Estados Unidos cuartelpimi shuj soldadoca ña cutin prezo japishpa soldado tucui nishpa rimajuhuarca. Chaimi ñucaca nircani, na guerraman rinamandaca ñami prezo carcani, ña cutinllu prezo churagrihuanguichi nishpa.

ÑUCACA Estados Unidos, Crooksville llactapimi 1926 huatapi nacirircani. 7 huauquipanicunatami charircani. Ñuca taitamamacunaca Taita Diosmanda yachajunata na ashta munashpapash misaman richunmi mandan carca. Ñucaca Metodista nishca Iglesiamanmi rin cariani. 14 huatacunata charijpica, huata enteropi shuj domingotallapash misamanga na faltashcachu nishpami shuj regalota carahuarca.

Lluqui ladomanda callarishpa umapi yura cintaguta churajushca Margaret Walker panigumi Bibliamandami yachachihuarca.

Chai punllacunapica Margaret Walker nishca vecinami Bibliamanda parlangapaj ñuca mamataca visitai callarirca. Paica testigo de Jehovami carca. Shuj punllaca paicuna imata parlajta uyangapaj munashpami paicunahuan quedangapaj munarcani. Shinapash ñuca mamaca, ama molestajuchun nishpami canllaman cachahuarca. Canllaman rishpapash imata parlanajujtami uyangapaj munajurcani. Huaquin punllacuna jipaca, Margaretca tapuhuarcami, Taita Diospa shutita yachanguichu nishpa. Shina nijpimi, Taita Diospa shuti Dios cajtaca tucuicunami yachan nircani. Chaimi Margaretca nihuarca, canba Bibliapi Salmo 83:18ta mascashpa ricupai nishpa. * (Notata ricupangui). Mascashpa ricujpica Taita Diospa shutica Jehová shutimi cashcarca. Chaimandami ñuca amigocunata ucha mascangapaj rishpa nircani, Taita Dios ima shuti cajta yachangapaca cangunapa Bibliapimi Salmo 83:18ta ricuna canguichi nishpa. Shinami ñucaca villachi callarircani.

Bibliata yachajui callarishpaca 1941 huatapimi bautizarircani. Jipamanga Estudio del Libro nishcapi yachachichunmi mingahuarca. Ñuca mamata, huauquicunata, panicunatapash Estudio del Libroman invitajpimi gulpi shamui callarirca. Shinapash ñuca taitaca na munarcachu.

ÑUCA TAITA JARCAI CALLARIRCAMI

Asha ashami congregacionbica ashtahuan responsabilidadcunata chasquircani. Ñucaca Testigocuna llujchishca ashtaca librocunatami charircani. Shuj punllaca ñuca taitaca nihuarcami, cai tucuilla librocunata apashpa ñuca huasimanda llujshishpa ri nishpa. Chaimi Zanesville nishca ladolla pueblogupi causangapaj rircani. Ñuca familiata animangapaca siempremi visitajun carcani.

 Ñuca taitaca tandanajuicunaman ñuca mama richunga na munanllu carca. Huaquinbica ñuca taita catishpa, tangashpa huasipi churajpipash ñuca mamaca chaishuj punguta llujshishpami tandanajuicunaman rin carca. Ñucaca ninmi carcani, ama llaquirijuichu, shuj punllaca ñuca taitaca shaijungami nishpa. Shinami ñuca taita shaijujpi ñuca mamaca tandanajuicunaman tranquilo ri usharca.

1943 huatapi Bibliamanda Yachachingapaj Escuela tiai callarijpimi congregacionbi uchilla discursocunata cui callarircani. Chai Escuelapi consejocunami ñucataca ali discursocunata cuchun ayudahuarca.

GUERRAPICA NA CHAPURIRCANICHU

1944pica soldado cachun nishpami Columbus llacta cuartel generalpi presentarichun obligahuarca. Chaipimi huaquin examengunata rurahuarca, huaquin papelcunata jundachichunbash mañahuarca. Ñucaca na soldado tucushachu nijpimi soldadocunaca richun saquihuarca. Shinapash jipaca ña cutin shuj policía huasiman shamushpami prezo apahuarca.

Ishcai semana jipaca shuj juiciota rurashpami juezca nihuarca, ñucamanda cashpaca huañungacaman prezo cachunmi sentenciata cuiman nishpa. Chai jipami tapuhuarca, imatapash ningapaj munanguichu nishpa. Shina nijpimi nircani: “Ari, ñucaca Taita Diosmandami yachachini. Gentecunapa huasiman rishpami Diospa Reinomanda ali villaicunata ashtaca gentecunaman yachachini” nishpa. * (Notata ricupangui). Chai jipami juezca chaishuj gentecunata nirca: “Cangunaca cai joven Taita Diosmanda yachachijta na yachachijta juzgangapaca na caipichu canguichi. Cangunaca cai joven soldado tucunata o na soldado tucunata juzgangapami caipi canguichi” nishpa. Shinami narapash media hora tucujpillata juezca picha huatacunata Ashland llactapa carcelpi prezo cachun sentenciata cuhuarca.

JEHOVAMI CARCELPIPASH CUIDAHUARCA

Ishcai semanacunataca Columbus llacta carcelpimi carcani. Primer punllataca carcelpi ñuca ucumandaca na llujshircanichu. Chaipimi Jehovataca mañarcani, 5 huatacunata caipi aguantaitaca na ushashachu, imata ruranatapash na atinanichu nishpa.

Cayandica ñuca ucumanda guardiacuna llujshichun saquijpimi shuj jatun, shinlli prezopaman quimirircani. Ishcandimi shuj ventanamanda ricunajurcanchi. Chaipimi paica tapuhuarca: “Can uchilataca imamandata prezo churarca” nishpa. Shina nijpimi nircani, Testigocunaca na guerraman rinchichu, pitapash na huañuchinchichu nishpa. Shina nijpimi paica nirca: “Cai gentecunaca huañuchijpimi gentecunataca carcelpi churan. Shinapash candaca na huañuchingapaj munajpimi carcelpi churashca. Chaica ¿alichu can?” nishpa. Shina nijpimi “na nircani”.

Paica Paul shutimi carca. Paulca parlahuarcami, 15 huatacunata shuj carcelpi cashpaca Testigocunapa publicaciongunatami liin carcani nishpa. Chaita uyashpami Jehovataca Paul ñucata ayudahuachun nishpa mañarcani. Mañashcandimi Paulca nihuarca: “Pipash macangapaj munajpica chai rato caparihuangui  shamushallami” nishpa. Chai carcelpi prezo cashca punllacamanga ñucapa grupopi 50 prezocunahuanga nima problemata na charircanichu.

Guerraman na rimandami shuj Testigocunandi Ashland carcelpi canchi.

Jipamanga Ashland llacta carcelmanmi cachahuarca. Chaipimi ashtaca experienciata charij prezo huauquicunata rijsircani. Paicunami shuj huauquicunatapash, ñucatapash Jehovaman ashtahuan quimirichun ayudarca. Cada semanami Bibliapa huaquin textocunata liichun animashpa jipamanga Bibliamanda tapuicunata rurashpa, contestashpa pugllan carcanchi. Shuj jatun ucupimi prezo carcanchi. Chaipica ashtaca ashtaca camacunami tiarca. Shuj huauquimi aliguta organizashpa, maijan camacunapi villachina cashcata ricun carca. Paica ninmi carca: “Robison, cai camaman maijanbash prezo shamujpica chai prezo nara llujshijpillatami villachina cangui” nishpa. Shinami aliguta organizarishpa villachin carcanchi.

CARCELMANDA LLUJSHIRCANI

Segunda Guerra Mundial 1945 huatapi tucurijpipash jipamanmi carcelmandaca llujshircani. Ñuca familiamandaca preocupadomi carcani. Ñuca taitaca nircami: “Imashinami canda huasimanda llujchishpa cachai usharcani, shinallatami canba mamatapash huauquipanicunatapash Bibliata ama yachajuchun jarcai ushasha” nishpa. Shinapash carcelmanda llujshishpaca shuj ali noticiatami chasquircani. Ñuca taita jarcajujpipash ñuca familiamanda 7purami tandanajuicunaman rinajurca. Ñucapa shuj panicarin ñami bautizarishcarca.

Demetrius Papageorge huauquihuanmi villachingapaj rijuni. Chai ungido huauquica 1913 huatapimi Jehovata sirvi callarirca.

1950 huatapica Corea llactapimi guerra callarirca. Estados Unidospash chai guerrapi chapurishca cajpimi ñucataca Columbus llacta cuartel generalman ña cutin presentarichun obligahuarca. Ñuca imatalla rurai ushashcata ricushpami shuj soldadoca canmi cai grupomandaca ashtahuan ali cangui nirca. Shina nijpimi, pagui, shinapash na soldado tucushachu nircani. Ashtahuangarin 2 Timoteo 2:3manda yuyaita japishpa nircani: “Ñucaca ñami Jesucristopa soldadoshna cani” nishpa. Shinami soldadoca upalla quedashpa jipamanga rilla nihuarca.

Jipamanga Cincinnati llactapi shuj jatun tandanajuimanmi rircani. Chaipimi Betelpi sirvingapaj munajcunapa tandanajuiman rircani. Chai tandanajuipimi Milton Henschel huauquica nihuarca: “Diospa Reino ñaupaman catichun ayudangapaj munaj huauquicunatami Betelpica minishtinajun” nishpa. Shina nijpimi solicitudta jundachishpa cacharcani, agosto de 1954 huatapi Brooklyn Betelpi sirvi callarircani. Chai huatamanda cunangamanmi Betelpi sivijushcani.

Betelpica siempremi ashtaca trabajota charishcani. Ashtaca huatacunataca publicaciongunata imprimingapaj maquinacunapi, oficinacunapi, maquinacunata, aldabacunata arreglashpami trabajarcani. Nueva York llactapi jatun tandanajui huasicunapipashmi trabajarcani.

Publicaciongunata imprimingapaj maquinacunapi trabajashpami Brooklyn Betelpi cani.

Betelpi Tutamanda Bibliata Yachajungapaj Programata, Villajun revistata tucui betelitacunahuan yachajunata, congregacionhuan villachinatapash ninandami alicachini. Tucuilla taitamamacuna paicunapa huahuacunahuan  tandanajushpa Cada Punlla Diospa Shimita Intindingapaj folletota, cada semana familiahuan adorana tutata charishpa, tandanajuicunapi participashpa, cushijushpa villachishpaca alipachami taitamamacunapa huahuacunapaca canman. Shina rurashpallami Jehovapa ñaupajpi ali ricurishpa catitaca tal vez usharinga.

Betelpipash congregacionbipash ashtaca amigocunatami charishcani. Huaquingunaca ungidocunami carca, ñami cielopi can. Cutin shujcunaca na ungidocunachu carca. Jehovata sirvishpapash tucuicunallata, betelitacunapash juchayu nacirishcacunami canchi. Chaimandami shuj huauquihuan imapash problemata charishpaca Mateo 5:23, 24pi consejota yarishpa chai problemataca uchalla arrenglangapaj esforzarini. Ashtaca problemacunataca disculpahuai nina na fácil cajpipash disculpahuai nishpami arreglai usharin.

JEHOVÁ DIOSCA BENDICIAHUASHCAMI

Ña mayorllagu caimandaca huasin huasin rishpa villachitaca ñana ushajunichu. Shinapash ñaupaman catijunimi. Chino mandarín shimitami ashaguta yachajushcani. Callepi chinocunata tuparishpaca paicunaman villachinatami gushtani. Huaquin punllacunacarin 30 ó 40 revistacunatami saquini.

Brooklyn llactapi chinocunamanmi villachijuni.

China llactapi shuj chinagutapashmi cutin visitashcani. ¿Imashinata cutin visitashcani? Ricupangui, shuj punllaca frutacunata jatuna localmanda shuj chinagumi papelcunata cujurca. Ñucataca cushillami ricujurca. Chaimandami cushilla asishpa chino shimipi Villajun revistatapash, ¡Despertad! revistatapash ricuchircani. Chai revistacunata chasquishpami Katie shutimi cani nirca. Chai punllamandami callepi ricushpaca ñucahuan parlangapaj quimirin carca. Ñucaca huaquin frutacunata, verduracunata inglés shimipi imashina ninatami yachachircani. Ashtahuangarin Bibliamanda huaquin textocunatapash intindichircani, Enseña librotapash curcani. Shinapash huaquin semanacuna jipaca ñana chai chinagutaca ricurcanichu.

Huaquin quillacuna jipaca papelcunata saquishpa purijuj shuj chinagumanmi revistacunata saquircani. Chaishuj semana paihuan parlajpica paipa telefonota cushpami nihuarca: “Parlai China llactahuan”. Shina nijpimi ñucaca Chinapica na pitapash rijsinichu nircani. Shinapash parlai nishpa atichijujpimi telefonota japishpa parlarcani. Chaimi telefonopica nirca: “Katiemi cani, Chinapimi cani” nishpa. Shinallata villahuarcami, telefonota cushca chinaguca ñuca ñañami can, ñucaman yachachishcataca paimanbash yachachipangui nirca. Shina nijpimi ñucaca paita ali yachachingapaj esforzarishami, Chinapi cashcata villashcamanda pagui nircani. Jipamanga shuj viajegutallami Katiepa ñañahuanga parlarcani. Cunanbi paicuna maipi cajtaca na yachanichu. Ima horapash Jehovamanda ashtahuan yachajushpaca alipachami canman.

Ñami 73 huatacunata Jehovata sirvijushcani. Prezo cashca punllacunapi paita sirvichun Jehová ayudashcamandaca tucui shunguhuanmi agradicini. Ñuca huauquicuna, panicunaca nihuarcami taita jarcajpipash canba ejemplota ricushpami ñaupaman cati usharcanchi nishpa. Jipamanga ñuca mamapash, ñucapa sucta huauquipanicunapashmi bautizarirca. Ñuca taitapash ashata cambiarcami. Jipamangarin nara huañushpallatami huaquin tandanajuicunaman rirca.

Jehová Dios munajpica ñuca juyashca familiapash paraíso Alpagupi causangapami causaringa. Tucuillacuna tandanajushpa Jehovata para siempre adorai ushashpaca ninan cushijuitami charishun.  * (Notata liipangui).

^ par. 6 Corwin Robisonba inglés Bibliapimi Taita Diospa shutica Jehovami can nijurca.

^ par. 14 Estados Unidospica iglesiapi yachachijcuna, ñaupaman pushajcunaca soldado tucuna obligaciondaca na charinllu carca.

^ par. 32 Corwin Robison huauquica cai temata escribijushca punllacunapimi Jehovata tucuipi ali sirvishpa huañurca.