CAUSAIMANDA, huañuimandaca gentecunaca shuj shuj yuyaicunatami charin. Ashtaca gentecunaca ninmi, huañushca jipaca shuj pushtupimi causashpa catinchi nishpa. Shujcunaca crinmi, huañushca jipa shuj cuerpopi nacirishpami causashpa catinchi nishpa. Cutin shujcunaca ninmi, huañushpaca chaipimi tucui tucurin nishpa.

Shinapash quiquin maipi causashpapash, imashina viñashca cashpapash huañushca jipa ima tucunamandaca shuj yuyaitami charingui. Huañushca jipa ima tucunamanda shuj shuj yuyaicuna tiajpipash, huañushca jipa ¿ima tucujtaca yachai usharinllu?

Ashtaca ashtaca huatacunatami, religiongunata ñaupaman pushajcunaca na huañuj almatami charinchi nishpa yachachishca. Ashtahuan jatun religiongunamandaca Jesusta catinchi nijcuna, hinduismo, judaísmo, islam nishcacunapashmi ñucanchi cuerpo huañujpipash almaca, espiritucuna causaj pushtumanmi rin nishpa yachachin. Cutin budista nishcacunaca, huañushpaca shuj shuj cuerpopi cutin cutin nacirishpami ñana sufrishpa cushilla causaita callarin nishpami crin.

Chashna yachachishcacunata uyashpami casi tucui gentecuna huañushca jipaca, shuj pushtupi causangapami yalinchi nishpa crin. Chaimandami ashtaca gentecunaca huañuica Taita Diospa munaimi can nin. Shinapash Bibliaca ¿imatata yachachin? Cati temata liichunmi animapanchi. Biblia imata yachachijta liishpaca ninandami cushijupangui.