Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista (tandanajuipi yachajungapaj)  |  Mayo de 2016

 CALLARI TEMA | HUAÑUI TIAJPICA NINANDAMI LLAQUIRINCHI

¿Imashinata ayudashun?

¿Imashinata ayudashun?

Huañui tiajpica, huaquinbica familiacunaman imata ninata o imata ruranata na yachashpami imatapash na ruranchi. Shinapash ¿imashinata ayudai ushanchi?

Huaquinbica cumbashpa llaquiripanimi nishpallata alimi can. Shuj llactacunapi gentecunaca, llaqui apashca familiata ugllashpa, maquita cushpami paicunapash llaquirishcata ricuchin. Llaqui apashca familia parlangapaj munajpica aligutami uyana canchi. Ashtahuangarin, yanunapi, huahuacunata cuidanapi ayudanaca alimi can. Familiacuna munajpicarin, chai llaqui apashca ratocunapica imapash arreglocunapi ayudanallami canchi. Llaquirinimi nishpapash ruraicunahuanmi llaquirishcataca ricuchita ushanchi.

Tiempohuanga tal vez huañushca imashina cashcata o pai imapash asinai rurashcacunatapash ashaguta parlanallami can. Shina parlajpimi huañushcapa familiaca llaquilla cashpapash ashaguta asirin. Pam shuti huarmigupa cusaca 6 huatacuna huañushca. Pam huarmiguca ninmi: “Gentecunaca ñuca cusa imata ali rurashcatami parlan. Ñucaca yachaitapash na yachashcarcanichu. Shinapash ñuca cusa imatalla rurashcata uyashpami alillata sintirini” nishpa.

Huaquin doctorcunaca ninmi, huañui tiajpica ashtacacunami chai ratopica ayudan. Shinapash jipamanga paicunapa ruraicunaman tigrashpami huañushcapa familiacunata ayudanataca cungan nishpa. Shinaca, tiempo yalijpipash llaqui apashca familiacunahuanga parlashpa catinami canchi. * Ashtaca familiacunaca tiempo yalijpipash paicuna imashina sintirishcata shujcunaman parlai ushashcataca ashtacatami agradicin.

Japón llactamanda Kaori shuti cuitsaguca paipa mama huañujpi, chaimanda huata yali jipalla paipa paya ñañapash huañujpimi llaquillapacha carca. Shinapash rijsicunaca cutin cutinmi paitaca ayudanajurca. Chaimandami Ritsuko payalla amigaca ushitashna cuidashallami nirca. Kaorica nircami: “Ritsuko cuidasha nijpica nalicachircanichu. Mamaca shujllami tian. Pipash ñuca mama tucuchunga na munarcanichu. Shinapash aliguta tratajpimi Ritsukotaca ashtacata juyai callarircani. Cada semanami villachingapaj llujshishpa tandanajuicunamanbash igual rin carcanchi. Paica té nishca yacuguta ufiachunmi invitahuan carca. Micunatapash apamun carca, tarjetacunata, cartagucunatapash escribishpami cuhuan carca. ‘Mama’ Ritsukomi ñucataca ashtacata ayudahuarca” nin.

Kaoripa mama huañushcamandaca ñami 12 huatacuna yalishca. Cunanbica Kaoripash paipa cusapash gentecunaman Bibliamanda ashtacata parlashpami cushijun. Kaorica ninmi: “‘Mama’ Ritsukoca siempremi ñucataca yarin. Ñuca viñashca llactaman tigrashpaca visitangapaj rishpami paihuan canataca ninanda alicachini” nishpa.

Chipre llactamanda Poli shuti testigo de Jehovatapashmi paipa cusa Sozos huañujpica shujcuna ayudarca. Sozosca juyashpami paipa huarmitaca charin carca. Congregacionbi huauquipanicunatapash alimi ñaupaman pushan carca. Paica congregacionbi taitamama illajcunata, viudacunata micungapaj invitashpami paicunahuan cushilla yalinata gushtan carca (Santiago 1:27). Shinapash, umapi shuj tumorta charishpami 53 huatacunata charishpa huañurca. Polica ninmi: “Ñucapa juyashca cumbagutami chingachipashcani. Paihuanmi 33 huatacunata causashcani” nishpa.

Cusa huañushca jipaca, 15 huatacunata charij paipa último churi Danielta apashpami Polica Canadá llactapi causangapaj rirca. Chaipimi chai llacta Testigocunapa tandanajuicunaman ri callarirca. Polica ninmi: “Chai congregacionmanda Testigocuna ñucanchicuna imashina llaqui apashcata  na yachashpapash cushilla chasquishpami ñucanchitaca ayudarca. Ñuca churi shuj taitata minishtijujpipachami chai congregacionda ñaupaman pushajcunaca ashtacata ñuca churi Danieltaca ayudarca. Congregacionda shuj ñaupaman pushajcarin ali amigocunahuan cumba tucushpa parlanajungapaj pelotahuan pugllagringapami invitan carca” nishpa. Cunanbica Polipash, Danielpash cushilla, alimi causanajun.

Imashinami ricunchi, huañui tiajpica ashtacatami familiacunataca ayudashpa animai ushanchi. Cunanga ricupashun, imashinami Bibliaca huañushcacuna jipa punllacunapi ima pasanata villashpa ñucanchita cushichijta.

^ par. 6 Huaquingunaca calendariopimi anotan ima punlla huañui tiashcata. Shinami chai punllacunapica familiacunata animashpa ayudan.