Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista (tandanajuipi yachajungapaj)  |  Enero de 2016

 CALLARI TEMA | TUCUIPI HONRADO CASHUNCHI

Na honrado canaca tucuicunatami llaquichin

Na honrado canaca tucuicunatami llaquichin

Sudáfrica llactamanda Samantha shuti huarmica ninmi: “Huaquinbi ashata llullanaca ninandami ayudan” nishpa.

¿Quiquinbash shinallatachu pensapangui? Tucuicunallatami huaquinbica yashcanchi, ama pingai tucungapaca ashata llullanami ayudanga nishpa. Shinapash, imapipash na honrado cashpaca, ñucanchicuna imashinapacha cashcatami ricuchijunchi. Shujcunapa ñaupajpi ali ricuringapalla munajushpaca, nali ruraicunataca ali ruraicunatashnami ricushun. Shinapash, llullashcata gentecuna yachaj chayajpica jatun llaquicunapimi urmashun. Huaquin yuyaicunata ricupashun.

LLULLAJPICA ÑANA CONFIARINLLU

Confianza tiajpica seguro, alimi sintirinchi. Shinapash, pihuanbash confianzata charingapaca humilde cana, ciertota parlana, tiempota llujchinami minishtirin. Confianzata charishpapash imapipash llullajpi o imapash nalita rurajpica chai confianzaca ñapashmi tucurin. Cutin confianzata charinaca shinllimi can.

¿Pipash quiquinda llullashcachu? Shina cajpica, ninanda llaquirishpachari nali sintiringui. Tucuicunallatami shina sintirishcanchi. Imashinami ricupashcanchi, na tucuipi honrado cajpica pipash na ñucanchipica confiangachu.

SHUJ UNGÜI CUENDAMI CAN

California llactamanda universidadpi, Economiata yachachij profesor Robert Innesca shuj investigaciondami rurarca. Chai investigacionbica llullana o imatapash pacalla ruranaca, shujcunaman ñapash yalij ungüi cuenda cashcatami cuenta japirca. Imatapash llullashpa parlajcunahuan tandanajushpaca ñucanchicunapashmi llullanata yachajushun.

Chai nali ruraipi ñucanchipash ama urmangapaca ¿imata ayudanga? Bibliami ayudanga. Huaquin yuyaicunata ricupashun.