Ñucanchi Taita Diosman Salmocunata candanaca, alimari(SAL. 147:1).

CÁNTICO 10, 2

1. Canciongunata uyanaca ¿imashinata ayudan?

MUSICAPA letracunata escribij famoso jarica nircami, letracunaca imatapash pensachunmi ayudan. Cutin tunucunaca cushilla o llaquilla sintirichunmi ayudan. Canciongunata uyanaca ñucanchi ima yuyashcacuna shunguman chayachunmi ayudan nishpa. Ñucanchi canticocunaca Jehovata alabangapaj, paita juyashcata ricuchingapami can. Chaimi Jehovaman ashtahuan quimirichun ayudan. Jehovata sirvijcunaca alimi yachanchi, Jehovata ali adorangapaca ñucanchilla o congregacionbi huauquipanicunahuan cashpapash canticocunata candana minishtirishcapacha cashcata.

2, 3. a) Congregacionbi cashpa ¿canticocunata shinllita candanamandaca imatata huaquingunaca yuyan? b) ¿Ima tapuicunatata cai temapica yachajupashun?

2 Cashna tapuripashunchi, ¿congregacionbi huauquipanicunahuan cashpaca shinllitachu candani? o ¿pingaimandallachu shimi ucupilla candani? nishpa. Huaquin llactacunapica ashtaca jaricunami shujcunapa ñaupajpi candanataca pinganayachin.  Shina canaca nimamanda nali canllu. Congregacionbi ancianocuna canticota candanapa randi imatapash rurashpa, mala gana candanajujpica shuj huauquipanicunapashmi desanimarita ushan (Sal. 30:12).

3 Jehovata ali adorangapaj tandanajuipi canticocunata candana minishtirishca cashcata intindishpaca, candana horascunapica shuj cosascunataraca na rurajunachu capanchi. Chaimanda cashna tapuripashunchi: “Tandanajuipi canticota candanamandaca ¿imatata yuyani? Manllaita mishashpa canticocunata tucui shunguhuan candangapaca ¿imatata rurai ushani? Canticopi letracunata tucui shunguhuan candangapaca ¿imata ayudahuanga?” nishpa.

DIOSTA ALI ADORANGAPAJ TUCUI SHUNGUHUAN CANDASHUNCHI

4, 5. Jehovata ali adorangapaj candana minishtirishca cashcataca ¿imashinata israelitacunaca ricuchirca?

4 Ashtaca huatacunatami Jehovata sirvijcunaca candashpa Jehovata alabanajushca. Jehovata ali sirvinajushpaca israelitacunaca siempremi Jehovata alicachishpa candan carca. Rey Davidca Diospa templo huasipi shuj shuj ruraicunata organizajushpami, 4 mil levitacuna musicata tucashpa, candashpa Jehovata alabachun churarca. Paicunapuramandaca 288 jaricunaca Jehová Diosman ‘candanata alipacha yachajushcacunami carca’ (1 Crón. 23:5; 25:7).

5 Diospa templo huasita rurai tucuchishca punllapica israelitacunaca candana importante cashcatami ricuchirca. Bibliapica ninmi: ‘Trompetata huacachij uyarijpica, tucuicunami Diosta pagui nishpa alicachishpa shujllashnalla candanajurca. Trompetata, platillota, shuj tocanacunatapash ashtahuan shinllita huacachishpa, shinllita candashpa alicachinajujpimi Taita Diospa huasipica, Diospa punchapambagu jundarca’. Chaimi israelitacunataca shinlli feta charichun ayudashcanga (2 Crón. 5:13, 14; 7:6).

6. Gobernador Nehemiasca ¿ima arreglocunatata rurarca?

6 Gobernador Nehemiasca israelitacuna Jerusalenba pircacunata cutin shayachichun, levitacunapash instrumentocunata tucachun, candachunmi arreglocunata rurarca. Jerusalenba pircacunata tucuchishca punllaca cushilla cashpapash israelitacunaca Jehovaman candashpami ashtahuan cushijunajurca. ‘Diosta alicachishpa candangapaca’ ishcai grupocunami tiarca. Chai ishcai grupocunaca shujca lluqui ladota, chaishujca ali ladota Jerusalenba pirca jahuata rishpami, Diospa templo huasi ladopi tandanajurca. Israelitacuna shinllita candanajuimandami caru carucaman uyarijurca (Neh. 12:27, 28, 31, 38, 40, 43). Jehová Diosca paita sirvijcuna tucui shunguhuan candashpa paita alabajta ricushpaca ninandami cushijushcanga.

7. ¿Imashinata Jesusca Diosta adorangapaj candana minishtirishca cashcata ricuchirca?

7 Jesuspa punllacunapipashmi Diosta ali adorangapaj candanaca minishtirishcapacha carca. Gentecuna tiai callarishcamandapachami Jesús huañushcata yarina tutaca ashtahuan importante carca. Chai tutami Jesusca pai huañuna punllata imashina yarinata ricuchishca jipalla, paipa apostolcunahuan Jehovaman candarca (Mateo 26:30, liingui).

8. Apostolcunapa punllacunapi Jesusta ali catijcunamandaca ¿imatata yachajupanchi?

8 Apostolcunapa punllacunapi Jesusta ali catijcunaca Diosta ali adorangapaj candashpami, ñucanchiman shuj ali ejemplota saquirca. Paicunaca Diospa templo huasipi na tandanajuita ushashpapash, pobrella huasigucunapi tandanajushpami tucui shunguhuan Jehovaman candan carca. Jesusta ali catijcunamanga  apóstol Pabloca nircami: Cangunapurami caishujhuan, chaishujhuan chai yachajushcacunataca yarichirishpa, tucuicuna yachajuna canguichi. Salmocunata, Diosman juyailla candanacunatapash candashpami Jehovata pagui nina canguichi nishpa (Col. 3:16, NM). Ñucanchipashmi canticopi ‘Diosman juyailla candanacunataca’ tucui shunguhuan candana capanchi. Chai canticocunataca “aliguta cazushpa, aliguta yarishpa sirvij” esclavomi espiritualmente micunaguta caranshna caramujun (Mat. 24:45).

NA MANLLASHPA CANDACHUNGA ¿IMATA AYUDANGA?

9. a) Tandanajuicunapi o jatun tandanajuicunapica ¿imamandata huaquingunaca candanata manllan? b) ¿Imashinata Jehová Diosmanga candana capanchi? c) ¿Picunata shuj ali ejemplota cuna can? (Callari fotota ricupangui).

9 Ñucanchi llactapi o familiapi chai costumbreta na charimandami huaquinbica candanataca manllanchi. Shinallata radiopi, televisionbi alipacha candajcunashna na candaita ushaimandami candanataca pinganayachinchi, candaitapash na candangapaj munanchi. Shina sintirishpapash Jehovaman candanataca na saquinachu capanchi. Ashtahuangarin recto shayarishpa, canticotapash maquipi charishpami tucui shunguhuan candana capanchi (Esd. 3:11; Salmo 147:1, liingui). Ashtaca Tandanajui Huasicunapimi, televisionbi canticopa letracunata ricuchin. Shinami ashtahuan shinlli candachun ayudan. Cunanbica Escuela del Ministerio del Reino nishcapipashmi ancianocunaca canticocunata candan. Ancianocuna tandanajuicunapi tucui shunguhuan candashpa shuj ali ejemplota cuna cashcatami cai escuelapica intindichin.

10. Shinllita candangapaj manllajushpaca ¿imatata yarina capanchi?

10 Huaquin huauquipanicunaca pingaimanda o nali candani yashpami shinllita candangapaca na munan. Caipi yuyapashunchi.  Parlashpaca tucuicunallatami ‘cutin cutin pandarinchilla’. Shina pandarishpapash parlanataca na saquinchichu (Sant. 3:2). Shinallata alipacha candaita na ushaimandallaca, Jehovaman candanataca na saquinachu capanchi.

11, 12. Ali candai ushachunga ¿imata ayudanga?

11 Imashina candanata na yachaimandami huaquinbica manllaihuan sintirinchi. Shina sintirijpica ¿imata ayudanga? Chaipaca huaquin yuyaicunata ricupashun. *

12 Shinllita candangapaca samaita aisanami minishtirin. Por ejemplo micha tiaimandami shuj fococa prindirita ushan. Shinallata samaita aisanami shinllita parlachun, shinllita candachunbash ayudan. Imashinami shinllillaguta parlanchi, shinallatami shinllillaguta candana capanchi (Benefíciesede la Escuela del Ministerio Teocrático libropa 181-184 paginacunapi “Control del volumen de aire” nishca partepimi ali yuyaicunata taripangui). Bibliapipashmi cashna nin, Jehovata sirvijcunaca Jehovaman candanajushpaca cushijushpa shinllita candaichi nishpa (Sal. 33:1-3).

13. Aliguta candachunga ¿imata ayudanga?

13 Ñucanchilla cashpa o familiahuan adorana tutata rurajushpapash, ñucanchi gushtashca canticopa letracunata ushashami yashpa, shinllita liipashunchi. Chai jipaca samaita aisashpa canticopa shuj yuyaita jaicata liipai. Cunanga chai yuyaitallata shinllillaguta candapai (Is. 24:14). Shina rurashpami aliguta candai ushashun. Candanataca na manllashpa, na pinganayachishpa candashunchi.

14. a) ¿Imamandata candanajushpaca shimita ashtahuan pascana capanchi? (“ Aliguta candachunga ¿imata ayudanga?” nishca recuadrota ricupangui). b) Aliguta candangapaca ¿imatallata rurai ushanchi?

14 Ñucanchi shimi parlashca ali uyarichunga shimita ali pascashpami parlana capanchi. Cutin candangapaca ashtahuanmi shimita pascana capanchi. Shinapash na uyarijta, ñañu ñañuta parlashpaca ¿imatata rurai ushapanchi? Chaipaca Benefíciese de la Escuela del Ministerio Teocrático libropa página 184​pi “Cómo superar problemas específicos” nishca recuadropi yuyaicunata catipangui.

TUCUI SHUNGUHUAN CANDASHUNCHI

15. a) Huata 2016 tandanajuipica ¿ima alipacha villaita tiarca? b) ¿Imamandata mushuj cántico libro llujchina minishtirirca?

15 Huata 2016 tandanajuipica shuj alipacha  villaimi tiarca. Chai tandanajuipica Cuerpo Gobernantemanda Stephen Lett shuti huauquica nircami, Tucui shunguhuan cushijushpa Jehová Diosman candashunchi mushuj cántico libromi llujshishca nishpa. Chai huauquica nircami huata 2013​pi Traducción del Nuevo Mundo de las Santas Escrituras revisashca Biblia llujshishcamanda, huaquin yuyaicunahuan igual cachunmi punda cántico librota revisanaca minishtirirca nishpa. Cai mushuj cántico libropica villachinamanda, Jesús paipa causaita cushpa ñucanchita salvashcata agradicinamandapashmi churashca. Ashtahuanbash Jehovata ali adorangapaca candanaca minishtirishcapachami can. Chaimi Cuerpo Gobernantemanda huauquicunaca alipacha materialcunahuan, plomo forroguhuan rurashca mushuj cántico librota llujchirca. Cai mushuj cántico libropa colorca Traducción del Nuevo Mundo revisashca Bibliahuanga igualmi can

16, 17. Cai mushuj cántico libroca ¿imashinata can?

16 Cai cántico libro facil utilizanalla cachunmi, cada temacunapi huaquin canticocunata churashca. Por ejemplo, callari 12 canticocunaca Jehovamandami parlan. Cati 8 canticocunaca Jesusmanda, paipa causaita cushpa gentecunata salvashcamandapashmi parlan. Cántico libropa tucuilla temacunaca página 3​pi can. Shinami discursocunapa canticocunata agllanaca facil can.

17 Tucui shunguhuan candai ushachunmi cai mushuj canticocunaca intindirinalla shimicunapi  churashca canga. Ashtahuanbash cunanbi gentecuna parlashca shimicunapimi canga. Shinallata tandanajuicunamanda, villachinamandapash parlachunmi huaquin canticocunaca revisashca canga.

Familiahuan Adorana Tutapi canticocunata repasapashunchi (Párrafo 18​ta ricupangui).

18. ¿Imamandata mushuj canticocunata ali yachajuna capanchi? (Notata ricupangui).

18 Tucui shunguhuan cushijushpa Jehová Diosman candashunchi mushuj cántico libropi tauca canticocunaca, Diosta mañajuj shinami can. Chaimi candanajushpaca ñucanchi imashina sintirishcata Diosman parlai ushanchi. Cutin shuj canticocunaca juyaita ricuchichun, huauquipanicunamanda imagutapash rurachunmi animan (Heb. 10:24). Chaimandami tucuicunallata canticocunapa tunuta, letracunatapash ali yachajuna capanchi. Chaipaca, Internetpi jw.org paginapimi candashca canticocunata, canticopa musicatapash uyapangui. Ñucanchi huasipillata cai mushuj canticocunata repasanami na manllashpa, tucui shunguhuan candachun ayudanga. *

19. Jehovata adorangapaca ¿imatata rurashun?

19 Jehovata ali adorangapaca candanaca minishtirishcapachami can. Jehovaman candashpami paita juyashcata, agradicishcatapash ricuchinchi (Isaías 12:5, liingui). Shinallata tucui shunguhuan cushijushpa candashpami ñucanchi huauquipanicunapash tucui shunguhuan candachun ayudapanchi. Tucuicunallatami joven cashpa, mayorlla cashpa o mushujcuna cashpapash congregacionbi tucui shunguhuan candashpa, Jehovata adorajushcata ricuchi ushapanchi. Tucui shunguhuan cushijushpa candashunchi. Shinami caitapash pactachinajupashun: ‘Mandaj Diosman candaichi’ nishcata (Sal. 96:1).

^ par. 11 Ali candangapaj imata ruranata ashtahuan yachangapaca JW Broadcasting, VIDEOS > DESDE NUESTRO ESTUDIO > DISCURSOS nishca partepi “Listos para cantar las nuevas canciones” nishca videota ricupangui.

^ par. 18 Jatun tandanajui nara callarijpillatami tutamanda, chaupi punllapash 10 minutocunata huaquin canticocunapa musicata churan. Chai canticocunapa musicata uyanami tucui shunguhuan candachun, yachachishcacunata yachajuchunbash ayudan. Tandanajui nara callarijpillatami canticopa musicacunata ali uyangapaj ña tiajuna capanchi.