Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Cai mundopa yuyaicunamanda caruyashunchi

Cai mundopa yuyaicunamanda caruyashunchi

‘Pipash cangunata pactarallapash aliguta yachajunami nij tucushpara yanga parlocunahuan pandachinman. Paicunaca cai pachapajtallami yachachinajun’ (COL. 2:8).

CÁNTICO 38, 31

1. Colosas llactamanda huauquipanicunamanga ¿imatata apóstol Pabloca advirtirca? (Callari dibujota ricupangui).

APÓSTOL Pabloca Roma llactapi punda viaje prezo cashpami Colosenses librotaca huata 60 ó 61​pi escribishcanga. Chai libropica apóstol Pabloca intindichircami, Jehová Dios munashcashna yuyangapaj esforzarina importante cashcata (Col. 1:9). Colosas llactamanda huauquipanicunataca cashna nishpami advirtirca: “Caitaca, pipash juyailla rimaj tucushpa, cangunata ama umachinajuchunmi, cashna nijuni”. “Pipash cangunata pactarallapash aliguta yachajunami nij tucushpara, yanga parlocunatalla parlashpa pandachinman. Paicunaca, Cristomandaca na yachachishpami, runacuna yachachishpa saquishcata, cai pachapajtalla cutin cutin yachashcata yachachinajun” nishpa (Col. 2:4, 8). Chai jipaca gentecunapa huaquin yuyaicuna imamanda panda cashcatami apóstol Pabloca chai huauquipanicunamanga intindichirca. Shinallata imamanda gentecuna chai yuyaicunata alicachishcatapashmi parlarca. Gentecunapa yuyaicunaca shujcunamanda ashtahuan yali cani yachun, vivo vivomi cani nishpa pensarichunmi pandachin. Chaimandami apóstol Pabloca cai mundopa yuyaicunamanda, shuj nali cosascunamandapash caruyachun Colosenses librota escribirca (Col. 2:16, 17, 23).

2. Gentecunapa yuyaicunamanda yachajunaca ¿imamandata minishtirin?

 2 Gentecunaca cai mundopa yuyaicunata catishpami Jehovapa mandashcacunata na cazushpa causan. Chaicunami asha asha ñucanchi feta chiriyachi ushan. Cai mundopa yuyaicunaca televisionbi, Internetpi, trabajo pushtucunapi, escuelacunapipashmi tian. Chaimandami chai yuyaicuna ama pandachichun cuidarina capanchi. Cai temapica chai yuyaicuna ñucanchicunata ama pandachichun imata ruranatami intindichinga. Shinallata gentecunapa rijsishca 5 yuyaicunatami yachajupashun. Chai yuyaicunamanda imashina caruyanatapashmi yachajupashun.

¿DIOSPI CRINACA MINISHTIRINLLU?

3. ¿Imatata ashtaca gentecunaca yuyan? ¿Imamandata shina yuyan?

3 “Ali gente cangapaca Diospi crinaca na minishtirinllu”. Ashtaca llactacunapi gentecunaca Diospica na crinchichu ninmi. Taita Dios ciertopacha tiashcata o na tiashcata na ali yachashpapash, paicunapa munashcata rurashpa causanata gushtaimandami shina yuyan (Salmo 14:1, liingui). Cutin shujcunaca yuyanmi ali causangapaj ali gente cangapaca Diospi crinaca na minishtirinllu nishpa.

4. Taita Diosca na tucuita rurashcachu nijpica ¿imatata ni ushapanchi?

4 ¿Tucui cosascunataca Taita Dioschu rurashcanga? Cientificocuna llujchishca informacionda ricushpa Taita Dios rurashcata o na rurashcata yachangapaj munashpaca ashtaca ashtaca información cajpimi jahualla intindinaca shinlli ricuringa. Caita ali intindingapaca caipi yuyapashun. Huasicuna tiachunga pipash huasichichunmi minishtirin. Shinallata gentecuna, plantacuna, animalcuna tiai callarichunga pipash rurachunmi minishtirirca. Ashtahuanbash maquipi chugrishpaca tiempohuanga paimandallatami ali tucun. Shinapash huasi partirishpaca paimandallata arreglaritaca na ushanllu. Jehová Dios tucuita rurashcata intindichunmi cai yuyaica ayudan. Bibliapipashmi cashna nin: “Huasicunaca, pipash huasichijpillami tian. Ashtahuangarin tucui caicunata rurashpa churajca, Taita Diosmi” can nishpa (Heb. 3:4).

5. Ima ali cajta o nali cajta yachangapaca Diospi crinaca na minishtirinllu nijpica ¿imatata ni ushapanchi?

5 Alita o nalita yachangapaca Diospi crinaca na minishtirinllu nijpica ¿imatata ni ushapanchi? Bibliapica ninmi, Dios tiajta na crishpapash gentecunaca ima ali cajta o nali cajtapash yachai ushanmi nishpa (Rom. 2:14, 15). Por ejemplo, huaquin gentecunaca taitamamacunata respetashpa, juyashpami causan. Shinapash Jehová Dios Tucui ruraj cajta, pailla ima ali cajta o nali cajta decidina derechota charishcata na crishpami gentecunaca nali decisiongunata agllashpa llaquicunatalla charinga (Is. 33:22). Cai alpapi causai nalipacha cashcata ricushpami ashtaca gentecunaca Dios ayudachunmi minishtinchi nin (Jeremías 10:23, liingui). Chaimandami, nunca na pensana canchi ali decisiongunata agllangapaca Taita Diospi crina, paipa mandashcacunata pactachinapash na minishtirinllu nishpa (Sal. 146:3).

¿SHUJ RELIGIONDA CHARINACA MINISHTIRINLLU?

6. Religionmandaca ¿imatata ashtaca gentecunaca yuyan?

6 “Cushilla cangapaca shuj religionda charinaca na minishtirinllu”. Shuj religionda charinaca aburridomi, imapapash na sirvinllu nishpa crij gentecunami shina yuyan. Ashtahuanbash ashtaca religiongunami politicapi chapurishpa, culquita cuchun obligashpa gentecunataca Taita Diosmanda caruyachishca. Shinallata nali gentecunataca infiernopimi Diosca cashtigan nishpa pandata yachachishpami ashtaca religiongunaca Diosman quimirichun ayudanapa randica caruyachitara caruyachishca. Chaicunamandami ashtaca gentecunaca cushilla causangapaca religionda charinaca na minishtirinllu nishpa yuyan. Chai  gentecunaca Taita Diospi crishpapash shuj religionda charingapaca na munanllu.

7. Ali religionga ¿imashinata cushilla causachun ayudan?

7 ¿Shuj religionda na charishpa cushilla causaita usharinllu? Panda religionguna ñana tiajpica cushilla causaita ushanchimanmi. Shinapash cushilla Taita Diospa amigo canami cushilla causachunga ayudanga (1 Tim. 1:11, NM). Jehová Diosca gentecuna cushilla ali causachunmi imatapash ruran. Chaimi paita sirvijcunapash shujcunata ayudashpa cushilla causanchi (Hech. 20:35). Ali religionga familia ucupi cushilla causachunmi ayudan. ¿Imashinata ayudan? Ali religionga cusahuarmi respetarishpa, paipura juyarishpa causachun, huahuacunata ali viñachichun, familiapi tucui shunguhuan juyarishpa causachunbashmi yachachin. Shinallata Diosta sirvijcuna mundo enteropi familiashna cushilla causachun, congregacionbi shujllashna tandanajuchunmi ayudan (Isaías 65:13, 14, liingui).

8. Cushilla causangapaj imata ruranata intindichingapaca ¿imashinata Mateo 5:3​ca ayudan?

8 Diosta na sirvishpapash cushillami causaita ushanchi nijpica ¿imatata ni ushapanchi? Tapuripashunchi, ¿imata rurashpata cushilla sintirini? nishpa. Huaquin gentecunaca ashtahuan estudiashpa, imapash pugllaicunapi pugllashpa o paicuna gushtashca shuj cosascunata rurashpami cushilla sintirin. Cutin shujcunaca familiata, amigocunata ayudashpami cushilla sintirin. Chaicunata rurashpa cushilla sintirishpapash ¿para siempre cushilla causachunga imata ayudanga? Ñucanchicunaca shuj animalgushnaca na canchichu. Chaimi ñucanchita ruraj Jehová Diosmanda ashtahuan yachajushpa, paita tucui shunguhuan sirvitapash ushanchi. Paita sirvishpa cushilla causachunmi ñucanchitaca rurarca (Mateo 5:3, liingui). Chaimi Jehovata adorangapaj ñucanchi huauquipanicunahuan tandanajushpaca ninanda cushijushpa animarinchi (Sal. 133:1). Shinallata huauquipanicunahuan shujllashna tandanajushpa, ali causashpa, jipa punllacunapi cushilla causanata yachashpami cushilla caita ushanchi.

¿JEHOVÁ DIOSPA MANDASHCACUNATACA MINISHTINCHICHU?

9. a) Shuj jarihuan o shuj huarmihuan nara cazarashpallata igual puñunamandaca ¿imatata gentecunaca yuyan? b) Cutin Bibliapica ¿imatata nin?

9 “Nara cazarashpallata igual puñunaca na juchachu can”. Huaquingunaca ninbashchari nara cazarashpallata igual puñunaca imapash juchaca na canllu, tucuicunallatami cushilla causana canchi nishpa. Shinapash Bibliapica ninmi, nara cazarashpallata igual puñunaca juchami can nishpa. Chaimi Jehovata sirvijcunaca Jehovapa mandashcata cazunchi * (1 Tesalonicenses 4:3-8, liingui). Jehová Diosmi ñucanchitaca rurashca. Chaimandami imata ruranata o na runatapash ni ushan. Chaimi shuj jarihuan shuj huarmihuanga cazarashca cashpalla pacta puñuchun Jehová Diosca saquishca. Jehová Diosca ñucanchita juyaimanda, ñucanchipallata ali canata yachashpami paipa mandashcacunata cushca. Chai mandashcacunata familia ucupi cazushpaca juyarishpa, respetarishpami ali causanga. Yachashca jahua Jehovapa mandashcacunata na cazujcunataca Jehová Diosca llaquichingami (Heb. 13:4).

10. Shuj jarihuan o shuj huarmihuan ama faltapi urmangapaca ¿imatata rurana capanchi?

10 Bibliapica yachachinmi shuj jarihuan o shuj huarmihuan ama faltapi urmachun. Ama faltapi urmangapaca imata ricunata o na ricunataca ñucanchillatami ali agllana capanchi. Jesusca nircami: “Maijambash shujpaj huarmitara ñucapaj cashcanman yashpa ricujushpaca, ñami  paipaj shungupi yarishpallata, chai huarmihuan huainayashca”. “Shina cashcamanda, cambaj ali lado ñavi imatapash ricushpa nalita rurachingapaj munajpica, surcushpa shitangui” nishpa (Mat. 5:28, 29). Chaimandami Jehovata sirvijcunaca pornografiataca na ricunachu can. Nali shimicunahuan musicacunatapash na uyanachu can. Apóstol Pabloca nircami: Cai mundopa ‘yarichijuj munaicunataca tucuitami huañuchinshna saquina canguichi’, ‘huainayanatapash’ saquinami canguichi nishpa (Col. 3:5). Chaimandami nalitaiman pensajushpa o nalitaiman parlagrijushpaca uchalla jarcarina capanchi.

¿ESTUDIASHPA SHUJ TITULOTA CHARINACA MINISHTIRINLLU?

11. Gentecunaca ¿imamandata estudiashpa shuj titulota charinami ali can nin?

11 “Cushilla causangapaca estudiashpa shuj titulota charinami minishtirin”. Ashtaca gentecunaca animanmi estudiashpa shuj titulotami charina cangui nishpa. Paicunaca ninmi, shina rurashpallami culquita, ali causaitapash charingui nishpa. Cai mundopi gentecunaca estudianapilla, ashtahuan culquita charinapillami yuyashpa causan. Chaimi Jehovata sirvijcunaca chai gentecunashna ama yuyangapaj cuidarina capanchi.

12. Cai mundopi shuj titulota charinaca ¿cushi causaita apamunllu?

12 Shuj titulota charina, cai mundopi rijsishca canaca ¿ciertopachachu cushilla causaita cun? Na cushilla causaita cunllu. Caita yaripashunchi Diabloca paita sirvichun, paita alicachichunmi ninanda munarca. Chai munaita pactachishca cashpapash Diabloca na cushillachu can. Ashtahuangarin ninanda culirashcami can (Mat. 4:8, 9; Apoc. 12:12). Cai mundopi imapash titulota charinaca ashapallami can. Shinapash gentecuna paraíso alpagupi causachunmi Taita Diosmanda, paipa mandashcacunatapash yachachinchi. Shina rurashpami ninanda cushijunchi. Chaitaca nimahuan na igualai usharinllu. Cai mundoca shujcunamanda ashtahuan yali ali cana, shujcunata envidiashpa ricuchunmi animan. Shinapash cai mundopi ashtahuan ali canaca nimapa na sirvinllu (Ecl. 4:4).

13. a) Trabajanamanda ¿imatata yuyana capanchi? b) Apóstol Pablotaca ¿imata ashtahuanbachaca cushichirca?

13 Tucuicunallatami culquigutaca minishtinchi. Chaimandami minishtirishca cosasgucunapa trabajana capanchi. Shinapash trabajotara pundapi churanaca nalichu can. Chaimandami Jesusca cashna nirca: “Pipash ishcai amota servitaca, na ushanllu. Ishcai amota servijushpaca, shujtaca na ricunayachishpa, shujtallami juyanga. Na cashpaca shuj amotalla cazushpami, shujtaca yangapi churashpa puringa. Shinallatami cangunaca, Taita Diostapash, imata charishcacunatapash, ishcandita servitaca na ushanguichi” nishpa (Mat. 6:24). Ñucanchipaca Jehová Diosta sirvina, shuj gentecunaman Diospa Shimimanda yachachinami  ashtahuanbachaca cushi causaita cun. Apóstol Pabloca jovenmandapachami cai mundopi rijsishca canata munarca. Rijsishca canataca ushanmanmi carca. Shinapash apóstol Pablopaca villachina, Jesuspa catijcuna tucujpi, chai gentegucuna paicunapa causaipi cambiajta ricunami ashtahuanbachaca cushichirianga (1 Tesalonicenses 2:13, 19, 20, liingui). Cai cushijuitaca nimahuan na igualaita ushanchichu.

Gentecuna Taita Diosta, paipa mandashcacunata rijsichun ayudashpami ninanda cushijunchi. (Párrafo 12, 13​ta ricupangui).

¿PITA CAI MUNDOPI PROBLEMACUNATACA TUCUCHI USHAN?

14. Gentecunallata paicunapa problemacunata arreglai ushanchimi nishca yuyaica ¿imamandata ashtacacunapaca alishnalla ricurin?

14 “Gentecunaca paicunapa problemacunata arreglai ushanmi”. Ashtaca gentecunaca ninmi, Diostaca na minishtinchichu, ñucanchi munaita rurashpa causaita ushanchimi nishpa. Ashtaca gentecunaca ninmi guerracuna, nali gentecuna, ungüicuna, pobre gentecunapash ñana yapa tianllu nishpa. Shuj informeca ninmi: “Tucui gentecunallata ali causangapaj esforzarinajujpimi cai alpapi causaica ashtahuan ali can” nishpa. ¿Chaica ciertochu can? ¿Gentecunaca cai mundopi tucuilla problemacunatachu arreglai ushashca? Cai cierto cashcata o na cierto cashcata ricupashunchi.

15. Gentecunaca ¿cai mundopi problemacunata tucuchi ushashcachu?

15 Guerracuna. Primera y Segunda Guerra Mundialpica 60 millón yali gentecunami huañushcarca. Segunda Guerra Mundial jipapash guerracunaca tiashpa catishcarami. Chaimi 2015 huatapicarin, guerra tiaimanda, catiriashpa llaquichimanda 65 millón gentecuna paicunapa causaj pushtucunamanda  shuj ladocunaman causagrina tucushca. Nali gentecuna. Huaquin pushtucunapica nali gentecuna, shuhuacunapash ñana yapa tianllu. Shinapash terrorismo, Internetta utilizashpa culquita o imapash informacionda shuhuana, cusa imatapash nishpa o huarmita macashpa, huahuacunata llaquichinapash ashtahuanmi mirashca. Ashtahuanbash ashtaca gentecunaca ninmi, cunanbimi nali ruraicunaca ashtahuan mirajun nishpa. Imashinami ricupanchi, shuhua gentecunataca gentecunallataca na tucuchi ushashcachu. Ungüicuna. Cunanbica ashtaca ungüicunapami jambi tian. Shinapash huata 2013​pi llujshishca shuj informeca ninmi, nara 60 huatacunata charishpallatami, shungu nanaihuan, derrame cerebral nishcahuan, na respirai ushaihuan, cáncer, diabetes ungüihuanmi cada huata 9 millón gentecuna huañun nishpa. Pobre gentecuna. Banco Mundial nishcashnaca, África llactapica 1990 huatapica 280 millón pobre gentecunami tiarca. Cutin 2012 huatapica 330 millón pobre gentecunami tiarca nishpa.

16. a) ¿Gobiernocunapash, ashtaca gentecunapash problemacunata tucuchi ushashcachu? b) Isaías, Salmos librocunapi nishcashnaca Diospa Reinoca ¿imatata ruranga?

16 Problemacuna ashtahuan mirajpipash ñucanchica na manllarinchichu. Cunanbi gobiernocuna, ashtaca gentecunapash paicunapilla yuyashpa, culquita mirachinapillami pensarin. Chaimandami guerracunata, nali gentecunata, ungüicunatapash na tucuchi ushashca. Pobre gentecunaman ali causaitapash na cui ushashcachu. Diospa Reinollami chai tucui llaquicunataca tucuchi ushan. Imashina chai llaquicunata Jehová Dios tucuchinata ricupashun. Guerracuna. Diospa Reinoca paicunapilla yuyashpa causaj gentecunata, nali ruraicunata, ñucanchi llactami ashtahuan yali nishpa yuyajcunata, panda religiongunata, Diablotapash tucuchishpami saquinga. Nali gentecuna. Diospa Reinoca ashtaca millón gentecunamanmi juyaita, confianzata charishpa causachun yachachijun. Chaitaca ni maijan gobierno na rurai ushashcachu (Is. 11:9). Ungüicuna. Jehová Diosca paita sirvijcunamanga shamuj punllacunapica sano causaitami caranga (Is. 35:5, 6). Pobre gentecunapash ñana tiangachu. Jehová Diosca paita sirvijcunataca sano, espiritualmentepash ali cachunmi ayudanga. Chai tucui bendiciongunaca culquitapash yali valishcami can (Sal. 72:12, 13).

PI IMATA TAPUCHIJPIPASH ALIGUMAN TIGRACHIPANGUI

17. Gentecunapa yuyaicuna ama pandachichunga ¿imata ayudanga?

17 Gentecunapa panda yuyaicuna ñucanchi crishcacunata pandachijpica Biblia imata nijta ali yachajushpa, experienciata charij huauquipanicunahuanbash parlapashunchi. Shinallata gentecuna imamanda shina pensajta, chai yuyaicuna panda cashcata imashina ricuchinatapash aligutami yuyana capanchi. Colosas llactamanda huauquipanicunaman apóstol Pablo cushca consejota catishpami, chai yuyaicuna ñucanchita pandachichunga na saquishun. Apóstol Pabloca nircami: ‘Pi tapuchijpipash cachihuan mishquiyachishpa villanalla cajpica na crijcunahuan cashpapash, aliguta yarishpa villanallami canguichi’ nishpa (Col. 4:5, 6).

^ par. 9 Ashtaca gentecunaca Juan 7:53–8:11​pi Diospa Shimi escribishcacunapi na tiashcataca na yachanllu. Huaquin gentecunaca cai textota utilizashpami cashna nin, jucha illaj gentecunallami cazarashca jahua shuj huarmihuan o shuj jarihuan faltapi urmashcataca juchachishpa rimai ushan nishpa. Shinapash israelitacunaman Jehová Dios cushca leypica nijurcami: “Maijan runatapash cazarashca huarmihuan sirijujta japishpaca, ishcanditami huañuchina” can nishpa (Deut. 22:22).