Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista  |  Núm. 6, 2017

 CALLARI TEMA | ¿IMATA CARAJPITA ASHTAHUAN CUSHIJUSHCANCHI?

Ali regalota carangapaca ¿imatata rurana canchi?

Ali regalota carangapaca ¿imatata rurana canchi?

Carangapaj shuj ali regalota tarinaca na facilchu can. Ima regalo cajpipash alicachishpa chasquijpimi ali regalo can. Huaquingunaca alicachishpami shuj regalotaca chasquin. Cutin shujcunaca na yapata alicachinllu.

Huaquin ejemplocunata ricupashun. Jovengunaca imapash mushuj aparatota carajpimi, caica alipacha regalomi can nishpa cushijun. Cutin mayorlla gentecunaca imapash punda tiempo cosascunata carajpimi cushijun. Huaquin llactacunapicarin, jovenguna cashpa, mayorllacuna cashpapash paicuna imata munashcata randingapami culquita carachun munan.

Shina cajpipash, ashtaca gentecunaca pitapash ninanda yarishpami paicunaman shuj ali regalota carangapaj munan. Imashinami ricupanchi, shuj ali regalota caranaca na facilchu can. Shinaca ñucanchi carashca regalota cushijushpa chasquichunga ¿imatata rurai ushapanchi? Chuscu yuyaicunata ricupashun.

¿Imatata munajun? Belfast-Irlanda del Norte nishca llactamanda shuj runaguca ninmi, ñucaca carrera bicicletata charingapami ninanda munarcani. 10, 11 huatacunata charijpica, carrera bicicletata carajpica ninandapachami cushijurcani nishpa. Imashinami ricupanchi, imata munajushcata carashpami alipacha regalota caranajunchi. Shinaca, pimanbash imatapash carangapaj munajushpaca pensaripai, paica ¿imatata alicachishpa ricun? nishpa. Gentecunaca munaimandami alichishpa ricunajun. Mayorllagucunapipash pensaripashun. Abuelocunaca familiahuan canatami ninanda alicachin. Huahuacunata, nietocunata seguido ricungapami munan. Imatapash carajpi cushijunapa randica, huahuacuna, nietocuna jacu purishun nijpimi, abuelocunaca ninanda cushijun.

Shujcuna imata munanajushcata yachangapaca, alimi uyajuna capanchi. Bibliapica ninmi: “Tucuicunallatami aliguta uyajcuna, aliguta yarishpara rimajcuna”  cana canguichi nishpa (Santiago 1:19). Shinaca, imata munajushcata yachangapaca, amigocunahuan, familiacunahuan parlajujpimi imata alichishpa parlajujta ali uyana capanchi. Shinami, paicuna imata munajushcata carai ushashun.

¿Imatata minishtijun? Imata minishtijujta carajpica, uchilla cosasgu cajpipash, cushijushpami chasquin. Shinaca, shujcuna imata minishtijujta yachangapaca ¿imatata rurai ushapanchi?

Paicunatallatami tapuita ushapanchi ¿imatata minishtijupangui? nishpa. Shinapash ashtacacunaca na yashcapi caranatami gushtan. Shinallata, huaquingunaca imata alicachishcata, imata nalicachishcata parlashpapash, imata minishtijushcata parlanataca na gushtanllu.

Chaimandami aliguta ricuna capangui. ¿Jovenlla, mayorlla, soltero, cazado, divorciado, viudochu can? Na cashpaca ¿trabajajunllu o jubiladochu can? Chai jipami, paicuna imata minishtijujta ricushpa imagutapash carai ushanchi.

Imata ciertopacha minishtijujta yachangapaca, paishnalla causaita charij gentecunahuanmi parlaita ushapanchi. Shinami paicunaca, imata carana cashcata yuyachinga. Chaimi ñucanchicunapash imata ciertopacha minishtijujta ricushpa, shujcuna na carashca regalota carashun.

¿Ima horata carana canchi? Bibliapica ninmi: “Ali shimicunata parlachun munashca horaspi parlashpacarin alipachamari” can nishpa (Proverbios 15:23). Shinaca, ima hora parlana cashcata ali ricushpa ali shimigucunata parlajpica, uyajcunaca cushijunmi. Shinallata, ima ratocunapi shuj regaloguta carana ali cashcata ricushpa carajpica, gentecunaca cushijushpami chasquin.

Huaquingunaca shuj amigo cazarajpi, graduarigrijujpi, shuj huahuaguta charigrinajujpi o imapash punlla chayajpimi imagutapash caranata gushtan. Huaquingunacarin, huata enteropi ima fecha o ima punlla chayanata ricushpami, shuj libretagupi anotashpa charin. Shinami piman, imata caranataca, tiempohuan aliguta pensarishpa caran. *

Regalocunataca ima punllapash caranallami capanchi. Imapash punlla chayamuchunga na shuyanachu capanchi. Shinapash cuidadota charinami capanchi. Pensaripashun. Imapash punlla na chayashca cajpita shuj jari shuj regalota shuj huarmiguman carajpica ¿imatashi chai huarmiguca pensanman? ¿Nachu paita munashpami carajun yanman? Shinapash chai huarmiguta na munashpata carajujpica ¿nachu pandarishpa llaquicunara tianman? Imashinami ricupanchi, shuj regalota carangapaj munajushpaca pensarinami capanchi ¿imamandata carajuni? nishpa.

¿Imamandata caranchi? Imashinami ñaupa parrafopi ricuparcanchi, imatapash carashpaca, ama pandata intindichunmi cuidadota charina capanchi. Ñucanchipash ¿imamandata carajunchi? nishpami pensarina capanchi. Ashtaca gentecunaca, carana munaihuanmi caranajunchi yanmi. Shinapash, tauca gentecunaca fiesta punllacuna chayajpi carana cashcamandallami caran. Cutin shuj gentecunaca, randi imatapash carachun o ali tratachun munashpallami imatapash caraj tucun.

Ciertopacha carana munaihuan carangapaca ¿imatata rurana capanchi? Bibliapica ninmi: “Imata rurashpapash, ninan juyaihuanmi rurana canguichi” nishpa (1 Corintios 16:14). Juyaimanda carajpica, gentecunaca ninanda cushijushpami chasquinga. Quiquinbash na mitsashpa carashpaca, cushillami sintiripangui. Juyaimanda carashpaca, jahua pachapi causajuj ñucanchi Taita Diostami cushichinajunchi. Corinto llactamanda huauquipanicunaca Judea llactamanda huauquipanicunata ayudangapami cushijushpa, na mitsashpa cararca. Chaimandami apóstol Pabloca, “Taita Diosca, cushijushpa  carajtami juyan” nishpa, paicunamanga shuj cartaguta felicitashpa escribirca (2 Corintios 9:7).

Cai temapi yachajushca chuscu yuyaicunata yaipi charishpa regalocunata carajpica, cushijushpami gentecunaca chasquinga. Caipi yachajushca yuyaicunatapash, shuj yuyaicunatapash yaipi charishpami, Taita Diospash gentecunamanga shuj alipacha regalota cararca. Shinaca ¿imatata Taita Diosca cararca? Chaitaca, shamuj temapimi yachajupashun.

^ par. 13 Ashtaca gentecunaca cumpleaños punllacunapi o shuj fiesta punllacunapimi regalocunata caranata yachan. Shinapash huaquin fiestacunapica Bibliapi na yachachishca cosascunatami ruran. Cai revistapillata, “Gentecunaca tapunmi” nishca partepi “Jesusta catijcunaca ¿Navidadta yarinachu can?” nishca tematapash ricupangui.