Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Taita Diospa ñaupajpi charij ricurinatami mascana capanchi

Taita Diospa ñaupajpi charij ricurinatami mascana capanchi

“Cai pachapi chingarijlla charishcacunahuanmi, shujcunapa cumbacuna tucuna capanguichi” (LUC. 16:9, NM).

CÁNTICO 32, 154

1, 2. ¿Imamandata cai mundopica pobre gentecuna tian?

CUNANBICA tucui ladocunapimi ashtaca llaquicuna tian. Jovengunaca trabajotapash na tari ushanllu. Ashtaca gentecunaca paicunapa causaitapash peligropi churashpami charij llactacunaman rin. Charij llactacunapipashmi pobre pobre gentecuna tian. Charijcunaca ashtahuan charij charijmi tucun. Cutin pobrecunaca ashtahuan pobre pobremi tucun. Chairalla rurashca shuj investigacionbica ninmi, huaquin millonario gentecunapa culquica, mundo enteropi ashtaca pobre gentecunapa culquihuanga igualanmanllami nishpa. Chai investigación cierto cajta, o na cierto cajtaca na yachai ushanchichu. Shinapash tucuicunallatami ali yachapanchi, mundo enteropi ashtaca millón gentecunaca pobrepacha pobrecunami can. Cutin huaquin gentecunaca, charij charijcunami can. Paicuna charishca culquica huahuacunata, nietocunata, bisnietocunata mantiningapapashmi mashnapash pactan. Pobre gentecuna tianata yachashpami Jesusca nirca: ‘Imagutapash na charijcunaca tiangallami’ nishpa (Mar. 14:7). Shinaca ¿imamandata chashna causai tian?

2 Cai mundopica gentecunaca, ashtahuan culquita mirachinatalla, na minishtirishca ashtaca cosascunata randinatalla yuyan. Chaicunatami Apocalipsis 18:3​pica, ‘cai pachapi randishpa jatujcuna’ nin. Chashna causaita Diospa Reino mandashpa tucuchinataca, Jesusca alimi yacharca. Bibliapica, ‘cai pachapi randishpa  jatujcunapash’, politicacunapash, panda religiongunapash Diablo mandajun mundomandami can ninmi. Chaimandami Jesusta catijcunaca, politicacunamanda, panda religiongunamandaca tucuipi caruyashcanchi. Shinapash ashtacacunaca, cai mundopi charijyanamandaca na tucuipi caruyai ushashcachu.

3. ¿Ima tapuicunatata yachajupashun?

3 Cai mundopi charijyanamanda imatata pensajushcata yachangapami cashna tapurina capanchi: “¿Imashinata ñuca charishcacunahuanga Jehová Diosta tucui shunguhuan sirvingapaj munashcata ricuchi ushani? Cai mundopi charijyanamandaca ¿imashinata caruyaita ushani? ¿Picunapa ejemplota Jehová Diosta sirvijcunaca Jehovapi tucui shunguhuan confiashcata ricuchin?” nishpa.

JESUSCA MAYORDOMO RUNAGUMANDAMI PARLARCA

4, 5. a) Jesús parlashca mayordomo runaguca ¿ima llaquipita carca? b) Jesusca ¿ima consejotata paipa catijcunamanga curca?

4 (Lucas 16:1-9 *, liingui). Jesusca ñucanchicuna aliguta pensarichunmi mayordomo runagumanda parlarca. Mayordomotaca amopa charishcacunata yangatami tucuchishcangui nishpami juchachinajurca. Chaimandami mayordomoca trabajo illaj quedagrijurca. * Shinapash, paica ‘alipacha yarijmi’ carca. Chaimandami paica, trabajo illaj quedashpaca imatata rurashayari yashpa, paita ayudai ushana gentecunahuan amigo tucurca. Shinaca ¿shujcunata aprovechana ali cashcata yachachingapachu Jesusca mayordomo runagumanda parlarca? Na. Chashna gentecunataca Jesusca nalicachinllu carca. Chaimandami paicunataca nirca: ‘Cai pachapatalla rurashpa causajcunami’ canguichi nishpa. Shinaca ¿imata yachachingapata Jesusca munarca?

5 Mayordomo runaguca jatun llaquipimi carca. Ñucanchicunapapash cai nali mundopi trabajashpa culquiguta tarinaca shinllimi can. Chaitaca alimi Jesusca yacharca. Chaimandami paica consejarca: “Cai pachapi chingarijlla charishcacunahuanmi shujcunapa cumbacuna tucuna canguichi” nishpa. Shinami, cai pachapi chingarijlla charishcacuna tucurijpica, Jehová Diospash Jesuspash ‘jahua pachapi causaita causachun cangunataca chasquinga’. Shinaca ¿imatata Jesuspa consejomandaca yachajupanchi?

6. ¿Imamandata nipanchi, ashtaca culquita charinapi preocuparinaca na Taita Diospa munaichu carca nishpa?

6 Cai pachapi charishcacuna imamanda ‘chingarijlla’ cashcataca Bibliapica na nijunllu. Shinapash, Bibliapi nishca shinaca, gentecuna ashtaca culquita charinapi preocuparichunga Jehová Diosca na munarcachu. ¿Imamandata shina nipanchi? Jardín de Edenbica, tucui imata minishtishcatami Adán y Evamanga curca (Gén. 2:15, 16). Bibliapica ninmi, ungidocuna Taita Diospa espíritu santota chasquishpaca, ‘ima charishcacunapash, tucuillapami can’ ninajurcami (Hech. 4:32). Profeta Isaiaspash nircami, shuj punllaca tucuilla gentecunami cai Alpapi fucushcacunata micunga nishpa (Is. 25:6-9; 65:21, 22). Chai punlla chayamungacamanga, chingarijlla charishcacunata taringapapash, Jehová Diosta ali sirvishpa causangapapashmi, ‘alipacha yarijcuna’ cashcata ricuchingapaj esforzarina capanchi.

 ‘CAI PACHAPI CHINGARIJLLA CHARISHCACUNAHUANGA’ ¿IMATATA RURAI USHAPANCHI?

7. ¿Imatata Lucas 16:10-13​pica yachachijun?

7 (Lucas 16:10-13, liingui). Jesús parlashca mayordomoca, jipaman aprovechangapami shujcunahuan cumba tucurca. Shinapash Jesusca, paihuan, Jehová Dioshuan ciertopacha cumba tucuchunmi munarca. Ashtahuangarin, ‘cai pachapi chingarijlla charishcacunahuan’, Jehová Diospa ñaupajpi ali ricuri ushanatami cati textocunapica Jesusca yachachijun.

8, 9. ¿Imashinata huaquin huauquipanicunaca paicunapa charishcacunahuan ayudanajun?

8 Jehová Diospa ñaupajpi aliguta pactachijcuna cashcata ricuchingapaca, ali villaicuna ñaupaman catichunmi, contribuciongunata churana capanchi (Mat. 24:14). Huaquin huauquipanicuna imata rurajta ricupashun. India llactamanda shuj uchilla cuitsaguca, juguetecunatapash na randishpami, shuj cajagupi culquita alichin carca. Chai cajagupi jundajpica, ali villaicuna ñaupaman catichunmi tucuillata contribucionbi churarca. India llactapillatami shuj huauquica, coco haciendata charin. Chai huauquipash ‘alipacha yarishpa’ causaj cashcata ricuchingapami munarca. Chaimandami, malayálam shimiman traducinajun oficina de traduccionman cococunata cun. Paica ninmi: “Oficina de traduccionbica cococunata minishtinajunmi. Chaimandami, contribucionbi culquita churanapa randica, cococunata cushpapash alimi can yani” nishpa. Grecia llactamanda huauquipanicunapash aceite de oliva nishcata, quesota, o shuj cosasgucunatami Betelman cushpa ayudan.

9 Sri Lanka llactamanda shuj huauquica, shuj llactapi causajushpapash, paipa llactapica shuj huasita, shuj alpatami charin. Chai huasipimi, tandanajuicunatapash, jatun tandanajuicunatapash ruran. Tiempo completopi sirvinajuj huauquipanicunapash chai huasipimi mingarin. Chai huasipi gastocunata pagashpami, chai huauquica pobrella huauquipanicunata ayudan. Cutin shuj llactacunapica, ama villachichunmi gobiernocunaca prohibishca. Chaimandami huauquipanicunaca paicunapa huasicunapillata tandanajuicunata ruran. Shuj huauquipanicuna ayudajpimi, pobrella precursorcuna, publicadorcunaca arriendomanda na pagashpa tandanajuita ushan.

Jehová Diosta sirvijcunaca paicunapa charishcacunahuanmi shujcunata ayudan

10. Na mitsashpa caranaca ¿imashinata ñucanchipallata ali can?

10 Imashinami ricupashcanchi, chai huauquipanicunaca, ‘ashaguta charishpapash’ aliguta pactachijcuna cashcatami ricuchinajushca (Luc. 16:10). Paicunapa charishcacunahuanmi shujcunata ayudan. Shina rurashpami, jahua pachapi charijyashpa ninanda cushijun (Luc. 16:11). Shuj paniguca ali villaicuna ñaupaman catichunmi, contribuciongunata churanata yachan. Paica ninmi: “Cai tucui huatacunapica imagutapash na mitsashpa caranami, shujcunata ñapash perdonachun, na ñapash fiñarichun, na ñapash nanarichun, shujcuna consejajpipash alicachishpa uyachun ayudahuashca” nishpa. Cutin shuj huauquipanicunaca, na mitsashpa caranaca paicunapallata ali cashcatami cuenta japishca (Sal. 112:5; Prov. 22:9).

11. a) ¿Imamandata nipanchi, na mitsashpa carashpaca ‘alipacha yarijcuna’ cashcatami ricuchinajunchi nishpa? b) Cunan punllacunapi tucuilla huauquipanicunaca ¿imatata ruranajun? (Callari fotota ricupangui).

11 ‘Alipacha yarishpa’ causajushcata ricuchingapaca, ñucanchi charishcacunahuanmi shujcuna  villachichun, yachachichun ayudai ushapanchi. Huaquin huauquipanicunaca culquita charishpapash, tiempo completopi sirvita o shuj llactaman rishpa sirvitaca na ushanllu. Shinapash, contribuciongunata churashpami, shuj huauquipanicunapash Jehová Diosta sirvichun ayudashca (Prov. 19:17). Ñucanchi contribuciongunahuanmi, ashtahuan publicaciongunata rurachun, publicaciongunata gentecunaman saquichun ayudaita ushanchi. Shinallata, ñucanchi contribuciongunahuanmi, pobre llactacunapi gentecunapash yachajuchun ayudai ushapanchi. Congo, Madagascar, Ruanda llactacunapica Bibliacunaca valishcapachami can. Shuj Bibliata randingapaca, shuj semana entero o shuj quilla entero trabajashca culquimi pactan. Chaimandami chai llactacunapi huauquipanicunaca, paicunapa familiapa micunata randinata, o shuj Bibliata randinata tauca huatacunata agllashpa causarca. Shinapash, cunanbica shuj huauquipanicuna contribuciongunata churajpimi, Jehová Diospa organizacionga, Bibliata traducishpa, tucuilla familiacunaman, Bibliata yachajungapaj munajcunamanbash shuj Bibliata cushca (2 Corintios 8:13-15, liingui). Shinami carajcunapash, carashcata japijcunapash Jehová Diospaman ashtahuan quimirita ushan.

MINISHTIRISHCA COSASCUNAHUANLLA CAUSANGAPACA ¿IMATATA RURANA CAPANCHI?

12. ¿Imashinata Abrahanga Jehová Diospi confiashcata ricuchirca?

12 Jehová Diosman ashtahuan quimiringapaca, cai mundopi charijyanamandapash tucuipi caruyashpami jahua pachapi charij ricurinata mascana capanchi. Abrahanba ejemplota yaripashun. Paica Jehová Diospa amigo cangapaj munaimandami, Ur nishca charij llactapi causashpapash, Jehová Diosta cazushpa yanga carpa huasigucunapi causangapaj rirca (Heb. 11:8-10). Abrahanga alimi yacharca, Jehová Diospa bendicionhuanlla jahua pachapi charij ricuri ushanata. Chaimandami paica cai mundopi charij canataca na mascarca. Cai pachapi charij canata mascashpaca, na shinlli feta charishcatami ricuchinman carca (Gén. 14:22, 23). Jipa punllacunamanga, Jesusca shuj charij huambragutami nirca: ‘Taita Diospa ñaupajpi ali ricuringapaj munashpaca, can imata charishcatapash tucuillata jatushpa culquitaca, imagutapash na charijcunaman caragri. Chashna carashpami jahua pachapi ninan charij cangui. Chai jipaca, ñucata catihuailla’ nishpa (Mat. 19:21). Chai joven huambraguca, na Abrahanshna shinlli feta charircachu. Shinapash shujcunaca Jehová Diospi tucui shunguhuan confiashcatami ricuchishca.

13. a) Timoteotaca ¿imatata apóstol Pabloca nirca? b) ¿Imashinata cunanbica apóstol Pablopa shimicunata pactachi ushapanchi?

13 Timoteopash shinlli fetami charirca. Apóstol Pabloca Timoteotaca nircami: ‘Jesucristopa alipacha soldadoshnami’ cangui nishpa. Chai jipapash nircami: ‘Soldado tucushpaca, na cai causaipajlla imatapash ruranacunahuan huatarinshna pandarinachu’ cangui. Canda ‘agllajta cushichingapami, na chashna causana’ cangui nishpa (2 Tim. 2:3, 4). Cunan punllacunapi Jesusta catijcunapashmi chai shimicunata pactachingapaj esforzarinajun. Ashtacacunaca tiempo completopimi sirvinajun. Cai mundopi charijyachun propagandacunataca na uyanajunllu. Chaipa randica, Bibliapi cai shimicunatami yaria causan: ‘Culquita mañashpa japij runapash, culquita mañachij runapa sirvijmi tucun’ (Prov.  22:7). Diabloca, cai mundopi charijyanapilla preocuparishpa ñucanchi tiempota, fuerzacunata chingachichunmi munan. Huaquin gentecunaca, shuj huasita, shuj carrota randingapaj, universidadpi estudiangapaj, shuj jatun cazamiento fiestata rurangapami bancopi ashtaca culquita prestamota llujchin. Na aliguta pensarishpaca ashtaca huatacunatami dibi tucunchiman. Shinapash, ‘alipacha yarishpa’ causajushcata ricuchishpaca, minishtirishca cosascunahuanlla causashpami, na yapata dibi tucushun, na yapata gashtashunbash. Shinami, cai mundopi charijyana ruraicunamanda cacharirishpa, Jehová Diosta libre sirvishun (1 Tim. 6:10).

14. ¿Imatata rurangapaj munana capanchi? Huaquinguna imata rurashcata parlapai.

14 Minishtirishca cosascunahuanlla causangapaj munashpaca, imata pundapi churana cashcatami yaipi charina capanchi. Shuj cusahuarmica shuj ali negociotami charirca. Shinapash tiempo completopi cutin sirvingapaj munaimandami chai negociotapash, uchilla barcotapash, shuj cosascunatapash jaturca. Chai jipaca, testigo de Jehovacunapa ashtahuan jatun Betel huasita Warwick-Nueva York llactapi rurashpa ayudangapami rirca. Shinami paicunapa ushihuan, mashahuan Betelpi sirvi ushashcamandaca cushijushcacunapacha carca. Ashtahuangarin, tauca semanacunatami chai cusahuarmica cusapa taitamamacunahuan Warwick Betelpi trabajanajurca. Cutin, Colorado-Estados Unidos llactapi shuj precursora regular paniguca, bancopi huaquin punllacunatalla trabajana trabajotami tarirca. Pai alipacha trabajajpimi, tucui punllacuna trabajachun, chaupi yalita pagangapaj munarca. Shinapash, chai trabajota chasquishpaca, villachinata pundapi churaitaca na ushashachu yashpami chai trabajotaca na chasquirca. Shuj huauquipanicunapashmi imata pundapi churana cashcata ali yachaimandaca ashtaca cosascunata huashaman saquishca. Ñucanchicunapash Diospa Reinota pundapi churashpami, cai mundopi charijyanata huashaman saquishpa, Jehová Diosman ashtahuan quimirinata, jahua pachapi charij ricurinata ashtahuan alicachishcata ricuchinajunchi.

ÑUCANCHI CHARISHCA COSASCUNACA TUCURINGAMI

15. ¿Ima charishcacunata ñucanchicunataca ashtahuan yali cushichin?

15 Ashtaca cosascunata charishpapash, na nita ushanchichu Jehová Diosmi bendiciajun nishpa. Jehová Diosca ‘ali ruraicunahuan ninanda charijyashcashna’ causajcunatami bendician (1 Timoteo 6:17-19, liingui). Italia llactamanda Lucia shuti panigupa ejemplota ricupashun. * Albania llactapi villachingapaj ayudachun minishtinajujta yachashpami Luciaca, trabajota na charishpapash Jehová Diospi tucui shunguhuan confiashpa, 1993 huatapica Albaniapi causangapaj rirca. Paica albanés shimita yachajushpami, 60 yali gentecunata bautizarichun ayudashca. Ashtaca huauquipanicunaca, chai panigushna ñucanchi territoriopi ayudaitaca na ushanchichu. Shinapash, causaiman apaj ñanda tarichun shuj gentecunata imagupipash ayudashpaca, ninandami cushijushun (Mat. 6:20).

Jehová Diostapash, paipa Reinota apoyashpami cushilla sintirinchi

16. a) ‘Cai pachapi chingarijlla charishcacunaca’ ¿imata tucunga? b) ‘Cai pachapi chingarijlla charishcacuna’ tucurinata yachashpaca ¿imatata yuyana capanchi?

16 Jesusca nircami, ‘cai pachapi chingarijlla charishcacunaca’ tucuringami nishpa (Luc. 16:9). Cai último punllacunapica, culquimandami ashtaca llactacunapica tauca problemacuna tiashca, bancocunapash vicharishcami. Shinapash, chai llaquicunaca yangalla cuendami canga. Ñallami shuj jatun llaqui tianga.  Diablopa mandajushca politicacunapash, panda religiongunapash, cai mundopi charijyana ruraicunapashmi tucuchi tucunga. Profeta Ezequielpash, profeta Sofoniaspash nircami, oropash culquipash yangami canga nishpa. Culquita ashtaca gentecuna, ashtaca huatacunata ocupashca cajpipash, tucuilla culquimi tucuringa (Ezeq. 7:19; Sof. 1:18). Shinaca, cai mundo ña tucurijpi, ‘cai pachapi chingarijlla charishcacunatara’ pundapi churashca cashpaca ¿imashinata sintirinchiman? ¿Nachu punlla entero shinllita trabajashcamanda falso culquita pagajpishna sintirinchiman? (Prov. 18:11). Cai mundopi charishca cosascunaca tucuringami. Chaimandami ‘cai pachapi chingarijlla charishcacunahuan’ Jehová Diosman ashtahuan quimiringapaj esforzarina capanchi. Imata rurashpapash Diospa Reinota apoyashpaca paimanmi ashtahuan quimiri ushashun.

17, 18. Jehová Diospa amigocunaca ¿ima bendiciongunatata charinga?

17 Diospa Reino mandajpica, pipash na arriendocunata, prestamocunata paganajushunllu. Jambicunata randina, doctorcunaman paganapash ñana minishtiringachu. Micunacunapash ashtacami tianga, gratismi canga. Gushtu, racu frutacunata, granocunatami cai Alpapi Jehová Diospa amigocunaca charinga. Orotapash, juyailla perlas rumigucunatapashmi charishun. Chaicunataca ñana randinajushunllu, ñana jatunajushunllu. Ñucanchi ali ricuringapami chaicunataca churajushun. Tucuicunallatami juyailla ali huasicunata caspihuan cashpa, rumihuan cashpa imahuan cashpapash rurashun. Ñucanchi rijsicunapash ayudana munaihuanmi huasichishpa ayudanga, ñana pimanbash paganajushunllu. Cai Alpapi fucushcacunatami, tucuicuna randimanda cararishpa causashun.

18 Jahua pachapi charij ricurinata pundapi churajcunaca, chashna bendiciongunatapash, shuj jatun bendiciongunatapashmi charinga. Chai punllacunapimi Jesusca ñucanchitaca ninga: ‘Ñuca Taita bendiciashcacuna, cai pachata churai punllamandapacha cangunaman alichishca charijushcata’ japij shamuichi nishpa (Mat. 25:34). Chai punllacunapica cushijushcacunapachami causashun.

^ par. 4 Lucas 16:9 (NM): “Cangunatapashmi cashna nini: ‘Cai pachapi chingarijlla charishcacunahuanmi shujcunapa cumbacuna tucuna capanguichi. Shinami, cai pachapi chingarijlla charishcacuna tucurijpica, jahua pachapi causaita causachun cangunataca chasquinga’”

^ par. 4 Lucas 16:1​ta griego shimipi ricujpica, mayordomo runagu yangata juchachi tucushcatallami nijun. Jesusca, mayordomo runagu imamanda trabajomanda llujchi tucushcata yachachingapaca na munarcachu. Chaipa randica, mayordomo runagu imata rurashcatami yachachingapaj munarca.

^ par. 15 Lucia Moussanett shuti panigupa causaita ricungapaca ¡Despertad! del 22 de junio de 2003 revistapi 18-22 paginacunata ricupangui.