapaj

Temacunata ricungapaj

 TEMA 14

¿Tucui shunguhuanllu villachinajupanchi?

¿Tucui shunguhuanllu villachinajupanchi?

“Ali villaita villashpa puringui. Diospajta ruranataca pactachingui” (2 TIM. 4:5).

CÁNTICO 57 Tucui gentecunaman villachishunchi

CAITAMI YACHAJUPASHUN *

Causarishca jipami Jesusca paipa catijcunahuan tandanajurca. Chaipimi Jesusca shuj gentecunapash paipa catijcuna tucuchunmi ayudachun paipa catijcunataca mandarca. (Párrafo 1ta ricupangui)

1. Jehovata ali sirvijcunaca ¿imatata tucui shunguhuan pactachingapaj munapanchi? (Callari paginapi dibujota ricupangui).

JESUSCA paita catijcunataca mandarcami: “Ñucapaj yachajujcuna tucuchun, cai pachapi causanajuj tucuilla gentecunapajman rishpa, villana canguichi” nishpa (Mat. 28:19). Tucui Jehovata ali sirvijcunaca Jesuspa mandashcata yachajushpami tucui shunguhuan pactachingapaj munapanchi (2 Tim. 4:5). Villachina minishtirishcapacha cajpimi, uchalla gentecunaman villachina capanchi. Shinapash tal vez llaquicunata o problemacunata charimandami ñucanchi munashcashnaca na villachi ushapanchi.

2. ¿Imamandata na tucui shunguhuan villachi ushapanchiman?

2 Huaquinbica imapash shuj ruraicunata rurashpa yapa tiempotami yalipanchi. Tal vez ñucanchi familiata mantiningapami tauca horascunata trabajana tucupanchiman. Huaquinbicarin ñucanchi familia ucupuramanda pitapash cuidana tucujpi, mayorlla cashpa, imapash ungüihuan cashpa, llaqui llaqui sintirinatami cada punlla aguantana tucunchiman. Shinaca cai llaquicunata aguantashpa catingapaj, tucui shunguhuan villachingapapash ¿imatata rurana capanchi?

3. Mateo 13:23​pi shimicunamandaca ¿imatata yachajupanchi?

3 Ñucanchi munashcashna na villachi ushashpaca na yapata llaquirinachu capanchi. Jesusca alimi yacharca, Jehová Diospa Gobiernomanda tucuicuna igual na villachi ushashcata (Mateo 13:23, liingui). Jehová Diosca paimanda tucui shunguhuan ashagutalla villachijpica, ninanda cushijushpami ñucanchitaca ricujun (Heb. 6:10-12). Tal vez pensarinchiman, Jehovata ashtahuan sirvita ushanchimi nishpa. Chaimi cai temapica ñucanchi causaipi Jehovamanda villachinata pundapi churashpa, minishtirishcahuanlla causanata ricupashun. Shinallata gentecunaman ali villachinata, Bibliamanda ashtahuan ali yachachinatapashmi ricupashun. Caicunamanda nara yachajushpallata tucui shunguhuan villachina ima cashcata yachajupashun.

4. Tucui shunguhuan villachinaca ¿imatata ningapaj munan?

 4 Tucui shunguhuan villachina nishpaca villachingapaj imacunatapash ruranata, gentecunaman Bibliamanda yachachitami ningapaj munan. Ñucanchi mashna horascunata villachijujta Jehová Diosca na ricujunllu. Ashtahuangarin Jehovata juyaimanda, gentecunata juyaimanda villachijujtami Jehová Diosca ricujun. Tucui shunguhuan villachishpaca Jehovatami sirvinajupanchi * (Mar. 12:30, 31; Col. 3:23, NM). Villachishpa catingapaca tucui ñucanchi rurai ushashcaguta rurapashunchi. Gentecunaman ali villaicunata villachichunmi Jehová Diosca mingashca. Chaimi ñucanchica ninanda cushijupanchi. Shinaca tucui gentecunaman cai ali villaicunata villachingapaj esforzaripashunchi.

5, 6. Jehovapa Gobiernomanda ali villaigucunata pundapi churanamanda shuj chimbapuraita parlapai.

5 Cunanga caipi pensaripashunchi. Shuj jovenga guitarratami tocanata ninanda gushtan. Guitarrata tocanata ninanda gushtashpapash culquiguta minishtimandami trabajana tucun. Chaimi lunesmanda, viernescaman shuj tiendapi trabajangapaj rin. Chai jovenga guitarrata tocanata ninanda gushtashpapash paica tiendapimi ashtahuan tiempota yalin. Shinapash paica guitarrata tocanata ashtahuan alipacha yachajungapaj munaimandami paica maimandapash tiempota llujchin.

6 Chai joven cuendami, ñucanchicunapash gentecunaman ali villaicunata villachingapaj ashtahuan munashpapash huaquinbica na ushanchi. Gentecunaman ali villaicunata villachinataca ninandami gushtapanchi. Jehovapa Gobiernomanda alipacha parlashpa, gentecunapa shunguman chayangapami ninanda esforzaripanchi. Shinapash ñucanchi causaipica ashtaca ruraicunatami charipanchi. Chaimi cashna tapuripanchi ¿imashinata Jehovapa Gobiernomanda ali villaigucunata pundapi churai ushani? nishpa.

 ALI VILLAICUNATA PUNDAPI CHURANGAPACA ¿IMATATA RURANA CAPANCHI?

7, 8. Villachinapica ¿imashinata Jesuspa chaquita cati ushapanchi?

7 Gentecunaman ali villaicunata villachinamandaca Jesuspa chaquitami catita ushapanchi. Jesuspaca Jehovapa Gobiernomanda parlanami ashtahuan minishtirishca carca (Juan 4:34, 35). Ashtaca gentecunaman villachingapaca caru carutami purishpa rin carca. Jesusca gentecunapa huasiman chayashpa, ashtaca gentecuna tiaj pushtucunapipashmi ali villaicunata villachirca. Jesusca siempremi paipa causaipica villachirca.

8 Ñucanchicunapash Jesús cuenda Jehovapa Gobiernomanda maipipash, tucuicunaman villachingapaj esforzaripashunchi. Ñucanchi munaicunata huashaman saquishpami, villachinataca pundapi churana capanchi (Mar. 6:31-34; 1 Ped. 2:21). Huaquin huauquipanicunaca precursor especialcuna, precursor regularcuna o precursor auxiliarcunami caita ushan. Shuj huauquipanicunaca shuj shimita yachajushpami minishtirishca pushtucunapi villachingapaj rishca. Shinallata caishuj publicador huauquipanicunapash paicunapa usharishcaguta villachingapami ninanda esforzarinajun. Jehová Diosca ñucanchi usharishcaguta rurachunmi munan. Jehová Diosca cushi Diosmi can. Chaimi ñucanchicuna “ali villaita” cushilla villachichun paica munan (1 Tim. 1:11, NM; Deut. 30:11).

9. a) Apóstol Pabloca trabajana tucujpipash ¿imashinata villachinata pundapi churarca? b) Hechos 28: 16, 30, 31​pi nishca shinaca apóstol Pabloca ¿imatata rurashpa catirca?

9 Cunanga apóstol Pablomanda yachajupashunchi. Paica ishcai viajetami misionero shina Corintios llactapi villachingapaj rishca carca. Chaipica carpacunata rurashpami trabajana tucurca. Na culquita charimandami shina trabajarca. Shina trabajana cashpapash trabajotaraca na pundapi churarcachu. Ashtahuangarin minishtirishcagupa, villachishpa catingapami shina trabajarca. Shinallata Corintios llactamanda huauquipanicuna paimanda ama preocuparichunmi shina rurarca (2 Cor. 11:7). Trabajana tucujpipash apóstol Pablopaca ali villaicunata villachinami ashtahuan minishtirishca carca. Paica sábado punllacunatapashmi villachin carca. Ña culquiguta charishpaca apóstol Pabloca ashtahuanmi villachishpa catirca. Chaimi apóstol Pabloca ‘Jesusca Quishpichij Cristo’ nishpami Judea llactamanda gentecunaman Diospa Shimimanda villachishpa ocupado causarca (Hech. 18:3-5; 2 Cor. 11:9). Apóstol Pabloca Roma llactapimi ishcai huatata prezo carca. Paita visitangapaj shamujcunamanga ali villaicunata villachishpa, cartacunatapashmi escribin carca (Hechos 28:16, 30, 31, liingui). Ali villaicunata villachishpa catichunga imapash jarcachunga na saquircachu. Paica nircami: “Diospajta ruranata ñucanchiman mingashca cajpimi” na shaijushpa villachishpa catina canchi nishpa (2 Cor. 4:1). Masqui trabajana cashpapash, ñucanchicunapash apóstol Pablo cuenda Jehovapa Gobiernomanda villachishpa catipashunchi.

Tucui shunguhuan ali villachingapaca ¿imatallata rurai ushapanchi? (Párrafo 10, 11​ta ricupangui)

10, 11. Irquilla cashpapash ¿imashinata ali villaicunata villachishpa cati ushapanchi?

10 Mayorlla caimanda o irquilla caimanda ñana pundashna villachita ushashpaca ¿imatata rurai ushapanchi? Punda tiempopi Jesusta catijcuna imata rurashcata ricupashunchi. Paicunaca gentecuna tiaj pushtuman rishpami maipipash villachin carca. Chaimi huasin huasin rishpa, ñangunapipash villachin carca (Hech. 17:17; 20:20). Purita na ushashpaca ¿imatata rurashun? Gentecuna yalij pushtugupi tiarishpami villachita ushapanchi. Shinami paicunahuan parlaita ushashun. Shinallata telefonopi, cartacunata rurashpa villachinalla capanchi. Shina villachimandami chai huauquipanicunaca ninanda cushijun.

11 Shinaca ñucanchicuna irquilla cashpapash villachishpa cati ushapanchimi. Cunanga cutin apóstol Pablomanda yaripashunchi. Paica villachinamandaca cashnami nirca: “Na ñucanchimandalla ushaita charishpapash, Taita Diosmandami ninan ushaita charinchi” nishpa (2 Cor. 4:7). Apóstol Pabloca huauquipanicunata visitangapaj rijushpami irquiyarca. Chaimandami Gálatas huauquipanicunataca cashna nirca: “Ali villaita cangunaman punda villajushpaca, huañujushpapashmi  villajurcani. Chaitaca, alimi yachanguichi” nishpa (Gál. 4:13). Huaquinbica ñucanchicunapash doctorpaman jambiringapaj rishpaca paicunahuan Jehovapa Gobiernomanda ali villaigucunata parlai ushapanchi. Shinallata enfermerocunaman, shuj doctorcunamanbashmi villachita ushapanchi. Paicunaca chaicunapi atindinajuimandami paicunataca paicunapa huasipi na tarita ushapanchi. Chaimi paicunaman villachinaca ali can.

¿IMASHINATA MINISHTIRISHCAGUHUANLLA CAUSAITA USHAPANCHI?

12. Mateo 6:22​pi shimicunahuanga Jesusca ¿imatata ningapaj munarca?

12 Jesusca nircami: “Cambaj ñavica, cuerpopaj michagushnami. Shinamandami, cambaj ñavi ali cajpica, cuerpogupash tucuilla michashnallapacha punchayachijunga” nishpa (Mat. 6:22). Cai shimicunata nishpaca Jesusca ¿imatata ningapaj munarca? Minishtirishcaguhuanlla causashpa, Jehovata sirvinata imapash na jarcachun saquinatami parlajurca. Jesusca paipa causaipica siempremi Jehovata sirvinata, Jehovapa Gobiernomanda villachinata paipa catijcunamanga pundapi churachun yachachirca. Jesusca paipa causaipi villachinata pundapi churashcamandami paipa catijcunapaca shuj alipacha ejemplo carca. Ñucanchicunapash Jesuspa chaquita catishpaca Jehovata sirvinatami siempre pundapi churangapaj munashun. Jesusca nircami: ‘Taita Diospa [Reinotara, NM], imagutapash cashcatapacha rurashpa causanatarami’ mascana canguichi nishpa (Mat. 6:33).

13. Ali villaicunata villachishpa ocupado cangapaca ¿imatata rurai ushapanchi?

13 Gentecunaman ali villaicunata villachingapaj, paicunapash Jehovata rijsichun munaimandami, ñucanchi munashca causaita  saquishpa paicunata ayudangapaj tiempoguta llujchipanchi. * Tapuripashunchi: Semana enterota trabajashpapash ashtahuan villachingapaj munashpaca ¿imatata rurai ushapanchi? Imapash yanga ruraicunapira yapa tiempota yalijushpaca ¿imatata rurai ushapanchi?

14. Shuj cusahuarmi ashtahuan villachingapaca ¿imatata rurarca?

14 Cunanga Elías anciano huauquipash, paipa huarmigupash imata rurashcata yachajupashunchi. Chai huauquica ninmi: “Ñucanchica precursor shina sirvitaca na usharcanchichu. Chaimi ashtahuan villachingapaca ñucanchi causaipi huaquin cambiocunata ruraparcanchi. Chaipaca culquiguta ama yapata gashtangapaj, shuj ruraicunapi ama yapa tiempota yalingapami parlarircanchi. Shinallata ama yapata trabajangapami horariota cambiachun trabajopi mañarcanchi. Shina ruraimandami chishicunapi villachingapaj, Bibliamanda ashtahuan yachachingapaj usharcanchi. Ashtahuangarin chaupi semanapi villachingapami quillapi ishcai punllacunata llujshij usharcanchi. Chaimandami ninanda cushijushca carcanchi” nishpa.

BIBLIAMANDACA ¿IMASHINATA ASHTAHUAN ALI YACHACHI USHAPANCHI?

Chaupi semanapi yachajushcami ali villachichun ayudanga. Chai yachajushcatami villachijushpaca yarina capanchi. (Párrafo 15, 16​ta ricupangui) *

15, 16. ¿Imashinata 1 Timoteo 4:13, 15​pi nishcataca villachinapi, gentecunaman Bibliamanda yachachinapi pactachi ushapanchi? (“ Ali villachingapaca ¿imatata rurai ushapanchi?” nishca recuadrota ricupangui).

15 Tucui shunguhuan villachingapaca Bibliamanda ashtahuan ali yachachingapami esforzarina capanchi. Huaquin gentecunataca ashtahuan ali trabajachunmi huaquin cursocunata catichun mañan. Shina cuendami ñucanchicunaca Bibliamanda ashtahuan ali yachachingapaj esforzarina capanchi (Prov. 1:5; 1 Timoteo 4:13, 15, liingui).

 16 ¿Imashinata ali yachachijcuna caita ushapanchi? Jesuspa Chaquita Catishpa Causashunchi Yachachishunchi chaupi semana Tandanajuipimi ali yachajui ushapanchi. Gentecunaman ashtahuan ali villachichunmi chai tandanajuica ayudan. Shuj huauqui o shuj pani asignacionda yachachishca jipa, tandanajuipa presidente huauqui imapash consejota cushpami imapi mejorana cashcata ninga. Chai consejoca ñucanchitapashmi ali villachichun ayudanga. Chai consejo cushcata yarishpami Bibliamanda shuj gentecunahuan parlangapaj ali prepararita ushashun. Shinallata ñucanchi grupomanda superintendente huauqui ñucanchihuan villachingapaj llujchichun mañai ushapanchi. Na cashpaca experienciata charij huauquita o panita, shuj precursorcunata o superintendente de circuito visitajujpica paicunahuan llujshingapapashmi ali villachingapaj ayudahuai nishpa mañanalla capanchi. Shinami ali villachingapaca Yachachingapaj publicaciongunata ali utilizanata yachajushpa ali villachijcuna, yachachijcuna tucushpa cushilla sintirishun.

17. Tucui shunguhuan ali villaicunata villachishpaca ¿imashinata sintiripanchi?

17 Ñucanchita Jehová Diospa ‘ayudajcuna’ cachun saquishcamandaca shuj jatun bendicionmi can (1 Cor. 3:9). Ñucanchi causaipi Jehovata sirvinata pundapi churashpa, Jehovapa Gobiernomanda villachishpaca Jehová “Diostaca, cushijuihuan servishpa causaichi” nishcataca cushijushpami pactachishun (Filip. 1:10, NM; Sal. 100:2). Ñucanchicuna ima llaquicunata charijpi o imapash problemacunata charijpipash villachishpa catichun Jehová Dios ayudanataca seguromi capanchi (2 Cor. 4:1, 7; 6:4). Ñucanchi usharishcaguta villachishpa o ashtacata villachishpapash tucui shunguhuan Jehovata sirvijushpaca ninandami cushijushun (Gál. 6:4). Tucui shunguhuan villachishpaca Jehovata juyashcata, gentecunata juyashcatapashmi ricuchishun. Shina rurashpaca ¿imatata chasquishun? Bibliapica ninmi: “Shina aliguta rurajushpallami, cambash quishpiringui, can villajujta uyajcunapash quishpiringa” nishpa (1 Tim. 4:16).

CÁNTICO 58 Na shaijushpami Jehová Diosmanda villachisha

^ par. 5 Jesusca Jehová Diospa Reinomanda o Gobiernomanda ali villaigucunata villachichun, paipa catijcuna tucuchun ayudachunmi mandarca. Cai temapica llaquicunata, problemacunata charishpapash tucui shunguhuan Jehovata sirvishpa catingapaj, imata rurana cashcatami yachajupashun. Shinallata Bibliamanda ali yachachingapaj, tucui shunguhuan villachingapapash imatata ruranatami yachajupashun.

^ par. 4 CAITA YARIPANGUI: Jehová Diosta sirvina nishpaca gentecunaman ali villaicunata villachinatalla, Bibliamanda yachachinatallaca na nijunllu. Ashtahuangarin Tandanajui Huasicunata shayachinata, Tandanajui Huasicunata arreglanata, llaqui apashca pushtucunapi huauquipanicunata ayudanatapashmi ningapaj munan (Hech. 11:29; 2 Cor. 5:18, 19).

^ par. 13 Julio de 2016 quillamanda Villajun revistapi, página 12​pi “¿Imashinata minishtirishca cosascunahuanlla causaita ushanchi?” nishca recuadromanda siete yuyaicunata ricupangui.

^ par. 62 CAI FOTOPICA: Shuj ishcai panicunami chaupi semana Tandanajuipi primera vez visitangapaj imashina ruranata ricuchin. Jipaca Aliguta yachachipangui nishca folletopimi escribijta ricuchin. Chai yachajushcata villachinapi pactachijujtami ricuchin.