Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Jehovata sirvijcunaca cai mundopi gentecunahuanga diferentemi can

Jehovata sirvijcunaca cai mundopi gentecunahuanga diferentemi can

‘Imatapash cashcatapacha ruranahuan nalita ruranahuanga shican cajtami yachanguichi’ (MAL. 3:18).

CÁNTICO 127, 101

1, 2. Cunan punllapica Jehovata sirvijcunaca ¿imamandata cuidarina capanchi? (Callari fotocunata ricupangui).

ASHTACA doctorcuna, enfermeracunaca millai ungüihuan caj gentecunata ayudangapaj munaimandami paicunata cuidan. Shinapash ama chai ungüi yalichunmi ninanda cuidarin. Shinallatami Jehovata sirvijcunaca Jehovata na sirvij gentecunapa chaupipi causanchi, trabajanchipash. Chaimi paicunashna ama cangapaj cuidarina capanchi.

2 Tucurimui punllacunapi causaj gentecunaca Diospa mandashcacunataca na respetanllu. 2 Timoteo cartapica apóstol Pabloca Taita Diosta na juyaj gentecuna imashina canatami escribirca. Cai tucurimui punllacunapimi shina gentecuna ashtahuan mirana carca (2 Timoteo 3:1-5, 13, liingui). Shina gentecunata nalicachishpapash, ñucanchicunapashmi paicunashna pensaita, parlaita, rurai callarinchiman (Prov. 13:20). Chaimandami cai temapica tucurimui punllacunapi gentecunahuan Jehovata sirvijcunahuan diferente cajta ricupashun. Shinallata chai gentecunapa nali cualidadcunamanda cuidarinata, shujcunapash Taita Diosta rijsichun ayudanatapashmi yachajupashun.

3. ¿Picunata 2 Timoteo 3:2-5​pi parlashcashna can?

 3 Imashinami ricupashcanchi apóstol Pabloca nircami, tucurimui “punllacunapica, jatun llaquicunami shamunga” nishpa. Chai jipaca 19 nali cualidadcunamandami parlarca. Chai nali cualidadcunataca cunanbi gentecunami charina carca. Romanos 1:29-31​pica chashnallata nali cualidadcunamandami parlan. Escrituras Griegas Cristianas nishcapica Timoteo libropillami chai nali cualidadcunamanda parlan. Apóstol Pabloca nircami, gentecunaca chai nali cualidadcunatami charinga nishpa. Shinapash huaquin gentecunaca ali cualidadcunatami charina carca. Jehovata sirvijcunaca diferentemi cana carca (Malaquías 3:18, liingui).

JEHOVATA SIRVIJCUNACA CAI MUNDOPI GENTECUNAHUANGA ¿IGUALCHU CAN?

4. Jatun tucushca gentecunaca ¿imashinata can?

4 Apóstol Pabloca paicunalla ali cangapaj munajcunamanda, charijyangapaj munajcunamanda parlashca jipaca ‘pitapash yalimi canchi nijcuna, jariyashpa jatun tucujcunamandami’ parlarca. Shina gentecunaca imatapash ruraimanda, juyaillagu caimanda, charij caimandami shuj gentecuna paicunata ashtahuan alicachishpa ricuchun munan. Shuj estudiashca jarica nircami: Jatun tucushca gentecunaca paipa shungupica Taita Diospa randi, paillatami alabarin nishpa. Huaquingunaca ninmi, jatun tucushca gentecunaca shujcuna shinallata jatun tucushca cajta ricushpaca paicunallatami nalicachishpa ricun nishpa.

5. Jehovata tucui shunguhuan sirvijcunahuanbash ¿imata pasarca?

5 Jatun tucushca gentecunataca Jehová Diosca nimamanda na ricunayachinllu. Bibliapica ninmi: ‘Jariyashpa purijtaca’ na ricunayachinllu nishpa (Prov. 6:16, 17). Jatun tucushca canaca Taita Diosmandami caruyachin (Sal. 10:4). Diablomi jatun tucushca can (1 Tim. 3:6). Huaquin Jehovata sirvijcunapashmi orgullosocuna tucurca. Judá llactamanda rey Uzías jarimanda ricupashun. Paica ashtaca huatacunatami tucui shunguhuan Jehovata sirvirca. Shinapash Bibliapica ninmi: “Uzías runaca, ninan ushaita ña charishpaca, paipaj shungupi jariyashpami llaquipi urmarca. Paita Mandaj Taita Diosta na cazushpami, inciensota cushnichina altarpi inciensota cushnichingapaj, Mandaj Diospaj huasi ucuman yaicurca” nishpa. Huatacuna jipaca Ezequías reypashmi jatun tucurca. Shinapash asha tiempotallami jatun tucushca carca (2 Crón. 26:16; 32:25, 26).

6. a) Davidca ¿imamandata jatun tucui ushanman carca? b) David ama jatun tucushca cachunga ¿imata ayudarca?

6 Huaquin gentecunaca juyaillagu caimanda, imapash instrumentocunata ali tucaimanda, rijsishca caimanda, shuj cosascunamandapashmi jariyashca tigran. Rey Davidca juyaillagu, instrumentocunata ali tucaj, rijsishca cashpapash paica na jariyashca carcachu. Por ejemplo, David Goliatta huañuchijpica rey Saulca paipa ushihuan cazarai ushanguimi nirca. Shina nijpipash Davidca cashnami tigrachirca: “Jatun mandajpaj masha tucungapaca, ¿ñucaca pita cani? ¿Na cashpaca, ñuca causaipash, ñuca taitapaj familiapash, Israel purapica imata capan?” nishpa (1 Sam. 18:18). David ama jatun tucushca cachunga ¿imata ayudarca? Davidca alimi yacharca, Jehová Dios humilde caimanda paiman ali cualidadcunata, privilegiocunatapash cushcata. Shinallata tucuita rurachunbash Jehová Dios ayudajushcata (Sal. 113:5-8). Tucuita Jehová Dios cushcatami Davidca ali intindirca (1 Corintios 4:7​ta ricupangui).

Jehová Diosta sirvijcuna na jatun tucushca cajta ricushpami, gentecunaca Jehovata rijsingapaj munanga

7. Ama jatun tucushca cachunga ¿imata ayudanga?

 7 Ñucanchipash ama jatun tucungapaj Davidpa ejemplota catingapaj esforzaripashunchi. Jehová Diosmi cai tucuilla alpamanda ashtahuan Jatun Mandaj Taita Dios can. Shinapash Jehová Diosca na jatun tucushca Dios canllu (Sal. 18:35, NM). Jehovata sirvijcunaca cai consejota cazungapaj munapanchi: “Cangunataca, mushujta churachinshnami tucui shunguhuan pitapash llaquishpa, juyashpa, ali shunguhuan na jariyashpa, pihuambash aligutapacha causana canguichi” nishpa (Col. 3:12). Gentecuna “juyaita charishpaca, na ñucami ashtahuan ali cani ninllu, na jariyanllu” (1 Cor. 13:4). Na Testigo cusa paipa huarmigu ‘cazujujta ricushpami, Diospaj Shimita na villajpillata crij tucunga’. Shinallatami Jehová Diosta sirvijcuna na jatun tucushca cajta ricushpami, huaquin gentecunaca Jehová Diosta rijsingapaj munanga (1 Ped. 3:1).

GENTECUNACA ¿IMASHINATA TRATARIN?

8. a) Taitamamacunata cazunamandaca cunan punllapi gentecunaca ¿imatata yuyan? b) Bibliapica ¿imatata huahuacunataca mandan?

8 Apóstol Pabloca nircapashmi tucurimui punllacunapi gentecuna imashina tratarinata. Por ejemplo, ‘Taitata, mamatapash na cazuj’ huahuacunami tianga nishpa. Cunan punllapica taitamamacunata na cazunataca librocunapi, peliculacunapi, televisión programacunapipashmi alitashna ricuchin. Shinapash familia ucupi na cazushpaca ali causaitaca na ushanllu. Chaitaca tucuicunami yachan. Ñaupa punllapi Grecia llactapi shuj jari paipa taitamamata macajpica, paipashmi llaquichi tucuna carca. Cutin Roma llactapi leyca ninmi carca, taitata macanaca pitapash huañuchij cuendami can nishpa. Escrituras Hebreas, Escrituras Griegas Cristianas nishcapica nijunmi, huahuacunaca Taitata, mamataca ninanda alicachina can nishpa (Éx. 20:12; Efes. 6:1-3).

9. Taitamamacunata cazuchunga ¿imata jovengunataca ayudanga?

9 Cunanbica huahuacuna taitamamacunataca na cazushpami causan. Paicunashna ama cangapaca huahuacunaca ¿imatata rurana can? Huahuacuna taitamamacuna paicunamanda imata rurashcatami pensarina can. Shinallata Taita Diosca taitamamacunata cazuchunmi munan. Chaita intindishpami huahuacunaca agradicinata yachajunga. Jovenguna taitamamamanda siempre ali parlajpica, paicunata uyajcunapashmi paicunapa taitamamacunata respetangapaj munanga. Shinapash taitamamacuna paicunapa huahuacunata ‘na juyajpica’ huahuacunapash taitamamata cazuitaca na ushangachu. Cutin taitamamacuna paicunapa huahuacunata juyaihuan tratajpica huahuacunaca cazungapaj munangami. Shuj joven Testigo Austin shutica ninmi: “Huaquinbica ñuca munashcata rurangapaj munajpipash, ñuca taitaca aligumanmi imatapash intindichihuan. Chaimi paicunahuan parlaita ushashcani. Chaicunami ñuca taitamamata cazuchun ayudahuashca. Shinallata ñucamanda siempre preocuparijta cuenta japircani. Chaimandami paicunata cushichingapaj munarcani” nishpa.

10, 11. a) Shujcunata na juyaj gentecunaca ¿imashinata can? b) Jehovata sirvijcunaca ¿imashina juyaitata ricuchin?

 10 Apóstol Pabloca shujcunata juyaita na charij gentecuna imashina canatami ricuchirca. ‘Taitata, mamatapash na cazuj’ gentecuna tianga nishca jipallami “na pashi nijcuna” tianga nirca. Shina gentecunaca alita rurajpipash na agradicinllu. Ashtaca gentecunaca ‘Diostapash na manllajcuna’, ‘ninanda fiñarishcamanda ali tucungapaj na munajcunami’ canga. Chashna gentecunaca paipilla pensarimandami shujcunahuan ali tucungapapash na munan. Shinallata, ‘Diostapash nali shimicunahuan rimajcuna’, ‘umachishpa japichij’ gentecuna tianga. Shina gentecunaca Diostapash, shujcunatapash nalicachishpa parlajcunami can. Ashtahuanbash ‘yangata juchachishpa’, shujcunamanda yangata llullashpa parlaj gentecunami tianga nircami. *

11 Cunanbi gentecunaca juyaitaca na charinllu. Shinapash Jehovata sirvijcunaca tucui shunguhuanmi gentecunata juyashcata ricuchin. Cashna juyaitaca Jehovata sirvijcunaca siempremi ricuchishca. Jesusca nircami, Moisesman cushca leypica pundapica Jehová Diosta juyanata, jipaca shuj gentecunata juyanatami ricuchijun nishpa. Shuj gentecunata juyanatami agápe nishpa rijsin (Mat. 22:37-39). Shinallata Jesusca nircami, juyarishpa causanajujta ricushpami, ñucapaj yachajujcuna cashcataca tucuicuna rijsinajunga nishpa (Juan 13:34, 35, liingui). Jehovata sirvijcunaca contracuna llaquichijpipashmi paicunata juyashcata ricuchin (Mat. 5:43, 44).

12. Tucuicunata juyashcataca ¿imashinata Jesusca ricuchirca?

12 Jesusca gentecunata ninanda juyashcatami ricuchirca. Jesusca Diospa Reinomandami shuj shuj llactacunaman villachingapaj rirca. Shinallata ñausacunata, na puri ushajcunata, lepra ungüihuan cajcunata, sordocunata jambirca. Huañushcacunatapash causachirca (Luc. 7:22). Gentecuna Jesusta na ricunayachijpipash Jesusca tucuicunamandami huañurca. Shina rurashpaca paipa taita imashina juyajtami ricuchirca. Cunan punllacunapica testigo de Jehovacunami Jesuspa chaquita catishpa shujcunata juyashcata ricuchinajun.

13. Gentecunata juyaihuan tratajpica ¿imatashi gentecunaca ruranga?

13 Gentecunata juyaihuan tratajpica shuj gentecunapashmi Jehová Diosta rijsingapaj munanga. Por ejemplo, Tailandia llactapi shuj jarica Quimsa Punlla Tandanajuimanmi rirca. Chaipica huauquipanicuna tucui shunguhuan juyajta ricushpami manllarishca quedarca. Huasiman chayashpaca semanapi ishcai viajeta Bibliamanda yachachihuai nishpami mañarca. Paica paipa familiacunamanmi villachirca. Cutin 6 quillacuna jipaca Tandanajui Huasipimi primera vez Bibliata liina asignacionda charirca. Shinaca shujcunata ciertopacha juyaita charishcata yachangapaca cashna tapuripashunchi: “¿Ñuca familiata, huauquipanicunata, villachinapi shujcunata ayudangapachu esforzarijuni? ¿Jehová ricuj shinachu ñucapash shujcunata ricujuni?” nishpa.

ATUJCUNA, LLAMAGUCUNA

14, 15. a) Bibliapica ¿imashina gentecunata tianatata nirca? b) Gentecunaca ¿ima cambiocunatata rurai ushashca?

14 Tucurimui punllacunapica nali cualidadcunata charij gentecunami tiana carca. Chaimi paicunamanda cuidarinami capanchi.  Por ejemplo, Taita Diosta na rijsimandami ‘ima alitapash na ricunayachijcuna tiana’ carca. Shuj traducciongunaca ricuchinmi, “ali ruraicunata na ricunayachij” gentecuna tianata. Huaquingunacarin ima munashcata rurajcuna, llaquitapash na llaquijcunami cana carca. Shinallata na shuyashpa imatapash ñapash rurangapaj munaj gentecunami tiana carca. Shina gentecunaca culirashpa, na ali pensarishpa yangata imatapash nijcunami can.

15 Cunan punllapica shuj juyailla profeciami pactarijun. Chai profeciapica nishcarcami, ashtaca gentecuna animal cuenda culirajcunaca ali cualidadcunatami charinga nishpa (Isaías 11:6, 7, liingui). Cai profeciapica ricuchinmi, atuj animalpash, leonbash llamahuan, shicuhuanmi tandanajushpa purinajunga. ¿Cashna causaica ciertocha canga? Ari. Mundo enteropimi casilla ali causai tianga. Bibliapica ninmi, “imashnami mama cuchaca yacu jundashca tiajun, chashnallatami tucui cai pachaca, Mandaj Diosta rijsina yuyaihuan junda canga” nishpa (Is. 11:9). Animalgucunaca Jehová Diostaca na rijsi ushanllu. Shinaca ¿imashinata cai profeciaca pactarin? Gentecuna ali cualidadcunata charinatami ricuchijun.

Bibliapa consejocunaca gentecunapa causaita cambianmi. (Párrafo 16​ta ricupangui)

16. Bibliaca ¿imashinata gentecunapa causaita cambiai ushashca?

16 Ashtaca gentecunaca atuj animal cuendami shuj gentecunahuan ninanda culirashca causashca. Shinapash cunanga tranquilo, alimi causan. Huaquin experienciacunatami Internetpi jw.org paginapi, “Bibliami gentecunapa causaita cambiashca” nishca partepi ricui ushapangui. Gentecunaca ‘ñavi ricuipi Diosta juyanshnalla cashpapash, Diospa ushaitaca na charircachu’. Shinapash Jehovata rijsimandami chai gentecunaca cambiashca.  Diosta juyanshnalla causaj gentecunaca Diosta sirvinchi nishpapash paicunapa causaihuanga shujtami ricuchin. Cutin Jehovata sirvijcunaca chai gentecunamandaca diferentemi can. Huaquin huauquipanicunaca animal cuenda culirajlla cajcunaca caitami rurashca. “Mushuj causaitaca mushujta churajunshna causaichi. Taita Dios munashcashna imatapash cashcatapacha ruraj cachun, paipajlla causashpa, na llullaj cachun agllashcashna causaichi” nishcatami cazushca (Efes. 4:23, 24). Gentecunaca Jehová Diosta rijsishpami paipa mandashcacunata yachajushpa cazungapaj munashca. Shina yachajunami imapi crishcata, pensashcata, ruraicunapipash cambiachun ayudashca. Cambiocunata ruranaca na facil canllu. Jehová Diospa munaita tucui shunguhuan pactachingapaj munaj gentecunataca Jehová Diosmi paipa espiritu santohuan cambiachun ayudashca.

Jehovapa munaita tucui shunguhuan pactachingapaj munajcunataca Jehovami paipa espiritu santohuan cambiachun ayudanga

“CHASHNACUNAMANDACA ANCHURINGUI”

17. Gentecunapa nali cualidadcunamanda cuidaringapaca ¿imatata rurana capanchi?

17 Jehovata na sirvij gentecunahuan, Jehovata sirvijcunahuanga diferentemi can. Jehovata na sirvijcunapa nali cualidadcunata ama charingapami cuidarina capanchi. 2 Timoteo 3:2-5​pica ninmi, “chashnacunamandaca anchuringui” nishpa. Chai consejotami cazungapaj munapanchi. Shinapash chai gentecunahuanga huaquinbica trabajana, escuelapi igual estudiana tucunchi. Huaquinbicarin shina familiahuan causanchi. Paicunashna ama pensangapaj, paicunashna ama portaringapami cuidarina capanchi. Caita pactachingapaca ¿imata ayudanga? Jehová Dioshuan ali amigo canami ayudanga. Chaipaca Bibliata liingapaj, Jehovata ali sirvijcunahuan amigocuna cangapami esforzarina capanchi.

18. Ñucanchi causaihuan, parlocunahuanga ¿imashinata shujcunata ayudaita ushapanchi?

18 Gentecunaman Jehová Diosmanda yachachingapaj esforzaripashunchi. Shinallata maipipash villachipashunchi. Gentecunaman imata ninata ayudahuai nishpa Jehovata mañapashunchi. Uchallami testigo de Jehovami cani nishpa villana capanchi. Chashnami ñucanchillata jatunyanapa randica, ñucanchi causaihuan Jehová Diosta jatunyachishun. Ñucanchicunamanga ‘cai pacha nali munaicunata ruranata paita na manllashpa causanatapash cungachunmi yachachin. Chaita yachajushpa, cai causaipi aliguta yarishpa, imatapash cashcatapacha rurashpa, Diosta yariajlla causachunmi yachachin’ (Tito 2:11-14). Jehová Diospa ejemplota catinajujta ricushpa, paipa mandashcacunata cazunajujta ricushpami huaquingunaca cashna ninga: “Ñucanchipashmi, cangunahuan ringapaj munapanchi. Taita Diosca, cangunahuan cajtami yachapanchi” nishpa (Zac. 8:23).

^ par. 10 Diábolos griego shimica “llullashpa juchachij” nisha ninmi. Bibliapica Satanás o Diablotami llullashpa juchachij nishpa churan. Diablomi Taita Diosta llullashpa juchachij can.