Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista (tandanajuipi yachajungapaj)  |  Diciembre de 2017

Taitamamacuna huahuacuna ali yachaita charichun, salvarichun ayudapaichi

Taitamamacuna huahuacuna ali yachaita charichun, salvarichun ayudapaichi

‘Diospa jucha illaj Shimicunataca huahuamandapachami yachajushcangui. Chaicunami quishpichingapaj, canda alipacha yachajta rurangapaj ushaita charin’ (2 TIM. 3:15).

CÁNTICO 141, 134

1, 2. ¿Imamandata huaquin taitamamacunaca paicunapa huahuacuna bautizaringapaj munajpica pinarin?

CADA huatami ashtaca Bibliamanda yachajujcunaca Jehová Diosman mingarishpa bautizarin. Paicunapuramandaca ashtaca jovengunami testigo taitamamacunahuan viñashca. Shinami chai jovengunaca ashtahuan ali causaita agllashca (Sal. 1:1-3). Testigo taitamamacunaca tucui shunguhuanmi paicunapa huahuacuna bautizarichun munan (3 Juan 4​ta ricupangui).

2 Shinapash taitamamacunaca paicunapa huahuacuna bautizarichun munashpapash ashata pinarinmi. Taitamamacunaca, huaquin jovenguna bautizarishca jipalla Diospa mandashcacunapi ñana seguro sintirijtami ricushca. Huaquin jovengunacarin Taita Diosmandapashmi caruyashca. Chaimandami ashtaca taitamamacunaca paicunapa huahuacuna Diospa Shimita alicachij cashpapash bautizarishca jipaca asha asha caruyanatami manllan. Apostolcunapa punllacunapi Éfeso llactamanda huauquipanicunami shina tucurca. Chaimi Jesusca paicunataca cashna nirca: “Cambaj punda juyaitaca saquishcanguimi” nishpa (Apoc. 2:4). Shinallata taitamamacunaca paicunapa  huahuacunahuan ama chashna pasachunga ¿imatata rurai ushan? Huahuacuna ‘quishpirichunga’ taitamamacunaca ¿imatata rurana can? (1 Ped. 2:2). Chaipaca Timoteopa causaimanda yachajupashunchi.

‘DIOSPA JUCHA ILLAJ SHIMITACA YACHAJUSHCANGUIMI’

3. a) Timoteoca ¿ima horata Jesusta catij tucurca? b) Diospa Shimita yachajushpaca Timoteoca ¿imatashi rurarca? c) Apóstol Pabloca ¿ima quimsa cosascunatata Timoteomanga nirca?

3 Apóstol Pabloca huata 47​pimi Listra llactata visitangapaj rirca. Chaipimi Timoteoca Jesuspa yachachishcacunata uyashpa Jesusta catij tucushcanga. Chai tiempopica Timoteoca chairalla viñajmi cashcanga. Shina cashpapash paica tucui yachajushcacunatami paipa causaipi pactachirca. Ishcai huatacuna jipaca shuj shuj llactacunapi congregaciongunata visitangapami Timoteoca Pablota cumbashpa rirca. 16 huatacuna jipaca Pabloca Timoteomanga cashnami escribirca: “Can crishpa yachajushcataca, aliguta catijunguilla. Canga maijan yachachishcatapash, ali yachashpami chashna catijungui. Dios escribichishca jucha illaj Shimicunataca [Escrituras Hebreastaca], huahuamandapachami yachajushcangui. Chai shimicunami, Cristo Jesusta crishcamanda quishpichingapaj, canda alipacha yachajta rurangapaj ushaita charin” nishpa (2 Tim. 3:14, 15). Chai textomanda quimsa yuyaicunata ricupashunchi: 1) ‘Diospa jucha illaj Shimicunatami yachajushcangui’, 2) ‘yachachishcata ali yachashpami chashna catina cangui’, 3) “Chai shimicunami, Cristo Jesusta crishcamanda quishpichingapaj, canda alipacha yachajta rurangapaj ushaita charin”.

4. Quiquingunapa huahuacuna uchilla cajpipash Bibliamanda yachachichunga ¿imata ayudashca? (Callari fotota ricupangui).

4 Testigo de Jehová taitamamacunaca paipa huahuacunapash ‘Diospa jucha illaj Shimicunata’ yachajuchunmi munan. Escrituras Hebreas y Escrituras Griegas Cristianas nishcacunapashmi cunanbica Diospa jucha illaj Shimi can. Uchilla huahuacuna cashpapashmi Bibliamandaca yachajui ushan. Jehovapa organizacionga taitamamacuna paicunapa huahuacunaman Bibliamanda yachachi ushachunmi ashtaca shimicunapi librocunata, folletocunata, videocunatapash llujchishca. ¿Ima publicaciongunatallata quiquinga rijsipangui? Yaripashunchi, Diospa Shimita ali yachashpallami Jehovahuan ali amigo caita ushapanchi.

‘YACHACHISHCATACA ALI YACHASHPA CATINGUI’

5. a) ‘Yachachishcata ali yachashpa catichun’ nishpaca ¿imatata ningapaj munan? b) Jesús Mesías cashcataca ¿imamandata Timoteoca seguro carca?

5 Taitamamacunaca huahuacunamanga Bibliamanda parlaitallaca na parlanachu can. Timoteopi pensaripashunchi, paitaca ‘yachachishcata ali yachashpa catichunmi’ ayudarca. Griego shimipi ‘yachachishcata ali yachashpa catina’ nishpaca “imapash cierto cashcata tucui shunguhuan crinata o seguro sintirinatami” shina nin. Timoteoca huahuamandapachami Diospa Shimitaca rijsin carca. Pai ña viñarishpaca Jesús Mesías cashcata tucui shunguhuan crishpami seguro sintirirca. Chaimi Timoteoca bautizarishpa caru llactacunapi villachingapaj apóstol Pablota cumbashpa rirca.

6. Bibliapi yachachishcata ali yachashpa catichunga ¿imashinata taitamamacunaca paicunapa huahuacunata ayudaita ushan?

6 Taitamamacunaca ¿imashinata paicunapa huahuacunapash Timoteoshna Bibliapi ‘yachachishcata ali yachashpa catichun’ ayudaita ushan? Chaipaca pacienciatami taitamamacunaca charina can. Taitamamacuna imatapash crishcata ricushpallaca na huahuacunapash shinallata cringachu. Chaimandami Bibliapica nin, imatapash tucui shunguhuan crishpa seguro  sintiringapaca huahuacunallatami ‘ali yuyaicunata charishpa aliguta yachajushca’ cana can nishpa (Hebreos 5:14, liingui). Huahuacuna imapash tapuicunata rurajpica paicunallata tucui shunguhuan crishpa seguro sintirichunmi taitamamacunaca ayudana can. Shuj ejemplota ricupashunchi.

7, 8. a) ¿Imashinata shuj huauquica pacienciata charishcata ricuchirca? b) Quiquinba huahuacunahuanga ¿imacunapillata na ñapash culirashpa parlapashcangui?

7 Thomas shuti huauquica 11 huatata charij ushigutami charin. Thomas huauquica ninmi, ñuca ushica huaquinbica cashnami tapuhuan: “¿Jehová Diosca Evolucionhuanllu tucui cosascunata rurashcanga?”. “Cai llactapi ali causai tiachunga ¿nachu politicapi chapurishpa pimandapash votana canchi?” nishpa. Shina tapujpica, Thomas huauquica paipa crishcacunata ninapa randica, paipa ushillata cuenda japichunmi saquin. Thomas huauquica alimi yachan yapata parlanapa randica, ashalla shimicunahuan paicunallata cuenda japichun ayudana ashtahuan ali cashcata.

8 Jehovata sirvijcunaca tucuicunallatami pacienciata charishcata ricuchina capanchi. Thomas huauquica alimi yachan, paipa ushita Bibliamanda yachachingapaca pacienciata charina minishtirishcata (Col. 3:12). Shinallata huahuacunahuan parlana, paicunahuan yalinapash minishtirishcapacha cashcata. Ashtahuanbash chai huauquica paipa ushillata Bibliapi yachachishcacunata tucui shunguhuan crishpa seguro sintirichunmi ali ali intindichin. Thomas huauquica ninmi: “Ñucapash, ñuca huarmigupash Bibliapa importante temacunamanda yachachijushpaca ñucanchi ushigu ali intindijujta, chai yachachishcacunata crijta o na crijtapash ricungapami esforzarinchi. Imatapash tapujpica na culiranchichu. Nimata na tapushpa uyaitalla uyajpimi ashata pinarinman. Huahuacuna tapuicunata rurajpica alimi can” nishpa.

9. ¿Imashinata taitamamacunaca Bibliamanda huahuacunaman yachachi ushan?

9 Taitamamacuna pacienciahuan yachachijpica huahuacunallatami Diospi feta charina ‘anchuman, jahuaman, uraiman, maicamanbash’ cashcata asha asha intindishpa catinga (Efes. 3:18, MTQI). Huahuacuna mashna huatacunata charijta ricushpami paicuna yachajui ushanatalla yachachina can. Shinami, Bibliapa yachachishcacunata tucui shunguhuan crishpa seguro sintirishpaca, escuelapi paipa cumbacunapa o shuj gentecunapa ñaupapipash paicunapa crishcacunata difindinga (1 Ped. 3:15). ¿Huañushca jipa ima tucujta quiquinba huahuacunaca Bibliahuan ali intindichita ushanllu? ¿Bibliapa yachachishcacunataca tucui shunguhuanllu crin? * Imashinami ricupashcanchi, Bibliamanda huahuacunaman yachachingapaca pacienciata charinaca minishtirishcapachami can. Shinami quiquinbash, quiquinba huahuacunapash ninanda cushijupanguichi (Deut. 6:6, 7).

10. Taitamamacunapaca ¿ima ruranata minishtirishcapacha can?

10 Bibliapa yachachishcacuna cierto cashcata huahuacunapash seguro cachunga, taitamamacunarami ali ruraicunahuan ricuchina can. Quimsa ushigucunata charij Stephanie paniguca ninmi: “Ñuca ushigucuna uchilla cajpillatami cashna tapurishcani, ‘Jehová Dios tiajta, Jehová juyaj, justo cajta tucui shunguhuan ñuca crishcataca ñuca ushicunaman ¿intindichishcanichu? Ñucapash Jehová Diosta juyashcataca ñuca ushicunaca ¿cuenta japinllu?’. Chai tucui  cosascuna cierto cashcata tucui shunguhuan ñuca na crijpica ¿imashinata ñuca ushicunacarin cierto cashcata cringa?” nishpa.

‘QUISHPIRINGAPAJ ALI YACHAITA CHARINA’

11, 12. a) Ali yachaita charinaca ¿imata can? b) Ali yachaita charishcata ricuchingapaca ¿imamandata na ashtaca huatacunata charinalla minishtirin?

11 Imashinami ricupashcanchi Timoteoca 1) Diospa Shimitaca alipachami yachan carca, 2) ima cierto cashcata tucui shunguhuan crishpami seguro sintirirca. Shinapash apóstol Pabloca nircami, ‘chai shimicunami quishpichingapaj, canda alipacha yachajta rurangapaj ushaita charin’ nishpa. Chai shimicunahuanga ¿imatata apóstol Pabloca ningapaj munarca?

12 Volumen 2 Perspicacia libroca Bibliapi ali yachai ima cashcatami ricuchin. Shinaca ali yachaita charinaca ¿imata can? “Imata yachajushcata ali utilizana, ali yuyaihuan problemacunata chimbapurana, imapash problemacunapi na satirishpa caruyana, imapash ali ruraicunata pactachina, pitapash shinallata ali rurachun animanami can. Cutin yangata causaj gentecunaca na shina canllu”. Bibliapica ninmi: “Chairalla viñai huambrapaj shungupica, shinlli shungu canaca huatarishcashnami” can nishpa (Prov. 22:15). Ashtahuanbash ali yachaita charijcunaca espiritualmente shinlli cashcatami ricuchin. Shinapash espiritualmente shinlli cashcata ricuchingapaca ashtaca huatacunata charinallaca na minishtirinllu. Chaipa randica Jehovata tucui shunguhuan juyashpa paipa mandashcacunata pactachishpami espiritualmente shinlli cashcata ricuchina can (Salmo 111:10, liingui).

13. Jovengunaca ¿imashinata ‘quishpiringapaj ali yachaita’ charishcata ricuchina can?

13 Espiritualmente shinlli caj jovengunaca paicunapa munaicuna mishachunga na saquinllu. Shinallata escuelapi o colegiopi cumbacuna nalita rurachun atichijujpipash ‘huaira shamunshna pandata yachachijpipash, na caiman chaiman apai tucungachu’ (Efes. 4:14). Espiritualmente shinlli caj jovengunaca ‘ali yuyaicunata charishpa aliguta yachajushca cashpami alita, nalitapash yachai ushan’ (Heb. 5:14). Jovengunaca taitamamacuna o shuj gentecuna na ricujujpipash ali decisiongunata agllashpami ali yachaita charishcata ricuchin (Filip. 2:12). Salvaringapaca ali yachaita charinaca minishtirishcapachami can (Proverbios 24:14, liingui). Taitamamacunaca paipa huahuacuna ali yachaita charichunga ¿imashinata ayudaita ushan? Huahuacuna Diospa mandashcacunata ali intindijta o na intindijtami ricuna can. Shinallata Diospa mandashcacunata pactachishpa causangapaj esforzarijushcataca huahuacunapa parlopi, ruraicunapimi ricuna can (Rom. 2:21-23).

Taitamamacuna, huahuacunata ayudanaca ¿imamandata minishtirishcapacha can? (Párrafo 14-18 ricupangui)

14, 15. a) Bautizaringapaj munaj jovenga ¿imapita ali ali pensarina can? b) Diospa mandashcacunata cazuna ali cashcata intindichunga ¿imashinata quiquinba huahuataca ayudai ushapangui?

14 Ashtahuanbash taitamamacuna huahuacunaman ima ali cashcata, ima nali cashcata ninallaca na minishtirinllu. Taitamamacunaca huahuacunallata ima ali cashcata, ima nali cashcata pensarichunmi cashna tapuchina capanguichi. “Ñucanchipa munaicuna alishnalla cajpipash ¿imashpata Bibliaca chaicunamanda caruyachun mandan? Bibliapi mandashcacunata cazushpa canballata ali cashcataca ¿imamandata cringui?” nishpa (Is. 48:17, 18).

15 Huahuacuna bautizaringapami munani nijpica taitamamacunaca bautizarina shuj importante decisión cashcata ali intindichunmi ayudana can. Huahuacuna nara bautizarishpallata cai yuyaicunapi ali ali pensarichunmi taitamamacunaca ricuna can. Bautizarina shuj jatun responsabilidad cajta, imashina beneficiarinata, ima jarcaicunata charinata, chai jarcaicunata  mishana imamanda paicunapallata ali cashcata (Mar. 10:29, 30). Taitamamacunaca huahuacuna Diospa mandashcacunata cazuna imamanda ali cashcata, na cazushpa ima llaquicunata charinata pensarichunmi ayudana can. Shina rurajpica huahuacuna Diospa mandashcacunata cazuna siempre ali cashcatami tucui shunguhuan crishpa seguro sintiringa (Deut. 30:19, 20).

ÑA BAUTIZARISHCA JOVEN PAIPA CRISHCACUNAPI ÑANA CRIJPI

16. Bautizarishca jipa huahuacuna paicunapa crishcacunapi ñana seguro cajpica ¿imatata taitamamacunaca rurana can?

16 Bautizarishca jipa huahuacuna paicunapa crishcacunapi ñana seguro cajpica ¿imashinata taitamamacunaca ayudaita ushan? Por ejemplo, chairalla viñaj jovengunaca mundopa cosascunatachari alicachishpa ricui callarinman. Shinallata Diospa mandashcacunata cazunaca ciertopachachu ñucata ayudahuan nishpami pensai callarin (Sal. 73:1-3, 12, 13). Taitamamacunaca paicunapa huahuacunapa ruraicunapi, parlaicunapimi Jehovata sirvingapaj munashcata o na munashcatapash ricui ushan. Shinapash chaira viñaj joven cajpi o uchilla huahua cajpipash taitamamacunaca paicunahuan na ñapash culiraringapami esforzarina can. Chaipa randica huahuacunaca quiquinguna juyashcata, paicunamanda preocuparishpa ayudangapaj munashcatami cuenta japina can.

17, 18. Jovenguna paipa crishcacunapi na seguro cajpica ¿imatata taitamamacunaca rurana can?

 17 Bautizarishca jovenga Jehová Diosmanmi cashna nishca, candallami juyasha, ima pasajpipash canba munaitarami pundapi churasha nishpa (Marcos 12:30, liingui). Chai nishcacunaca Jehovapaca valishcapachami can. Chaimandami ña bautizarishcacunaca chai shimicunataca pactachinapacha can (Ecl. 5:4, 5). Taitamamacunaca paicunapa huahuacunaman Jehovaman mingarishcata juyaihuan yarichingapami shuj tiempoguta llujchina can. Taitamamacunaca huahuacunahuan nara parlashpallatami Jehovapa organización llujchishca ayudacunata ali ali liishpa yachajuna can. Shina rurashpami taitamamacunaca ña bautizarishca testigo de Jehová cana shuj jatun responsabilidad cashcata, ima bendiciongunatalla charishcatapash huahuacunaman ali intindichi ushanga.

18 Taitamamacunaca cai ayudacunatapashmi charin. Por ejemplo, volumen 1 Los jóvenes preguntan nishca libropa “Los padres preguntan” nishca partepimi ashtahuan ali yuyaicunata tari ushan. Chai partepica ninmi: “Taitamamacunaca na ñapash pensarinachu can, ñucanchi huahuacunaca religionmandaca nimata na yachangapaj munanllu nishpa. Casi tucui jovengunami chai edadpica paicunallata na intindiri ushan”. Paicunaca escuelapi o colegiopi cumbacuna nalicunata rurachun atichijujpi, pailla sintirimanda, congregacionbi shuj jovenguna espiritualmente ashtahuan ali cajta ricushpami shina sintirin. Chai libropica caitapashmi nin: “Shina yuyaicunata charishpapash jovengunaca paipa crishcacunapica segurorami sintirin. Huaquinbica imapash cambiocuna tiajpimi paipa crishcacunata pactachinaca shinlli ricurin”. Ashtahuanbash Diospa Shimi cierto cashcata huahuacuna na seguro cajpi, imata ruranatapashmi chai partepica yachachin.

19. Huahuacuna quishpiringapaj ali yachaita charichunga taitamamacunaca ¿imashinata ayudaita ushan?

19 Taitamamacunaca huahuacunata ‘shinlli tacurishpa aliguta yarichishpa, Jehová Dios munashcashna viñachina’ responsabilidadtami charin. Huahuacunata viñachinaca shuj jatun privilegiomi can (Efes. 6:4). Imashinami ricupashcanchi huahuacunamanga Bibliamanda yachachitallaca na yachachinachu can. Huahuacunallata ima cierto cashcata tucui shunguhuan crishpa seguro sintirichunmi ayudana can. Huahuacuna quishpiringapaj ali yachaita charichunga Bibliapa, Diospa espíritu santopa, taitamamacunapa ayudatapashmi minishtin. Shina rurajpimi huahuacunaca Jehovaman mingarishpa bautizarishpa, tucui shunguhuan Jehovata sirvingapaj munanga.

^ par. 9 Internetpi guías de estudio “¿Qué enseña realmente la Biblia?” nishca parteca ashtaca idiomacunapimi tian. Shinallata jovengunapash, mayorcunapashmi Diospa Shimimanda ali intindishpa shujcunaman yachachi ushachun ayudan. Internetpi jw.org paginapi yaicushpa ENSEÑANZAS BÍBLICAS > JÓVENES nishca partepi ricupangui.