“Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” (1 PEDRO 5:7).

CÁNTICO 23, 38

1, 2. a) ¿Imamandata ashtaca llaquicunata charipanchi? (Callari dibujota ricupangui). b) ¿Ima chuscu yuyaicunatata yachajupashun?

CUNAN punllacunapica, Diabloca “león huacashpa, pitapash micungapaj mascajunshnami muyuriajun” (1 Pedro 5:8; Apocalipsis 12:17). Chaimandami cai mundopica ashtaca llaquicuna tian. Jehovata sirvijcunapashmi llaquicunata charin. Punda tiempocunapipashmi Jehovata sirvijcunaca llaquicunata charirca. Ishcai ejemplocunata ricupashun. Bibliapica ninmi, huaquinbica rey Davidca ninanda llaquirishpami musparin carca nishpa (Salmo 13:2). Apóstol Pablopash congregacionbi huauquipanicunamandami ‘punllandi ninanda llaquirirca’ (2 Corintios 11:28). Shinaca ñucanchicunapash ninanda llaquirishpa musparijushpaca ¿imatata rurai ushanchi?

2 Punda tiempocunapica, jahua pachapi causaj ñucanchi Taita Jehová Diosca paita sirvijcuna ama ninanda llaquirishpa musparinajuchunmi ayudan carca. Cunanbipash ayudangapami munan. Bibliapica ninmi: “Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” nishpa (1 Pedro 5:7). Shinaca ¿imashinata quiquinba llaquicunataca Jehová Diospa  maquipi saquita ushapangui? Chuscu yuyaicunata ricupashun: 1) Jehová Diostami mañana capangui. 2) Diospa Shimi Bibliata liishpami imata liishcapi aliguta pensarina capangui. 3) Jehová Diospa espíritu santo ayudachunmi saquina capangui. 4) Confianzata charishca huauquiman o panimanmi imashina sintirishcata parlana capangui. Chai chuscu yuyaicunata yachajujushpaca imapi mejorana cashcatapash pensaripangui.

‘LLASHA QUIPISHNA LLAQUITACA MANDAJ DIOSMAN SAQUILLA’

3. ‘Llasha quipishna llaquicunataca’ ¿imashinata Jehová Diosman saquita ushapangui?

3 Ninanda llaquirishpa musparijushpaca Jehovatami tucui shunguhuan mañana canchi. Jahua pachapi causajuj ñucanchi Taita Jehová Diosca ñucanchi shungu ucupi tucui imata pensarijushcata, imashina sintirijushcata paiman parlachunmi munan. Rey Davidca cashna nishpami Jehová Diostaca tucui shunguhuan mañarca: “Taita Dioslla, ñuca mañajujta uyahuayari” nishpa. Ashtahuangarin nircami: ‘Llasha quipishna llaquitaca, Mandaj Diosman saquilla. Paica ayudangallami’ nishpa (Salmo 55:​1, 22). Problemacunata arreglangapaj esforzarishca jipaca, ñana imatapash rurai ushapanguichu. Problemapilla ashtahuan pensarinapa randica Jehová Diosman tucuita parlashpa oracionda ruranami quiquindaca ashtahuan ayudanga. Shinapash oracionda ruranaca ¿imashinata ayudan? Oracionda ruranaca ¿imashinata ama ninanda llaquirishpa musparijuchun ayudan? (Salmo 94:​18, 19).

4. Ninanda llaquirishpa musparijushpaca ¿imamandata Jehovata mañanaca ali can?

4 (Filipenses 4:​6, 7, liingui). Tucui shunguhuan cutin cutin mañajpica ¿imashinata Jehová Diosca ñucanchi oraciongunata contestan? Paica ñucanchicuna tranquilo sintirichun, maitapash pensarishpa ama llaquirijuchunmi ayudan. Ama ninanda llaquirishpa musparijuchun, ama manllarijuchunmi Jehová Diosca shungu ucupi ama yapata preocuparishpa tranquilo sintirichun ayudan. Ashtaca huauquipanicunami shungu ucupi tranquilo sintirin. Quiquinbashmi shinallata sintiri ushapangui. ‘Casilla ali causaita Taita Dios carajpimi’ quiquinga ima llaquitapash mishashpa shungu ucupi tranquilo sintirita ushapangui. Jehová Diospa cai shimicunataca siempremi yarina capangui: “Na shaijunachu canguichi, ñucami cangunaman ushaita cuj Taita Dios cani. [Alita] ruraj, ñuca ali lado maquihuanmi, cangunapaj tucui causaipi ayudajushalla” (Isaías 41:10).

BIBLIACA SHUNGU UCUPI TRANQUILO SINTIRICHUNMI AYUDAN

5. ¿Imashinata Diospa Shimica shungu ucupi tranquilo sintirichun ayudan?

5 Shinallata, shungu ucupi tranquilo sintiringapaca Bibliata liishpa, imata liishcapimi aliguta pensarina canchi. Shinapash ¿imamandata chaita ruranaca minishtirishca can? Bibliaca Taita Dios escribichishca Shimimi can. Chaimandami Bibliapica ali yachaihuan escribishca consejocuna, ali causachun ayudaj consejocuna tian. Ninanda llaquirishpa musparijushpaca Jehová Diospa shimicunapi aliguta pensarishpami ricuna canchi paipa consejocuna ñucanchi shinlli tucuchun imashina ayudajta. Chaita ruranami llaquicunata mishachun, llaquicunamanda ama yapata llaquirichun o llaquilla yuyaicunata ama charichunbash  ayudan. Jehová Diosca ninmi, paipa Shimipi escribishca yuyaicunata liinami ‘na manllashpa, na shaijushpa causachun’ ayudan nishpa (Josué 1:​7-9).

Shinlli feta charishpaca ñucanchi ayudachun minishtijuj horaspipacha Jehová Dios ayudanataca seguromi cashun

6. ¿Imashinata Jesuspa shimicunaca quiquindapash ayudaita ushan?

6 Bibliapimi ñucanchicunaca gentecunahuan Jesús imashina parlashcata lii ushanchi. Jesusca gentecunata llaquishpa, cushichishpami parlan carca. Chaimandami ashtaca gentecuna, ashtahuanbachaca shaijushcashna, aparishcashna llaquilla causanajuj gentecunaca alicachishpa Jesustaca uyan carca (Mateo 11:​28-​30, liingui). Jesusca ashtacatami shujcunapi preocuparin carca (Marcos 6:​30-​32). Imashinami Jesusca paihuan igual purinajuj apostolcunata ayudasha nirca, shinallatami ñucanchicunatapash ayudanga. Jesús na cai Alpapi cashpapash cunanbipashmi Jesuspa shimicunaca ashtacata ayudai ushan. Jesusca jahua pachapi Rey caimandami ñucanchita juyashcata ricuchingapaj munan. Shinaca, ninanda llaquirishpa musparijushpaca Jesús quiquinda ayudanata, ayudachun minishtijuj horaspipacha ayudanataca seguromi cana capangui. Jesús cushichishpa shinlliyachishpa ayudashcamandami ima llaquitapash mishai ushanchi (Hebreos 2:​17, 18; 4:​16).

DIOSPA ESPÍRITU SANTOCA ¿IMASHINATA AYUDAN?

7. Diospa espíritu santoca ¿imashinata ayudan?

7 Jesusca nircami, jahua pachapi cangunapa Taitata espíritu santota carahuai nishpa mañajpica carangallami nishpa (Lucas 11:​10-​13). Shinaca ¿imashinata Diospa espíritu santopash ama ninanda llaquirishpa musparijuchun ñucanchita ayudan? Diospa espíritu santomi ñucanchitaca Jehová Dios charishca cualidadcunata ñucanchipash charichun ayudan (Colosenses 3:​10). Bibliapica chai cualidadcunamanda parlashpami nin, ‘Diospa espirituca granotashnami fucuchin’ nishpa (Gálatas 5:​22, 23, liingui). Chai cualidadcunata charingapaj esforzarinami shujcunahuan ali llevarichun, ama yapata llaquirishpa musparijuchun ayudan. Shinaca ‘Diospa espíritu granota fucuchinshna’ ñucanchi causaipi imashina ayudajta ricupashun.

8-12. ¿Imashinata Diospa espirituca granota fucuchinshna quiquinda ayudaita ushan?

8 “Juyashpa causana, cushijushpa causana, casilla aliguta causana”. Shujcunata respetohuan tratanaca ama yapata llaquirijuchunmi ayudan. Shinapash ¿imashinata ayudan? Huauquipanicunata llaquishpa, juyashpa, respetohuan tratashpaca na jipacunamanga imamandata shina nircani o shina tratarcani nishpaca na arripintirijupanguichu, llaquirijupanguichu o culirarijupanguichu. Shinami shujcunahuan tranquilo ali sintirita ushapangui (Romanos 12:10).

Ali cualidadcunata charingapaj esforzarinami shujcunahuan ali llevarichun ayudan

9 ‘Na ñapash fiñarishpa causana, llaquishpa causana, imagutapash carashpa causana’. Bibliapica ninmi: ‘Tucuicunahuan aliguta causashpa, caishuj chaishuj llaquirishpa, caishujmanda chaishujmanda perdonarinami canguichi’ nishpa (Efesios 4:​32). Chai shimicunata pactachishpaca shujcunahuan tranquilo, ali llevarishpami na yapata llaquirinajushun. Shinallata, chai shimicunata pactachishpami juchayucuna caimanda imapash problemacunata shujcunahuan charishpaca ashtahuan jahualla arreglashpa na yapata llaquirinajushun.

10 “Aliguta crishpa causana”. Cunan punllacunapica culquimanda o imapash cosascunamandami ninanda llaquirishpa musparinchi (Proverbios 18:11). Shinaca chaicunamanda ama ninanda llaquirishpa musparijungapaca ¿imatata rurana  canchi? Apóstol Pablopa cai consejotami catina canchi: “Cunan imaguta charishpapash, chaihuanlla cushijushpa causanguichi” nishpa. Ñucanchi imata minishtijujta ricushpa Jehová llaquishpa caranataca tucui shunguhuanmi crina canchi. Jehová Diosca nircami: “Candaca na jichushachu, na saquishachu” nishpa. Chaita tucui shunguhuan crishpami ñucanchipash apóstol Pabloshna cashna nina capanchi: “Ñucata ayudajca, Jatun Diosmi. Shina cashcamandaca, gentecuna imata ruranatapash, na manllashachu” nishpa (Hebreos 13:​5, 6).

11 “Na jariyashpa causana, nali munaicunata mishashpa causana”. Chai cualidadcunaca ¿imashinata ayudan? Na jariyashpa causana, nali munaicunata mishashpa causanami ñucanchitaca imacunatapash yangata rurashpa o imacunatapash nishpa ama yapata llaquirijuchun ayudan. Ashtahuangarin chai cualidadcunami ama ‘fiñarishcalla cachun’ ama ‘caparishpa rimajuchun, ima llaquipash japishpachari ali canman’ ama nijuchun ayudan (Efesios 4:​31).

12 ‘Ima llaqui japijpipash’ chai llaquitaca ‘ninan ushaita charij Taita Diospa maquipimi’ saquina canchi. Chaita rurangapaca humilde canami minishtirin (1 Pedro 5:​6, 7). Humilde cajpica Jehová Diosca quiquinda cuidanga, ayudangami. Imata rurai ushashcata, imata na rurai ushashcata cuenta japishpaca, quiquinbilla confianapa randica Jehová Diospi confiashpami na yapata llaquirijupangui (Miqueas 6:8).

“NA MUSPARIJUNACHU CANGUICHI”

13. ¿Imamandata Jesusca nirca “na musparijunachu canguichi” nishpa?

13 Mateo 6:​34pica Jesusca “na musparijunachu canguichi” nishpami consejarca (chai textota liipangui). Chai consejota ñucanchi causaipi pactachinaca huaquinbica shinllimi can. Shinapash ¿imamandata Jesusca shina nirca? Imashinami ña yachajurcanchi, rey Davidpash apóstol Pablopash huaquinbica ninanda llaquirishpami musparirca. Shinapash Taita Diosta sirvijcunaca ¿nunca na llaquirishpa musparinachu can nishpachu Jesusca shina nirca? Na. Yapata llaquirishpa musparimandallaca na problemacunata arreglai ushanchichu. Chaita intindichunmi Jesusca Mateo 6:34​pi shimicunataca nirca. Cada punllami imapash preocupaciongunata charinchi. Chaimandami punda cosascunamanda o jipaman pasana cosascunamandaca na yapata llaquirishpa musparijuna canchi. Shinaca ¿imashinata Jesuspa shimicunaca ama yapata llaquirishpa musparijuchun ayudan?

14. ¿Imashinata rey Davidpa ejemplota catishpa na yapata llaquirishun?

14 Huaquin gentecunaca punda pandarishca cosascunamandami yapata llaquirin. Punda rurashcacunatami huaquinbica tauca huatacuna jipapash cutin yarishpa nali sintirinajun. Rey Davidpash paipa pandarishcacunata yarishpami ninanda llaquirishpa musparirca. Chaimandami  paica nirca: “Ñuca shungu nanaihuanmari aij nijuni” nishpa (Salmo 38:​3, 4, 8, 18). Chashna sintirijushpami rey Davidca Jehová Dios llaquishpa perdonanataca tucui shunguhuan crirca. Jehová Dios paita perdonashcata yachashpami Davidca cushilla sintirirca (Salmo 32:​1-3, 5, liingui).

15. a) ¿Imatata rey Davidmandaca ashtahuan yachajuita ushapanchi? b) Ama yapata llaquirijungapaca ¿imatata rurana capangui? ( “Ninanda llaquirishpa musparijujpica ¿imata ayudanga?” nishca recuadrota ricupangui).

15 Huaquinbica cunan ratopi charishca problemacunamandami yapata preocuparishpa llaquirinchi. Shuj ejemplota ricupashun. Salmo 55​ta escribijushpaca huañuchi tucunatami rey Davidca manllajurca (Salmo 55:​2-5). Yapata llaquirishpa mushparijushpapash Jehová Diospi confianataca na saquircachu. Llaquipi cashpaca Jehovatami ayudahuai nishpa tucui shunguhuan mañarca. Mañashpapash paipa problemacunata arreglangapaj paipash esforzarina cashcatami rey Davidca ali yacharca (2 Samuel 15:​30-​34). Shinaca ¿imatata rey Davidmandaca yachajuita ushapangui? Ninanda llaquirishpalla musparijunapa randica quiquin charishca problemata arreglangapami esforzarina capangui. Jehová Dios quiquinda ayudanatapash seguromi cana capangui.

16. Diospa shuti ima nisha nishcata intindinaca ¿imashinata ama yapata llaquirichun ayudan?

16 Huaquinbica nara pasashca cosascunapi pensarishpami ninanda llaquirishpa musparinchi. Shinapash, nara pasashca cosascunamandaca na preocuparijunachu canchi. ¿Imamandata na preocuparina canchi? Huaquinbica ñucanchi pensashca cosascunaca ñucanchi pensashcashnapachaca na pasanllu. Shinallata, Jehová Diosca tucui horasmi ñucanchicunataca ricuriajun. Ashtahuanbash, Jehová Diospa shutica ‘ima tucuna cashpapash tucunalla cashcatami’ intindichin (Éxodo 3:​14, NM). Shinaca Jehová Diospa shuti ima cashcata yarishpami, Jehovapa tucui nishcacuna pactarinata crishpa na yapata llaquirina canchi. Jehová Dios paipa sirvijcunata bendicianatapash, punda pasashca cosascunapi, cunan ratopi o jipaman ima pasanapi pensarishpa ama yapata llaquirichun Jehová ayudanataca tucui shunguhuanmi confiana canchi.

CONFIANZATA CHARISHCA HUAUQUIHUAN O PANIHUAN PARLAPAI

17, 18. Ñucanchi imashina sintirijushcata tucuita parlanaca ¿imashinata ayudan?

17 Ñucanchicuna confianzata charishca huauquihuan o panihuan ñucanchi imashina sintirijushcata tucuita parlanami ama ninanda llaquirishpa musparijuchun ayudan. Shinaca cusahuan o huarmihuan, shuj ali amigohuan o shuj ancianohuan parlanami ñucanchi imamanda shina sintirijushcata intindichun ayudai ushan. Bibliapica ninmi: “Runapaj shungupi llaquilla canami, ñavita urai cumuchin. Ashtahuangarin alita rimashca shimicunaca, cushichinllami” nishpa (Prover bios 12:25). Shinallata Bibliapica ninbashmi: “Ali yuyaita pipash na cujpica, yuyaicunaca llaquimi tucun. Ashtahuangarin ali yuyaita taucacuna cujpimi, shinllipacha tucun” nishpa (Proverbios 15:22).

18 Ñucanchi tandanajuicunapashmi ama ninanda llaquirishpa musparijuchun ayudan. Cada semana ñucanchi huauquipanicunahuan tandanajuicunapi cajpimi paicunaca ñucanchita ayudaita, animaitapash ushanga (Hebreos 10:​24, 25). ‘Shujmanda shujmanda yarichirishpa’ animarishpaca ashtahuan shinlli tucushpa ama yapata llaquirijuchunmi ayudanga (Romanos 1:​12).

JEHOVÁ DIOSMAN ASHTAHUAN QUIMIRINGAPAMI NINANDA ESFORZARINA CANCHI

19. Jehová Diosman quimirinaca ¿imashinata ayudan?

19 Canadá llactamanda shuj anciano huauquica tucuita Jehová Diospa maquipi saquina ali cashcatami intindirca. Chai huauquica profesormi carca. Shinallata ungushcami carca. Chaimandami paica ninanda llaquirishpa musparijurca. Shinaca ¿imata chai huauquitaca ayudarca? Ashtahuanbachaca Jehová Diosman quimiringapami paica ninanda esforzarirca. Shinallata ali amigocunami imapash llaqui ricurijpica ayudan carca. Paipa huarmimanbash imashina sintirishcataca tucuitami parlan carca. Ancianocunapash, superintendente de circuito huauquipashmi llaquicuna ricurijpi Jehová Dios pensashcashna pensachun paitaca ayudarca. Doctorpa ayudatapashmi mascarca. Ashtahuanbash, paipa trabajopi huaquin cambiocunata rurarca, samangapaj, ejerciciota rurangapapash tiempota llujchirca. Shinami chai huauquica ama ninanda llaquirishpa musparijungapaj imata rurana cashcata asha asha yachajurca. Cunanbi imapash problema ricurijpi na arreglai ushashpaca Jehová Dios ayudanata confiashpami causan.

20. ¿Imashinata ñucanchi llaquicunata Jehovapa maquipi saquita ushapanchi? b) Cati temapica ¿imatata yachajupashun?

20 Cai temapica, ninanda llaquirishpa musparijushpaca llaquicunata Jehová Diospa maquipi saquina cashcatami yachajushcanchi. Chaipaca Jehová Diostami mañana canchi, Bibliata liishpami liishcapi pensarina canchi. Shinallata, Jehová Diospa espíritu santo ayudachunmi saquina canchi, ñucanchi confiashca huauquihuan o panihuanmi parlana canchi. Ashtahuangarin tandanajuicunamanmi rina canchi. Cati temapica, paita mascashpa causajcunata Jehová Dios bendicianatami ricupashun (Hebreos 11:6).