Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista (tandanajuipi yachajungapaj)  |  Mayo de 2017

‘Shuj llactamanda shamushcacunapa’ huahuacunataca ¿imashinata ayudai ushapanchi?

‘Shuj llactamanda shamushcacunapa’ huahuacunataca ¿imashinata ayudai ushapanchi?

‘Na llullashpa villajuj Shimita ñuca huahuacunashna aliguta catinajujta uyashpami ninandapacha cushijuni’ (3 JUAN 4).

CÁNTICO 11, 41

1, 2. a) Shuj llactapi causanajuj taitamamacunapa ashtaca huahuacunaca ¿ima llaquicunatata charin? b) Cai temapica ¿ima tapuicunatata yachajupashun?

JOSHUA shuti huauquica ninmi: “Ñuca taitamamacunaca shuj llactamandami carca. Ñucaca huahuamandapachami paicuna parlashca shimita huasipipash, congregacionbipash parlan carcani” nishpa. Shinapash Joshua escuelaman ri callarishpaca, pai viñajuj llactapi parlanajuj shimipi parlanatami ashtahuan alicachirca. Joshuaca ninbashmi: “Huaquin huatacuna jipaca, tandanajuicunapi ima nijujtaca ñana intindijurcanichu. Ñuca taitamamapa llactapi costumbrecunahuanbash, ñana ali sintirijurcanichu” nishpa. Ashtacacunami Joshua huauquishna sintirishca.

2 Cunan punllacunapica 240 millón yali gentecunami, paicunapa llactata saquishpa shuj llactacunapi causanajun. Quiquinbash shuj llactapi causangapaj rishca taita cashpaca ¿imashinata quiquinba huahuacunataca Jehová Diosta juyachunbash, Bibliapi yachachishcacunata ‘aliguta catishpa’ causachunbash ayudaita ushapangui? (3 Juan 4). ¿Imashinata shuj huauquipanicunapash paicunata ayudai ushan?

 TAITAMAMACUNA, SHUJ ALI EJEMPLOTAMI CHURANA CAPANGUICHI

3. Huahuacunaman shuj ali ejemplota ricuchingapaca ¿imatata taitamamacunaca ruraita ushan?

3 Taitamamacuna, quiquinba huahuacuna Jehová Diospa ali amigocuna cashpa catichun, para siempre causachun munashpaca, shuj ali ejemplotami ricuchina capanguichi. Quiquinguna Taita Diospa munaita ‘pundapi mascajujta’ ricushpaca, paicunapashmi cada punlla Jehová Dios ayudanata confianga (Mateo 6:33, 34). Ashtaca cosascunata charinata mascanapa randica, Jehová Diosta sirvinata pundapi churapaichi. Minishtirishca cosascunahuanlla causashpa ama dibi tucupaichichu. Shinallata, ashtaca culquita mirachinata, ‘gentecuna alicachishpa’ ricuchun munanataca, na mascanachu capanguichi. Chaipa randica, ‘jahua pachapi ninan charij’ canata pundapi churashpami, Jehová Diospa ñaupajpi ali ricurinata mascana capanguichi (Juan 12:43; Mateo 19:21, 22, liingui).

4. Taitamamacunaca ¿imatata siempre yarina can?

4 Ocupado cashpapash, huahuacu nahuan cangapaca maimandami taitamamacunaca tiempota llujchina can. Huaquin huahuacunaca Jehová Diosta pundapi churaimandami, rijsishca canataca huashaman saquishca. Shinallata, taitamamacunaman nishpa o paicunapallata nishpa culquita mirachinatapash huashamanmi saquishca. Chashna huahuacunataca, alitami rurajungui nishpami cushichina capanguichi. Taitamamacuna siempre yaripanguichi, Bibliapica ninmi: ‘Huahuacunaca na taitaman, mamaman mascanllu. Ashtahuangarin taitamamami, huahuacunaman carangapaca mascana’ can nishpa (2 Corintios 12:14). Taitamamacuna, ama pandaripanguichichu, huahuacuna shinllita trabajashpa tucuipi mantinishpa causachunga na shuyanachu capanguichi.

TAITAMAMACUNA ¿IMATATA RURAI USHAPANGUICHI?

5. ¿Imamandata taitamamacunaca Jehová Diosmanda siempre parlana can?

5 Bibliapi nishca shinami, ‘shuj llactacunamanda shuj shuj shimita’ parlaj gentecuna Jehová Diospa organizacionman quimirimunajun (Zacarías 8:23). Taitamamacuna, quiquinba huahuacuna quiquinguna parlashca shimita na ali intindi ushashpaca, Bibliamanda quiquinguna imata yachachijujtaca na ali intindi ushangachu. Shuj gentecunaman Bibliamanda yachachina cashpapash, quiquingunapa huahuacunamandami ashtahuanga preocuparina capanguichi. Paicunaca Jehová Diosta rijsishpallami para siempre causaitaca ushanga (Juan 17:3). Chaimandami huahuacunamanga, Jehová Dios imata yachachijta siempre parlana capanguichi (Deuteronomio 6:6, 7, liingui).

6. ¿Imamandata taitamamacuna parlashca shimita yachajunaca ali can? (Callari fotota ricupangui).

6 Quiquinba huahuacunaca escuelaman rishpa, shuj gentecunahuan parlashpami paicuna viñajuj llactapi shimita yachajunga. Shinapash quiquingunapa shimita yachajuchun munashpaca, quiquingunapa shimipimi huahuacunahuanga cutin cutin parlana capanguichi. Quiquingunapa shimita yachajushpami, huahuacunaca quiquingunahuan parlaita ushanga, paicuna imashina sintirishcatapash villanga. Shinallata, huahuacunaca shuj shimitapash yachajushpami, ashtahuan ali pensarita, shuj gentecuna imashina sintirijtapash intindi ushanga. Ashtahuangarin, shuj shimitapash yachajushpami huahuacunaca, Jehová Diosta ashtahuan sirvita ushanga. Carolina shuti panigupa taitamamacunaca shuj llactamanda shamushcacunami can. Carolinaca ninmi: “Ñuca taitamamacuna parlashca shimipi congregacionman rinaca alipachami cashca. Ayudachun minishtijuj congregacionbi sirvinatami alicachini” nishpa.

7. Huahuacuna shuj shimita ashtahuan ali intindijpica ¿imatata taitamamacunaca ruraita ushan?

 7 Shuj llactamanda shamushca taitamamacunapa huahuacunaca, asha ashami paicuna viñajuj llactapi costumbrecunata, chaipi parlanajuj shimitapash yachajui callarin. Chaimandami huaquin huahuacunaca, taitamamacunapa shimipi parlangapaca ñana munan o ñana ushan. Quiquinba huahuacuna shina pasanajujpica ¿nachu huahuacunahuan parlangapaca, paicuna parlajuj shimita yachajungapaj munapanguiman? Huahuacuna shujcunahuan imata parlajta, imata ricujta, escuelapi imashina cajta intindishpaca huahuacunata ayudanaca ashtahuan jahuallami ricuringa. Shinallata huahuacuna parlajuj shimita yachajushpami, profesorcunahuanbash parlashpa huahuacunataca ashtahuan ali ayudaita ushapangui. Shuj shimita yachajungapaj tiempo, esfuerzo, humilde cana minishtirijpipash alimi can. Pensaripai, quiquinba churi sordo quedajpica ¿nachu paihuan parlangapaca señasta yachajupanguiman? Shinallata quiquinba churi shuj shimita ashtahuan ali intindishpa parlai ushajpica ¿nachu pai parlajuj shimita yachajunaca ali capanman? * (Notata ricupangui).

8. Huahuacuna parlajuj shimita na ali parlai ushashpapash ¿imashinata taitamamacunaca ayudaita ushan?

8 Shuj llactamanda shamushca huaquin taitamamacunapaca, huahuacuna parlashca shimipi parlanaca shinllimi can. Chaimandami huaquinbica, Taita ‘Dios escribichishca shimicunata’ huahuacunaman aliguta intindichinaca shinlli ricurin (2 Timoteo 3:15). Shinlli cajpipash, huahuacuna Jehová Diosta rijsichun, juyachunga ayudaita ushapanguimi. Shan shuti ancianoca ninmi: “Ñuca mamitaca paillami ñucanchicunataca viñachirca. Ñuca panicunapash, ñucapash parlajuj shimita ali intinditaca ñuca mamitaca na ushanllu carca. Ñucanchipash ñuca mamita parlashca shimitaca na ali parlai ushanllu carcanchi. Shinapash ñuca mamita estudiajujta, Jehová Diosta mañajujta, cada semana Familiahuan Adorana Tutata rurangapaj esforzarijujta ricushpami, Jehová Diosta rijsina minishtirishca cashcata intindiparcanchi” ninmi.

9. Huahuacuna ishcai shimipi estudianata minishtijpica ¿imatata taitamamacunaca ruraita ushan?

9 Huaquin huahuacunaca shuj shimipimi escuelapica parlan. Cutin huasipi cashpaca shuj shimipimi parlan. Chaimandami chai huahuacunaca, ishcai shimipi Jehová Diosmanda yachajunata minishtin. Shina cajpimi, huaquin taitamamacunaca publicaciongunata, grabaciongunata, videocunataca ishcai shimipi huahuacunamanga ricuchin. Paicunapa huahuacuna Jehová Diosman ashtahuan quimirichun munashpaca, ashtahuanmi esforzarishpa catina can.

Taitami paipa familiapi pensarishpa maijan congregacionman rinataca ali ricuna can

¿MAIJAN CONGREGACIONMANDA RINA CAN?

10. a) Maijan congregacionman rinataca ¿pita ali ricuna can? b) Shuj decisionda nara agllashpallata ¿imatata taitacunaca rurana can?

10 Paicunapa shimita parlaj congregación carupi cajpica ¿imatata ‘shuj llactamanda shamushca’ Testigocunaca ruraita ushan? Paicuna causanajuj llactapa shimita parlaj congregacionmanmi rina can (Salmo 146:9). Cutin, taitamamacunapa shimita parlaj congregación ladolla cajpica,  taitami paipa familiapi pensarishpa maijan congregacionman rinataca ali ricuna can. Shinapash, maijan congregacionman rinata nara decidishpallatami taitaca, aliguta pensarina can, Jehová Diostapash ayudahuai nishpa mañana can. Ashtahuangarin paipa huarmihuanbash, huahuacunahuanbash parlarinami can (1 Corintios 11:3). Shinaca ¿imacunapillata taitaca pensarina can? Ali decisionda agllachunga ¿Bibliapi maijan textocunata ayudaita ushan?

11. ¿Imamandata nipanguiman, tandanajuicunapi yachachijuj shimita ali intindinaca huahuacunapaca alimi can nishpa?

11 Taitamamacunaca, huahuacuna imata minishtinajujtaca yaipimi charina can. Bibliapi yachachishcacunata ali intindingapaj cada semana tandanajuicunaman rishpapash, huahuacunaca na chaitallachu minishtin. Taitamamacuna yaipi charipanguichi, huaquin huahuacunaca paicuna ashtahuan ali intindijuj shimipi tandanajuicunaman rishpami, imagutallapash yachajui ushan. Tandanajuicunapi imata nijujta na ali intindi ushashpaca, Bibliapi ima nijujtaca na yachajuita ushangachu (1 Corintios 14:9, 11, liingui). Huaquin huahuacunaca, huahuacuna cashpa shuj shimita yachajushca cashpapash, viñashpaca na chai shimipillata pensarishpa catinllu. Huaquin huahuacunacarin, taitamamacuna parlashca shimipi comentariocunata cushpa, asignaciongunata rurashpapash paicuna imashina sintirishcata, imata pensashcataca na ninajunllu.

12. ¿Imamandata huaquin huahuacunaca taitamamacunapa shimita na yachajungapaj munan?

12 Joshua shuti huauquipa ejemplota cutin yaripashun. Paipa pani Estherca ninmi: “Huahuacunaca, taitamamacuna parlashca shimita yachajushpaca taitamamacunapa costumbrecunamandapash, religionmandapashmi yachajunajun” nishpa. Taitamamacunapa costumbrecunahuan huahuacuna na ali sintirishpaca, taitamamacuna parlashca shimitapash, religiondapash na yachajungapaj munangachu. Shina pasajpica ¿imatata taitamamacunaca ruraita ushan?

13, 14. a) ¿Imamandata shuj taitamamacunaca paicunapa huahuacunandi, chai llactapi shimita parlaj congregacionman cambiarirca? b) Espiritualmente shinlli cashpa catingapaca ¿imatata chai taitamamacunaca rurarca?

13 Jesusta catij taitamamacunaca, huahuacuna imata minishtinajujtami pundapi churana can (1 Corintios 10:24). Joshuapa, Estherpa taitaca Samuel shutimi can. Samuelca ninmi: “Ñucapash ñuca huarmigupash, Bibliapi yachachishcacuna ima shimipi huahuacunapa shunguman chayajtami cuenta japircanchi. Jehová Diostapash imata ruranata ayudahuai nishpami mañarcanchi. Shina nishpa mañajpimi Jehová Diosca, ñucanchi munashcata huashaman saquishpa, huahuacunata pundapi churana cashcata intindichun ayudarca” nishpa. Samuelca ninbashmi: “Ñucanchi parlanajuj shimipi tandanajuicunata huahuacuna na ali intindi ushanajujta ricushpami, shuj congregacionman cambiarircanchi. Tandanajuicunamanbash villachinamanbash igualmi rin carcanchi. Huauquipanicunatapash huasipi micungapaj, puringapaj ringapapashmi invitan carcanchi. Chaita ruranami, ñucanchi huahuacunataca congregacionbi huauquipanicunata ashtahuan ali rijsichun, Jehová Diosta shuj ali amigotashna, paicunapa Taitatashna ricuchun ayudashca. Ñucanchi shimita yachajuchun munashpapash, ñucanchi yuyaipica, chai cosascunami huahuacunapaca ashtahuan importante cashca” nin.

14 Samuelca ninmi: “Espiritualmente shinlli cangapami, ñuca huarmiguhuanga ñucanchi shimita parlajuj congregacionmanbash rin carcanchi. Shaijunmi carcanchi. Shinapash, shinllita esforzarishcamandaca Jehová Diosca ashtacatami bendiciashca. Chaimandami Jehová Diostaca tucui shunguhuan pagui nipanchi. Ñucanchi quimsandi huahuacunami tiempo completopi sirvinajupan” nishpa.

 ¿IMATATA JOVENGUNACA RURAITA USHAN?

15. ¿Imamandata shuj paniguca escuelapi yachajushca shimita parlaj congregacionman cambiarirca?

15 Huaquin huahuacuna viñashpaca, paicunapa shimita parlajuj congregacionbi, Jehová Diosta ashtahuan ali sirvi ushashcatami cuenta japin. Shina pasajpica, ñucanchitami ladoman saquijun nishpaca taitamamacunaca na llaquirijunachu can. Kristina shuti paniguca ninmi: “Ñuca taitamamacuna parlajuj shimitaca ashaguta intindinmi carcani. Shinapash, tandanajuicunapi imata yachachijujtaca na intindi ushanllu carcani. 12 huatacunata charishpami, escuelapi yachajushca shimita parlaj jatun tandanajuiman rircani. Shinami, Bibliapi imata yachachijushcataca primera vez ali intindi usharcani. Shinallata shuj punllaca, escuelapi yachajushca shimipimi Jehová Diosta mañai callarircani. Shungu ucumandami Jehová Dioshuanga parlarcani” ninmi (Hechos 2:11, 41). Kristina 18 huatacunata charishpaca, paipa taitamamacunahuan parlashpami, pai ali intindij shimita parlaj congregacionman cambiarirca. Kristinaca ninmi: “Escuelapi yachajushca shimipi Jehová Diosmanda yachajui callarishpami, Jehová Diosta sirvingapaj munarcani” nishpa. Shinami jipamanga, precursora regular tucurca. Kristinaca cushijushcapachami can.

16. ¿Imamandata Nadiaca paipa taitamamacunapa shimita parlaj congregacionbi quedashcataca ashtacata agradicin?

16 Jovenguna ¿quiquingunapa shimita parlajuj congregacionmanllu cambiaringapaj munapanguichi? Shina cashpaca pensaripaichi: ¿Jehová Diosman ashtahuan quimiringapaj munaimandachu cambiaringapaj munajuni? (Santiago 4:8). Na cashpaca ¿ñuca taitamamacuna tucuita ama ricuriajuchun munaimanda, o congregacionbi na esforzaringapaj munaimandachu cambiaringapaj munajuni? nishpa. Nadia shuti paniguca, cunanbica Betelpimi sirvijun. Paica ninmi: “Ñuca ñañacunapash, ñuca turipash, ñucapash joven cashpaca ñucanchi ali intindij shimita parlajuj congregacionmanmi cambiaringapaj munarcanchi. Shinapash, ñucanchi taitamamacunaca na saquircachu. Paicunaca ñucanchicuna Jehová Diosman na ashtahuan quimiri ushanataca alimi yacharca. Ñuca taitamamacuna paicunapa shimita ñucanchiman yachachingapaj esforzarishcamanda, paicunapa shimita parlaj congregacionbi quedachishcamandaca ashtacatami agradicinchi. Chaita ruranami ñucanchipaca alipacha cashca. Shinallata, shuj gentecunatapashmi Jehová Diosta rijsichun ayudai ushashcanchi” nishpa.

¿IMASHINATA SHUJ HUAQUIPANICUNAPASH AYUDAITA USHAN?

17. a) Jehová Diosca ¿pitata mandashca huahuacunaman yachachichun? b) Huahuacunaman Jehová Diosmanda yachachingapaj ayudachun minishtinajushpaca ¿imatata taitamamacunaca ruraita ushan?

17 Jehová Diosca ¿abuelocunata o shujcunatachu mandarca, huahuacunaman Bibliamanda yachachinami canguichi nishpa? Na. Jehová Diosca taitamamacunatami, huahuacunamanga Bibliamanda yachachinami canguichi nishpa mandarca (Proverbios 1:8; 31:10, 27, 28, liingui). Shinapash huaquin taitamamacunaca, huahuacuna parlanajuj shimita na ali parlai ushashpami, huahuacunapa shunguman chayangapaca shujcunata ayudahuai nin. Chai taitamamacunaca ¿huahuacunaman na yachachingapaj munaimandachu shina ninajun? Na. Huahuacunaman Taita Diosmanda aliguta yachachingapaj munaimandami shina ninajun (Efesios 6:4, NM). Chaimandami taitamamacunaca ancianocunataca nita ushan, Familiahuan Adorana Tutapica ¿imatata rurai ushapani?, ñucapa huahuacuna congregacionbi ali amigocunata tarichunga ¿nachu ayudaita ushahuangui? nishpa.

Shuj huauquipanicunahuan tandanajunaca huahuacunapapash, taitamamacunapapash alimi can (Párrafo 18, 19ta ricupangui).

18, 19. a) ¿Imashinata huauquipanicunaca jovengunata ayudaita ushan? b) ¿Imatata taitamamacunaca rurashpa catina can?

18 Huahuacunata ayudangapaca, huaquinbi huaquinbimi shuj familiataca quiquingunapa  Familiahuan Adorana Tutaman invitaita ushapanguichi. Ashtaca jovengunaca, shuj huauquipanicunahuan villachingapaj llujshishpa, paicunahuan imatapash rurashpami ali cosascunata ruranata yachajun (Proverbios 27:17). Shan shuti huauquita cutin yaripashun. Paica ninmi: “Ñucanchimanda preocuparinajushca huauquipanicunataca siempremi yarini. Paicunaca siempremi asignaciongunata rurangapaj ayudahuan carca. Ashtaca cosascunatami yachajurcani. Paicunahuan imacunatapash ruranataca, alicachinmi carcani” nishpa.

19 Taitamamacunata ayudanajushpaca, taitamamacunata respetachunmi huahuacunataca ayudana can. ¿Imashinata ayudana can? Taitamamacunamanda ali parlashpami ayudana can. Taitamamacuna huahuacunata yachachina cashcatapash na cunganachu can. Shinallata, chai huahuacunahuan cashpaca, shuj huauquipanicuna o shuj gentecuna ama pandacunata yuyachunmi siempre ali portarina can (1 Pedro 2:12). Shuj huauquipanicuna ayudanajujpipash, taitamamacunami huahuamanga Taita Diosmanda yachachina can. Shujcuna ayudanajujpipash, huahuacunata imashina ayudanajujtaca, taitamamacunaca ricuriajunami can.

20. ¿Imashinata taitamamacunaca paicunapa huahuacuna Jehová Diosta ali sirvichun ayudaita ushan?

20 Taitamamacuna, Jehová Diosta ayudahuai nishpa, esforzarishpa catipaichi (2 Crónicas 15:7, liingui). Cangunapa munaicunatapash huashaman saquishpami, huahuacuna Jehová Dioshuan ali canata pundapica churana capanguichi. Bibliapi yachachishcacuna huahuacunapa shunguman chayachunmi, ashtacata esforzarina capanguichi. Quiquinba huahuacuna Jehová Diosta sirvi ushanatami confiana capanguichi. Bibliapi mandashcacunata huahuacuna cazujpi, quiquinba ali ejemplota catijujta ricushpaca, apóstol Pablo shinami sintiripangui. Paica, pai yachachishca huauquicunataca nircami: ‘Na llullashpa villajuj Shimita, ñuca huahuacunashna aliguta catinajujta uyashpami ninandapacha cushijuni’ nishpa (3 Juan 4).

^ par. 7 “Usted puede aprender otro idioma” nishca temata ¡Despertad! de marzo de 2007 revistapi, 10-12 paginacunapi ricupangui.