Agllashca temata ricungapaj

Temacunata ricungapaj

Jacobca paipa huauqui Esaú runahuanmi punda churi cana derechota cambiarca. ¿Chaimandallachu Jacobca Mesiaspa punda familia tucurca?

Gentecunaca tapunmi

Gentecunaca tapunmi

¿Israelitacunapa punllacunapica Mesiaspa punda familia cangapaca punda churichu cana carca?

Pundaca Hebreos 12:16​pi shimicunata ricushpami crin carcanchi, Mesiaspa punda familia cangapaca punda churi cana cashcata. Cai textopi Mushuj Testamento Quichua Imbabura Bibliapica ninmi: Esaú runaca “Taita Dios carashapacha nishcata” yangapi churashpami, ‘punda churi cashpa’ imata japinatapash ‘shuj micunamandalla’ Jacobman jaturca nishpa. Jacobca “punda churi” cana derechota chasquishpaca, Mesiaspa punda familia cana privilegiotapash chasquishca nishpami crin carcanchi (Mateo 1:2, 16; Lucas 3:23, 34).

Shinapash Bibliapi shuj textocunaca Mesiaspa punda familia cangapaj punda churi canaca, na minishtirishca cashcatami ricuchin. Caita ali intindingapaca huaquin ejemplocunata ricupashun.

Jacobpa, Lea huarmigupa punda churica Rubén shutimi carca. Shinallata Raquel huarmiguhuan charishca punda churica Josemi carca. Rubenga shuj huarmihuanmi juchapi urmarca. Chaimi punda churi canataca José japirca (Génesis 29:31-35; 30:22-25; 35:22-26; 49:22-26; 1 Crónicas 5:1, 2). Shinaca Mesiasca Rubenba, Josepa familia ucupuramandaca na carcachu. Mesiasca Jacobpa, Lea huarmigupa último churi Judapa familiamandami carca (Génesis 49:10).

Lucas 3:32​pica Mesiaspa 5 punda familiacunamandami parlajun. Paicunaca casi tucuillami punda churicuna carca. Por ejemplo Boazca, Obed runagupa taitami carca. Cutin Obed runaguca Jesé runagupa taitami carca (Rut 4:17, 20-22; 1 Crónicas 2:10-12).

Davidca Jesé runagupa punda churica na carcachu. Paica 8 huahuacunamanda último churimi carca. Shinapash Mesiasca Davidpa familiamandami shamurca (1 Samuel 16:10, 11; 17:12; Mateo 1:5, 6). Shinallata Davidpa churi Salomonba familiamandami Mesiasca shamurca. Shinapash Salomonga Davidpa punda churica na carcachu (2 Samuel 3:2-5).

 Shinapash na ninajunchichu punda churi canaca na importante cashcata. Punda churi caimandaca chaishuj huahuacuna na chasquishcatami chasquin carca. Punda churica paicunapa familiatami ñaupaman pushan carca. Shinallata punda churimanga herenciataca yalillatami cun carca (Génesis 43:33; Deuteronomio 21:17; Josué 17:1).

Punda churi cana derechotaca shuj churicunaman cunllami carca. Abrahán paipa churi Ismaelta huasimanda llujshishpa cachajpica, Isaac runagumi punda churi cana derechotaca chasquirca (Génesis 21:14-21; 22:2) Imashinami ricupashcanchi, Rubén runagupa randica, Josemi punda churi canataca japirca.

Shinaca apóstol Pabloca ¿imatata Hebreos 12:16​pica ricuchingapaj munarca? Cai textopi Mushuj Testamento Quichua Imbabura Bibliapica ninmi: “Pajta cangunapurapi shujllapash huainayaj tianguichiman. Shinallata Taita Dios carashapacha nishcata Esaú shuti runashna pajta nalicachishpa na munanguichiman. Chai runaca punda churi cashpami, ashtacata japinata charishca. Chaitaca shujlla viaje micunamandallami jatushca” nishpa.

Apóstol Pabloca Mesiaspa punda familiamandaca na parlajurcachu. Paica Diosta sirvijcuna cuidadota charichunmi shina nirca. Paica nircami: “Canguna purina chaqui ñangunataca alichinami canguichi”. Shina rurajpimi “Taita Dios ninanda juyashpa caramujujta japinata” nipi na jarcanga nishpa. Pipash shuj jarihuan, shuj huarmihuan juchapi urmashpaca Taita Dios caramunataca na chasqui ushanachu carca (Hebreos 12:12-16). Ashtahuangarin Esaú cuendami Taita Dios carashapacha nishcata yangapi churashpa paicunapa munaitara pundapi churanajunman.

Chai punllacunapica Esauca punda churi caimandaca, animalcunata rupachishpa Jehovaman cuna privilegiotami chari ushanman carca (Génesis 8:20, 21; 12:7, 8; Job 1:4, 5). Shinapash Esauca paipa munaipilla pensarijuimandami punda churi canataca lentejas plato micunahuan cambiarca. Jehová Diosca nircami, Abrahanba miraica jipa punllacunapi llaquicunata charingami nishpa. Chai llaquicunata ama charingapami Esauca shina rurashcanga (Génesis 15:13). Esauca Taita Dios carashapacha nishcata na valichishpami Diosta na sirvij ishcai huarmicunahuan cazararca. Shina rurajpica paipa taitamamacunaca ninandami llaquirirca (Génesis 26:34, 35). Cutin Jacob runaguca na shinachu carca. Paica Jehovata sirvij huarmiguhuanmi cazararca (Génesis 28:6, 7; 29:10-12, 18).

Cai ejemplocunamandaca ¿imatata Mesiaspa punda familiamandaca yachajupanchi? Mesiaspa punda familiacunaca huaquingunaca punda churicunami carca. Cutin shujcunaca na punda churicunachu carca. Chaitaca Judiocunaca alimi intindirca. ¿Imamandata shina nipanchi? Judiocunaca, Jesé runagupa último churi Davidpa familia ucupuramanda Cristo shamunatami crirca (Mateo 22:42).