Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista (tandanajuipi yachajungapaj)  |  Febrero de 2016

Jehová Diosta tucui shunguhuan cazushunchi

Jehová Diosta tucui shunguhuan cazushunchi

‘Mandaj Diosca canhuanbash, ñucahuanbash, canba miraicunahuanbash, ñucapa miraicunahuanbash, tucui causaipi ñucanchihuan cachun’ (1 SAMUEL 20:42).

CÁNTICO 43, 31

1, 2. ¿Imashinata Jonatanga Davidpa ali amigo cashcata ricuchirca?

DAVIDCA shinlli shayarishpami Goliatta huañuchishpa Goliatpa umataca Jonatanba taita, rey Saulman aparca (1 Samuel 17:57). Chaita ricushpaca manllarishpami Jonatanga Davidta ricushcanga. Shinallata Davidta Jehová Dios ayudajushcataca alimi Jonatanga yacharca. Chai punllamandami Jonatanbash Davidpash ali amigocuna tucurca. Paicunaca llaquishpa juyashun nishpami randimanda juramenturca (1 Samuel 18:1-3). Juramentushca shinami Jonatanga Davidta apoyashpa catirca.

2 Reypa churi caimandaca Jonatanmi cati rey cana carca. Shinapash Jehová Diosca Davidtami cati rey cachun agllarca. Davidta rey cachun agllashcata yachashpapash Jonatanga Davidta juyashpa catircami. Davidta Jonatanba taita huañuchingapaj mascajujta yachashpacarin Jonatanga ninanda preocuparishpami Hores nishca pushtucaman rishpa, Davidtaca Jehová Diospi confiashpa catinami cangui nishpa cashna nirca: ‘Ama  manllaichu, ñuca taita Saulca, candaca na taringachu. Canmi israelitacunata jatun mandaj tucungui. Shinallata ñucapash canba cati mandajmi tucusha’ nishpa (1 Samuel 23:16, 17).

3. a) Jonatanbaca ¿imata ashtahuan importante carca? b) ¿Imashinata yachanchi Jonatanbaca Jehovata cazuna ashtahuan importante cashcata? (Callari dibujota ricupangui).

3 Tucuicunami Jonatandaca Davidhuan ali amigo cashcamanda alicachinchi. Shinapash Jonatanbaca Jehová Diosta cazunami ashtahuan importante carca. Jonatanga Jehová Diosta tucui shunguhuan cazuimandami Davidtaca juyashpa na envidiarca, Jehová Diospi confiachunbash ayudarca. Jonatanhuan Davidhuanga randimanda juyarishpami Jehovatapash cazun carca. Paicunaca juramentushca cai shimicunatami pactachirca: ‘Mandaj Diosca canhuanbash, ñucahuanbash, canba miraicunahuanbash, ñucapa miraicunahuanbash, tucui causaipi ñucanchihuan cachun’ nishpa (1 Samuel 20:42).

4. a) ¿Imamandata cushilla causaita ushapanchi? b) ¿Ima chuscu yuyaicunatata cai temapica yachajupashun?

4 Ñucanchicunapash ñucanchi familiata, amigocunata, congregacionbi huauquipanicunata juyashcataca ricuchinami canchi (1 Tesalonicenses 2:10, 11). Shinapash Jehová Dios ñucanchita rurashcamandami, pundapica paita tucui shunguhuan cazuna canchi (Apocalipsis 4:11). Jehovata tucui shunguhuan cazushpaca ñucanchillatami cushilla causanchi. Ashtahuangarin Jehovata tucui shunguhuan cazushcataca llaquicunapi cashpapash ricuchinami canchi. Chaimandami cai temapica Jonatanba ejemplota catishpa chuscu yuyaicunata yachajushun: Jehovata tucuipi cazuimandaca 1) ¿imashinata autoridadta charijcunata na respetanayajpipash respetashcata ricuchishun?, 2) ¿pitata pundapica respetashun?, 3) autoridadta charij huauqui ñucanchi rurashcacunata panda intindijpica ¿imatata rurashun?, 4) ñucanchi rurasha nishcataca ¿imashinata pactachishun?

¿IMASHINATA AUTORIDADTA CHARIJCUNATA NA RESPETANAYAJPIPASH RESPETASHCATA RICUCHISHUN?

5. Saúl mandajujpica ¿imamandata israelitacunapaca Jehovata tucui shunguhuan cazunaca shinlli carca?

5 Shuj punllaca Jonatanbash, israelitacunapash jatun llaquipimi carca. Jonatanba taita Saúl ñana cazujpimi, Jehová Diosca Saúl rey cashpa catichunga ñana munarca (1 Samuel 15:17-23). Shinapash huaquin huatacunata mandashpa catichunmi Jehová Diosca saquirca. Saulca Jehovapa mandanapi tiarishca cashpapash nalitami rurajurca. Chaimandami israelitacunapaca Jehová Diosta tucui shunguhuan cazunaca shinlli carca (1 Crónicas 29:23).

6. ¿Imashinata Jonatanga Jehovata tucui shunguhuan cazushcata ricuchirca?

6 Paipa taita Saúl na cazujpipash Jonatanga tucui shunguhuanmi Jehovataca cazun carca (1 Samuel 13:13, 14). Chai punllacunapica contra soldadocunami 30 mil carretacunahuan rishpa Israel llactataca atacagrinajurca. Shinapash Israelpica 600 soldadocunallami tiarca. Ashtahuangarin rey Saúl, Jonatanllami macanajuna armacunata charirca. Shina llaquipi cashpapash Jonatanga na manllarcachu. Paica profeta Samuelpa cai shimicunatami yaria carca: “Mandaj Diosca, paipaj jatun shutimandaca, pai agllashcacunataca na jichungachu” nishcata (1 Samuel 12:22). Chaimandami Jonatanga shuj soldadotaca nirca: “Mandaj Diospaca,  imapash na shinllichu. Ashtaca cajpipash, ashalla cajpipash, paica quishpichi ushanllami” nishpa. Shinami Saulhuan Jonatanhuanlla rishpa 20 contra soldadocunata huañuchirca. Imashinami ricupanchi Jonatanga tucui shunguhuanmi Jehovapi confiarca. Chaimandami Jehovapash bendiciarca. Ashtahuangarin Jehová Dios alpata chujchuchijpimi contra soldadocunaca manllarishpa paicunapura huañuchirirca. Shinami israelitacunaca contracunata misharca (1 Samuel 13:5, 15, 22; 14:1, 2, 6, 14, 15, 20).

7. ¿Imashinata Jonatanga paipa taitataca tratan carca?

7 Rey Saúl Jehovata na cazushpa catijpipash Jonatanga Jehovata pundapi cazushpami paipa taitatapash cazun carca. Taitata cazuimandami Jonatanga paihuan rishpa israelitacunata difindingapaj macanajurca (1 Samuel 31:1, 2).

8, 9. ¿Imamandata autoridadta charijcunataca respetana capanchi?

8 Jonatanba ejemplota catishpa Taita Diosta tucui shunguhuan cazungapaca ¿imatata rurana canchi? Ñucanchi llactapi gobiernotapash usharishcacamanga cazunami canchi. Jehová Diosca ñucanchicunata mandachunmi ‘jatun mandajcuna’ tiachun saquishca. Paicunata respetachunmi Jehová Diosca munan (Romanos 13:1, 2, liingui). Chaimandami huaquin autoridadcuna na honrado cajpi na respetanayajpipash tucuilla autoridadcunata respetana canchi. Jehová Diosca familiapi, congregacionbi autoridadta charijcunatapash  respetachunmi munan (1 Corintios 11:3; Hebreos 13:17).

Jehovata tucui shunguhuan cazushpaca ñucanchi huarmi o cusa na Testigo cajpipash respetohuanmi tratana canchi. (Párrafo 9ta ricupangui).

9 Cunanga Bolivia llactamanda Olga shuti panigu imashina Jehovata tucui shunguhuan cazushcata ricupashun [1] (cai tema tucuripi notata ricupangui). Olgapa cusaca ninandami paitaca nali tratan carca. Olga Testigo cajpimi cusaca culirashpa na parlan carca, shinllita riman carca. Shuj punllacarin huahuacunatapash apashpami jichushpa risha nirca. Cusa nali tratajpipash Olgaca ‘na chashnallata tigrachircachu’, siempremi respetarca. Ashtahuangarin ali huarmi cangapaj esforzarishpami cusaman, huahuacunaman yanushpa, ropata tajshashpa, cusapa familiatapash huaquin ruraicunapi ayudan carca (Romanos 12:17). Ushashpacarin cusapa familiacunata, amigocunata cusa visitangapaj rijpica cumbashpami rin carca. Cusapa taita huañujpicarin shuj llactapi pambagrinajujpimi, Olgaca minishtirishca cosascunata uchalla segurashpa cumbashpa rirca. Huañushcaman misata cujujpipash iglesia canllapimi cusa llujshingacaman Olgaca shuyajurca. Shinami huaquin huatacuna jipaca, Olga na fiñarishpa siempre respetashcamanda cusaca alillata tratai callarirca. Cunanbica tandanajuicunaman richunmi Olgataca animan, tandanajuicunamanbash apan. Huaquinbicarin Olgata cumbashpami tandanajuipi quedan (1 Pedro 3:1).

¿PITATA PUNDAPICA RESPETASHUN?

10. ¿Imashinata Jonatanga yacharca pita apoyana cashcata?

10 Davidta paipa taita Saúl huañuchigrijujta yachashpaca ¿imatata Jonatanga rurarca? ¿Paipa taitata o Davidtachu ayudarca? Saulta apoyanapa randica Davidta Jehová Dios apoyajujta ali yachashpami Jonatanga Davidta ayudanata agllarca. Davidta ayudangapaj munashpami Davidtaca pacajugri nishpa villarca. Chai jipapash Davidtaca ama huañuchipaichu nishpami Jonatanga paipa taitataca rogarca (1 Samuel 19:1-6, liingui).

11, 12. Taita Diosta juyashpaca ¿imatallata rurashun?

11 Ñucanchi familiacunata juyashpapash Jehovata ashtahuan juyashpaca Jehovatarami pundapica cazushun. Australia llactamanda Alicia shuti panigupa ejemplota ricupashun. Bibliata yachajui callarishpaca paipa familiamanmi imata yachajushcata parlan carca. Chaimandami shuj punllaca imamanda Navidadta ñana ruragrijushcata parlarca. Callaripica nalicachishpami familiaca uyarca. Jipamangarin, ñana juyanllu yashpami familiaca ninanda culirarca. Paipa mamacarin cutinga na ricunayanllu nishpami Aliciataca rimarca. Aliciaca ninmi: “Ñuca familia shina tratajpica shungu faquirijpishnami llaquirircani. Ñuca familiata ninanda juyashpapash Jehovata, Jesusta pundapi cazungapaj munashpami cati jatun tandanajuipi bautizarircani” nin (Mateo 10:37).

12 Jehová Diosta tucui shunguhuan cazungapaj munashpaca na ñucanchi escuelata, pugllana equipota, ñucanchi llactata pundapi churashunllu. Henry shuti joven huauquigupa ejemplota ricupashun. Paica paipa escuelapa equipopimi ajedrezta pugllan carca. Paica campeonatota ganashapacha yashpami purijurca. Sabadocunatapash domingocunatapash pugllajushpami villachingapaj, tandanajuicunaman ringapaca na tiempota charirca. Shuj punllaca Jehová Diosta tucui shunguhuan cazunapa randi escuelata pundapi churajushcatami Henryca cuenta japirca. Chaimandami ajedrezta pugllana equipomanda llujshirca (Mateo 6:33).

13. Familiapi problemacuna tiajpica ¿imashinata Jehovata tucui shunguhuan cazushcata ricuchi ushapanchi?

 13 Huaquinbica shuj familiata juyashpapash chaishuj familiatapash juyashcata ricuchinaca shinllimi can. Cunanga Ken shuti huauquipa ejemplota ricupashun. Kenga paipa mama ña mayorllagu cajpimi mamata cutin cutin visitashpa huasimanbash huaquinbi huaquinbi apangapaj munajurca. Shinapash Kenba mamaca Kenba huarmihuanga nali llevarinllu carca. Kenga ninmi: “Ishcandita cushichingapaj imata ruranataca na atinarcanichu” nishpa. Paica Jehovata tucui shunguhuan cazungapaj munashpami Bibliapa consejocunapi pensarirca. Shinami Kenga cuenta japirca paipa huarmita cushichichun, paipa huarmita pundapi churachun Jehová Diosca munashcata. Chaimandami Kenga huarmihuanbash mamahuanbash parlarca. Huarmita ali sintichingapaca aliguman parlashpami mamata imamanda aliguman tratana cashcata intindichirca. Cutin mamataca jachunda imamanda respetana cashcatami intindichirca (Génesis 2:24; 1 Corintios 13:4, 5, liingui).

AUTORIDADTA CHARIJ HUAUQUI ÑUCANCHI RURASHCACUNATA PANDA INTINDIJPI

14. Saulca ¿imashinata Jonatanda tratarca?

14 Autoridadta charij huauqui ñucanchi rurashcacunata panda intindijpipash Jehovata tucui shunguhuan cazushcataca ricuchi ushanchimi. Rey Saulca Taita Diospa agllashca cashpapash paipa churitallatami nali tratarca. Paica imamanda Davidta Jonatán juyashcataca na intindircachu. Chaimandami Davidta Jonatán ayudangapaj munajpica  ninanda culirashpa gentecunapa ñaupajpi pinganai shimicunata rimashpa saquirca. Shinapash Jonatanga paipa taitatapash, Jehovatapash, Israel llactata mandana Davidtapash respetashpami catirca (1 Samuel 20:30-41).

15. Ñucanchi rurashcacunata shuj huauqui panda intindijpipash ¿imatata rurana capanchi?

15 Cunan punllapi ancianocunapash congregacionbi tucuilla huauquipanicunata igual tratangapami esforzarin. Shinapash juchayu caimandami huaquinbica ñucanchicuna imata rurajushcataca nali intindi ushan (1 Samuel 1:13-17). Shinaca ancianocuna ñucanchi rurashcacunata huaquinbi panda intindijpipash Jehovata tucui shunguhuan cazushpa catishunchi.

ÑUCANCHI RURASHA NISHCATACA ¿IMASHINATA PACTACHISHUN?

16. ¿Imacunapita na ñucanchipilla pensarishpa Jehovata tucui shunguhuan cazushcata ricuchi ushapanchi?

16 Saulca paipa churi Jonatán mandachunmi munarca. David mandachunga na munarcachu (1 Samuel 20:31). Shinapash Jonatanga Jehová Diosta juyaimanda, paita tucui shunguhuan cazungapaj munaimandami Davidtaca na envidiarca, pai juramentushca shimicunatapash pactachingapaj esforzarirca. Bibliapica ninmi, Jehovata juyajcuna, tucui shunguhuan cazujcunaca llaquipi urmana cashpapashmi paicunapa nishcacunataca siempre pactachin nishpa (Salmo 15:4). Shinaca shuj negociota rurangapaj imapash contratota rurashca cashpaca, shinlli cajpipash contratopi imata nijujtaca pactachinami canchi. Cusahuarmicunapash problemata charishpaca Jehovata cazuimandami huarmitalla o cusatalla juyashcata ricuchina can (Malaquías 2:13-16, liingui).

Shuj negociota rurangapaj contratota rurashca cashpaca Jehová Diosta tucui shuguhuan cazuimandami chai contratopi nishcata pactachina canchi. (Párrafo 16ta ricupangui).

17. Cai temapica ¿imatata yachajupashcangui?

17 Shinlli cajpipash Jonatanshnami Jehovataca tucui shunguhuan cazuna canchi. Ñucanchi huauquipanicunahuan huaquinbi ashata nanarishpapash paicunata juyashcataca ricuchinami canchi. Shinami Jehovatapash cushichishpa, ñucanchipash cushilla causashun (Proverbios 27:11). Jehová Dios ñucanchita siempre cuidanataca yariami cana capanchi. Shamuj temapica Davidpa punllacunapi huaquin gentecuna imashina Jehová Diosta tucuipi cazushcata, cutin shujcuna na cazushcata, shinallata chai gentecunamanda imata yachajui ushashcatami ricupashun.

^ [1] (párrafo 9): Cai temapica huaquin shuticunata cambiashcanchimi.