Agllashca temata ricungapaj

Ir al menú secundario

Temacunata ricungapaj

Testigo de Jehovacuna

quichua (imbabura)

Villajun revista (tandanajuipi yachajungapaj)  |  Septiembre de 2016

¿Jehová Dios munashcashna ropatachu churajunchi?

¿Jehová Dios munashcashna ropatachu churajunchi?

‘Imata rurashpapash, Taita Diosca punchapambagumi cangui ni tucuchun [alicachi tucuchunmi], tucuita rurana canguichi’ (1 CORINTIOS 10:31).

CÁNTICO 34, 29

1, 2. ¿Imamandata testigo de Jehovacunaca ñucanchi churajuna ropapi ashtacata preocuparinchi? (callari fotota ricunpangui).

HOLANDA llactamanda shuj periodicopica nircami, tauca religiongunapi yachachijcunaca calormandami yangata vistirishpa paicunapa tandanajuimanga rirca nishpa. Cutin testigo de Jehovacunamanda parlashpaca nircami, paicunaca shuj jatun tandanajuiman rishpaca jari huahuacunapash, jatungunapash corbatahuan ternohuan churajurca nishpa. Huarmi huahuacunapash, huarmicunapash cunanbi llujshishca faldacunata churajushpapash na alto faldacunata churajushcachu carca nishpa. Testigo de Jehovacunataca aliguta mudarishpa vistirishcamandami gentecunaca tauca viaje felicitan. Apóstol Pabloca nircami, Jesusta catijcunaca Taita Dios munashcashnami ‘na munanaita, na pinganaita churajuna’ can nishpa (1 Timoteo 2:9, 10). Chai consejoca huarmicunapapash jaricunapapashmi can.

2 Jehová Diosca gentecuna ima ropata churajujtaca ricujunmi. Chaimandami Jehovata sirvijcunaca ñucanchi churajushca ropamandaca ashtacata preocuparinchi (Génesis 3:21). Jehová Diosmi cai tucuilla Alpamanda ashtahuan jatun mandaj Taita Dios can. Chaimandami, Bibliapica gentecuna imashina vistirichun munashcata villachijun. Shinaca churajuna ropata agllajushpaca ñucanchi alicachishca ropatalla  agllanapa randica, Jehová Dios alicachishca ropatami pundapica agllana canchi.

3. Moisesman Cushca Leypica ¿imatata vistirinamandaca yachajupanchi?

3 Moisespa punllacunapica pinganaita causaj gentecunami ladolla llactacunapica tiarca. Chai gentecunahuan israelitacuna ama chapurichunmi Jehová Diosca ashtaca leycunata curca. Chai leycunapica Jehová Diosca nijurcami, jaricuna huarmicunashna churajushpa, huarmicunapash jaricunashna churajushpaca nalitami ruranajun, chaita ruranaca millanaimi can nishpa (Deuteronomio 22:5, liingui). Imashinami Moisesman Cushca Leypi yachajushcanchi, Jehová Diosca huarmicunapa ropata jaricuna churajushpa huarmicunashna ricurijuchun, o huarmicunapash jaricunapa ropata churajushpa jaricunashna ricurijuchun, o jari cajta huarmi cajta na yacharij ropacunata churajuchunga na munanllu.

4. Ima ropa ali cashcata o na ali cashcata ricushpa aliguta agllachunga ¿imata ayudanga?

4 Bibliapi consejocunami ñucanchitaca vistiringapaj ima ropa ali cashcata o na ali cashcata ricushpa aliguta agllachun ayudan. Chai consejocunami maijan llactapi causajpipash, chai llactapi ima costumbrecuna tiajpipash, cunuj o chiri llacta cajpipash ñucanchi churajuna ropata aliguta agllachun ayudan. Bibliapi consejocunata catishpaca cai ropatami churajuna cangui o cai ropataca na churajunachu cangui nishpa ashtaca cosascunata pipash nichunga na minishtishunllu. Shinaca ñucanchi churajushca ropahuanbash ‘Taita Diospa munaita, paita cushichinata, ima pandatapash na rurashpa causangapaj’ munajushcata ricuchingapaca Bibliapi huaquin consejocunata ricupashun (Romanos 12:1, 2).

‘TAITA DIOSPAJTA RURAJCUNAMI’ CANCHI

5, 6. Ñucanchi churajushca ropata ricushpaca ¿imashinata shuj gentecunaca sintirina can?

5 Jehová Diosmi apóstol Pablotaca 2 Corintios 6:4pi shimicunata escribichirca (chai textota liingui). Gentecunaca ñucanchi churajushca ropata ricushpami ñucanchita alicachishpa o nalicachishpa ricun (1 Samuel 16:7). Jehovata sirvijcuna cashcamandaca ñucanchi alicachishca ropatalla o ñucanchi yuyaipi ali ricurishca ropatallaca na churajunachu canchi. Bibliapi consejocunaca ajustado ajustado ropacunata, transparente o pinganai ropacunata ama churajuchunmi ayudanga. Huaquingunaca ñucanchi churajushca ropata ricushpami pingai tucun o pingaimandaca shuj ladoman ricun. Shujcunara ñucanchimanda pingai tucunajuchunga na munanchichu.

6 Na pinganai ropacunata churajushpa, limpio, aliguta mudarishpa purijpica huaquin gentecunaca ñucanchi organizaciondapash, testigo de Jehovacunatapash alicachishpami ricunga. Huaquingunacarin, Jehová Diosmanda yachangapaj munashpami ali villaicunata uyangapaj munanga.

7, 8. Ashtahuanbachaca ¿ima horata aligutapacha vistirina capanchi?

7 Ñucanchi jucha illaj Jehová Diostapash, shuj huauquipanicunatapash, shuj gentecunatapash respetaimandaca limpio, aligutami vistirina canchi. Shinami shuj gentecunaca Jehovatapash, ali villaicunatapash alicachinga (Romanos 13:8-10). Ashtahuanbachaca tandanajuicunaman rishpa, villachingapaj llujshishpami Jehová Diosta sirvijcunashna aliguta vistirishpa rina canchi (1 Timoteo 2:10). Huaquin ropacunaca shuj llactacunapica alimi ricurin, cutin shuj llactacunapica nali ricurinllu. Chaimandami testigo de Jehovacunaca maijan llactapi causashpapash ñucanchi churajushca ropata ricushpa shujcuna nalicachishpa parlanajuchunga na munanchi.

Ñucanchi churajushca ropata ricushpaca ¿shujcunapash Jehovata respetangachu? (Párrafo 7, 8ta ricupangui).

8 (1 Corintios 10:31, liingui). Jatun tandanajuicunaman rishpaca na pinganai ropacunata churajushpa, aliguta vistirishpami rina canchi. Jehovata na rijsij gentecunapa nali modata catishpaca na vistirinachu canchi. Shinallata, jatun tandanajui nara callarijpi o jipapash na cashpaca hotelman chayashpa o ña rijushpapash na yangata, maipash cachun vistirinachu canchi. Tucui  horas aliguta vistirishca cashpami na pingai tucushpa nishun, ñucaca testigo de Jehovami cani nishpa. Shinallata ima horas villachingapapash listomi cashun.

9, 10. ¿Imashinata Filipenses 2:4ca aliguta vistirichun ayudan?

9 (Filipenses 2:4, liingui). ¿Imamandata shuj huauquipanicuna ñucanchi churajushca ropata ricushpa imashina sintirinataca yaipi charina canchi? Jehovata sirvijcunaca ‘huainayana, Diospa ñaupajpi mapayana, nalita rurana munaicunata’ mishangapami esforzarinajun (Colosenses 3:2, 5). Huaquin huauquipanicunacarin pundacuna Jehovata nara rijsimandami huainayana juchacunata rurashpa causarca. Chaimandachari paicunaca chai juchacunapi ama cutin urmangapaj esforzarinajun. Ñucanchicuna na cuidadota charishpa yangata vistirijta ricushpaca Bibliapi consejocunata pactachina, punda nali munaita saquinaca shinllimi paicunapaca canga (1 Corintios 6:9-11). Maijanbash huauquita o panita shina llaquichijushpaca ¿alichu canman?

10 Jehovata na rijsij gentecunaca shuj huarmihuan o shuj jarihuan juchapi urmanataca yaipimi charin. Shinapash ñucanchi huauquipanicunahuan cashpaca tranquilomi caita ushanchi. Chaimandami ñucanchicunaca Tandanajui  Huasicunapi cashpa o maipi cashpapash aliguta vistirishpa ñucanchi huauquipanicuna tranquilo sintirichun ayudangapaj munanchi. Ñucanchi gushtashca ropata agllashpa churajunalla cashpapash, shuj huauquipanicuna Jehová Dios munashcashna pensarichun, parlachun, rurachun ayudana responsabilidadtami charinchi (1 Pedro 1:15, 16). Ñucanchi huauquipanicunata ciertopacha juyashpaca ‘na imatapash pinganaita rurashunllu’ ñucanchipa ali canatallapash na mascashunllu (1 Corintios 13:4, 5).

MAIPI CASHCATA, IMATA RURANATA RICUSHPAMI ALIGUTA CHURAJUNA CAN

11, 12. Eclesiastés 3:1, 17pi shimicunaca ¿imashinata aliguta pensarishpa vistirichun ayudan?

11 Ima ropata churajunata agllagrijushpaca Bibliapi cai consejotami Jehovata sirvijcunaca catinchi: ‘Imata rurangapapash chai horasmi chayamun’ nishpa (Eclesiastés 3:1, 17). Shinaca, Jehovata sirvijcunaca chiri o cunuj llacta cajta ricushpa, tamia punllacuna, Indi o polvo punllacuna cajta ricushpami vistirinchi. Ima ropata agllashpapash Jehovapa consejocuna na cambiajtaca yaipimi charina canchi (Malaquías 3:6).

12 Cunuj llactacunapica na pinganai ropata agllashpa aliguta vistirinaca ashata shinllimi can. Chaimandami chai llactapi huauquipanicunaca ajustado ropacunata o flojolla cashpapash transparente ropacunata na churajujpica alicachishpa ricun (Job 31:1). Playaman, piscinaman rishpapash pinganai traje de bañocunataca na churajunachu canchi (Proverbios 11:2, 20). Jehovata na rijsij gentecunaca uchilla uchilla traje de bañocunatami churajun. Shinapash ñucanchicunaca jucha illaj Jehová Diosta alicachingapaj munashpami imata churajunataca aliguta pensarishpa agllanchi.

13. Ima ropata churajunata agllajushpaca ¿imamandata 1 Corintios 10:32, 33pi shimicunata yarina capanchi?

13 Churajuna ropata agllajushpaca shujcunapa concienciatapash ama llaquichingapami 1 Corintios 10:32, 33pi consejotapash yarina canchi (chai textota liingui). Ñucanchi churajushca ropahuan huauquipanicunata o shuj gentecunata nali sintichingapaca na munanachu canchi. Apóstol Pabloca escribircami: ‘Cumba runagupash ali crishpa cushijuchunmi tucuicuna paicunamanbash aliguta rurana canchi’ nishpa. Ashtahuangarin nircami: ‘Cristopash na pailla cushijushpami causajurca’ nishpa (Romanos 15:2, 3). Jesuspaca paipa munaicunata pundapi churanapa randica, Jehová Diospa munaita pundapi churana, shuj gentecunata ayudanami ashtahuan importante carca. Ñucanchicunapash Jesuspa ejemplotami catina canchi. Chaimandami ñucanchi gushtashca ropata churajuimanda gentecuna ali villaicunata na uyangapaj munana cajpica chai ropataca na churajuna canchi.

14. ¿Imashinata taitamamacunaca Jehová Dios alicachishcashna vistirichun huahuacunataca ayudana can?

14 Jesusta catij taitamamacunaca Bibliapi consejocunata huahuacunaman yachachina responsabilidadtami charin. Yachachina responsabilidadta charishcamandami paicunapa huahuacunataca Jehová Dios alicachishcashna vistirichun, arreglarichun ayudana can (Proverbios 22:6; 27:11). Shinapash ¿imashinata taitamacunaca Jehová Diosta juyanata, paipa mandashcacunata respetanata yachachina can? Pundapica taitamamacunami shuj ali ejemplota cuna can. Shinallata ropata imashina mascanata, maipi randinatami huahuacunamanga yachachina can. Ashtahuangarin, paicuna alicachishca ropata randigrijushpapash, Jehová Diosta sirvijcuna cashcamandaca Jehová alicachishca ropata agllanatami juyaihuan yachachina can.

ALIGUTA YUYASHPAMI ÑUCANCHI CHURAJUNA ROPATACA AGLLANA CANCHI

15. Ali decisiongunata agllachunga ¿imata ayudan?

15 Bibliapi ali consejocunami Jehová Dios alicachishca decisiongunata agllachun ayudan. Shinapash ñucanchi churajushca ropami ñucanchi imata alicachishcata ricuchin. Tucuicunallatami  shuj shuj ropata alicachinchi, shuj shuj ropata randinchi. Shuj shuj cashpapash ropaca siempremi limpio, na pinganai, na liqui cana can. Maijan llactapi causashpapash alimi ricuna can.

16. ¿Imamandata ñucanchi munaicunata huashaman saquishpa aliguta vistirina capanchi?

16 Ashtaca almacengunapica mushuj moda llujshishca ropacunatallami jatun. Chaimandami, na pinganai ropata randinaca shinlli can. Na pinganai ricurij camizacunata, faldacunata o na yapa ajustado pantalongunata mascangapaca ashtahuan tiempomi minishtirin. Shina cajpipash esforzarishpa catinami canchi. ¿Imamandata esforzarishpa catina canchi? Ishcai yuyaicunata ricupashun. 1) Ñucanchi huauquipanicunaca ricunajunmi. Ñucanchi aliguta vistirijpica alicachishpami ricunga. 2) Aliguta vistirishpami Jehovata jatunyachinajunchi. Ñucanchi munaicunata huashaman saquishpa aliguta vistirishpaca Jehovata cushichina jatun cushijuitami charishun.

17. Barbasta viñachingapaj munajushpaca ¿imapita huauquicunaca pensarina can?

17 Huauquicunapaca barbasta charinaca ¿alichu can? Moisesman Cushca Leypica, jaricunaca barbasta charinami can nishpami mandarca. Shinapash Jesusta catijcunaca Moisesman Cushca Leyta pactachina obligaciondaca ñana charinchichu (Levítico 19:27; 21:5; Gálatas 3:24, 25). Huaquin llactacunapica barbasta aliguta rutushpa charijpica alicachishpa, respetohuanmi jaricunataca ricun. Shinallata, barbasta charij huauquicuna villachingapaj rijpipash gentecunaca uyanllami. Chaimandami chai llacta congregaciongunapi responsabilidadcunata charij huaquin huauquicunaca barbasta charin. Chai llactacunamanda huaquin huauquicuna barbasta charijpipash shuj huauquicunaca barbasta viñachingapaca na munanllu (1 Corintios 8:9, 13; 10:32). Shinapash shuj llactacunapica barbasta na charina costumbremi tian. Chaimandami chai llactacunapi testigo de Jehovacunaca barbasta na viñachin. Shuj huauqui barbasta viñachishpaca Jehovata na respetashcatami ricuchin. Shinallata pipash na ‘juchachijpi’ causajushcataca na ricuchi ushanmanllu (1 Timoteo 3:2, 7; Romanos 15:1-3).

18, 19. ¿Imashinata Miqueas 6:8pi shimicunaca ayudan?

18 Jehová Diosca cashnami vistirina, arreglarina canguichi o cashnaca na vistirina, arreglarinachu canguichi nishpaca na ashtaca cosascunata mandashcachu. Chaipa randica, ñucanchillata ima ropata churajunata agllachun munashpami Bibliapi huaquin consejocunata cushca. Shinaca imashina vistirinata, arreglarinata agllajushpaca Miqueas 6:8pi nishca shinami Jehovapa ñaupajpi na jariyashca cashcata ricuchina canchi.

19 Na jariyashca cashpaca Jehová Dioslla jucha illaj cashcata na cungashpami paipa mandashcacuna alipacha cashcata yarina canchi. Na jariyashca, humilde cashpaca Jehovapa mandashcacunata cazushpami causashun. Ashtahuangarin, na jariyashca cashpami shujcunapa yuyaicunata respetashun, shujcuna imashina sintirishcatapash yaipi charishun.

20. Ñucanchi churajushca ropahuan, arreglarishcahuanga ¿imashinata shujcunata ayudashun?

20 Ñucanchi churajushca ropahuanmi Jehovata sirvijcuna cashcata ricuchina canchi. Jehovapa mandashcacunaca alipachami can. Chaimandami ñucanchica cushijushpa cazunchi. Ñucanchi huauquicuna, panicuna aliguta vistirishpa, aliguta portarishcamandaca ashtacatami felicitangapaj munanchi. Shina vistirishpa, portarishpami paicunaca gentecunata Bibliamanda yachajungapaj munachun ayudashpa Jehová Diosta jatunyachishpa cushichinajun. Ali decisiongunata agllashpa aliguta vistirishpami jahua pachapi ‘punchapamba juyaillagupacha’ tiajuj Jehová Diosta jatunyachishpa catinajushun (Salmo 104:1, 2).